Thursday, October 11, 2007

فراق


اكتر إحساس بيوجعلى قلبي بجد
أنى أحب حد قوى وتكون ليه تفاصيل كتير معاه وتفرقنا الايام يكون مجرد ذكرى وانك تقابله الحد ده تانى يكون صعب جدا طيب ليه بتجمعنا الايام وتقربنا قوى كده لما هى هتفرقنا تانى؟
فارقت اصحاب ليه كتير كانوا غالين عندى جدا
اولهم كانت صديقة طفولتى وبنت عمتى كنا دايما مع بعض من قبل حتى ماندخل الحضانه وابتدائى واعدادى كل يومنا كان مع بعض وكل ذكرياتنا حلوها ومرها وزعلنا واحلامنا العبيطة وشقاوتنا وضحكنا ومواقف كتير لما نفتكرها الوقتى سوا بنضحك عليها من قلبنا بجد
بجد يا مرمر افتقدتك كتير قوى لما سافرتى مكنتش متخيله ازاى هيعدى يومى من غيرك ازاى حياتى اللى جايه مش هتكونى فيها؟ هروح المدرسه مع مين ؟ ومين هيتجنن معايا لما أحب اتشاقى؟ جايز مش قولتلك الكلام ده وقتها كنا لسه صغيرين بس كنت حاسة بجد بحزن قوى لفراقك عدى تقريبا عشر سنين على اللحظة دى وبنتقابل وعلى اتصال ببعض بس بجد افتقدتك قوى
اصحابى كانو ديما الأهم عندي بحبهم جدا فى كل فتره فى حياتى كان ليهم دور رئيسي
اصحابى أيام المدينة الجامعية
فى اخر يوم فى سنه اولى كنت حاسة انى قلبى بيتعصر من الحزن لفراقهم سنه كامله بناكل وبنشرب وعايشين مع بعض شايلين هم بعض وبنفرح لبعض جمعتنا غربة وبرضه فرقتنا غربه استحملوتنى كتير
وحشتونى قوى
اصحابى وزمايلى فى الجامعة
انشغلت عنكم فى اخر سنتين وفى اخر يوم فى امتحانات سنه رابعه دورت عليكم كان نفسى اشوفكوا قوى كنت عارفه انكم زعلانين منى عشان كنت بعيده الفتره الاخيرة بس للاسف كان معظمكم مشى من غير ما اسلم عليكم للمرة الأخيرة سامحونى انى كنت بعيده عنكم بجد بندم على كل لحظه مش قضتها معاكم
اصدقاء كفاح مابعد التخرج
بقالنا سنتين مع بعض اتعلمت منكم حاجات كتير بحبكم جدا بلاقى نفسى معاكوا همومنا واحده واحلامنا واهدفنا بتعرفوا تخرجونى من اى حالة حزن كنت بمر بيها وكنت بلاقيكم دايما واقفين معايا
بس برضه الفراق مسبناش
اللى سافرت واللى اتجوزت وانشغلت عننا ربنا يوفقكوا ويهنيكوا بس خايفه كمان شويه مش الاقى حد منكوا
ماما كانت دايما تقولى ان مسيرنا نفترق وانى هفضل لوحدى من غيركو كنت دايما ساعتها افكر انى احاول اسافر بره مصر اتغرب وانا بعيد عنكم احسن ماكون فى بلدى ومتغربه من غيركو بس غالبا كلام ماما صح
بنفترق واحنا مش حاسين
المشكله الاصعب
فى فراقنا لحد بنشوفه كل يوم ومعانا فراق احساس مش جسد مش بعد ومسافة وسفر
حد قريب منك وساكنك وعايش جواك وكان اقرب ليك من نفسك
هى دى سنة الحياة مش كده؟
مش عارفه ليه اخر مرة كنت معاها حسيتها بعيدة عنى قوى بجد مفتقداها انا عارفه انها مشغولة والحمد لله انها مشغولة بخير ليها انا بجد سعيدة ليها جدا
بس مش لاقيها
بتقولى انى مقصره معاها
بس بجد غصب عنى مش عايزه اشغلك معايا انا عارفه انك مش فاضية
والله مفتقداكى جدا بشكل متتخيلهوش
بدأت احس ان كل اللى اصحابى وحبايبى بعد شويه مش هلاقى حد منهم معايا
حاسه انى هفضل لوحدى
كنت دايما شايله هم اليوم ده
كنت عارفه انه هيجى بس مكنتش عارفه انه قريب كده او جايز كنت بهرب منه
طب واللى باقين من اصحابى اقرب كمان ليهم ولا لغاية كده وكفاية

