Friday, February 8, 2008

اخيرا اتقابلنا مدونين الدقهلية


امبارح اخيرا اتقابلنا من شهر اكتوبر اللى فات من يوم ماعملت المدونه وانا كان نفسى اجمع مدونين الدقهليه مع بعض ونتقابل ويكون فى تصور لينا ايه هو معرفش؟
المهم انا مكنتش اعرف من مدونين الدقهلية غير علاء سالم صاحب مدونتى علاء سالم واحمد عوض صاحب مدونة ارهاصات فكرية وبدأت بعد كده اخد بالى من بروفيل اى مدون او مدونة واول لما الاقى حد من الدقهليه اغلس عليه واعرض عليه الفكره وخلال الفتره دى غالبا معرفتش كتيركانت اولهم خلود صلاح صاحبة سريالى ودرما طبعا لما روحت مدونتها وعرفت انها من الدقهليه ماصدقت وخصوصا انى لما اتكلمنا على الميل حسيت انها مجنونة جدا وانا بمووووت فى اى حد مجنون وبعدها بفترة عرفت سلوىصاحبة طوق الحرية وتأملات قلب غلست عليها برده وخدت اميلها واتعرفت عليها وكنت سعيده جدا ومن سلوى عرفت منى صاحبة احاسيس بس من خلال المدونات بس وبعدين سامح دخل عالم التدوين لاء مخدتش اميله كان معايا من زمان عشان احنا اساسا قرايب
وبعدين بس خلاص دول تقريبا الناس اللى كنت اعرفهم من الدقهلية واتفقت معاهم ان احنا نتقابل فى اجازه نص السنه وكل شويه حد يسألنى ايه التصور اقولهم معرفش بجد مكنش عندى تصور غير ان احنا نتقابل ونتعرف على بعض وبعدين نفكر سوا وقد كان اتقفنا على معاد والدنيا مطرت واتأجل ومعاد تانى واتأجل قولت اه احنا ابتدينا مبينلناش اجتماعات
واخيرا وبعد طول انتظار اتقابلنا امبارح الخميس فى الجامعة
بداية كده ناخد الغياب سامح صاحب دمعاتى
وسلوى صاحبة طوق الحرية اعتذروا وكمان احمد خير الدين صاحب مدونه ولاد النهارده من دمياط كان معانا من بدايه الفكرة
وانا وخلود كنا اتفاقنا على حاجه شريرة نعملها كده ان احنا نعمل تاج غلس شويه خلود سمته كرسى الاعتراف نسأله لبعض وكل حد فينا يجاوب عليه هههههههههههههههههههههههه المهم كان معادنا الساعة 12 ولا حد فينا راح الساعة 12 انا وخلود وعلاء سبحان الله اتأخرنا ورحنا فى نفس التوقيت طيب ماكنا من البدايه اتفقنا على معاد متأخر شويه واحمد عوض صاحب ارهاصات فكريه كان قايل اساس انه هيتأخر شويه اتقابلنا الساعه واحده كده
البت خلود اساسا انا كنت هموت واشوفها كانت من اوائل الناس اللى عرفتها عن طريق المدونات كنت بحسها عسل قوى ومجنونة كده ولذيذة وبعدين كانت لمضه قوى بس هى مخدعتنيش من زمان قالتلى خلود على النت حاجة واللى فى الطبيعه حاجه وانها هاديه اساسا قولت لاء اكيد مش للدرجادى مانا متعوده بقى على لولو اللى على النت تخيلوا اول كلمة تقولهالى اول ماتشوفنى انى قصيره بقى كده ياخلود عشان ربنا مديكى شويه طول هههههههههههههه
المهم البنت بصراحة كانت هاديه جدا ياجماعة ومسالمة قوى مش خلود الشريره اللى انا اعرفها من النت خالص هى شوية وبدأت تاخد على الجو شويه خلود دى بقى شربات بجد انا بموت فيها اساسا من قبل مانتقابل ولما اتقبلنا حسيت معاها كده بألفه وكأننا نعرف بعض قبل كده, دخلنا الجامعة كان علاء مستنينا
وبدأنا التاج بعلاء والله صعب عليه تخيولوا خلود اساسا جايبه اسئله فى صفحتين وشويه وانا كنت عامله صفحه تقريبا لاء واخرتها طبعا احنا كمان جاوبنا عليه مهو طباخ السم بيدوقوا
علاء سالم بجد انا شايفه انه احسن احد انا بقرأ ليه شعر فى عالم التدوين ودماغه حلوه بس الاخ متشائم حبيبتين مش عارفه ليه؟ اقترح ان احنا نعمل مدونة لمدونين الدقهلية سوا وانا كمان كنت بفكر بصراحة فى نفس الفكرة بس لسه مش حطينا تصور
وبعدين قعدنا خلود على كرسى الاعتراف انا مردتش ارخم عليها بصراحة زى ماعملنا فى علاء واحمد ,بنات بقى زى بعض اصل من بحب التفرقة
وشويه واحمد عوض جالنا بس علاء استأذن ومشى, وعلى طول قعدنا احمد على كرسى الاعتراف ههههههههههه لاء وعلاء قبل مايمشى بيقوله ربنا معاك خد دورك بقى
بيعجبنى فى احمد قوى طموحه دماغه حلوه بجد
كان جاى امبارح متعصب قوى بسبب اجراءات بتاعة مسابقة الازهر طبعا طلعوا عينه وطبعا انا بقى فضلت اشحنوا واديلوا الوصايا العشره للتعامل مع بتوع الازهر بما انى خبرة سنتين وياهم شريرة انا عقدتوا اكتر ماهو متعقد من التدريس وسنينه هههههههههههههههههههههههههههههه
اها وجه عليه الدور عشان اقعد على كرسى الاعتراف قولتلهم كفايه بقى كده اتاخرنا نقوم نروح بس مين ده طبعا معرفتش ازوغ
على فكره ان شاء الله انا هنزل اسئله التاج وكل حد فينا هيجاوب عليها فى مدونته
والناس اللى غابت هتجاوب عليها برده بجد اليوم كان ناقصهم كان يوم ظريف فعلا
والغريب بقى ان ليله مانا مسافرة المنصوره عشان نتقابل عرفت اربع مدونات من الدقهلية طبعا كان صعب انهم يجوا بس بجد سعيده انى عرفتهم ويارب يكون فى تواصل بنا
وان شاء الله هيكون فى يوم تجمع فى اول شهر مارس فى القاهرة هيكون فى مجموعة من المدونين من محافظات مختلفة بجد حاسه انه هيكون يوم جميل جدا فى ناس كتير نفسى اشوفها واتعرف عليها

