سلام 2011

 نهاية السنة بتكون زي بدايتها عشان كده مهم اننا نركز فى البدايات عشان هي اللى هتوصلنا للنهاية اللى عاوزينها

مع ان في الغالب مافيش نهايات لأن الزمن كأنه دايرة بتلف ورا بعضها عشان كده قيمة الوقت مش فى طوله او قصره الواحد ممكن يعيش عشر سنين مالهمش معني ومايكونش فيهم اى اضافة لحياة الانسان بالعكس بيضيع فيهم احلام وطاقة وعمر بيعدي في الفاضي وممكن حدث واحد في لحظة يغير حياتنا تماما المهم بقى ركزوا في الاحداث اللي ممكن تفرق في حياتكم

وطبعا 2011 كانت زحمة زحمة يعني وكلها احداث مهمة

 بس اهم حدث بالنسبالي فيها كان ف 11-12-2011

تاريخ ميلاد مالك

ذاكرة شرقية

 

 

 فالذكريات شاهد ظالم لا يرأف حين ينفرد بالأرواح الواهنة ، يجنِّد الشوق والحنين والألم والحسرة ضدنا فلا نملك سوى الإستسلام والخضوع بعد حرب نستنفد فيها كل قوانا

.

.

.

ذاكرة شرقية

حدوتة 

على جدار الروح

وما تنسوش تعملوا لايك للصفحة :)

لقاء مدونين فـ المنصورة

واخيرا وكالعادة بعد غياب وبعد رسالة رايحة جاية اكتر من اسبوع بنشوف فيها 

اقتراحات لمكان اللقاء وبرنامج اللقاء ومطعم اللقاء وكافية اللقاء - وده غالبا سبب تأخيرنا فى اللقاءات - مع ان الموضوع في الاخر بيكون سهل وبسيط والمهم انه ممتع جدا اننا نتقابل ونقضي يوم سوا 

ولذا قررنا عمل لقاء اخيرا فى المنصورة يوم الجمعة القادم 30 -9هنبتدي نتجمع الساعة 10.30 صباحا فى كافية هاي لايت قدام بواية الجامعة اللى ع البحر يعنى الناس اللى جاية من برة المنصورة تقول للتاكسي بوابة الجامعة اللى ع البحر 

وبعد الغدا هنروح نادي الكهربا فى طلخا

ولو في وقت بعد كده فـ الغالب هناخد مركب في النيل

واحتمال مش اكيد اننا نروح دار ابن لقمان

للاستفسار والتواصل عشان محدش يقول اننا جيبنا المنصورة توهناه اتصلوا على رقم ندى الياسمين الرقم بيكون مفتوح ايام اللقاءات او من قبلها بيوم او اتنين هذا هو

 0126379796

 اللقاء ده بس عشان نتقابل ونشوف بعض لاننا من زمان مش اتقابلنا

هنا لينك الايفنت ع الفيس بوك

أشوفكم على خير 

----------------

الصورة بعدسة ليساندرا

على جدار الروح

 على جدار الروح ينحت القدر نقوشا لا يمحوها الزمن

 وتزيد كلما زادت التفاصيل فتزدحم جدارن أرواحنا أكثر كلما مرت الأيام 

 إلى أن نتفاجأ بأنه لم يعد لدينا مساحات لنحفر عليها ما أردنا أن نكون وبالرغم من هذا ومن كونها  تتناقض وتختلف عن بعضها البعض إلا أنها في نهاية الأمر تبقى نقوش على جدارن أرواحنا لا يمكننا التنكر لها

-----------------------------

من محاولات للبحث عني حتي على جدار الروح أربع سنوات مرت سريعاً .. سرعة لا نشعر  بها إلا حين تمر بنا الأيام ...

