Friday, February 1, 2008

تجارب

انا بعتذر للجميع عن غيبتى طول الاسبوع اللى فات النت كان فاصل عندى من اسبوع من قبل مايفصل عند الناس كلها ههههههه
وبعتذر كمان لتقصيرى فى زيارتى ليكم فى مدوناتكم وان شاء الله ليه عوده تانى الحمد لله النت اتصلح
وشكرا لكل اللى زارونى الفتره اللى فاتت واللى كمان كانو اول مره يزرونى
وبجد بجد وحشتونى جدا كلكم ربنا مايحرمنى منكم ابدا ويخلينى دايما معاكم وفى وسطكم
بحبكم جدا


أنا :أقولك خوضي التجربة
صديقتي : تانى برده أنا كرهت الكلمة دي
أنا :الاستسلام والخوف ورفض التجربة من البداية أو القدرة انك تعيشيها وتكوني متوقعه جميع النهايات

سكتت صديقتي غالبا كلامي معجبهاش و مقتنعتش
وغالبا أنا مكنش عندي كلام تانى أقوله

اصل بصراحة القدرة على خوض التجارب من هواياتي ومن صفاتي المحببة لدى رغم ما قد تجلبه من مشاكل و ألام و ورغم إن الناس شايفاه جنان منى
المهم أنا جيت أفكر هل يا ترى أنا صح ولا الناس اللي هما اللي صح في انتقادهم ليه فقولت أشوف مميزات خوض

التجارب وعيوبها
================
أولا المميزات كما أراها أنا

1- تجاربي دي هي رصيدي من الذكريات يعنى مثلا لو ربنا ادانى العمر وعشت 50 سنه ممكن أكون عشت عادى جدا زى معظم الناس خلصت دراسة اشتغلت فى اى شغل اتجوزت وبعدين بقى عندى اولاد اربيهم وبعدين حياه مكررة بلا اى جديد أو إضافة ولو حبيت احكى مثلا لأولادي بعد كده أو احفادى عن حياتي مش هلاقى اى حاجه احكيها غير كلام مكرر وممل ممكن يسمعوا من اى حد فى سنى بس انا بقى مش عايزه كده انا عايزه اعيش حياتى بشكل مختلف

ويكون رصيدى من الذكريات مختلف جدا
-------------
2- انى مثلا مكنتش هتعلم حاجات كتير لو مكنتش خضت التجارب دى بنفسي يعنى فى ناس مثلا ممكن تتعلم من تجارب الآخرين بس أنا دايما ليه وجهة نظر تانية فى الموضوع ده فعلا ممكن تتشابه التجارب بين بعض الناس لكن أكيد التفاصيل بتختلف لان دى بتتوقف على طبيعة الأشخاص اللي في التجربة نفسها كل واحد ليه تفكير مختلف وليه وجهه نظره الخاصة في الحياة
---------------
3- متعة التجربة نفسها وانا عايشاها بكل تفاصيلها ازاى هحس بيها لو كنت مثلا فكرت أنى استفيد من تجربه تكاد

تكون في ظاهرها مماثلة لتجربتي
-----------------
4- قبل التجربة وبعد التجربة
+ قبل التجربة : المفروض 1+1= 2 أنا بقى مش بحب 2 دي غير لما اثبتها بنفسي حتى لو مطلعوش 2 المهم أنى عشت التجربة وأثبتها بنفسي
+ بعد التجربة : أكيد بيكون في إضافة جديدة سواء كان خبرة أو معرفة لناس جديدة أو أماكن جديدة أو حتى إحساس جديد (حب , حزن ,فرح ,جرح , حماس ) أو بداية حلم جديد أو نهاية لفكر معين واستبداله بفكر جديد المهم أكيد هيكون فى إضافة

----------------
5- حاجه كمان لاحظتها إن حكمي على التجربة قبلها بيختلف عن حكمي على الأمور داخل التجربة نفسها وأثناء أحداثها عن بعد التجربة فأكيد التفكير والتحليل ده بيفدنى على حكمي على الأمور بعد كده

------------------
6- حاجة كمان مهمة جدا ان مش دايما الأمور بتكون زى ما احنا مخططنلها لاء القدر بيكون ليه دور كبير في تغير مسار التجربة نفسها وإضافة أحداث جديدة ممكن يكون ليها اثر كبير في تغير حياتنا كلها
وبعدين هي الحياة إيه غير شوية تجارب فوق بعضها

-------------------------------------
ثانيا عيوب التجارب

1- إن بيكون في جدل ومشاكل كتير من الناس اللي حوليه لأنهم بيفكروا بمنطق وأنا بفكر بمنطق تانى خالص فدايما فى صدام
-------------------
2- إنى أوقات بوصل في تجربه معينه لمرحلة العند لا أكثر ولا اقل لإثبات ما أريده -قلما يحدث- لان أنا أساسا رفض الآخرين بيزدنى عند وإصرارا وقبولهم لأمر ما ارفضه أيضا بيزدنى رفضا
-------------------
3- اكتر كلمه اكرها مش قولنا لك هما مش متفهمين أساسا نظريتي في خوض التجارب فمعنى أنى موصلتش للهدف اللي أنا عايزاه ده بيكون بالنسبة ليهم فشل واني بذلت مجهود على الفاضى بس بالنسبالى مش كده
--------------------
4- أما العيوب اللي تخصني انا شخصيا فأهم عيب ان أكيد بيكون في رصيد من الأحزان لابد منه بيأتى نتيجة لمواقف كثيرة بمر بيها ومن خلال تعاملاتي مع شخصيات معينة ممكن أكون شايفها بشكل مختلف عن حقيقتها بس أكيد برده بتعلم
------------------------------
التجارب دي بتكون جزء من تراكماتنا وجزء من النقط السوداء التي تظل عالقة في قلوبنا في نهاية كل يوم يمر علينا
وفى تجارب بتكون باختيارنا وتجارب تانية بيفرضها علينا القدر والظروف

