Saturday, November 24, 2007

اوقات عصيبة


يوم الاربع بعد الضهر كده حصلى موقف قلقنى جدا
كنت فاتحه الماسنجر وفجاه حد ضافنى وبعد كده قالى انه مجمع هكر وانى احسنلى انزل ويندوز وحاجات كده
بصراحة مش عرفت اتصرف خالص قولت اتصل بحد من اصحابى اللى ممكن يفدونى
والغريب بقى ان فى وقتها كل حد اعرفه ممكن اتصل بيه يا اما مش بيرد ياما غير متاح
ياما فى شغل وهيتصل بعد مايخلص معرفتش اعمل ايه غير انى قفلت الجهاز
وقومت وفتحت تانى لاقيت اميلى اتفتح معايا
كان كل اللى مسيطر على تفكيرى فى الوقت ده انى الاميل هيتسرق
والاهم من الاميل كان عندى المدونة بتاعتى ازاى هدخل عليها لان انا اساسا عامله حسابى على جوجل بالاميل بتاع الياهو فكانت دى اكتر حاجه شاغله تفكيرى
المهم النت فصل عندى فقولت اتصل بمرمربنت عمتى تغير الباس ورد من عندها
وفعلا غيرتها وبعتتلى الباس الجديده
جيت افتح الاميل ابدا مش راضى يفتح لا بالقديمه ولا الجديدة
طيب اجرب المدونة هى كمان مش رديت تفتح
بس هى المدونة مش فتحت من هنا وانا جالى انهيار من هنا معقول مش هقدر ادخل مدونتى تانى
بجد بيتى مش هعرف ادخله اتفرج عليه بس من بره
بجد احساس بشع حسيت قد ايه مدونتى غالية قوى عندى وانها بقت شئ مهم جدا بالنسبالى
احساس صعب قوى انك تقف قدام بيتك ضايع منك المفتاح ومفيش حتى شباك تدخل منه
مش متاح ليك غير انك تتفرج من بره عليها
وفضلت اجرب واجرب لغاية بجد ماحسيت انى دماغى هتنفجر
قولت اتصل تانى بالناس اللى اعرفها وممكن تفدنى واللى بجد بشكرهم جدا
انهم شاركونى لحظات قلقى وانهم حاولوا يساعدونى ومعلش لو كنت قلقتكوا معايا
اميره بنت عمتى غيرتلى الباس ورد هو صحيح مش رضى يفتح بس المشكله كانت عندى انا قرفتها تليفونات
علاء سالم تعب معايا بجد فضل يفهم فيه ان حساب جوجل ملوش دعوه بالاميل وان الباس ورد مش هيتغير حتى لو غيرت الباس بتاع الاميل وانا ابدا ولا انا هنا ولا مقتنعة

اصل المدونة مكنتش راضيه تفتح لا بالجديد ولا القديم فخلاص انا اعصابى اساسا كانت بازت
ومش عارفه اركز فمهما يقول انا اللى فى دماغى فى دماغى
معلش ياعلاء الغباء وحش برده شكرا انك استحملتنى
سامح غالبا قرب يكره اليوم اللى كنا قرايب فيه اتصلت ببنت عمتى التانيه بحكى معاها قالتلى اتصلى بسامح
اتصلت فى البيت طنط قالتلى انه فى الشغل وانه اول ماهيوصل هيكلمنى
بصراحة طنط وجبت معايا اول وصل اتصل كان حتى لسه مش اتغدى حتى سامح كان ليه وجة نظر تانيه
ان المشكلة عند اميرة انها لما غيرت الباس حصل مشكلة والميل مش فتح معاها اقوله هى بتقول انه فتح
يقولى اميره بيجيلها تهيؤات تخيلى ياميره فى الاخر يطلع عندك تهيؤات مش انا اللى بقول ده سامح
انا بس بهدى النفوس

لاء وايه بيقولى انك عندك مشكلة اساسا فى كتابة الباس ورد ده كلام برده ياسامح تقوله على اميره
خلاص بقى يامرمر قلبك ابيض سامح زى اخونا برضه ايه ده هو الموضوع وصل للضرب
طيب اسيبكوا انا مش بحب ادخل فى الامور دى انا بس قولت اهدى النفوس بينكوا
وكمان عايزه اشكر قوى باشمهندس محمد من عندنا من البلد كان عنده شغل لما كلمته

والصراحه اول لما خلص اتصل بيه وحاول يساعدنى بقدر الامكان
كمان خلود صلاح كانت معايا على اميل الهوت وحاولت معايا

