Sunday, October 28, 2007

حبة تفاؤل


بقالي كام يوم كده مزاجي حلو قوى وحاسه بحبة تفاؤل
وانى صافية قوى من جوايا ونفسيتى هاديه
ومبتسمه كده وعلاقتى كويسه بالناس اللى حواليه بسأل عليهم وبيسألوا عليه
فى ود معاهم الايامدى

وموجوده بين اصحابى على فكره هما لسه ماشين من عندى من شويه صغيرين
انا عارفه ان ده انعكاس لإحساس حلو جوايا
اى نعم هو فى شوية مشاحنات فى البيت والشغل

وطبعا البوست ده مش عشان افضفض معاكوا فى المشاحنات دى
باعدين هنتكلم فى الموضوع ده المهم ان المشاحنات دى مش مأثرة عليه قوى او ممكن اكون اتعودت خلاص
او مليش مزاج حاجه تعكنن عليه وانا مزاجى حلو
يعنى مش بحاول اكبر المواضيع فلما حاجه بضايقنى بزعل فى وقتها شويه صغيرين وخلاص
عارفين

صحيت من النوم كده لاقيت مزاجى حلو
ولما مشيت فى الشارع كنت حاسه قوى لون السما وانها صافيه جدا وشكل السحاب فيها جميل
ونور الشمس مدينى احساس ببهجة ودفئ وحاجات كده حلوة جوايا
ده غير نسمة هوا حستها فى ملامحى كنت شايفه الالون زاهية قوى
حاسه ان الدنيا كأنها مغسوله بعد مطر وكل حاجه نضيفه قوى ولونها طبيعى
عارفه ان كل حاجه حزينة بتاخد وقتها وبتعدي هي أكيد بتسيب نقط سودا جوانا من وقت للتانى نفتكرها

بس الأكيد إن الحياة بتمر والدنيا مش بتوقف على موقف او شخص اى ان كان هى هتستمر ازاى ؟ المهم انها بتستمر
حاسه ان الجاى أحسن مع انى مبقاش عندي القدرة على تخيله اهو بقى احساس بإن الحياه حلوه وخلاص اليومين دول
مع انى قلقانه من شويه حاجات كده ومحتاره

وفى قرارت خدتها من فتره مكنتش متوقعه مدى تأثيرها على المدى البعيد هبقى احكيلكوا عليها بعد كده عشان انا محتاجه بجد رأيكوا عشان تحاولوا معايا انى الاقينى
وطييعى كان لازم اشاركوا معايا فى حالة التفاؤل دى يعنى مين يوم ماعملت المدونه وانا زهقتكوا حزن وكابة وغربة ووحدة

والناس اشتكت
دى حتى تيقى انانيه منى انى افضفض معاكوا فى لحظات حزنى ولما اكون سعيدة انساكوا
وبعدين بجد حاسه ان انتوا سبب من اسباب حالة التفاؤل دى بجد شكرا لكل اللى حاول معايا الفترة اللى فاتت بتعليقاتهم وبرأيهم وشكرا كمان لكل اللى حسيتنى عندهم بين سطورهم وفى مدونتهم

شكرا جدا جدا



ملحوظة هامة:متخدوش على كده الله اعلم البوست الجاى هيكون فى ايه

40 comments:

rainbow said...

العزيزة سارة
ربنا يديمها نعمة وتفضلى متفائلة كده يا رب .. وصفم للون السما واحساسك بالشمس خلانى ابتسم كأنى ماشية جنبك .. حقيقى سعيده انى احسك سعيده .. واكيد النقط السودا اللى اتكلمتى عنها مسيرها تبهت لحد ما تختفى فى اللون الجميل للسما والدفىء المريح للشمس .. اما انك وضعتينا من ضمن اسباب تفاؤلك فده اكبر دليل على ان اصبح عندك ثروة من الاصدقاء .. ربنا يسعدك وسجمعنا دايما فى الخير وعلى خير

تحياتى ودعائى
والاهم امنياتى ببوست قادم اكثر سعادة
هدى

د. ضياء النجار said...

فعلا، صدق إيليا أبو ماضي

والذي نفسه بغير جمال
لا يرى في الكون شيئا جميلا

ربنا يديم عليك التفاؤل ولحظات السعادة وعجبتني أوي جملة "حاسه ان الدنيا كأنها مغسوله بعد مطر" وأنا حاسس ان البوست ده انت كتباه وأنت مغسولة من همومك. وأنت حتلاقينا دايما جنبك في كل الأحوال، أهم حاجة اكتبي وأمتعينا.