اعتقد اننى تعلمت من كل الاشخاص اللى مروا عليه فى حياتى حتى لو كان ليهم اثر سلبى بشكل مباشر او غير مباشر
---------------------------------
و دلوقتى بسأل نفسي سؤال هو أنا المفروض اسمع كلام اللي حوليه وأعيش حياتي بالمفروض والمنطق وبالشكل اللي الواقع بيفرضه عليه عشان أوصل في الأخر انى أعيش حياه عمري ماهحسها حياتي؟؟؟
ولا اصمد أمام الجميع وأصر على موقفى وأعيش حياتي كما أريدها أنا وحتى لو موصلتش للي انا بحلم بيه أكيد هيكفينى انى حاولت وميجيش يوم أحس بالندم انى كان المفروض أحاول و انى الفرصة جتلى وأنا عشان خايفه رفضتها واعيش أسيرة لخوفي ولكلام الآخرين؟؟؟؟؟؟
انتوا رأيكوا ايه ؟
وايه مميزات وسلبيات التجارب من وجهة نظركم؟

31 comments:

dr.gesho said...

هاىىىىىىىىىىىىىىىىىىىىىىى اول كومنت بعد الغيبه الطويله دى ؟ لا دا انا اكيد محظوظ
اولا حمدا لله على سلامة النت و يا رب يتوب عليكى من حبل الغسيل ده
ثانيا حمدالله على السلامه و نورتى البلوج و مبروك انك اخيرا قدرتى تكتبى بوست جديد من فتره طويله وان كان مش بنفس قوة البوستات اللى قبل كده و ده معناه ان لسه المود مش متظبط و لسه البال مشغول
اما عن التجارب فانا شايف ان مفيش حاجه بتعلم زى التجارب الشخصيه فى مختلف المجالات و مهما سببت الم و سواء كانت ايجابيه او سلبيه لازم بنطلع منها بحاجه و اكيد الاستفاده بتكون اكتر بكتير من التعلم النظرى او الحواديت
حمدالله على السلامه مره تانيه و يا رب مايقطعلك نت تانى

frake_ghost said...

السلام عليكمحمد الله ع السلامه
أنا بس بثبت حضور من خلال كيبورد تعبان بجد فى سايبركنت داخل علشان بوست مخصوص
وقلت أطل على رحيل زمانها ماتت ولا حاجه..ع العموم ل عوده مفصله بس غالبا نفس المنطق بتاعى بجد تقريبا خصوصا رغبه الرصيد من الذكريات والتجارب الى جانب كم الأحزان والتصادم مع المجتمع بلا طائل
لكن سنستمر هكذا فى دوائر الذات القسريه
تحياتى

أحمد المصري said...

أخيرا رجعتي..الحمد لله
لا متخافيش بإذن الله حتعيشي ميت سنة إن مكنش أكتر
بالنسبة للسؤال الأخير:
المنطق ده شيء يقارب المطلق..هوا مش مطلق بس في النهاية المنطق في الغالب بيودي لنتيجة واحدة و إن اختلفت طرق التفكير..أحيانا كتيرة بنبقى متفقين مع الناس اللي بنتجادل معاهم بس اسلوب تفكيرنا هوا اللي مختلف..من هنا بينشىء الصدام..و ده حصل معايا كتير جدا..بس في نهاية الأمر مش المهم إنك تمشي مع كلام الناس لمجرد إنه يحمل شيء من المنطق..احنا شعب مفوه وخبير إنه يلبس الحق بالباطل..المهم إنك تمشي زي ما عقلك بيقولك..و عشان عقلك يوصل صح يبقى لازم تعرفي ازاي واحد زائد واحد يساوي اتنين زي ما قلتي..خايفة على رأيك ليه بقى؟ اتكلي على الله هو قادر يوصلك للصح لو حطيتي في قلبك النية ..مش كده؟

rack-yourminds said...

بعتقد المفروض علي الانسان عندما يخوض تجربه ويخشي من فشلها ,بعتقد ان المفروض عليه ان يحكم عقله ويستشير ايضا اقرب الناس اليه ويطرح عليهم وجة نظره ويسمع ايضا وجة نظرهم ,بحيث في النهايه يخرج بقرار

واذا كان من استشارهم اختلفوا معه وهو يري ان وجهة نظره صحيحه ووجهة نظر اهله خاطئه يحاول ان يوضح لهم وجهة نظره ويسمع ايضا وجهة نظرهم لانه ممكن يكون علي خطأ واهله علي صواب ,بعتقد من خلال هذه المناقشه الهادئه بينه وبين الاهل اعتقد هيتوصل هو والاهل الي قرار سواء بخوض التجره ام لا

تحياتي وسلامي

summar said...