انى اعمل خطوات عشان مش استقبل ملفات من حد شكرا يالولو قلقتك معايا
ورشا صاحبتى كمان كانت مشركانى وجدانيا ومعايا على التليفون
ياااااااااااااااه تخيلوا قلقت كل الناس دى معايا
لاء وايه كل ده ولا الاميل فتح ولا المدونة حسيت ان دماغى خلاص ولعت
روحت قافله ونمت اصل خلاص هعمل ايه
وعلاء وسامح كانوا شايفين ان الحل الوحيد اعمل مدونة جديدة

طيب ازاى ومدونتى كل ركن فيها ليه فيه ذكرى وكل بوست وكل تعليق
ياخبر اعمل مدونه جديده ازاى؟؟؟؟؟؟؟؟؟؟؟؟؟؟
المهم روحت الشغل تانى يوم وكان فى مشكلة ومشيت من الشغل معيطة ومزاجى زفت
وكان المفروض اسافر بورسعيد فقررت الغى السفر وقررت انى اقضى اليوم نوووم وبس
رجعت الضهر البيت اتصلت باميره تانى اتاكد من الباس وررد
فخدتها تانى وجربت تانى وفتح الاميل بجد متتخيلوش كنت سعيده ازاى
وجيت بقى افتح المدونه بالباس الجديده مش فتحت كان هيغمن عليه
اخويا قالى جربى القديمة ففتحت يعنى كلام علاء كان صح تماما حساب جوجل ملوش دعوه بالاميل
بجد متتخيلوش مدى سعادتى انها فتحت بجد روقت جدا وقومت سافرت ونسيت اى حاجة كانت مزعلانى فعلا
حسيت انى كنت تايه ولاقيت بيتى ورجعتله تانى
غالبا كان الجهاز محتاج يتعمله ريستارت وانه لما اتقفل واتفتح قبل الباس وورد
شكرا لكل اللى تعبتهم معايا
ونورتى مدونتك يارحيل

33 comments:

DayDreaming said...

اخيرا لحقت اكون اول تعليق ع البوست ممتخيليش مدى سعادتي يا ساره ان انا اول واحده اعلق على البوست ولو اني مكنتش اتمنى انه يكون ده ههههههههههههه

فعلا يا جماعه هي كانت اوقات عصيبه ساره حسستني ان عيل من عيالها تاه ومش هتشوفه تاني اه والله
كل شويه تقولي قولي كده الباس ورد تاني متأكده انه فتح معاكي
يا بنتي والله فتح اكتر من مره

ولا صوتها في التلفون مقولوكوش مش طالع من كتر القلق
ما علينا

سيبكوا من كل ده انا عايزه اشتيكلكوا منها تخيلوا تيجي تعد معايا يومين في بورسعيد تسيبني وتعد ادام المدونات قال يعني بنشوف بعض كل يوم.


حمد الله على سلامة مدونتك يا ساره ونورتيها بجد
اما سامح ده فليا معاه حساب تاني على مدونته عشان موضوع التهيؤات ده

يلا كفايه عليكي كده سلام
بنت عمتك :)

e7na said...

كل ده يحصل ولا تعرفينا

اوقات عصيبه فعلا



الحمد لله

مرت بسلااااااااااااااام

فرنسا هانم said...

لا احنا اللى نقولك نورتى مدونتك يا رحيل
وخليتى الناس يمسكوا فى بعض
كنت هازعل قوى لو المدونه منفتحتش
سلامى لكل اللى تعب معاكى لغايه لما فتحت المدونه

rack-yourminds said...

الحمد لله انك قدرتي ترجعي لمدونتك وتمتعينا بموضوعاتك الجميله

alaa salim said...

السلام عليكم

ياااااااااااااه أخيراً ؟
ماكنتش هاطمئن على المدونة غير لما أشوفلك بوست جديد فيها.

الحمد لله إنك صدقتي كلامي دا انتي حسستيني وقتها إني بأتكلم لغه تانيه مش فاهماها.
بس الحمد لله المدونه فتحت والإيميل كمان وكله آخر تمام.
و أظن والله أعلم إن بتاع الهاكر دا حد كان بيشتغلك وانتي صدقتي وإرتبكتي وعلشان كده حصلت كل اللخبطه دي
وهاتلاقي النت العجيب اللى عندك كان عامل مساعد في الموضوع دا يمكن كان بيفصل وانتي بتدخلي فيتهيقلك إن الإيميل مش بيفتح علشان مسروق
عموماً مبروك على عودة الإيميل والمدونة
وبالنسبه للتعب فأنا ماتعبتش معاكي ولا حاجه.
بالعكس دا انا كنت فرحان فيكي ههههههههههههههههههههههههههههه

وحتى لو المدونه ماكنتش فتحت ماتقلقيش يعني كنا هانلم من بعضنا ونجبلك واحده تانيه أو حتى كنا نشوفلك واحده إيجار جديد ههههههههههههههههههه

dr.Roufy said...