 فشكراً لكل أصدقائي خاصة المدونين منهم

----------------------------------

إنها محاولات آخرى للكتابة على صفحات الفيسبوك
لمتعابعة الصفحة إضغط
 like
 أو اعجبني
على جدار الروح

أمنيات كاذبة

هناك فترات من العمر لا نملك فيها سوى الأحلام الوردية نملأ جعبة خيالاتنا بها  لتصبح رصيدنا للمستقبل وما أن يأتينا المستقبل بأقدار آخرى حتى نعي أن هناك بعض الأمنيات من فرط ما نريدها تتحول ليقين كاذب لايسعنا معه إلا أن نصدقه وننتظر حدوثه وما بين فعلى التمني والانتظار تتراكم الخيبات .. وحينها يلزمنا كثيرا من الاكاذيب لنقنع أنفسنا أنه لم يزل أمامنا الوقت لتحقيق ما فاتنا من أحلام ولكن كم يلزمنا من الخيبات لنصدق أننا لا نجيد سوى الكذب على أنفسنا وأننا أضعنا سنوات فى مطاردة فراشات أحلامنا الملونة حين  توحدنا معاها وهربنا ورائها ظناً مننا أننا قادرين على الامساك بها وكلما اقتربنا اكتشفنا أنها لا تعدو عن كونها سراب واهم

فهل يعاقبنا الله بأحلامنا ؟ يمنحنا القدرة عليها لنتعذب بها حين نفاجأ انها تسير فى طريق موازي للواقع لا تلتقيه أبدا .. فلا أحلام تتحول لحقيقة ولا واقع يأتينا كما حلمنا .. فأيهما عقاب الله  قدرتنا على الحلم أم عجزنا عن تحقيقه؟

إنا لله و إنا إليه راجعون

هند رستم ماتت ... الله يرحمها  .. فتحت الفيس امبارح لاقيت الهوم عندي معظمها عن خبر وفاة هند رستم

يمكن فى اى وقت تاني كنت هشوف الخبر عادي يعنى ... بس النهاردة وف التوقيت ده بالذات اعتقد انه كان اقل من عادي ومش محتاج كل الدوشة دي

فى ناس كتير بتموت بطرق ابشع من كده زي مثلا ان شاب صغير ماكملش الـ 20 يعدي عليه ميكروباص يفرمه فيموت فى ساعتها

اما بقى انك تبقى راكب فى الميكروباص ده قدام جمب السواق فده لوحده موت بشكل تاني

يمكن موت من الخضة

الحادثة حصلت فى اقل من ثواني فعلا والسواق مش غلطان الولد فجاة ظهر من بين العربيات اترمي فجأة قدام العربية ملحقش حتى السواق انه يفاديه او يفرمل بأى شكل حسيت بالعربية وهي بتدوسه كأنه مطب

الميكروباص وقف  والسواق نزل وانا والبنت اللى جمبي انهارنا ماكنتش متخيلة اصلا اللى بيحصل وفضل عندي امل لثواني ان اللى يكون الميكروباص عدى عليه الموتوسيكل اللى الولد كان راكب عليه او اى حاجه غير انه يكون بني ادم

الناس نزلت وناس اتلمت وزعيق ودوشة وكلام عن انه عاش ومات وانا مش مستوعبة مش اول مره اشوف حادثة ع الطريق بس يمكن عشان عشت الموقف فكان مختلف فعلا كنت مرعوبة ومش فاهمه ايه اللى بيحصل لحد ما راجل فتحلنا الباب ونزلنا .. السواق جه عندنا وفضل يستنجد بينا ويحلف ان ماحدش فينا يمشي وانه لو مشينا من غير ما نشهد هيتسجن لان كلنا عارفين انه مالوش ذنب فعلا وما بين السواق المنهار والجثة اللى  اتغطت فى ساعتها ولمة الناس علينا ومحاولة ناس انه يطلعونا انا والبنت اللي كانت جمبي من الموقف لاننا كنا واقفين منهارين وكنا لوحدنا وباقى السيدات اللى معانا كانوا معاهم ازواجهم وولادهم منتهي اللخبطة ناس مصممة اننا نمشي ووقفلنا اكتر من عربية عشان يخدونا ونخلع خالص من المكان وجالنا كمان ميكروباص تانى ركب فيه كل ركاب العربية اللى كنا فيها وجالنا السواق تاني يستنجد بينا وعايزنا نطلع معاه ع القسم نشهد معاه وراجل من اللى كانوا معانا شايف انه كده كده لبس قضية وان مالوش لازمة نروح معاه وخصوصا ان فى حريم وقبل المغرب بساعتين  وانه اللمة دي كلها لازم السواق هيضرب فيها والعربية هتتكسر ولازم نمشي