كويس انك رجعتى
كنت هقتلك
:)
عندك حق ان التجارب فعلا رصيد الحد
بس اهم حاجة تكون الناس بتتعلم فعلا
مش بس بتزعل
او تفرح

MKSARAT SAYED SAAD said...

صديقتى الجميلة رحيل ازيك
والحمد لله ان النت اتصلح عندك وهنشوفك تورتينا
التجربة
انا معاكي ان التجارب بتمدنا مجموعة خبرات بالاضافة طبعا للذكريات بس مش كل التجارب او بمعنى اصح مش كل شئ لازم نخش في تجربة لية علشان نستفيد منه انا فاهم قصدك اللي بتتكلمى علية تجارب معينة تكون خطورتها لو فشلت مش مضرة لدرجة انك ممكن تخسري رحيل نفسها
ودة اللي قصد ااكد علية علشان ما يبانش انك بتأكدي التجربة عموما
دة راي الشخصي
وكان اضح من عيوب التجارب اللي ذكرتيها انها مأكدتشي على النقطة دية
عارفة يا رحيل
احنا ممكن نبني معرفتنا وثقافتنا من حاجات تانية غير التجربة ولو انى بردة معاكي في ان كلمة تجربة كلمة اشمل ممكن يجي تحتها اي حاجة عايزن نعملها بنفسنا
بس ما يبقاش ان الخوض اي تجربة من المسلمات لأن كتير بتأتي الرياح عكس ما تشتهى السفن
تحياتي ومودتى

بنوته مصرية said...

ازيك يا رحيل حمدالله علي السلامه ياقمر


والله انا تقريبا زيك في كذا حاجه

ودائما بسمع من اللي حواليا .. انتي مقاوحه ، انتي مجازفة ، انتي مش بتسمعي كلام الناس اللي اكبر منك ، واخيرا من كتر العند وراسي الناشفة بسمع اني مليش كبير او بمعني مش بسمع كلام حد دلوقتي

وده نتيجه اني جربت اني اسمع كلام الاكبر مني ويختارو ليا حياه وللاسف موفقتش فيها

وياما جربت كذا تجربة وبطلع منها بي مشاكل وتعب قلب
بس في النهاية بتعلم من اخطائي ومبقررهاش

قدرت افهم الناس علي حقيقتهم
سبقت سني واكني عندي مش 27 سنه لاء ممكن تقولي تفكيري بقي 30 زياده 3 سنين يعني حلوين المهم اني ليا وجهه نظر مختلفة وبعمل اللي انا مقتنعه بيه ومحدش بيفرض عليا شئ

ده رئي انا ودي دماغي انا

بس انا دائما بقول لي نفسي دي حياتي انا وانا اللي هعشها مش اي حد تاني وكل واحد مش هتهون عليه نفسة

طالما مش بنغلط ولا بنعمل حاجه وحشة تغضب ربنا
خلاص
ميهمنيش اي حد


ومعلشي طولت عليكي
علي فكرة اسمك منور في صفحتي
خليني اشوفك دائما

youma said...

أولا واضح من البارت الاخير انك حاسمة الموضوع ومش بتطرحي سؤال مفتوح للجدل

ودا بيأكد القدرة على الاصرار في شخصيتك..

كملي زي ما انتي عايزة

كدا صح

دنيتى الجميلة said...

انا بجد اشتأتلك جدا
كنت كل شويه اشوف فى بوست جديد ليكى ولا لسه بعد وقررت الرحيل
لأنه كان هايل جدا
وفرحت بعودتك جدا
بصى بقى انا كان نفسى توضحى قصدك فى نوعيه التجارب
لان مش ممكن اى تجربه ممكن ادخلها بسبب انى عايزه استفاد منها
المهم تكون تجربه عارفه انى فى الاخر مش هكون مضرورة بعد الدخول فيها
انا بيبقى نفسى اخوض تجارب او دخول دنيا جديده مثلا زى دخولى لعالم للبلوجات بس زوجى مكنش قابل الفكره قلتله سبنى اخوضها
وادعيلى بقى بيعملش باسوردولا يقطع كابل النت
الله يخليكى

منى said...

رحيل حمد الله على السلامه
دايما موضوعاتك مثيره للجدل ده اجمل ما فيها
لانك بتخلينا نفكر
عموما
معاكى ان التجربه اللى بنعيشها بنفسنا بنتعلم منها اكتر من اللى بسمع عنها او نقراها
بس فى نفس الوقت مش كل حاجه لازم اعيشها بنفسى عشان اتعلم
اعتقد ان خبره اى حد هى مجموع تجاربه الشخصيه وكل الى سمعه وشافه وقراه فى حياته
ولو رفضنا ده كله وصممنا نعيش كل حاجه بنفسنا من الاول للاخر
يبقى ايه لازمه القراءه او الاستماع
اقصد ان الخبره تراكميه
وحكايه انى اسمع كلام الناس واخد برايهم
ده توقف على مين الناس دول؟
مصلحتهم ايه؟
تفكيرهم ايه؟
اخلاقهم ايه؟
واهم حاجه ان لما نسمع نسمع ونناقش نفكر
مش بس ننفذ او نرفض
تحياتى ايتها الفيلسوفه

Hadota .. حـدوتة said...