عميق تحياتي

ضياء

shreen said...

صديقتى العزيزه جدا رحيل

يارب تكون ايامك كلها سعاده ونفاء
يارب تفضل ايامك كلها منتعشه ونضره ومغسوله بماء المطر

ويارب يكون البوست التانى مغسول بالندى
ولا تخرجيش ابدا من المود ده

والله من قلبى

فبركة said...

السلام عليكم
أولا شكرا لمجهودك الكبير فى البوست الجميل ده

أنا كاتب بوست عبرت فيه عن مشكلة البلد بحالها وبالذات الشباب وحطيت فيه حل الأزمة اللى كلنا عايشينها ومش عارفين نطلع منها أزاى
يمكن يكون حلى مناسب وممكن يكون غلط
بجد أتمنى أعرف رأيك فيه ضرورى جدا
عشان أتعلم من تعليقك عليه أيه مميزاته وسلبياته
بجد أتمنى قرائته والتعليق عليه
تحياتى

نورسين said...

حبيبتي سارة : صباح الفل والورد والياسمين وكل زهور الدنيا الحلوين على أحلى قلب وأطيب روح وأنقى سريرة .. ربنا يديم عليك التفاؤل واللي حتى بتعيشينا معاكي فيه برضه بنفس الدرجة
سعيدة بكي قوي وبدعيلك من قلبي يحلي ايامك ويسعد قلبك الناعم

دومتي بخير وتفاؤل

إرهص براحتك يا زوق said...

يارب ديماً يا ساره تكوني في حاله فرحه وسعادهو تفاؤل
ما تتخيليش أد أيه فرحني البوست ده
أيوة كده عيشي حياتك ومتزعليش نفسك علي حاجات ملهاش لزمه.
وحاولي تتأقلمي مع المشاكل لان مافيش حياه بدون مشاكل إلا في المدينه الأفلاطونيه
وخالي الحكمه دي في دماغك ديماً
"قد يغفر الله لنا أخطائنا العصبيه ولكن جهازنا العصبي لن يغفرها"
With my best Wishes SARA

رئيس جمهوريه نفسى said...

اولا الف مبروك حاله التفائل الى انتى فيها ويارب دائما متفائله بس انتى اجلتى حجات كتير حتتكلمى عنها عايزه بلوحج لوحده
بجد الواحد مبسوط لاحساسك المتفائل واختيار الاغنيه متوافق مع الحاله النفسيه دى

DayDreaming said...

ايوا كده...والله انا حسيت بنفس التفاؤل لما قريت البوست
ياااااااااااارب دايما نشوفك متفائله
عايزين من ده كتيير ماشي

rack-yourminds said...

ربنا يجعل ايامك سعاده وتفاؤل

وان شاء الله البوست الجاي كله تفاؤل

تحياتي لكي

horas said...

طبعا انا مبسوط جدا من نوبه التفاؤل دى
واتمنى تستمر
وعاوز اقولك
انى انا بالذات
يستحيل ازهق من كلامك
حتى لو كله حزين

لانه حقيقى
ودا يكفينى

MKSARAT SAYED SAAD said...

رحيل ربنا يسعد ايامك كلها وتبقى فرحانة على طول
انتى عارفة الفضفضة اللي بتتكلمي عليها دية بتخلي الانسان يستريح جدا وترجع امورة تتوزن الي حد ما دة لو كان مضايق
لكن بقى لو كان فرحان زيك ماشاءالله بنزود سعادتة بدرجة اكبر اشكرك انك فرحتينا ونقلتلنا احساسك بالبهجه واللي كان باين قوي في كلامك
ربنا يحلي ايامك على طول
تحياتى اليكي برقة الوان الفراشة التى على البوست الجميل بتاعك

princess dodo said...

ربنا يسعدك دايما يا قمر
بحب أوووى لما نعبر عن فرحنا
وسعادتنا
لأنى دايما بلاحظ نقول
زعلانين ومتشائمين وعيانين
ولما نحس بمشاعر حلوة نخبيها
ونخاف نتكلم عنها

***

ربنا يسعدك دايما
والبوست الجاى يكون بردو
تعبير عن فرح

سلام يا جميل

Ragi said...

سارة
نحمد الله على السعادة التى منحها الله لك وندعوه ان يديمها عليكى

osama said...