وانا مش عارفة اعمل ايه مش قادرة امشي عشان السواق وعشان دي شهادة وبرضه متلخبطة لان افرض كانوا صمموا يمشوا كلهم بصيت للبنت اللى معايا وهما عمالين يقولولنا اركبوا ومش فاضل غيرنا وقولتلها والسواق  هى كمان واخده موقفي وردت عليهم معايا ان مش هينفع نمشي فسواق الميكروباص التاني اقترح انه ياخد ارقام تليفونتنا وكلمه من هنا وكلمة من هناك على انهيار السواق اللى كان ناقص يبوس ايدينا ورجلينا عشان محدش يمشى اقتنع الرجالة انهم يطلعوا ع القسم معاه عشان نشهد لان كلنا كنا شايفين انها  مش غلطته الحادثة تقريبا الساعة 5 العصر فضلنا واقفين قدام القسم لحد 6 ونص الرجالة نزلت وبعدها بشوية جالنا ناس طلبوا مننا اننا ننزل نشهد فنزلنا مشينا معاهم في مبني كده شبه الخرابة مالوش معالم اساسا وقدام شوية قابلنا الراجل اللى كان رافض اننا نيجى القسم وفضل يزعق لزوجته انها ازاى تنزل اصلا وتيجى تدخل قسم ورجعها هى وواحده معاها وراح بصلنا وزعق لينا احنا كمان وطلب مننا نرجع وانه ازاى ندخل قسم وف توقيت زى ده وانه شهادتنا مش هتفرق عن شهادة الرجالة اللى نزلت ورجعنا  ركبنا تاني وفضلنا نستناهم لحد ما خلصوا واحنا كنا خلصنا بصراحة لان باقي التفاصيل ماكنتش بعيده عننا لان عشان نروح القسم يدوب عدينا كوبري ووقفنا الناحية التانية من الحادثة قصادنا الاسعاف وهو بيشيل الجثة والنار اللى ولعوها فى الدم والمستشفى جمب القسم اهل الولد جم على هناك الواحد اصلا اعصابه ماكنتش متحمله فكرة الناس اللى راحة جايه عمالة تتفرج علينا كاننا احنا اللي قتلنا الولد واتحركنا اخيرا

وبالرغم طبعا من الخضة ومن كل التفاصيل المأساوية الا انه طبعا الواحد لا ينكر وقفة الناس جمب بعضها وخوف الناس على البنات  ..حركة الشارع ساعة أذان المغرب الناس اللي واقفة ع الطريق بتوزع تمر ومايه وعصاير.. اهل البلد كانو عايزيننا  نفطر عندهم  ..السواق اللى وصلنا صمم انه ياخدنا تحت بيته الاول وشربنا عصير وميه و مرضاش ياخد اجرة رغم انه كانت مسافة ساعة تقريبا ومش الطريق اللى شغال عليه .. وان الراجل اللى كان بيزعق طول الوقت لم الاجرة بزيادة وطلب منه انه يوصلها للسواق اللى عمل الحادثة رغم اننا ماكناش بعدنا عن المنصورة كتير

الموت لما بيكون قريب قوي مننا بيكون ليه رهبة مش عادية والموت المفاجئ بالذات بيبين قد ايه فعلا الحياة مش مستاهلة  .. ربنا يرحم الولد اللي مات ويصبر أهله على فراقه

هو في ايه؟

بداية شكرا لكل اللي علقوا ع البوست اللى فات وكل أصحابي اللي بيسألوا دايما :)

ثانيا كل سنة طبعا و انتم بخير واحرار اول رمضان يعدي عليا ومبارك مش رئيسنا واعتقد انه كده على معظمنا 