حمد لله على سلامتك يا رحيل
وربنا يجعل كلامنا خفيف على النت بتاعك ومش يفصل تانى

بالنسبة للبوست
انا عن نفسي شايفة الواحد يعيش حياته زى ماهو عاوز وزى منتى مخططة ليها

بس لازم دا يكون فى اطار بعض الاطارات عشان تعرفى تعيشي
يعنى اطار الدين مهم جدا
كمان العادات والتقاليد برغم ان ليا بعض التحفظات على بعض العادات والتقاليد اللى فيها نوع من التخلف او التعسف

غير كده طالما بتتصرفى صح ومبتضريش حد عيشي حياتك زى منتى عاوزة
حتى لو منجحتيش او موصلتيش لحاجة لقدر الله ساعتها لن تلومى الا نفسك
انما لو تقيدتى باراء الاخرين وظروفهم هيعدى العمر ومهما توصلى لنجاحات هتفضلى تندمى على العمر اللى فات ومش هتحسي انك حققتى حاجة

انا شخصيا بتمنى اعيش برده حياة مختلفة متكونش تقليدية ومكررة
نفسي تكون حياتى فيها تجدد وفيها حاجات تحفزنى على الحياة فيها

تحياتى يارحيل
موضوعك مميز

بحبك يامصر said...

اول زياره ليا اسمحيلى اشترك فى الموضوع بتعليق
انا شايف ان فعلا فى مواضيع لازم الواحد يخوض التجربه قبل ان يأخذ قراره

وشايف برده ان فى مواضيع ممكن الواحد يستفاد من خبرة اللى حواليه
واختلاف المواضيع طبعا هتختلف من شخص لاخر
لان فى موضوع بالنسبه لى انا ممكن اخد رأى حد قريب لى وممكن نفس الموضوع بالنسبه لشخص اخر مينفعش ياخد رأى حد فيه

arsenalwy said...

حمد اللة عالسلامة انا عضو جديد فى عالم التدوين شوفى موضوعى الاول ومستنى رايك فية

احساس لسه حى said...

عزيزتى
اكيد التجارب بتسيب جوانا اشياء كتير بس الطبع بتاع الانسان ساعات بيكون فوق اى تجربة فى الدنيا


وموضوع تسمعى كلام الاخرين ولا تعملى اللى بتحبيه وتحسيه من حق غيرك تسمعيهم وتفكرى فى كلامهم
ومش كل اللى بنحسه صح بس فى الاخر لازم بعد تفكير طويل

تنفذى اللى بتحسيه لانك انتى اللى هتلاقى ثمرة اى شئ تعمليه

تحياتى
سلام

walaa said...

رحيل ازيك عامله ايه الحمد لله رجعت بغد الغيبه الطويله دى
ثانيا فعلا التجارب اللى احنا بنعشها بتدينا خبرات كتيييره قوى وزى انت ما قلتى برده فى تجارب احنا بنخوضها مش بتدينا غير الم نفسى وعذاب وفقد
يعنى مثلا بابا يقولى متخوديش التجربه دى علشان الانسانه دى كذا وكذا طيب انا عاجبانى الانسانه دى مثلا اقول فى سرى لا انا هخوض التجربه علشان اثبت لبابا العكس يطلع كلامه صحيح فى النهايه
يعنى انا قصدى مش شرط كل التجارب نخضها بنفسنا يعنى ممكن نسمع كلام الاكبر مننا فى بعض التجارب وليست كلها لان مش شرط دايما كلامهم صح هتوفر عننا عناء كبير
وفى الاخر انا معاكى اللى احنا لازم نخوض التجارب بنفسنا هنتعلم كتييير فى حيانتا مع التحفظ على انفسنا من خوض التجربه لان ساعات تجربه بتبقى قاسيه قوى
تحياتى لك ولاء

Soooo said...

حمدا لله على سلامتك يا رحيل وحمدا لله انك مارحلتيش

بصي ياستي .. التجربه في حد ذاتها ميزه تضاف الي المميزات الي انتي قلتيها

لو بصينا في اي مجال في الحياه .. هتلاقي ان اول واحد عمل اي حاجه .. عملها من باب التجربه
وعشان كده غير ان التاريخ سجله لكل الناس اللي تيجي بعديه .. بيبقى نجاح الشخص نفسه في انه جرب حاجه جديده عليه .. ونجح فيها .. والناس عرفت بنجاحه ده

اكبر عيب للتجربه بقى .. ان ممكن لو واحد فشل في تجربه .. يقفش ويقول ياعم خليني زي باقي الناس

فهمتي حاجه؟؟؟




سلامووووووووووووز

linda said...

وحشتيني

بالنسبة للتجارب يارحيل أحنى لسى صغيرين ومش بنسمع كلام حد وبنحب نتمرد بأسم اننا عاوزين نجرب لوحدينا

بس دا مش مزبوط

احنى لازم نسمع رأي المجرب عشان اكتر خبرة مننا
وبعدين لازم نعمل يلي فيه العقل احيانا بنتوه ومش بنعرف ازاي ؟

وبنمشي ورا أهوائنا وبالأخر بنتعلم

انا نفسي مش عارفة انصحك بايه بالزبط

بس انا عن نفسي دايما بستخير وبجرب وبسئل وبالأخر كله مكتوب


تحياتي

دمعاتي said...

