Monday, December 17, 2007

تاج

محمود رئيس جمهورية نفسه مررلى التاج ده لاء دبسنى فيه مش مرره وكمان سيد سعد صاحب احلى مكسرات لما جاوب عليه مررهولى يعنى كده تدبيسه مرتين
وانا طبعا مقدرش ارفضلهم طلب لان بصراحه فعلا هما الاتنين من المدونين المتميزين
انا بشكرهم جدا
على فكره انا خدت التاج من عند رئيس جمهورية نفسه والصوره كمان عافيه بقى مش مررلى التاج معلش يامحمود لو مكنتش استأذنت بس كسلت ادور على صورة
----------------------
لو مكنتش مصرى بس عربى كانت هتبقى ايه نظرتك للمصرين واللى بيحصل فى مصر دلوقتى؟
اكيد هيصعب عليه الحال اللى وصلولوا وخصوصا ان لسه فى ناس عندها القدرة انها تهتف وتقول ان احنا مركز ريادة وقيادة لسه عايشين الوهم بتاع نصر اكتوبر الى الان
وهيصعب عليه سكوتهم واستسلامهم للواقع المهزوم اللى بيمروا فيه فى الفترة الحالية احساس بالغيظ من الصمت ده والشفقه عليهم من اللى بيحصل ليهم

ــــــــــــــــــــــــــــــــــــــــــــــــــ
لو كنت اوربى او غير مسلم هتبقى ايه نظرتك للعرب والمسلمين؟
اعتقد ان ده هيتوقف على الخلفية اللى عندى اساسا عن الدين الاسلامى يعنى لوا نا عندى نوعا ما خلفية عنه الاسلام هكون عندى حالة استغراب من التناقض اللى حاصل الوقتى لحال المسلمين والعرب
وان المشكلة فى الشعب ده مش فى الدين نفسه
ولو معديش خلفية نهائى اكيد هتكون نظرتى ان شعب عاطفى جدا وثرثار وسلبى ومعندوش قدره ان ياخد اى خطوة ايجابية فى مصيره
ـــــــــــــــــــــــــــــــــــــــــــ
لو قالوا لك انك بقيت رئيس جمهورية هتعمل ايه؟
مع انى مش بحب المناصب بس هجاول اتخيل
هشغل كل الشباب كل واحد فى المجال اللى يناسب قدراته ومهارباته الشخصية
وكمان هعمل برامج لاعداد تأهيل المدرسين عشان يكونوا قدوة للجيل الجديد مش مجرد ماكينه شرح
ههتم بكل المناطق العشوائية واوفرلهم سكن وشغل وعلاج
واعمل ملاجى لاطفال الشوارع واوفرلهم حياه كريمة يحسوا فيها بكرامتهم وبنفسهم عشان يكونوا فى يوم من الايام شخصيات سوية و يكونوا عناصر فعالة للمجتمع
وافرج عن كل المعتقلين
وافعل دور الاخصائين الاجتماعين واعمل مراكز متخصصة لحل المشاكل الاجتماعيه والنفسية للشعب كله
واخلى الناس تكون سعيده ومحدش يبقى عنده مشاكل ومحدش يشيل هم لحاجه

ـــــــــــــــــــــــــــــــــــــــــــــــــــــــــــــ
لو سمح لك برؤية الرسول صلى وانك هتقول كلمه واحده؟
هسأله عن رأيه فى المشايخ بتوع اليومين دول ؟ وعن الفتاوى اللى يبقولوها كل ساعة والتانية؟
ـــــــــــــــــــــــــــــــــــــــــــــــــــــــــــــ
لو كنا فى عصر اذدهار الاندلس كنت تتخيل نفسك ازاى؟
فى كل العصور بحب يكون ليه دور ايجابى وانى مكنش عايشه على هامش الحياة
بس اعتقد ان كم الاحباطات كانت هتكون اقل كتير من دلوقتى اكيد كان هيكون مجال الابداع اكتر