لا فعلا صعب
ان الواحد يتخيل ان مدونته راحت
ياااه

عود أحمد
ونورتي مدونتك يارحيل

MKSARAT SAYED SAAD said...

لو عملية جراحية مكنشي حصل كل دة
يلا الحمد لله انها جت خير والله يكون في عون اللي ساهموا بالمساعدة بس اشكرهم انا كمان علشان حفظولنا على المدونة بتاعتك
تحياتي

Mask said...

احم احم
ياساتر
ياأهل المدونه
الحمد لله
كله تمام و الامن مستتب
الحق انا بقه استخبه بين الكومنتات عشان اميره متشوفنيش..
وبعدين ياساره بدل ما تستري عليه جايه تصيحي علنا كده..
وبعدين انا مقلتش ان عندها تهيؤات
انا قلت جايز يكون متهيألها
وتفرق كتير..
كله الا اميره
اول ما تيجي سيره اميره الواحد بيتذكر علامات معينه كده
اميره عقل
اميره حكمه
اميره حنكه
اميره ذكاء
تيجي انت بقه عاوزه تقولي
اميره تهيؤات
لا مينفعش ياساره
وانا مش هاعمل زيك واصيح زي ما انت عملت
ومش هقول خالص واحنا بنكلم انت قلتي ايه على اميره
عشان احنا قرايب في بعضينا ومينفعش نعض في بعض كده
يله يااميره قومي بوسي دماغ ساره
وانت ياساره متعمليش كده تاني
صافي يالبن حليب ياقشطه
يله اخلع انا بقه
تقريبا هاحط بوست جديد عندي

مصطفى السيد سمير said...

مش ممكن يارحيل
بقى المحاولات للبحث عنك كانت حتقف
الحمد لله على السلامة

osama said...

بالفعل هنا يتضح جلياً اسم المدونة محاولات للبحث عنك ههههههههههههه
محاولات والحمد لله نجحت في الآخر ولقيتي نفسك...

وبصدق كان يحدث لي هذا حين افقد باس ورد لمنتدى قبل ان اصل لعالم المدونات...
دمت بكل ود..
خالص تحياتي

rainbow said...

يا حبيبتى يا سارة

معقول كل ده
حمالله عالسلامة نورتى بيتك ومطرحك
وسط اخواتك واصحابك

كنا هندور عليكى بجد مش على رحيل نفسها هههههههههههه

بس مش ملاحظة انك وقعتى الناس فى بعض وقاعدة تضحكى ؟

بلاش كده هينقلب عليكى ده كله هههههههه

يالله المهم انك رجعتى من رحلة البحث عنك بسلامة
المهم تكونى فعلا لقيتى سارة

حبى ودعائى

هدى

البرديــــــة المصرية said...

نورتى مدونتك يارحيل

وادعى ربنا ما يحصلش الموقف ده تانى

سلام

ra7eel said...

daydreaming
يالا من نفسك مره اول تعليق
كل مره تيجى متأخر ده كلام
انا عارفه يامرمر تعبتك معايا انا اساسا مجنونة
بس فعلا كنت قلقانه قوى جدا خالص على مدونتى
مرسى يامرمر ربنا يخليكى ليه واتعبك دايما معايا
وان شاء الله المره اللى جايه لما اجيلك مش هقعد قدام المدونات تصدقى قلة زووق منى معلش حقك عليه
ربنا مايحرمنى منك ابدا
---------------------------------
e7na
منورنى ياحمد
بس عارف الموضوع خد 24 ساعه فقط عدو كانهم سنه بجد
الحمد لله ازمة وعدت
تحيااااااتى ليك
------------------------------
خالتى فرنسا
ده نورك انتى مش نورى
بس ايه رايك هديت النفوووس تمام

لما تحبى تهدى النفوووس بين حد اى خدمة
انا موجوده

ربنا يخليكى يارب ومايحرمنى من زيارتك
----------------------------------
rack-yourminds
شكرا جدا لمرورك

ربنا يخليك
خالص تحيااااااتى

ra7eel said...