حمدالله على سلامتك وسلامة النت وسلامتي يارحيل
نخش في التجارب
حياة الانسان مجموعه من التجارب
بيتعلم شويه تجارب خاصة بالاخرين
وبعدين يخوض مجموعه تجارب خاصه به
ضروري جدا الاسان يمر بتجارب
لكن في نفس الوقت ميدخلش تجارب خاسره
يعني يستفيد من تجارب الاخرين قبل ما يقرر يخوض تجاربه
وبيني وبينك في مجتمعنا الشرقي دايما فيه قيود علينا
دايما متحدد لينا نجرب ايه ومنجربش ايه
يمكن دا فيه احيانا فايده
وكتير بيكون محبط

ra7eel said...

Dr gesho

اهلا اهلا فينك يابنى مختفى كده لا حس ولا خبر؟
وبعدين مالك وامال حبل الغسيل بتاعى انا بس اللى اقول على النت بتعاعى كده
مركز انت قوى معايا ياحمد وبتاخد بالك من حاجات غريبه
ههههههههههههههه
نورتنى بجد ياحمد
----------------------------------
Frake_ghost

وعليكم السلام الله يسلمك يامصطفى
بقى كده تقول زمانها ماتت ماشى ماشى على العموم مش تقلق
موصيه بنت عمتى لو مت تدخل تقولكوا ويكون البوست الاخير فى المدونه
انا موضوع رصيد الذكريات ده مهم جدا عندى
شكرا على وجودك الدائم يسعدنى جدا جدا
----------------------------------
احمد المصرى

اخيرا دى انا اللى اقولهالك
هما بتوع مدونين طب كل شويه كده يختفوا ويقولوا امتحانات
ده كلام برده التدوين اهم
هههههههههههههههههههه
انت كلامك صح المهم امشى ورا عقلى
فعلا هو كده
وحمد الله على السلامه ليك انت كمان عدت عوده قويه
تحياتى وتقديرى لك
---------------------------------
Rack-yourminds

شوف فى قرارت بتكون مرفوضه رفض تام لمجرد عادات وتقاليد
ومهما تتكلم فيها وتقول رايك هيكون مرفوض ومش هتوصل لحل يرضيهم او يرضيك يبقى ايه العمل وقتها؟.
شكرا لزيارتك

خالص تحياتى وتقديرى
---------------------------------
Summar

سموره
وحشتينى معلش بس بجد ظروف النت بقى انتى عارفه
كلامك مظبوط المهم تكون الناس بتتعلم فعلا

تحياتى وحبى لكى

ra7eel said...

Mksarat sayed saad

اهلا صديقى صاحب احلى مكسرات
انا معاك جدا ان مش كل التجارب ينفع نخوضها
لان فى حاجات بيكون معروف نتيجتها مسبقة مش محتاجه لتجربة
طبيعى جدا بكون حاطه تصور نهائى للتجربة حتى لو فشلت واكيد فى حد ادنى من الخساير اللى ممكن اقبل بيه
وفى تجارب اكيد خسايرها بتكون محسومه من قبل بدايه التجربه فتكون اساسا غير قابله تمام للخوض فيها

شكرا للتوضيحك للنقطه دى
خالص تقديرى وتحياتى لك
----------------------------------
بنوته مصرية

اهلا رودى منورانى

تعرفى بجد تعليقك ده كأنى انا اللى كتبته نفس اللى بيحصل معايا
ونفس التعليقات اللى بسمعها
عارفه وكمان خوضت تجارب هما اختاروها وموفقتش فيها
عشان كده قررت امشى بدماغى وبس وانا اللى اتحمل نتيجه اختياراتى عشان حياتى انا مش اى حد تانى
المهم فعلا تكون حاجه مش بتغضب ربنا
وطولى براحتك ولا يهمك البيت بيتك
حبى ومودتى
---------------------------------
Youma

حبيبتى وحشاااااااااانى جدا
اان فعلا الموضوع محسوم بالنسبالى بس اوقات بحتار

حبيت اعرف رايكوا وافكر وياكو بصوت عالى
هحاول بجد اكمل زى مانا شكرا جدا لتشجيعك

بحبك جدا
---------------------------------
دنيتى الجميلة

مرسى جدا على كلامك ويارب اكون دايما عند حسن ظنك
شوفى بالنسبة لنوعيه التجارب اكيد دايما بيكون فى حدود
الموضوع مش مطلق فى حاجات زى ماقولت فى رد قبل كده بيكون معروف عواقبها
ملهاش نتايج تانيه دى اكيد مرفوضه من البداية مش محتاجه ادخلها عشان استفاد
كويس انه سابك تخوضى التجربه عالم التدوين نور بيكى
يااااااارب يسبك تكملى ان شاء الله
ربنا يسعد ايامك كلها ويجعل دنيتك دايما جميله
-----------------------------------
منى

اهلا بيكى
الله يسلمك شكرا جدا على كلامك

شوفى من الواضح ان تقريبا فعلا كان المفروض احدد فى البوست نوعيه التجارب
لان الكل علق على الموضوع ده
شوفى اكدي طبعا فى ثوابت وحدود مش هنتعداها فى تجربه او قرار بناخده
وبالنسبه للخبرة التراكيه طبعا اكيد لازم نستفاد مناها
بس فى تجارب شخصية لازم نخوضها عشان بتحدد حياتنا بعد كده
اما بالنسبة للناس فغالبا المهم يكون تفكيرهم زى مش المهم قربهم ليه عشان اكيد دايما فى اختلاف فى وجهات النظر

بجد شكرا جدا لتعليقك وان شاء الله اشوفك قريب

ra7eel said...