ـــــــــــــــــــــــــــــــــــــــــــــــــــــــــــــــــــــ
لو خطبت واحده او اتخطبتى لواحد واثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك؟
الاكيد ان يوم ما اخد قرار انى اتخطب لشخص ما هيكون هو كل حاجه فى حياتى وانه وجوده فى حياتى يغنينى عن اى حد فى الدنيا وانى اكون متأكده انى انا كمان بالنسبة ليه كده
ووقتها اكيد موضوع الانجاب مش هيكون مأثر اطلاقا وهختار انى اكمل معاه اى ان كانت الظروف
لان مش سهل ان احنا نقابل حب حقيقى فلازم لما نلاقيه نحافظ عليه قوى

ــــــــــــــــــــــــــــــــــــــــــــــــــــــــــ
لو طلعت على القمر هتكتب ايه؟
الدنيا مش مستهاله كل اللى بنعمله فى بعض عشانها
ـــــــــــــــــــــــــــــــــــــــــــــــــــــــــــــ
لو مررت التاج لحد وماجاوبش هتعمل ايه؟
لا لا لا انا عارفه اصحابى بيحبونى ومش هيرفضولى تاج من الاخر بقى يجاوبوا بالتى هى احسن ؟ انا شريرةاساسا وبشتغل امنا الغوله بعد الضهر يعنى اللى امررله التاج يخاف ويجاوب احسنله
ــــــــــــــــــــــــــــــــــــــــــــــــــــــــ
تمرر التاج لمين؟
احمد صاحب مدونه ارهاصات فكرية
علاء سالم
زهرة الكامليا
سلوى صاحبة طوق الحرية
سامح صاحب مدونه دمعاتى
ميرا صاحبة تهيؤات
هدى صاحبة فبدال ما نطق ياولا لاء نضحك
خلود صلاح
شيماء بنت مصرية
ووسمر وواحده شبهها
احمد صاحب ولاد النهاردة
-------------------------------------
تحـــــديــــث
--------------
الى كل اصدقائى وزوار مدونتى الكرام اليكم جميعا
اسمحوا ليه ان امرر هذا التاج لمن يرغب فى الرد على اسئلته
سيسعدنى حقا ان ارى اجابتكم عليه
وشكرا لكم جميعا

41 comments:

the others said...

ماشي ياساره خفت قوي وهجاوب بس انا مرعوبه دلوقتي شويه كده لما اعصابي تهدى هرد

DayDreaming said...

ليه بس كده يا ساره عملت فيكي ايه مقبوله منك يا ستي اول لما افضى وقت طويل كده يكفي الاجابات دي كلها هرد عليكي

رئيس جمهوريه نفسى said...

الغريب انى كنت مشغل اغنيه ساعه المطر لحظه ما دخلت البلوج عندك
اجاباتك منطقيه قوى بس يا سياده رئيس الجمهوريه تقدرى تقولى ليه حتجيب التمويل من فين بتاع كل حاجه

dr.gesho said...

جميل جدا التاج ده بس هوا الموضوع مش موضوع تمويل يا ريس الموضوع فى الناس نفسها للاسف احنا بقينا شعب فهلوى مستهلك بس علشان حال البلد ينصلح لازم حاجات كتييييييييييير تتغير الاصلاح مش من فوق بس دا لازم يكون من جميع الاتجاهات حصلنا الرعب يا امنا الغوله بس اوعى الجمبرى يعضك

alaa salim said...

السلام عليكم

إجاباتك جميله و الواضح من إجاباتك إن أحلامك وطموحاتك كتيره.

عموماً انا مارضيتش أدخل أعلق قبل ما أجاوب على التاج عندي .
بما إنك بتتحولي فالواحد يخاف على نفسه أحسن
هههههههههههههههه
تحياتي

princess dodo said...

ايه الإجابات الجميلة دى
جميلة بجد يا ساره
كل سنة وانتى طيبة
وعيد سعيد يا قمر


تحياتى

Doba said...

جميل التاج وأجوبته
كل سنة وانتى طيبة وبخير وسعادة

السنة الجاية تكونى محققة كل اللى بتتمنيه

تحياتى يا قمراية
هبة

EmY said...