29 comments:

princess dodo said...

كان نفسى اكون معاكو ياقمر
معلش بق مرة تانية
تتجمعو فى القاهرة وتتعوض
ان شاء الله

.
.
تعبتك معايا اوووووى

بس فعلا كان يفرق معايا كتير
إنى اعلق عندك

.
.

سلامى ليكى

احساس لسه حى said...

عزيزتى
احنا حتى فى المدونات هنقلبها اهلى وزمالك مدونين الاسكندرية والصعيد والدقلية حتى الاحساس بقه ليه لون ومكان

اوعى تزعلى ده مش نقد
ده سؤال وتساءل ومش مختلف معاكى فى شئ
تحياتى
سلام

أحمد المصري said...

يعني حبكت في شهر مارس في الإمتحانات..ليه الزعل ده..بس بقولك أي حاجة تانية بعد الإمتحانات الغبية بتاعتنا دي ابقى نبهيني انا بقولك اهه ..نفسي اقعد في لقاء ظريف زي ده من زمان..
---------
بالنسبة لموضوع مدونة للدقهلية فالفكرة كويسة..بس أنا شقت حاجات كتير زي دي و فشلت بصراحة و ده مش تفويل ولا حاجة ربنا يوفقكوا..اهم حاجة بس النظام النظام النظام و الإلتزام..يعني تبقثى المدونة الجديدة دي زي مدونتة كل واحد فيكو يشتغل فيها بنفس الحماس..و إن شاء الله ربنا حيوفقكوا.
سلام.

ra7eel said...