ثالثا بقي امممم غايبة انا بقالي كتير  بس اصل الدنيا حر قوي وحاجة خنقة كده .. كتير كان بيكون في دماغي مواضيع اكتب عنها وامور كتير بتحصل واخبار مستفزة بس تقريبا بكسل كمان يمكن الفيس بوك بقى اسهل واسرع في نشر الاخبار والتعليق عليها فالواحد بقى بيطلع غيظه من اللي بيحصل هناك

جايز التدوينة دي تبقى ملخبطة شوية ممممم ممكن اقسمها فقرات مالهاش دعوة بعضها 

1

النهاردة كان في خبر عن وفاة بنت اسمها هدى 17 سنة كانت مصابة برصاص الداخلية ايام الثورة اصيبت وهي بتدافع عن اخوها اللى استشهد وقت الثورة .. ماتت بسبب تسوس عظام القفص الصدري لان الرصاصة مخرجتش من جسمها طول ست شهور !!!!!! سابوها تموت هي تبقى مين يعنى

محمد صبحي كان على قناة التحرير من وقت بيحكي انه كان فى زيارة لفرنسا وزار مصابين الثورة هناك اللى كان حظهم كويس وسفرهم رجال اعمال على نفقتهم الخاصة

وقال ان تونس بعد ثورتها سفرت 1200 مصاب يتعالجوا على نفقة الدولة !!! واحنا عملنا ثورة عشان يفضل دم المصري رخيص

 عملنا ثورة عشان مبارك يفضل يتعالج في شرم الشيخ

عملنا ثورة عشان الثوار يتحاكموا محاكمات عسكرية والمجرمين تتأجل قضاياهم قدام المحاكم المدنية 

الله يكون في عون المجلس العسكري بيتعب فعلا هياخد باله من مين ولا مين كفاية عليه يطبطب ويأجل محاكمات ويبرأ مجرمين بيتعبوا فعلا بجد مش مهم بقى القصاص للشهداء ولا المصابين يتعالجوا وياخدوا تعويضات هيجيبوا فلوس لاهالي الشهدا والمصابين ولا هيدفعوا مرتبات كلاب الداخلية اللى بدل ما يتحاكموا اتنقلوا لأماكن تانية بمرتبات اكبر .. هيحموا مبارك ولا اهالي الشهداء اللى بيتهددوا ؟ لازم يركزوا  التركيز مهم برضه عشان يجيبوا مجموع

وبعدين المجلس العسكري مش فاضي يحاكم المتهمين فى قضايا الفساد وقتل المتظاهرين يا جماعة عندهم شغل اكبر دلوقتي بيطلعوا اشاعات على 6 ابريل ويخونوا المعتصمين ويقسموا الشعب فرق ويلاغوا الاخوان المسلمين اللي بيدوروا على مصلحتهم وبس - ومحدش يدخل يدافع عن الاخوان عشان مش هقتنع  مع احترامي لشباب الاخوان اللي نزلوا بيان وضحوا فيه تضامنهم مع 6 ابريل واعتراضهم على موقف المجلس وطالبوا فيه قيادتهم برد فعل اقوى تجاه اللى حصل- ويظبطوا امورهم مع السلفيين عشان يفصلولهم فتاوي على مزاجهم يكفروا بيها اللي يضايقهم واللي بيخرجوا عن الحاكم واللي بيعتصموا ... ومن هنا بقى قسموا الشعب تيارات اسلامية وكفار وملحدين

زي ما طلعوا علينا ايام الاستفتاء بتاع الانتخابات اولا ولا الدستور اولا .. كفروا اللى بينادي بالدستور اولا- مع ان كان منهم على سبيل المثال دكتور عمرو خالد- ويومها كان بيوزعوا منشورات مستفزة جدا وسطحية جدا مقدرتش اعمل حاجة غير انى قطعتها ورميتها قدامهم من غيظي ومن تافهتهم

 المجلس العسكري بقى خد باله من موضوع الانقسام ده قال بقي نخبط احنا في بعض وهو ياخد راحته ولما يتزنق يقضيها اشاعات