حدوتة

الله يسلمك تسلمى لى
يارب فعلا يجعل كلامنا خفيف عليه
ههههههههههه

انا معاكى فعلا ان اطار الدين مهم وكمان لازم يكون الاساس

بس بعيدا عن العادات والتقاليد
نفس وجهة النظر اللى انا عايشه بيها انا كمان
حياتنا احنا مش حياة اى حد تانى

نورتينى ياحدوته بجد
----------------------------------
بحبك يامصر

اهلا بأول زياره ليك شرفتنى

فعلا الموضوع بيختلف من شخص لاخر حسب تجاربه السابقه وخبراته
والبيئه اللى اتربى فيها وكمان تطلعه للمستقبل كل ده فعلا بيأثر فى قرار خوض التجربه من عدمه
وكمان من النتايج

شكار لتعليقك
تحياتى
-----------------------------------
Arsenalwy

الله يسلمك
اهلا بيك فى عالم التدوين
ان شاء الله اكيد هجى ازورك

تحياتى لك
---------------------------------
احساس لسه حى

اهلا بك
لو من حقهم فعلا انى اسمعهم فالاكيد ان مش من حقهم انهم يفرضوا رأيهم عليه
فعلا مش كل اللى بنحس بيه بيكون صح فى الاخر بس برده حتى احاسيسنا الغلط
دى بنتعلم منها وبتشكل جزء كبير من تفكيرنا ومعتقدتنا

شكرا لمرورك
تحياتى وتقديرى
-----------------------------------

ra7eel said...

Walaa

اهلا ياولاء
معلش عارفه انى مقصره معاكى بس فعلا ظروف النت

انتى بتقولى ان فى تجارب بنخوضها مش بتدينا غير الم نفسى وعذاب
بس هى ممكن تكون الاعراض مصاحبه للتجربه فعلا وبنتعلم حاجات تانيه
اكيد يعنى مش الم وجرح وبس
لاء هتلاقى نفسك عرفتى نوعيه من البشر معينه وعرفتى طباعهم عشان تتجنبيهم بعد كده فى حياتك او على الاقل تحرسى منهم
فعلا فى اوقات تجارب بتكون قاسيه جدا بس صدقينى بتقوينا جدا جدا

شكرا جدا لمرورك ولتعليقك

خالص حبى ومودتى
-----------------------------------
Soooo

احلى عجوز عنده 30 سنه
منور التدوين كله ياباشا

اه فهمت والله
عارف فعلا العيب اللى انت قولته ده مهم جدا
انا الناس لما تفشل يجيلها احباط وتقرر عدم خوض التجارب وتستسلم للواقع
بس اعتقد ان فى نوعيه اقوى من كده وبيكون عندها اصرار على النجاح

نورتنى ياسوووو
وفى انتظار مذكراتك
--------------------------------
Linda

شوفى حبيتى انتى ممكن فعلا تكونى لسه شويه صغيره

بس عارفه انا مشكلتى بجد انى من صغرى مش بسمع الكلام غير اللى فى دماغى
اوقات بحسه عيب واوقات بحسه ميزه
على العموم هى بتختلف من حد للتانى

ربنا يوفقك يارب فى كل حاجه بتعمليها
-----------------------------------
دمعاته

اهلا ياسامح الله يسلمك
افرض تجارب الاخرين دى اختلفت فى التفاصيل الشكل الخارجى ليها واحد بس خلفيات كل شخص بيتفرق

صعب ان احنا نتعلم من تجارب حد ممكن تكون مشابهه بس الظروف تختلف وتنجح تجربه كانت فشلت

تحياتى لك سامح

كاميليا said...

هو أنا المفروض اسمع كلام اللي حوليه وأعيش حياتي بالمفروض والمنطق وبالشكل اللي الواقع بيفرضه عليه عشان أوصل في الأخر انى أعيش حياه عمري ماهحسها حياتي؟؟؟
ولا اصمد أمام الجميع وأصر على موقفى وأعيش حياتي كما أريدها أنا

الحبيبة رحيل

القصة مش انك تسمعى كلام من حولك
القصة هى الصح فين؟ وتجنب الدخول فى ازمات والتعرض للجراح فين..

من حولك بالتأكيد نصحونك.. من اجلك.. من اجل حبهم لك

أنا شخصيا.. اخدت بنصيحة من حولى
وغيرت حاجات كتير فى تفكير
ومشاعرى

ونظرت من وجهة نظرهم.. وخوضت التجربة التى نصحونى بها.. ولازلت فى اول الطريق فيها
ولكنهم كانوا على صواب

الحقيقة
احيانا يروا مايخفيه عنا وهمنا

كل ما عليكى
هو ان تجلسى فى مقعدهم للحظات
وتفكرى بمنطقهم
وتستفتى قلبك

ستكتشفين حقائق كثيرة

تمنياتى لكى التوفيق والسعادة

كاميليا

only spot said...