برنسيس دودو

اهلا اهلا ببرنسيسه التدوين كله

ياريت بجد نشوفك فى اليوم اللى هنتجمع فيه فى القاهره
تعبك راحه يادودو
انا بفرح بجد لما بشوف تعليقك

شكرا ليكى
حبى لكى
---------------------------------
احساس لسه حى

لا لا لا اهلى ايه وزمالك ايه ؟
انا اساسا مش بحب الكوره نهائى
ههههههههه
شوف الموضوع مش موضوع تكتلات بس احنا من محافظه واحده والمسافات بينا ممكن تكون قريبه نسبيا سهل ان يكون فى تواصل بس ادى كل الموضوع
انا مش زعلانه ابدا
واهلا بيك فى اى وقت
تحياتى وتقديرى
------------------------------
احمد المصرى

يادى الامتحانات هو انت هتخلص كليه امتى وتترحم بقى من الفيلم ده
ربنا يوفقك يارب
ان شاء الله لو هحددنا معاد تانى اكيد هعرفك انا اتمنى انها متكونش مره واحده وتتكرر

اما بالنسبه للمدونة فربنا يسهل هنحاول نجط تصور ويارب تنجح الفكره

شكرا جدا لمرورك
خالص تحياتى وتقديرى

the others said...

ازيك يا رحيل وحشاني بجد
حلوه قوي الفكره مستنيه اشوف التاج وردك عليه بالتوفيق

دوحة said...

سارة
الحقيقة يعنى
مدونينالدقهلية كلهم عشرة على عشرةوالله
كفاية انى طلع من عندكم النجم
عمروزكى
قلب الاسد
الحقيقة ماشاء الله ناجحين فى كل حاجة
ماشاء الله

خلود صلاح said...

كان يوم حلو اوى

والجو كان حلو جدا

خلى الكسلانين يتغاظوا

linda said...

انا بصدق غرت منهم

وحفضل غيرانة كدا على طول:(

ههههه

بهزر

سعيدة انك عرفتيهم بس سيبيلي مكان جنبك

Sherif said...

ra7eel

أرجو ان تحجزى لى مكان فى أول الحاضرين للقاء القاهرة

فقط اذكرى المكان والساعة

فكرة رائعة

dr.gesho said...

بقى كده؟ اتفاقات و اجتماعات و مقابلات من ورايا ماشى ماشى ان شاء الله هبلغ عنكوا امن الدوله و امريكا كمان هاقول انكوا تبع تنظيم القاعده و ان ابن لادن يبقى جوز عمتك و نتقابل فى المعتقل بقى

صالح سعيد said...

بصراحه فكره ممتازه
وانا مستعد انضم ليكوا
بس انا مدون شرقاوى
خلاص نعمل نظام مسابقه تدوينيه بين الشراقوه والدقهلاويه
قلتوا ايه
مستعدين
احنا جاهزين

summar said...

من غيري :(
بس هتتعوض لازم
هنتقابل مرة برده اكيد
بتكون حاجة جميلة والله:)
على فكرة انا حاسة ان دودو خليتك تشيلي الاغنية
:)
علشان تعرف تعلق
تحياتى ياقمر

MKSARAT SAYED SAAD said...

رحيل
اوعي تنسيني لما تتجمعوا فمصر
سيد سعد

علاء سالم said...

السلام عليكم

أخيراً النت فتح الصفحه بعد عناء كبيير

فعلاً اليوم كان جميل جداً وكان لقاء مثمر سواء بسبب التاج اللي خلانا إتعرفنا على بعض أكتر أو الإقتراحات اللي إتناقشنا فيها بالنسبه لمدونين الدقهلية .