كن جميلا ترى الوجود جميلا....

ويارب يديم عليك السرور والبهجة....
واستدراكا الحزن ان حدث لا يساوي الاكتئاب فالحزن ايضا يرقي المشاعر ويدفئها ...

دمت بكل ود..
خالص تحياتي

doha said...

عمال اقول ماشاء الله على التفاؤل
فيه تفاؤل كدة
ايه الطيبة دى بتزعل بسرعه وتصفى بسرعه
ياماشاء الله
على التفاؤل
الاقيكى فى الاخر
تقولى متاخدوش على كدة
تؤ
مينفعش الكلام ده
حددى موقف

Soooo said...

خصيمك النبي يا ساره لا تقوليلي خدتي دوا ايه عشان تشوفي الحياه بمبي كده
ولا اقولك .. اتصرفي باي طريقه اكتبي بوست ازاي وصلتي للحاله دي عشان اخوكي شايف الحياه سوداااااااااا
فيها خط سينيه رمادي غامق
خط واحد بس والله


وياريت تفضل جرعة التفاؤل دي عشان بجد انا حسيت بحالتك واتنقللي الجو العام من الموضوع ده



سلامووووووووز

خلود صلاح said...

رحيل ..
بجد مبسوطة انك فى المود العسل دة .. ويمكن كنت محتاجة كتير انى اقرا حاجة لحد فرحان ..أكيد هتساعدنى اخرج من المود العسل (بردو) الى انا فيها .. ومحاولتك المرة دى ناحجة جدا ..بوست متفاءل ومارسيل خليفة شغال عندى ولسة واكلة بطاطس محمرة .. ايه بأى هحتاج لايه تانى ...
مدونتك حلوة اوى يا رحيل انا هضيفها عندى وهبقى مبسوطة كتير لو عرفتك بشكل مباشر اكتر .. مش مدونات بس يعنى :)

ra7eel said...

اسفه جدا يااصدقائى انى اتأخرت فى الرد النت كان فاصل


rainbow
عزيزتى هدى
ربنا يخليكى يارب ومايحرمنى منك ابدا
انا فعلا حاسه ان بقى عندى ثروه من
الاصدقاء ربنا يخليكو ليه يارب
نورتينى
-----------------------------------
د. ضياء
تشرفنى زيارتك وتسعدنى دائما
ربنا يكرمك
وانا عشمى دايما انى بجد الاقى الصحبه الحلوه دى على طول
خالص احترامى لك
-----------------------------------
شرين
صديقتى الغاليه
عارفه والله انه من قلبك بجد
ولكنى لن اكون اسعد حالا حتى تكونى انتى ايضا بخير
حتى اجد لديكى وبين سطورك
كلمات متفائله
كلمات اكثر قوة
واكثر املا
خالص حبى لكى
-----------------------------------
فبركه
شكرا لمرورك
شرفتنى
وبالنسبه للبوست الاخير انا زورته وقولت راى
فعلا بوست رائع
تمنياتى لك بكل التوفيق
----------------------------------
حبيبتى نورسين
ده صباحك انتى اللى كله ورد وفل وياسمين
مفيش صباح احلى من كده لما يكون منك طبعا الدنيا كلها لازم تكون متفائله
ربنا يهنيكى ويسعدك
يارب اشوفك اون لاين قريب
خالص مودتى وحبى لكى
-----------------------------------

ra7eel said...
This comment has been removed by the author.
ra7eel said...

ارهص براحتك يازوق
منورنى دايما ياحمد
ربنا يخليك وهحاول والله انى اكبر دماغى
اوعدك بجد انى هحاول
دعواتك
ربنا يخليك
-----------------------------------
رئيس جمهورية نفسه
الله يبارك فيك
عقبالك يارب لما تتنقل عدوى التفاؤل ليك
اما بالنسبه للحاجات اللى اجلتها
مش تقلق
اللى جاى كتير هصدعكوا
وبالنسبة للاغنيه
فهى اختيار الصديقه الغاليه هدى عبد القادر
بس فعلا عجبتنى قوى
نورتنى

------------------------------
Daydreaming
مرمر حبيبة قلبى
الحمد لله انك حستى بالتفاؤل عشان بس متقوليش انى حارماكى من حاجه قولتى ممتنعه عن التعليق لغايه ماقرا حاجه متفائله اى خدمه انتى تأمرى بس
بس من ده كتير دى مش مضمونه انتى فاهمه بنت خالك
-----------------------------------
Rack-yourminds
ربنا يخليك نورت المدونه
وييجعل ايامك كلها تفاؤل يارب دايما
تحياتى وتقديرى لك

ra7eel said...