علاء سالم
اهلا بالشاعر الكبير قوى قوى اه اصلى لسه جايه من مدونتك والقصيده الاخيره جامدة قوى
خلاص يابنى انا بعد كده هبصم بالعشرة على كلامك
وبعدين كنت فرحان فيه ماشى ياعلاء بكره افرح فيك انا كمان
لا لا مش فى المدونه بعد الشر فى حاجه تانيه انا دعيااااااالك
شكرا ياعلاء عارفه انا دايما كده تعباك
ايوه انا عارفه تعبى راحه شكرا بجد ربنا يخليك
---------------------------------
روفى

اه فعلا احساس صعب جدا
ربنا مايوريه لحد
وكل واحد يحط مدونته فى عنيه

نورتينى روفى ربنا يخليكى
-----------------------------------
مكسرات سيد سعد
لاء الموضوع اصعب من كده
احساسك بالتوهه بجد
والضياع
يااااااااااااااه الحمد لله انى رجعت بجد

صديقى العزيز خالص تحياتى لك
---------------------------------
mask
ساااااامح اميرة بتدور عليك
هههههههه
الحق استخبى منها
وبعدين ايه الكلام الجامده عن اميره
طبعا مرمر كده
وبعدين يابتى انا واميره محدش يقدر يوقع بنا ابدا ابدا بتكلم فى ايه بس

رربنا يخليك ياسامح تعبتك بجد معايا

ra7eel said...

مصطفى السيد سمير
شكرا يامصطفى لزيارتك
تخيل المحاولات كانت هتقف
طيب انا اعمل ايه وقتها؟
خالص تحياااااتى
----------------------------------
اسامة
اه الحمد لله فعهلا ان لاقيت مدونتى تانى بجد

شكرا جدا لمرورك

خالص تحياااتى وتقدير
-----------------------------------
عزيزتى هدى
فعلا ياهدى انتوا اخواتى واصحابى بجد
وبعدين مش تقلقى هى خناقة بسيطه كده على الماشى بين سامح ومرمر حبايبى الاتنين اساسا
هههههه يبقى يورينى هيخلص من مرمر ازاى
هههههههههههههههههههههه
بس للاسف ياهدى انا لسه بدور على ساره
رحيل هى اللى هنا
ربنا يخليكى ياهدى دايما يارب
خالص تحياااتى
----------------------------------
البردية المصرية

يااااااارب مايحصل تانى لا عندىولا عند اى حد ابدا

نورتنى شكرا لزيارتك
خالص تحياتى

horas said...

فعلا والله

نورتى مدونتك يارحيل

only spot said...

الف حمد الله على سلامتك ونورتى بيتك التانى وربنا ميضيعلك مدونه ابدااا

only spot said...
This comment has been removed by a blog administrator.
klmat said...

عزيزتى ساره
حمد الله على السلامه .كنا حانكثف البحث
وكل القوات حاتتحرك عدت على خير

ربنا يسهل لك كل الامور يارب
تحياتى ودعواتى بكل الخير

Ragi said...

سارة انتى طيبة وجميلة والله كنت اقرا البوست وانا عاوز اشوف عملتى ايه فى نهاية الامر حاجة كده زى افلام الرعب
الحمد لله
اعملى
back up
لكل حاجة انتى تعنزى بيها على الكمبيوتر لان الكمبيوترات مهما كانت كويسة وحديثة لها مقالب مشهورة وياما ضاعت معلومات ومستندات مهمة

ra7eel said...

الرائع حورس

الله يخليك

بجد بكون مبسوطة لما بشوفك هنا


تحياااااااااتى
-----------------------------------
only spot

شكرا لرورك


ربنا يخليكى يارب


خالص تحياتى
-----------------------------------
كلمات

هههههه وهدورى بقى ميكرفون بقى وكده
تسلميلى يامرمر ربنا مايحرمنى منك

نورتى المدونة
----------------------------------
العزيز راجى
هو فعلا كان فيلم رعب بجد
انا فعلا مكنتش فاهمةاللى بيحصل

شكرا جدا لزيارتك ربنا يخليك

تحياااتى وتقديرى

dr.gesho said...

gmaهوا لامؤاخذه لما يكون فيه هكر و عايز يسرق الايميل بتاعك هيحذرك علشان تغيرى الباس ورد بتاعتك و تبوظى شغله؟ انا شايف انك تعبتى مصر كلها معاكى على الفاضى و خلى بالك من ايميلك بعد كده

بنت مصر said...