الفكره جميله جداً يا جماعه والله وبجد ياريت في كل محافظه الناس تعمل كده يعني يكون فيه لقاء مثلاً كل شهر على الأقل لمدونين كل محافظه . وكلم مثلاً 4 أو 6 شهور أو حتى سنه يكون فيه لقاء لمدونين مصر كلهم في القاهرة .

إن شاء الله هاعمل بوست عن الموضوع دا عندي بس لما النت يتصلح لأن حالته سيئه جداً عندي بقاله فتره .

طبعاً لازم أشكرك يا ساره على جهودك اللي بذلتيها علشان الإجتماع دا ينجح
لأن بجد بدونك كان الموضوع هايفضل فكره بلا تنفيذ .

تحياتي للجميع.

ra7eel said...

The others

وانتى كمان ياشيمو وحشان بجد ايه انتى فين يابنتىايه الاختفاء ده؟
ربنا يسهل هنزل التاج قريب

ياريت اشوفك على الميل
نورتينى
---------------------------------
دوحة

اهلا بيك
ربنا يخليك
ويكون مدونين الدقهليه عند حسن ظنك دايما
تحياتى وتقديرى
------------------------------
خلود صلاح

حبيبة قلبى
هو فعلا كان يوم حلو
احلى حاجه فى بجد انى اعرفت عليكى
وان شاء الله هيتكرر
-------------------------------
Linda

عارفه انتى وهيام بجد من اكتر الناس اللى نفسى اشوفها
واصعب ناس ممكن اشوفها
بس ان شاء الله ياتيجو مصر ياجى انا لبيا
المهم نتقابل
مكانك فى قلبى ياحبيبتى
----------------------------
Sherif

اهلا بيك
طبعا ان شاء الله هبلغك وياريت تكون موجود
اول لما المعاد يتحدد هقولك
شرفتنى

ra7eel said...

Dr gesho

ههههههههههههه
ايه ده بجد والله لو اعرف انك عايز تيجى كنت عرفتك
يالا يوم القاهره بقى ان شاء الله هنستناك بجد
ده لو مكنتش روحت فى داهيه بعد تعليقك ده
تحياتى وتقديرى
----------------------------------
صالح سعيد

اهلا بيك
ياريت تنضم لينا مفيش اى مشكله
وبعدين الشرقيه قريبه للمنصوره
وبعدين احنا مستعيدين ياباشا لاى مسابقات
احنا مبنتهددش
هههههههههههههههههه شكرا لمرورك
----------------------------------
Summar

سموره ازيك

ياريت بجد اعرف اقابلك فعلا هيكون يوم ظريف

ههههههههههههههههه
احساسك صح
دودو تؤمر بس
ربنا يخليكى ليه
-----------------------------------
Maksarat sayed saad

اهلا سيد
لاء طبعا مش هنسى من غير ماتأكد كنت اكيد فعلا هعرفك
شكرا جدا لمرورك
----------------------------------
علاء سالم

حمد الله على سلامه النت عندك ياعلاء
ايه ده شوفلك حل او اقولك غير البلد جايز المشكله عندكوا
فعلا كان يوم جميل وان شاء الله نكرره
احم احم
شكرا ياعلاء اى خدمه يابنى هو انا بعمل كل ده عشان مين
مهو عشانكوا يابنى وعشان مصر والشعب العربى
كفايه كده احسن اصدق نفسى
هههههههههههههههههههههههه

كاميليا said...

الخروج من خلف السطور
ولقاء على صفحة الحياه
لأشخاص كثيراً ماينتابنا شعور بأنهم من صنع الخيال
من فرط جمالهم الإنسانى وقلوبهم النقية وأفكارهم القوية

يابختك بجد يارحيل

يارب دايما تتجمعوا
وتتآنسوا

ربنا يسعدكم كلكم يارب

كاميليا

راجى said...

فكرة جميلة جدا
لكن
ياترى كده احسن ولا المدون يفضل غير معروف احسن
لست ادرى

rack-yourminds said...