اصل هقرب عشان افارقهم زى مافارقت غيرهم؟
وعارفه برضه انى مش هقدر استغنى عنهم
بس اتعلمت حاجة مهمة قوى
محدش بيموت مين غير حد والحياة بتستمر
بقيت بجد بخاف اقرب من حد اوحد يقرب منى
بقيت بحس انى من غير ما احس بعمل حدود بينى وبين اصحابى بقالى كام يوم مش لاقيانى معاهم وبحاول اهرب منهم سامحونى عارفة انى بكون غلسة قوى بس بجد محتاجة انى اكون لوحدى الايامدى مش عارفه ليه؟
جايز بأقلم نفسى على الايام اللى جاية
عشان مصدمش لفراق حد تانى منكم

17 comments:

د. ضياء النجار said...

هوني على نفسك،

على المرء السعي وليس عليه إدراك النجاح

تحياتي

ضياء

Ragi said...

الوحدة ؟ وهل هناك اجمل من الوحدة ؟ فرصة للتأمل ومراجعة النفس
تحياتى

rack-yourminds said...

مفيش اصعب من فراق الاصحاب بجد ده شئ صعب كتير ..اصحابنا اللي بنحبهم ونثق في اخلاقهم وبنحكي لهم همومنا ومشاكلنا واللي ضحكنا معاهم واللي بكينا لحزنهم بيبقي صعب ان ييجي يوم ونبتعد عنهم

كلامك جميل وبيدل قد ايه انك حساسه

تحياتي لكي وكل سنه وانتي طيبه

كفراوى said...

و اللة انا عديت دلوقتى

مش عارف لية


انا لسة بفض حوار مع واحد صاحبى

بقالة 6 سنين

معى زى اخويا
دلوقتى ع النت

مش عارف اقوللك اية

horas said...

بدل ما تمنعى نفسك من العلاقات عشان خايفة تنتهى
ادخليها وانتى عارفه نهايتها
هى دى طبيعة الاشياء
عودى نفسك على كده
كل مرحلة وليها اصحابها
وكل مرحلة بتنتهى باصحابها
واللي بيستمر نوادر
ادعيلك ربنا يكتر لك منهم
بس اوعى تبعدى انتى
قربى
واللى يحتاجلك كونى معاه
عشان يوم ما تحتاجيه
تلاقيه
او حتى تلاقى حد

mo7amed mamdo7 said...

اولا كل سنة وانتى طيبة بمناسبة العيد عايز اقولك على حاجة شوية كده وصدقينى هتلاقى الناس متفرقش معاكى الغريب انك هاتحسى انك مش انتى او انتى مكنتيش كده اية الى حصل
لانا ولانتى نعرف الى حصل
بس الفراق حقيقة واقعة

رئيس جمهوريه نفسى said...

اولا كل سنه وانتى طيبه
ثانيا: الدنيا زى القطار بنشوف فى كل المحطات ناس وفى محطات بتنزل ناس وتركب ناس بس بنتقابل وبنتفارق وبنرجع نقابل وبنفارق هى كده الدنيا قطار والى بينزل فى محطه مش بيلاقى الى كان على الكرسى الى جنبه ده طبعا الدنيا
وكلامك قلب عليه مواجع كتير

ra7eel said...

د.ضياء
نعم على المرء السعى
ولكن كيف يكون ومالطريق الى النجاح
وما نمر به خلال رحلتنا الحياتية
عن هذا اتحدث
فكل تفاصيلنا الصغيرة تؤثر فينا
من لقاء وفراق وحزن وفرح وغيرها
خالص تحياتى وعيد سعيد



ragi
انا استمتع بوحدتى كثيرا
ولكن افتقد اصداقائى فى وقت ما
وافتقد اكثر احساسى بيهم وبلحظات سعادتى وانا معهم
نورت المدونة
وكل سنه وانت طيب


rack-yourminds
اه والف اه من لحظات الفراق حقا كم هى قاسية
شكرا لك ولكلماتك
اما بالنسبة لانى حساسه
فحقيقى مبقتش عارفه
ده عيب ولا ميزه
اوقات بحس
انى كنت هبقى افضل لو مكنتش كده
عيد سعيد


كفراوى
من غير ماتقول انا صدقنى حاسة بيك
عارفه انا احساس الصداقه بيكون عامل ازاى بكل تفاصيله
ربنا معاك
وكل سنه وانت طيب