رحيل
شوفى يا ستى بما انى مؤمنه ان الانسان عمره ما هيتعلم الا اذا جرب هو وخاض التجربه لوحده وفى النهايه عليه انه يصدر الحكم بالنجاح او الفشل وبما اننا فى مجتمع ابوى بيعمل على تطفيل الكبار بنحس اننا من خلال حياتنا عايشين فى صراعات ما بين عند ورغبه فى اثبات الذات وبنحس اننا لازم نخوض مجموعه من التجارب كى نثبت للاخرين اننا كبرنا واستطعنا اتخاذ قرارت
ولكن من المفترض فى سنه الخلق ان الانسانيعيش كى يبتلى ويختبر فى كل شئ وعليه ان يختار طريقه والا ماكنتش نزلت الايه القائله وهديناه النجدين
لذلك انسان بدون تجارب صفر على الشمال
بس برضه ربنا حبانا بالعقل والقلب او البصيره لكى يكونا جرس الانذار حتى لا نعرض انفسنا للتهلكه
مميزات وعيوب التجارب تساوى مميزات وعيوب صاحب تلك التجربه ونقاط الضعف لديه بمعنى انها مساله نسبيه متغيره من شخص لاخر كل حسب شخصيته
رحيل موضوعك حلو اوى وبجد حاولى ان العناد والاصرار على اثبات وجودك للاخرين مياثرش على قرارك بخوض اى تجربه ولكن نظرتك البعيده لدرجه استفادتك وضررك من تلك التجربه
واخيرا امر الله الرسول صلى الله عليه وسلم قال له وشاورهم فى الامر
واعتقد ان ده رد على تساؤل لكى فى بدايه البوست والى مفاداه هو احنا متضطرين اننا نمشى براى الاخرين ولا لا
فى رايى اننا نشور الى حواليا والى طبعا مصدر ثقه لنا ومن ثم لينا احنا القرار هل رايهم ينطبق مع ارءنا ووجهة نظرنا وكذلك رغبتنا ام لا
تمنياتى لكى بالتوفيق والنجاح الدائم

3ala asm masr said...

عيشى حياتك زى ما انتى عايزه تعشيها
خططيها زى ما انتى عايزه تشوفيها
احلمى وحاولى تحققى اكيد مش كل حاجه عايزنها بنطولها
بس ايه قيمة حياتنا لو متعبناش وحاولنا
وايه قيمتنا احنا وفين راينا ووجهة نظرنا لو مشينا على خط رسمه لينا ناس تانين
تحياتى على البوست المهم جدا


شاركونا وروقوا مصر
http://hnro2masr.blogspot.com/

klmat said...

عزيزتى ساره
الف حمد الله على سلامتك وسلامه النت
احساسى انك حاتعملى اللى فى دماغك فى كل الاحوال

عن نفسى انا بحب اسمع اراء الللى حواليا
واقرأ وبعدين اقلبها فى دماغى وبكون عامله حسابى فى الاراء اللى اصحابها بيتمتعوا بالصدق والذكاء وطبيعتهم قريبه منى وبعمل اللى احس انى مرتاحه له
حتى لو كان مش متفق مع باقى الاراء
اللى يسعدنى قد يشقى منه الأخرين
طالما قرارى ليس له تأثير الا على نفسى

الموضوع مش تجارب احكيها او رغبه فى المغامره الموضوع قرار يسعدنى وتجربه عوامل نجاحها عاليه
مواضيعك دايما جميله ومميزه
تحياتى القلبيه

Sola said...

hey
i changed the link of my blog,this is the new link,

http://egyptiangirl-1981.blogspot.com

chao

Sola said...

bosy ba2aana geet hena kteer o 2aretlek kteer kaman bas 3omry ma sebt commet el marady mesh 2edert amsek nafsy bas ya reet yekn 3andek se3et sadr 3ashan ana har3'y b sara7ah
bosy ya gamiela
el 7ayah kolaha tagarob o dayman betet3alemy mn 2ay tagrobah kelma gededah insha allah 7ata kelma gededah,ya3ny enty lama tet3arafy 3ala 7ad gdeed akeed betestafedo mn tare2et tafkeroh aw 7ata mn aslob y7ayatoh aw absat 7agah mn derasto bas nase7ah meny balash te2araby lel nas awy dayma 7'aleky 3ala 7azar mn kol el nas ya3ny dont trust anybody o dah sada2eny mn tagarob kteeer awy ana maree beha f 7ayaty,bosy ana sa7ee7 3andy 26 bas wgody fe usa by myself akeed bey3alem el ensan 7agat kteer awy 3ashan bat3amel ma3a genseyat kteer o ma3a deyanat aktar o 7ata el lo3'at kteer awy o aslob 7ayah mo7'talef tamama2 3an elly shofnah fe asr,so ay tagrobah tegelek fe 7ayatek 2et3alemy menha o 2estafedy 3ala 2ad ma ta2dary,3arfa el nas hena f usa betfakar ezay ana ha2olek,fe wa7da sa7bety awy she is lebaness bas she never been there,and by te way she is she3a and im sunni so we totally diffent anyway 3arfa el bent deh faga2a 2aletly 2eh
she said to me do u know why i choosed u as my best friend,so i siad may be bcoz im nice person and kind,she said she dont care about these things bco these thoigs will never help her when she has a real problem so i said to her do0nt tell me bcoz of money coz i have no money so she loughted and said nooo,and then she said 2 me i choosed u bcoz u r so smart person and uu thik ,so i said so what everybody think she siad no but u think in a very smart and cevelkized way so i can learn from u and in this case im gonna waiste my time by hangeing out with u bcoz im gonna learn somthing new everytime
2ah walahy dah elly heya 2aleto,shayfa el nas hna betfakar ezay,3arfa ba2a ana mn el kalam dah 2et3alemt 7agat kteer awy o menha en el ensan lazem ye2abel fekr gdeed o yet3alem o yegarab toul ma howa 3ayesh
ya rab makonsh 7'ana2tec b kalamy wala 7aga
salam ya gameila

rainbow said...