الرائع حورس
انك عمرك ماتزهق من كلامى ده اكيد شرف ليه
ربنا يخليك
بس برده ليه شايف ان الحزن بس هو اللى حقيقى فى حياتنا؟
فى لحظات سعاده حتى لو مش كتير يكفى ان احنا نعيشها ولو للحظه
حورس ربنا يهنيك ويسعد ايامك
بفرح بتعليقك جدا
-----------------------------------

مكسرات سيد سعد
فعلا الفضفضه ليها عامل كبير فى ان الانسان يستعيد توازنهويخرج شحنه
الغضب او الحزن او التمرد اللى جواه او حتى حالة فرح بيعشها
وخصوصا لما يكون معاه صحبه كده
انا سعيده انى قدرت ولو للحظه صغير افرحكوا معايا
وان احساسى اتنقلكوا
ربنا يهنيكوا كلكوا يارب
---------------------------------

برنسيسة دودو

بجد منوره
ليه نخبى مشاعرنا الحلوه
ونخاف نتكلم عنها
خصوصا مع الناس اللى هما اساسا السبب فيها؟
مشاعرنا الحلوه اولى نفضفض بيها عشان مش تبقى الدنيا كلها سوده
تحياتى وحبى لكى

----------------------------------
Ragi
شكرا لزيارتك
ولدعائك ليه
ربنا يكرمك ويهنيك
خالص تحياتى لك
-----------------------------------
Osama
اهلا بيك شرفت المدونه
اعلم جيدا ان الحزن يرقى المشاعر ويدفئها حقا
ولا استغناء عنه
انا شخصيا بستمتع جدا بلحظات حزنى
وبرده بلحظات سعادتى
تحياتى لك

ra7eel said...

Doha

نورتينى فينك من زمان
يابنى انا قايله من زمان انى مجنونه
وكل مره هتلاقى واحده غير اللى قبل كده
بس فعلا انا بزعل بسرعه وبصفى بسرعه
مش هينفع احدد موقفى
اقولك متخدش على كلامى
تحياتى لك
-----------------------------------

Soooo

لا لا لا
احنا فى بينا زعل جامد
قعدت تقولى المدونه دى اصلا بتاعتى وحوارات وافلام
وروحت وقولت عدولى
وعايزينى اقولك انا شايفه الحياه بمبى كده ازاى
لا انسى
ولا اقولك انا هرد بس عشان خاطر الناسى التانيه
شوف باختصار شديد
حب الناس وعيش
الدنيا مش سوده العيب فى النضاره ياكبتن غالبا محتاجه تتغير
ومتغمقهاش كده مسيرها تروق وتحلى
سلامووووووووووووووز جامد جدا
--------------------------------
خلود صلاح
نورتنينى
مبسوطه بجد جدا ان حد اتنقاله حاله التفاؤل دى
وانا هكون سعيده اكتر واكتر لو اتعرفت عليكى
شوفى احنا خلاص بيقنا اصحاب
وعازمه نفسى بكره عندك على الغدا بقى على العشى المهم استنينى بكره ان شاء الله
سلام ياجميل

Doba said...

أسعدك الله دائما كما استطعتى ان تبثى السعادة لمن حولك

مدونتك جميلة تستحق المتابعة وارجو ان تتقبلى مرورى

تحياتى هبة

كاميليا said...

تعرفى؟
احساس التفائل معدى، لما الواحد بيقرا ان حد متفائل ويكتب عن تفائله ويوصف احساسه بيدخل التفائل كمان للقارئ

يارب تفضلي متفائلة علي طول كده
ونسمع منك كلام جميل في وصف السما والشمس والنجوم كمان

لك تحياتي

Salwa said...

يارب دايما سعيده ومتفائله

رسمتي صوره جميله والله يا رحيل

كنت حاسه إني ماشيه معك في الشارع

والشمس والسما والنسيم

جميل ..
وربنا يديمها عليكى

رئيس جمهوريه نفسى said...

العزيزه ساره كان نفسى اشوف جديدك واعلق عليه قبل الاجازه بس ماليش نصيب لما ارجع يبقا اعلق برحتى
تحياتى

Sherif said...