واضح من كلامك انه كان لقاء جميل واتبسطوا كتير ربنا يسعدكم ,بس انتي شكلك كده دمك خفيف كتير , وكمان اجتماعيه ,بس قوليلي بقي هو انتي ليه بتحبي المجانين هههههههه ,اول مره يا ناس اشوف حد يحب المجانين ههههه

منتظرين موضوعات جديده ليكي

تحياتي وسلامي

walaa said...

الحمدلله اللى المدونين الدقهليه اتجمعو
ويارب نسمع عنكم احلى اخبار
وانا كمان نفسى اشوف المدونين واتعرف على كتيييير منهم
دمت بكل الود
تحياتى ولاء

منى said...

ازيك يا رحيل
الحمد لله
مجهوداتك جابت نتيجه واتقابلتم
و كان يوم حلو
وان شاء الله اشوفك قريب
سلام

linda said...

حفضل مفروسة منهم لحد ماشوفك

اخخخخخخخخخخخخ
ههههه

ربنا يخليك لينا

فرنسا هانم said...

بهدى كل تحيه لمدونى الدقهليه
وجميل جدا ان يلتقى المدونين
برغم
انى اعرف من تلك الاسماء سلوى طوق الحريه الا انها مخصمانى من فتره
مش عارفه ليه ؟؟؟؟
مع تحياتى لكل اهل الدقهليه

ياسر مدني ...دينامو الإخوان said...

بعد طووووووووووووول غياب
الحمد لله عودة للتدوين عبر دينامو الإخوان

أتمني التواصل بلا إنقطاع

ra7eel said...

كامى حبيبتى

الخروج من خلف السطور
ولقاء على صفحة الحياه

انهم ياعزيزتى حقا من اجمل ماعرفت فى حياتى
وكم سكون اللقاء جميلا جدا

فى انتظار نزولك مصر لتكونى معنا فى احدى المرات
لكى من كل الجب
------------------------------
استاذ راجى

اهلا بيك
وليه يكون غير معروف مدام فى ود وتفاهم من خلال شاشات الكمبيوتر
ليه متكونش معرفه واقعيه؟
اتمنى حضرتك تكون معانا فى القاهره
----------------------------------
Rack-yourminds

فعلا كان لقاء جميل

مرسى جدا على كلامك
انا بحب المجانين عشان بيعملوا اللى عما شايفنوا صح من وجهة نظرهم مش بيتقيدوا بوجهات نظر المجتمع
وجايز كمان بحبهم عشان انا زيهم
ههههههههههههههههههههههه
شكرا ليك
-----------------------------
Walaa

اهلا ولاء شكرا ليكى

ياريت لو تقدرى تكونى موجوده يوم القاهره ان شاء الله يكون يوم ظريف
تحياتى وحبى
-----------------------------------

ra7eel said...

منى

اهلا اهلا بالناس اللى زوغوا

كان نفسى فعلا تكونى موجوده انتى وسلوى
يالا تتعوض ان شاء الله
------------------------------
ليندا

حبيبتى
مستنياكى فى الاجازه ان شاء الله

يارب فعلا تعرفى تنزلى مصر
وهاتى هيام معاكى
ربنا يخليكى ليه
--------------------------------
فرنسا هانم

ياميت اهلا وسهلا
هى حاجه فعلا جميله جدا

على فكره سلوى النت فاصل عندها بقالها مده كيبره
ولسه مجاش تقريبا ده شبب غيابها

نورتينى
-----------------------------------
ياسر مدنى
اهلا بيك
حمد الله على سلامتك
----------------------------

L.G. said...

الفكرة صح لأن المقابلة بتزود المعرفة وتوطد العلاقات والمفروض كل محافظة تعمل كده وبعدين كل المحافظات يتفقوا على يوم في السنة يتقابلوا كلهم
طبعا شكرا على المقلب وأطخ مشوار بعيارين لحد المنصورة وأرجع في الساقعة ماشي
حرحل يا رحيل

رئيس جمهوريه نفسى said...

شكله كان يوم ظريف ربنا يسعدك انا شكلى مجتش هنا من سنه ونص تقريبا

kafrawy said...

الحمد لله

انكم اتقابلتوا

عقبال رجالتنا يارب