كل سنه و انت طيب عيد سعيد

كاميليا said...

هههههه

كده برضو؟

ده انا بحبك ..

آلبس التاج على ايديكى؟

المهم انا كنت خايفة اوى من التاج ده، قريته فى مدونات كتير،، وكل مرة اقول لنفسى ،، لاااااا،، هو حد يعرفنى علشان يمرر لى تاج؟ الحمد لله انا فى آمان
بس كانت اوهام هههههههه

هافكر بقى ،، واجاوب ،، بس لما افوق من المفاجآة

بس لسة بحبك برضو

كاميليا

تائه في الدنيا said...

جميل جدا التاج
إجاباتك جميله و الواضح من إجاباتك إن أحلامك وطموحاتك كتيره

Rehab Mostafa said...

مش أول مره أدخل هنا بس أول مره أكتب تعليق .. كل ما أدخل مدونه ألاقي رحيل رحيل:) ربنا يكرمك ومايحرمش جوجل منك أبداً يارب
----------------
أولاً كل سنه طبعاً وانتي طيبه
ثانياً اجاباتك عجبتني أوي بجد وخصوصاً ان فيها شبه من اجاباتي وعجبتني اجابة لوكنتي رئيس جمهوريه

Ahmed Al-Sabbagh said...

كل عــام وأنتم بخير

عـــيد سعـــيد

أعــادة الله عليكم بالخير والبركــات

تحياتى

فرنسا هانم said...

كل سنه وانتى طيبه ياساره
وعلى فكره
الرسول صلى الله عليه وسلم
لو سألتيه
عن حال المشايخ
وفتواهم اليومين دول
مش هيعجبه احوالهم
اجابات جميله

klmat said...

اجابات جميله وذكيه
واسئله التاج مختلفه
كل سنه وانت طيبه
ودومتى بصحه وعافيه
تحياتى وسلامى

linda said...

اجابات روعة

كل سنة وانت طيبة ياقمر

Sherif said...

لذيذة الفكرة ..

أطالب بتمريرها على كل الأعضاء

Dr. Diaa Elnaggar said...

عزيزتي سارة

استمتعت جدا بإجاباتك الرائعة عن الأسئلة، ولكن اكثر إجابة توقفت عندها بالتأمل وسألت نفسي، لو كنت مكانها، يا ترى كنت حتسأل نفس الشيء، ووجدتني اتفق معك في سؤالك ووجدتني أكثر تشوقا لإجابة رسول الله صلعم، ولكنه أعتقد اعطانا الإجابة بمنهج الإسلام الفكري الذي تركه لنا وأوصانا عليه بألا نرجع من بعد ايماننا كفارا نضرب أعماق بعض، وهو للأسف الشيء الذي يحدث حاليا، حتى لو كان ضرب الأعناق لا يتم بالسيف في كل الأحيان.


لو سمح لك برؤية الرسول صلى وانك هتقول كلمه واحده؟
هسأله عن رأيه فى المشايخ بتوع اليومين دول ؟ وعن الفتاوى اللى يبقولوها كل ساعة والتانية؟

جميل جدا سؤالك يا سارة وانت محقة فيه تماما

عميق تحياتي

ضياء

e7na said...

كل سنه وانت طيبه يا ساره

كل تاج وانت بخير

doha said...

كل سنة وانتى طيبة ياسارة
وعيد سعيد عليكى
اجاباتك فى التاج
نالت احترامى وتقديرى
وكل سنة وانتى طيبة

خلود صلاح said...

ايه السكر دة يا خواتى
هو الى بنعمله فى الناس هيطلع علينا ولا ايه
كمان انا لسة مش خلصت من التاج الاول عشان يتبعتلى واحد تانى
:))
بس هجاوب طبعا مقدرش مجاوبش يا ساسو يا عسل
كل تاج وكل عيد وانتى طيبة
بس استأذنك طبعا اجاوب بعد الامتحانات على رواقه كدة يا قمر
(وردة)

ra7eel said...