الرائع حورس
ادخل العلاقات وانا عارفه نهايتها؟
انا لما اتعامل مع حد وانا عارفه انى هفارقه اكيد هيكون فى حدود مانا برده مش هقربه قوى منى عشان لما يبعد متاثرش قوى لفراقه دايما هيكون فى حاجز
انا لما بتعامل مع حد بحب اكون على حريتى وعلى طبيعتى جدا ودى مشكلتى انى بقرب قوى
مش بحب العلاقات السطحية
وبكون موجوده دايما مع اصحابى عمرى مااتخليت عن حد محتاجلى
وانا كاتبه البوست ده وعارفه انى مش هبعد عنهم عارفه انى مش هقدر ولا هما هيسبونى ابعد
بس برضه الفراق صعب قوى
شكرا ليك حورس برغم انى حاسه انك داخل حامى قوى فى ردك
بس بجد كلامك فوقنى على حاجات ممكن اكون عارفها بس بهرب منها
بجد شكرا ليك


محمد ممدوح
شويه وهحس ان الناس مش هتفرق معايا؟
يارب
بس معتقدش
اصلى حاولت كتير ومعرفتش
ربنا يخليك نورتنى
كل سنه وانت طيب


رئيس جمهورية نفسه
وانت طيب وبخير وسعادة
تشبيهك عجبنى قوى هى الدنيا فعلا كده
خالص تحياتى
حاول تقضى عيد سعيد

د. ضياء النجار said...

رحيل،
وانت طيبة، عيد سعيد عليك وعلى الأسرة الكريمة كلها.

عارفة كلامك فكرني بنكته واحد خلقه ضيق ذهب للخياط عشان يفصله قميص، والخياط ماسك المازورة وبياخد المقاسات قال له الراجل، بقولك ايه، أنا ما بحبش القمصان الخنقة، تعملي القميص مبحبح، يعني الياقة متكونش ماسكة على الرقبة، والأكمام متكونش ماسكة في الدراعات والوسط ميكونش محزق، يووووووه، بقولك ايه، شكلك كده مش حتعرف تعمل ايه اللي عايزه، أوعى مش عايز قمصان!!!!0

لا تعذبي نفسك، عليك السعي، وليس عليك إدراك النجاح، وروشتة النجاح تتمثل في سعيك الدائم نحو النجاح ومحاولتك تحقيقه ونحن دائما أبناء اللحظة، وقرارتنا منطلقة من موقف لحظي آني وما سيحدث في المستقبل أمر ليس لك عليه سيطرة، وليس عليك لوم إن لم تسر الأمور كما خططت لها.

ولذا خليكي على مستوى "أذبحوا بقرة" بدون ما تعذبي نفسك بأسئلة بتعقد عليكي الموقف فقط لا غير كما حدث مع اليهود، حينما سألوا عن شكلها ولونها وتشابه عليهم البقر وما كادوا يفعلون!!!0

وأخيرا أتذكر قصة جد سيدنا محمد حينما ذهب إلى أبرهة عندما أتى بجنوده لهدم الكعبة وطلب من الملك إبلا كانت له أخذها منه جنوده، فاستغرب الملك وقال: أتكلمني في مائتي بعير أصبتها لك ، وتترك بيتا هو دينك ودين آبائك قد جئت لهدمه ، لا تكلمني فيه !، فقال له عبد المطلب: أما الإبل فأنا ربهم، وأما البيت فله رب يحميه، وأنا عليه أقول لك: الحاضر هو الإبل التي لك، أما المستقبل فهو البيت الذي له رب يحميه!!!0

أرجو أن تكون الرسالة وصلت
تحياتي
ضياء

loumi said...

العزيزة رحيل

شدني الإسم
الأغنيه من مفضلاتي

رحلة البحث عن الذات لا تنتهي
الحياه أخذ وعطاء
لقاء وفراق
حب وكره

وإللي زيك
ممن يهتم بالتفاصيل وبتعب من سردها
بيتعب كتير في حياته لأنه بيرتبط بسرعه بكل من حوله ويتألم لفراقهم
ولكن الحل ليس في مقاطعة الناس لانك ببساطه لن تستطيعي فعل ذلك
لأن ده من تركيبة شخصيتك
لذلك
هوني على نفسك وعيشي كل مرحله وحاله زى ما هي بكل تفاصيلها
الحيام كده متغيره دائما ودي حلاوتها
ارجو ان يفيدك كلامي ولا يضايقك

عيد سعيد
تحياتي

ra7eel said...