ومحدش يقولى بقى اصله بابا وماما وانور وجدي والبلد هتضيع وعجلة الانتاج 

المجلس العسكري حاجة والجيش حاجة تانية

المجلس العسكري الوقتي شغال سياسة وبيتحكم في مصير البلد واحنا الشعب اللى المفروض يحدد مصيره بنفسه

المجلس العسكري اشخاص بني ادمين يعني مش خط احمر ولا اخضر ولا حتي بمبى مسخسخ يعني مش معصومين من الخطأ مش هنعملهم بعبع ونفضل نبقى نكبر وننفخ فيهم لحد ما نلاقي نفسنا قدامنا 30 سنة كمان عشان نخلص من سطوتهم واستبدادهم

الجيش على عينا وراسنا .. يعنى الجيش المصري بتاعنا والمجلس مش تبعنا ... كان واحد من الهتافات فى مظاهرات المنصورة

وبعدين كان فين الجيش يوم موقعة الجمل وكان فين يوم العباسية كان واقف يتفرج ؟؟؟ ولا كان واقف يحمي البلطجية ؟؟؟ 

وبعدين اللي خايفين على مصلحة البلد وبيهاجموا الثوار والمعتصمين واللي قلبهم على مبارك ومش قادرين على بعده اللي بينزلوا  روكسي اللي شايفين ان الثورة خربت البلد ؟؟؟؟ هما البعدا معندهمش نظر ؟؟؟ معندهمش عقل ؟؟؟ 

يعني ماكنوش واخدين بالهم قبل الثورة من كم الجرائم اللي بترتكب في حق الشعب؟ ولا هما عشان مصلحتهم ماشية اتعموا عن اللي كان حاصل طول السنين اللى فاتت ؟؟؟

طيب بعد الثورة مش واخدين بالهم ان في شهداء اتقتلوا وان اهاليهم قلبهم محروق عليهم وان في شباب زي الفل ضحى بحياته عشان احنا حياتنا تبقى احسن ؟؟؟ ولا هما شايفين انهم ممولين من بره وقبضوا تمن حياتهم قبل ما يموتوا ؟؟؟؟

هما البعدا مش حاسين بالمصابين  وحالتهم عامله ازاى ؟؟؟ والمعاملة اللي اتعاملوها في المستشفيات والاهمال اللي اتسبب في عاهات مستديمة لكتير منهم غير اللى توفوا طبعا ؟؟؟؟

هما البعدا اخرهم قنواتنا المصرية بتاعة الحكومة اللي لسه مخدوش بالهم ان في ثورة حصلت ؟؟؟؟

هما البعدا قلبهم واجعهم على مبارك وما اتحركش لدموع ام شهيد وهي بتحكي على ابنها ؟؟؟؟؟

هما البعدا عندهم دم لامؤاخذة ؟؟؟!!!!!!! ده ايه القرف ده

وهو بقى المجلس العسكري ناوي يقضيها اشاعات كده كتير من غير تحقيقات وادلة ونيابة  ولا الوقتي الاتهامات بقى اخرها بيان على الفيس بوك و كم خبر على كم صورة على التليفزيون المصري ؟؟؟ ولا هو نظام العيار اللي مايصيبش يدوش

اتمنى ان الجمعة الجاية تبقى لم الشمل بجد ما بين كل التيارات والاحزاب ربنا يستر وتعدي على خير

مافيش فقرة 2 بقى انا رغيت كتير مع اني اصلا كنت هكتب بوست تاني خالص مالوش علاقة بأحداث اليومين دول بس الواحد دمه محروق .... تصبحوا على خير

عاش الشهيد مقتول ... لكل شهيد خبز بدمه العيش بحرية 

لـ أمجد القهوجي

...

أكره كثيراً كل ماهو روتيني وما يجب أن افعله بشكل منتظم ..يصيبني الملل من تلك الأفعال اليومية وأفقد حماسي للقيام بها  .. لعلي لهذا لا أنجح في كل ما يحتاج للإستمرارية .. يرهقني فعل المدوامة ولا أستطيع عليه صبراً