The others

اهلا شيمو كويس انك خوفتى هذا هو المطلوب عشان تعرفى تردى

مستنيه اجابتك ياسكر وكل سنه وانتى طيبة
--------------------------------
Daydreaming

مرمر
اهو بقى عافيه بقى تقولى ايه مانتى عارفانى؟
ماشى ياست الكل لما اشوف هتفضى امتى ياست المهمة
المهم انا مش هسمح بأى تزويغ
منوره
---------------------------------
رئيس جمهوريه نفسه

شوف يامحمود طبعا انت صاحب الفضل فى انى عرفت البوم عزيز وجيه اساسا
بجد شكرا ليك طبعا على التاج وكمان انك عرفتنى الالبوم ده
وبالنسبة للتمويل معتقدش ابدا ان احنا بلد فقيره بالعكس طبعا بس احنا منهوبين
وطبعا لما امسك الحكم ان شاء الله احم احم هظبط كل الامور متقلقش هتخرب اكتر ماهيه
خاالص تحياتى
----------------------------------
dr:gesho

فعلا ياحمد فى جزء من المشكله فى الشعب نفسه على العموم
شكلى هعينك فى الوزاره ان شاء الله وسيبك بقى من الطب والجراحه والعمليات بتاعتك دى
كويس انك خوفت حاسيت انى مرعبه جدا
هااااااااا مين هناك
نورتنى

ra7eel said...

علاء سالم

وعليكم السلام
ايوه كده ياعلاء كويس انك خوفت على نفسك يابنى كده اسلملك
انا عارفه انك اول واحد جاوبت على التاج خلاص كده انت فى الامان
شكرا ياعلاء ربنا يخليك
-----------------------------------
برنسيسه دودو

منورانى يادودو
ووحشانى كتير ربنا يخليكى يارب

ويارب يكون عيد سعيد عليكى دايما
خالص مودتى وحبى
----------------------------------
دوبا

كل سنه وانتى دايما اسعد واطيب

شكرا ليكى تسلميلى يارب

خالص تحياتى وتقديرى
----------------------------------
ايمى

وانتى طيبه ياايمى

يارب كل عيد يكون دايما احلى عليكى

نورتينى

ra7eel said...

كامى حبيبتى

وانا بمووت فيكى
ليه الشرف انك تلبسى التاج على اديه
مستنيه الاجابات ياجميل
يالا بقى قدرك انك تعرفينى انا عارفه انى مؤذيه
هههههههههههههههه
وبجد متشوقه جدا لاجاباتك
منورانى دايما ياكامى
---------------------------------
تائه فى الدنيا

اهلا بيك فى اول زياره
شكرا ليك جدا
كل سنه وانت طيب
تحياتى
----------------------------------
رحاب مصطفى

نورتينى يارحاب
ههههههههههه
هو انا مزعجه قوى كده مع انى والله بقالى فتره كبيره مش بدخل مدونات
ومقصره مع كتير بسبب ظروف النت
على العموم ياستى اهلا بيكى عندى
وكل سنه وانتى طيبة
خالص تحياتى
----------------------------------
احمد الصباغ

كل سنه وانت طيب

يارب يكون عيد سعيد عليك

خالص تحياتى

ra7eel said...

فرنسا هانم

كل سنه وانتى بصحه وسلامه
ويارب تكون صحتك بقت احسن دلوقتى
المشكله فى المشايخ الايامدى انهم عايشوا الناس فى حاله بلبله وتشتت
ربنا يهديهم ويهدينا جميعا
تحياتى وحبى
-----------------------------------
كلمات

اهلا اميرة
كل سنه وانتى طيبه
شكرا على زيارتك
ربنا مايحرمنى منها
خالص تحياتى وتقديرى
-----------------------------------
ليندا

كل سنه وانتى طيبه واهل لبيا كلهم بخير
منورااااااانى
ووحشاااانى كتير
--------------------------------
شريف

اهلا بيك
طلباتك تنفذ فورا
انا همرر التاج لكل المعلقين والل يحب يجاوب مفيش اى مشكله
انا بس كانت المشكله عندى انى عارفه ان فى ناس مش بتبح نظام التاج
فبعته بس لاصدقائى اللى ليه عشم قوى معاهم وعارفه انهم مش هيضايقوا من التاج
تحياتى وتقديرى

ra7eel said...