د .ضياء
وصلت رسالتك جيدا
واعلم انى احاول قدر المستطاع ان اعيش لحظاتى الحالية واحاول ايضا الاستمتاع بكل ما هو جميل فيها
ولكن المستقبل هو حاضرى القريب
افكر كثيرا فيما سيكون وما كان
انا اعلم ان تلك هى مشكلتى دائما
ساحاول العمل بنصيحتك
وشكرا لك كثيرا

ra7eel said...

loumi
اسعدتنى زيارتك وكلماتك كثيرا
اعلم ان الحل ليس فى مقاطعة الناس ولكنها لحظات ضعف قد تمر على
واعلم ايضا جيدا انى لا استطيع مفارقة اصدقائى
ولكنه التفكير ثم التفكير ياعزيزتى
افادنى كلامك واكيد مش مضايقه
شكرا لمرورك ولرأيك

summar said...

البوست ده بتاعى على فكرة
ليا
كل كلمة انا حاساها جدا جدا
وبعانى منها
انا تخصص كده من الاخر
حاجة فعلا مؤلمة جدا..ممكن تنهارى كلك على بعضك..
ومالهاش حل فى الاخر
واوحش حاجة بجد لو اتنسيتى

بوست جميل ..وانتى اجمل
ماتنسيش الناس بس..وحاولى تفضلى معاهم
وادعى للى بيروح..
ربنا يسعدك دايما

ra7eel said...

summar
فعلا احساس صعب جدا ياسمر ان احنا نتنسى
انا مش بنسى الناس هى دى مشكلتى حتى لو هما بعيد مدام لينا ذكرى مع بعض صعب انهم يتنسوا
ربنا يوفقهم كلهم ويوفقك انتى كمان ياقمر
مبسوطه انك حسيتى ان البوست ليكى
بتنورينى دايما ياسموره

DayDreaming said...

حبيبة قلبي رحيل
كل سنه وانتي طيبه واسفه لغيابي عن متابعة المدونه لظروف سفري

حسيت كلماتك اوي وكنت حاسه بيها من قبل ما اقرأها خصوصا الايام اللي فات لما شوفتك ولاحظت صمتك بالرغم من محاولات لاظهار العكس

انا عارفه ان الفراق صعب اوي وكتير كنت بتمنى انك تكوني جانبي لما كنت بحتاج حد اتكلم معاه بس كمان بحمد ربنا لاني ساعات بحس ان فراقنا ده قربنا اكتر احنا صحيح افترقنا من عشر سنين تقريبا لكن لما بنحتاج بعض بنلاقي بعض اوي وان شاء الله مفيش حاجه هتفرقنا عن بعض


وبالنسبه لطبيعة الفراق فانا اوءيد رأي د. ضياء النجار بشده

ربنا يوفقك

ra7eel said...

daydreaming
المهم انك رجعتى بالسلامه
عذرك مقبول المره دى
بس متغيبيش تانى
طبيعى
كنت عارفه انك اكتر واحده هتحس البوست ده
ويارب فعلا مفيش حاجه تفرقنا عن بعض

sagittarus said...

هنا بقه بجد لازم اقف وقفه جامده قوى
انا والله اترحكت معاكى بقلبى واتحركت
صحيح بوستاتك اللى فاتت كلها كانت حجلوه
بس ما لمتشى قلبى واتحركت معاها
كانت بمثابه مخدر بعيشنى حاله حلوه سوا رومانسيه سوا حاله غضب مكبوت نفسى اطلعه
بس مش بتعبر عن حياتى وعن نفسى وبتمس اوتار قلبى وتعزف عليها مقطوعه موسيقيه من الحزن ينزف منها دم اسود ملوث هو دمى انا
ده اللى حسيته ف البوست ده
بقيت بجد بخاف اقرب من حد اوحد يقرب منى
الكلمه دى هى اللى بمر بيها دوقتى
نفس الذكريات القديمه
فعلا هى والله بالضبط
بس انا مع ولاد خالتى "أكتر من اخواتى "افترقنا وابتعدنا عن بعض
ونفس ذكريات دوقتى
ونفس الحاله اللى بمر بيها انى ببعد عنهم علشان ما تبعدهمشى الدنيا عنى
او حتى ابعد او تبعدنى الدنيا انا
دواشوف نظره التخلى فى عينيهم بجد دى بقه اللى فيها موتى
بتقتلنى قوى
بفضل اكون ندل ومتكبر قبل ما يحبونى
عن انهم يحبو الانسان الحلو اللى هو انا الطاهر الكويس نسبيا وبعد كده يتعلقوا بى ويزعلوا لما ما اودهمشى او ما اسألشى عنهم
سلاموو ومتشكر لمشاعرك اللى حركت قلبى واله بلا ادنى تزوييق للكلام