الرقيقة سارة

الاسم غالى لدى جدا لأنه اسم رفيقة عمرى

جميل أن نحس بكل التفاؤل من كلماتك واحساسك وكأننا نرى بعينيك .. ونسمع بأذنيك

أدام الله عليك كل السعادة

على باب الله said...

يا رب دايماً

بوست جميل .. و أنا شخصياً اتعديت من حالة التفاؤل دي

يا رب كل الناس تتعدي

sendbad said...

البسوت الجاي هايبقي احل ومليان تفاؤل انشاء الله
سعيد بدخولي مدونتك
تحياتي

coca said...

والله انتي سكر يا راحيل
تفاؤل تفاؤل وفي الاخر متتعودوش علي كدا

بس عامه الحمد لله طبعا علي كل حال

ra7eel said...

doba
اهلا بيكى ياهبه ويارب فعلا اكون قدرت اسعد حد معايا
نورتينى
-----------------------------------
كاميليا
اهلا اهلا بيكى
يارب تكون اتعديتى بجد من التفاؤل
واشوفك بخير دايما
تحياتى لكى
-----------------------------------
salaw
ربنا يخليكى
ويسعد ايامك
شرفتى المدونه ياسلوى
----------------------------------
رئيس جمهورية نفسه
هى الاجازه هطول ولا ايه؟
يارب بس تكمل مش تقطعها زى المره اللى فاتت
تروح وترجع بالسلامه
اجازه سعيده
-----------------------------------

ra7eel said...

sherif
اسعدنى مرورك مره اخرى
خالص تحياتى لك ولرفيقه العمر
ربنا يجعلك متفائل دايما
نورت المدونه
-----------------------------------
على باب الله
بجد اتعديت
يارب كل الناس تتعدى ويكونوا مبسوطين ومتفائلين يااااااارب
شرفتنى كتير
----------------------------------
sendbad
اهلا بيك فى المدونه
انا اسعد بمرورك
اما بالنسبه للبوست فجد مش هاين عليه
نخرج من حاله التفاؤل دى
ربنا يسهل
نورتنى
---------------------------------
coca
ده انتى اللى سكر
اصل صعب بجد الناس تتعود على التفاؤل ده
دوام الحال من المحال
فعلا شايله هم البوست الجاى ده جدا اصلى كتبته من يومين
وعلى النقيض شويه للبوست ده
بس هحاول انزل حاجه تانيه ان شاء الله
نورتينى ياكوكا
--------------------------------

كفراوى said...

كن جميلا ترى الوجود جميلا



_ابو القاسم الشابى _

linda said...

بتمنالها الدوام

ra7eel said...

كفراوى
شكرا لمرورك
تحياتى لك
----------------------------------
linda
اسعدتنى زيارتك
واتنمى لكى انتى الاخرى دوام التفاؤل
نورتينى

إيمان said...

أدينى بحاول أعلق
وبحاول بل عشت احساس التفاؤل معاكى
رغم انى النهاردة حصل معاى موقف مضايقنى جدااااااااا بس بجد غسلتنى
كلماتك شوية وفصلت حبة عن الاحساس ده وعجبنى جدااا جدااا
جملة حاسه ان الدنيا كأنها مغسوله بعد مطر وكل حاجه نضيفه قوى ولونها طبيعى

رائعة من زمان وانا بدور على جملة تصف احساس الصفاء ده ربنا يديمه عليكى

تحياتى ومودتى

ra7eel said...

ايمان
نورتينى
شوفى عادى ان المواقف دى نمر بيها
بس المهم احنا من جوا عاملين ازاى
نزعل شويه مش مشكله
المهم نشوف بكره احسن
خالص تحياتى

klmat said...

انا اول مره امر عندك
وسعيده جدا بمرورى
خصوصا انى لقيتك متفائله
عارفه انا حاسه ان السعاده
والتفاؤل زى العدوى
لما تقابلى حد سعيد ومبتسم بتتأثرى
وكمان الكتابه عامل مهم
اسلوبك جميل
ويارب دايما تكونى سعيده
تحياتى

ra7eel said...

klmat
شكرا لزيارتك
انا كمان سعيده بيها
ربنا يخليكى
ويسعد ايامك
شرفتينى

sagittarus said...

حلو ..رحيل
انا بصراحه عمال اخد جراعات تفائل وفرح وحاجات حلو كتير
ربنا يزيدك من نعيمه
وتنبسطى كمان وكمان
انا فرحان
يلا متابع