استاذى الفاضل د. ضياء

اهلا بحضرتك
افتقدت تعليق حضرتك البوست اللى فات
واسفه انى مقصره بس مش فى الزياره انا بجى فعلا عندك بس مش بلحق اعلق النت يفصل عندى كتير جدا
حقا اعتقد اننا نتفق فى تلك النقطه تماما
ومتشوقه انا ايضا للاجابة جدا لحسم امور كثيره فى حياتنا
واتمنى لو مفيش عندك حضرتك مانع تجاوب على اسئله التاج
لو مفهاش رخامه منى يعنى
خالص تحياتى وتقديرى
----------------------------------
E7na

اهلا ياحمد
وانت بصحه وسلامه
مستنيه اجابتك على التاج
خالص تحياتى
---------------------------------
دوحا

كل سنه اونت طيب
والله انا مكسوفه منك لانى مش بعلق عندك
بس عايزه اعرفك حاجه
انا اساسا بخلاف ان النت مهيس اليومين دول او ده بقى العادى تقريبا

عندى مشكله فى فتح بعض التعليقات فى كذا مدونه ومنها مدونتك والمدونتين بتوع خلود صلاح ومدونه يوما
وكام مدونه تانيه بقالهم مده كده
بيجلى رساله مكتوب فيما معناها تقريبا ان الخدمه دى مش متاحه عندى
والمشكله ان الحركه دى حاصله فى مدونات انا بعزها جدا
ومش عارفه احل المشكله دى ازاى
ياريت اللى عنده حل للموضوع ده يفدنى ينوبه ثواب فيه
نورتينى بجد ربنا يخليك
-----------------------------------
خلود صلاااح

شوفتى اى خدمه
كما تدين تدان ياباشا
من الواضح انى انا عملك الاسود فى الدنيا يالولو
على العموم براحتك المهم تذاكرى الوقتى نفسى الاشاعات تبقى حقيقه
واعرف انك بتذاكرى بجد
سماح لبعد الامتحانات
وياريت لو عندك حل للمشكله اللى حكيتها فوق تعرفينى
من زمان مرخمتش عليكى فى التعليقات
ايوه ايوه عارفه انك مفتقدانى
شكلك كده كسرتى ورايا زير
نورتينى يالولو

walaa said...

كل سنه وانت طيبه ومبروك عليك التاج عجبتنى قوى اجابة رئاسة الجمهوريه

محمود الدوح said...

اجابات جميلة جدا

ويارب تحققى احلامك

وان شاء الله انا هحاول اخد التاج

خدى بالك انا قلت هحاول

youma said...

عجبتني جدا الجملة لي على القمر
واقعية
كل سنة وانتِ طيبة
عيد اضحى مبارك
حأبقى اشوف مشكلةالتعليقات دي ايه ;)

عمر بوك ستورز said...

فاصـل إعلاني :
زورونـا تجدون ما يسركم، وبأقل الأسعار، قائمة كبيرة من الكتب ، للعديد من دور النشر تحت سقف واحد، وبأسعار لا تقبل المتافسـة )

كل عيد وأنتم كويسين

A L A B D E L R H M A N . said...

مساء الخير اول حاجة
وكل سنة وانتى طيبة وعيد سعيد يارب


اممممم بالنسبة لحكاية التاج دي جميلة جدا بس في حتة رئيس جمهورية بحس كأني بقرا شعر قاله حسني مبارك زمان..!!

الكلام سهل جدا ياريت نكون واقعيين اكثر !


تحياتى

dr.Roufy said...

اجاباتك بجد عجبتني ياسارة
تحياتي ياقمر
:)

MKSARAT SAYED SAAD said...

كل كل سنة وانتى طيبة الاول
وشكرا على استلامك التاج
تحياتي

shreen said...