الصديقة الجميلة سارة

تساؤلاتك الاخيرة لن تغير من قناعاتك اى شىء لكنها وسيلة جميلة للتفاعل مع وجهة نظرك

كلماتك عزيزتى عن مميزات وعيوب التجربة لا يمكن تعميمها على كل التجارب فهناك اشياء لا يمكن تجربتها او محاولة وضع قواعد امان للدخول فيها ثم الخروج بسلام اذا لم ينجح الامر .. التجارب عموما مطلوبة فهى التى تصنع المعرفة وتكون الشخصية وبها نستطيع عمل رصيد نسحب منه عند اتخاذ القرارات المصيرية

انا معك تماما فى ان وسائل الضغط على المرأة عموما والشرقية خصوصا لتوجيه قراراتها نوع من افضل البيئات لنمو العند والرغبة المكبوتة فى خوض اكبر كمية من الرفض ثم التجربة .. ولا افهم لماذا لا يحاول الآباء زرع الصح والخطا داخلنا ثم توجيهنا توجيهات طفيفة تضعنا على اول طريق الاختيار لا افهم سبب تلك السيطرة شبه الكاملة تحت مسمى الحب والخوف علينا من المجهول

بينما كل مجهول لابد ان يثير الخوف وكل ممنوع لابد ان يثير الاصرار على فعله

معك فى اشياء كثيرة تحدثتى عنها بخصوص التجربة فقط لا تجعلى جملة يكفينى شرف المحاولة تأسرك فلا يمكن المحاولة فى كل الاشياء

عميق حبى وخالص مودتى

هدى

ra7eel said...

كامى عزيزتى
اهلا بيكى

شوفى ياكامى انا شخصيا معرفش اعيش من منظور الاخرين لحياتى لاسباب كتير
منها اساسا الاختلاف الدائم فى وجهات النظر وتحليل الامور
يعنى انا ممكن اكون صح وهما كمان صح
طيب ساعتها اعمل ايه طبعا اعمل الصح اللى انا شيفاه عشان فى الاخر هى حياتى
وربنا يوفقك دايما فى طريق تمشى فيه
طمنينى عليكى
تحياتى وحبى
----------------------------------
Only spot

اهلا شيمو ايه التعليق الجامد انتى فعلا كلامك صح ومنطقى والانسان من غير تجارب صفر على الشمال
المشكله بجد بالنسبالى انى مختلفه تماما فى وجهات النظر مع اللى حواليه بسبب عادات وتقاليد مجتمع
انا رافضها تماما
فمجرد المشوره بتقلب بمشكله دايما
فقلتها احسن
منورانى بجد
----------------------------
3ala asm masr
اهلا هنوده

صح فعلا ايه قيتنا لو محاولناش بنفسنا

عشان نكون احنا مش حد تانى
هحاول دايما انى اصمد امام الجميع
ويارب قريبا اكتب بوست عن حاجه جايز اقدر اعملها

خالص نحياتى وتقديرى

ra7eel said...

Klmat
عزيزتى اميرة

الله يسلمك تسلمى
احساسك صح فعلا
شوفى ياميره انا كل اللى حواليه بيفكروا بنفس ونفس الطريقه
حتى اصحابى القريبين
صعب انى اخد رأى حد عشان بكون عارفه مقدما اللى هيتقال
فخلاص وصلت لمرحلة انى بقصر مع الجميع
شكرا جدا لرأيك وتعليقك
تحياتى وتقديرى
--------------------------------
Sola

اهلا بيكى فى اى وقت
شوفى انا معاكى فعلا ان تجربة السفر فى حد ذاتها لاى مكان بره مصر
ممتعه جدا ومفيده جدا جدا بنتعامل مع تقاليد مختلفه وجنسيات ومجتمع تانى خالص
اكتر حاجه فعلا ممكن الواحد يستفيد منها
انا امنيه حياتى فعلا اسافر بره مصر
حاولى تستفديى من وجودك فى امريكا عشان لما ترجعى
اكيد هتندمى على انك رجعتى فى يوم من الايام

شكرا ليكى
--------------------------------
صديقتى العزيزه هدى

ههههههههه انا واضحه قوى كده انتى كمان شايفه ان التساؤل الاخير مش هيغير حاجه
شوفى ياهدى انا اوقات بحس ان رغم عندى ودماغى الناشفه بحسها ميزه اوقات لانى للاسف فعلا مش بعرف اسمع كلام اان مش مقتنعه بيه بجد مش بقدر اعمل غير اللى انا عايزاه
وانتى نفسك قولى الاباء والاهل والمجتمع والعادات والتقاليد كل ده بيحكمنا
ويربى فينا رغبه للعند
انا واثقه ان مش كل الاشياء قابله للتجربة من البداية
انا بكلم عن تجارب الخوض فيها لايمثل ادنى مشكله لدى بل قد يتعارض فقد مع بعض العادات والتقاليد
ولكن يبقى الدين دوما مرجعيتى

شكرا لكى صديقتى العزيزه