كل الدراما دي ..موقف لاتحسدي عليه يارحيل المهم ان المدونة رجعتلك تاني وربنا يحمينا كلنا من الهاكرز

مروة جمعة said...

ياااااه ...ألف حمدا لله على السلامة !ا
اسأليني انا ..مش عارفة افتح صفحة المدونة الرئيسية كل ما افتحها تقفل لوحدها هههههههههههه تخيلي الوضع عامل ازاي أصلا! بدخل من جوه ..يظهر الويندوز عايز ينزل من تاني !..ربنا يسهل
مبروك يا جميل

doha said...

hard times
تصدقى انا لومنك
كنت اتجننت والله زيك بالظبط
يمكن المدونة الواحد اتعلق بيها اوى
كنا هنتحرم منك بس ربنا ستر
خدى بالك بعد كدة
وهدى النفوس
واخدة بالك هدى هه
وحتت الهاكر دى تقريبا زى ماعلاء قال
اشتغالة ودخلت عليكى
تحياتى وحمد الله على السلامة مرة اخرى

فى القلب said...

ياخبر فعلا موقف عصيب

عموما ده عرفك مدى حبك للمدونه وغلوتها ورب ضاره نافعه


ربنا يحفظهالك

نورسين said...

شكرا فعلا لكل اللي اهتموا وتعبو معاكي
وبجد نورتي مدونتك يا رحيل

أحيي عنوانك بصف حالتك وتوتراتك في قلب الحدث

حبي الدائم

ra7eel said...

dr.gesho
وانا ايه اللى عرفنى يااحمد يعنى؟
انا اعصابى باظت ساعتها وخلاص
وباعدين مالك انت ومال مصر اللى تعبت حد اشتاكلك منهم
قول كده وانا كنت فرجت عليه عالم التدوين كله قال يشتكوا قال
شكرا ياحمد نورتنى
------------------------------
بنت مصر
اه تخيلى كل ده فى ساعات قليله جدا
انا عارفه انى كبرت الموضوع بس فكرت ان المدونه مش هتفتح تانى قلقتنى جدا جدا

فعلا ربنا يحمينا كلنا من الهاكرز

شكرا لمرورك تحياااتى
---------------------------------
مروة جمعة
الله يسلمك يامروه
ده انتى للى بجد نورتى مدونتك مش تبقى تغيبى كده
وشوفى حل لموضوع الصفحة الى مش بتفتح ضرورى

خالص تحيااااتى
---------------------------------
دوحا
الله يسلمك يامدحت

ربنا يخليك بجد

يااارب تطلع اشتغاله انا خلاص بقيت موسوسه

منورنى يامدحت دايما
-----------------------------------
فى القلب
بجد نورتينى والله
فعلا عارفنى قد ايه مدونتى غاليه عندى
ربنا يخليكى
شكرا لمرورك
خالص تحياتى وتقديرى
-------------------------------
حبيبتى نورسين
اه بجد انا كمان بحيهم جدا وبشكرهم
والاسم طبعا اساسا كان لروايه لشارلز ديكينز
بس بجد الساعات اللى عدت عليه حسيتها قوى بالمعنى ده
ربنا مايحرمنى منك يانورسين
عميق حبى لكى

خلود صلاح said...

نورتى من جديد يا ساسو حمد الله على السلامة يا جميل

ra7eel said...

خلود صلاح
تسلميلى يالولو ربنا يخليكى
نورتينى

youma said...

يــــــــــــــــاه
ايه الازعاج الي انتي فيه ده يابنتي
الحمد لله شكلي مكنتش ع الاين وقتها

بس بلاش توتر وركزي لما بتبقى متلخطبة شكلك بتبوزي الدنيا خالص

وبعدين الحقي سامح واميرة حرام عليكِ ليكونوا وصلوا للإسعاف ولا حاجة

عموما متبيقش تضيفي حد متعرفيهوش ع الياهو ارفضيه على طول وجعتي دماغنا

ra7eel said...

يوما
انا فعل مزعجه هههههههه
انتى عارفه ان بسبب اللى حصل واللى عملتو مع اميره وسامح
اميره اخيرا رست على اسم لمدونتها
انتظروا تهيؤات اميره قريبا
انا فعلا بقيا مش يضيف حد خالص مش اعرفه حرمت يوما
ربنا يخليكى وتجربى ازعاجى

حبى وتحياتى

sagittarus said...

الحمد لله عدت على الخير
ويلكم باك
احنا كنا هنزعل قوى لو فقدنا قلم زيى قلمك
سلاموو
متابع للآخر على فكره