تخيلى يا ساره انهم مررولى التاج وانا ما كنتش اعرف ان المفروض ارد على الاسئله دى
انا فكراها حاجه شرفيه
انه نوع من الاعجاب بكلماتى
فبيدونى صورة التاج

كل يوم باعرف انى اصبت بنوع نادر من التخلف صعب الشفاء منه

على كل حال حاحاول ارد على الاسئله دى كمان كام يوم لحسن لسه منزله بوست جديد

اجاباتك يا رحيل غايه فى المنطقيه وتنظيم الافكار
وان كان بعضها يتطلب خططا مسبقه وموارد هائله

smraa alnil said...

عامة انا لسة عليا تاج برضه

بالهنا والشفا
وعقبال باقي التاجات
:)

Salwa said...

طيب يايا عم المرعب

إنت عزيزه عليا
وطلباتك أوامر
بس هتأخر في الرد
أوك
قلت أوك .. صح

إجابتك حلوة أوى
خصوصا وإنت ريس

إنت طيبه جدا

تحياااااااتي

Ragi said...

ازيك ياسارة وكل عام وانتى طيبة

زُمُرده said...

عيد سعيد عليك يا اجمل ساره
عجبتني اجاباتك كتير اوي
بس ساعات بسأل نفسي هو نهايه الأمل ايه
يعني هيتحقق ولا هنشوفه بيكسر زي كل شيء جميل في حياتنا
وياترى بجد لو في يوم اتحقق شيء من الاشياء دي لينا هنتصرف زي ماتخيلنا

ايه ده انا دوشتك وعماله افكر بصوت عالي
معلش الحق اجري لحسن احنا بقينا بعد الظهر
ههههههه
سلام

ra7eel said...

ولاء

كل سنه وانت بخير دايما

شكرا لمرورك
نورتينى
--------------------------------
محمود الدوح

متشكره ليك جدا
ربنا يخليك
هستنى اجابتك على التاج
خالص تحياتى
-------------------------------
يوما حبيبة قلبى

منورانى دايما
وانتى طيبه ياعمرى

تسلميلى دايما
-----------------------------------
عمر بوك ستورز

كل سنه وانت طيب
واهلا بالفاصل الاعلانى

ra7eel said...

A l a b d e l r h m a n

مساء الفل
وكل سنه وانت طيب
الكلام سهل فعلا عارف ليه؟
عشان اساسا الفكره عمرها ماهتحصل
بس ممكن تقول انها مجرد امنيات

شكرا لزيارتك
----------------------------------
روفى

اهلا بيكى
ربنا يخليكى شكرا ليكى

تحياتى وتقديرى
------------------------------
الصديق العزيز صاحب احلى مكسرات

كل سنه وانت بخير وسعاده
شكرا على ايه بس
انا اقدر برضه ارفضلك طلب
خالص تحياتى تقديرى
-----------------------------------
شرين

عادى ياشرين ولا يهمك ياما بيحصل
المهم مستنيه اجاباتك على التاج بقى
نورتينى
خالص تحياتى

ra7eel said...

سمراء النيل

اهلا ياانوج

نورتينى شكرا لزيارتك

تحياتى وتقديرى
--------------------------------
سلوى

منورانى
ايوه المهم تترعبى عشان تجاوبى على التاج
فى انتظار ردك على الاسئلة بس مش تتاخرى علينا
شكرا جدا ليكى
خالص تحياتى وتقديرى
------------------------------
راجى

انا الحمد لله بخير
كل سنه وانت طيب
شكرا لمرورك
خالص تحياتى وتقديرى
---------------------------------
زمرده

كل سنه وانتى بخير وسعاده
الامل ملوش نهايه
اما بقى ازاى هنتصرف فى حاجه كنا بنتمناها وحصلت
فدى بقى الله اعلم بيها
وبعدين دوشتينى ازاى بقى
انا اساسا عامله المدونه عشان نفكر بصوت عالى مع بعض
نورتينى بجد

rainbow said...

حبيبتى سارة

كل سنة وانت بخير وصحة وسعادة
وتكون 2008 افضل واسعد من اللى بتموت دى

التاج اجاباتك عليه جميله كما هو متوقع من انسانة حساسة وجميلة زيك

تحياتى وحبى لكى دائما

هدى