Saturday, March 1, 2008

لا تذكرنى


لا تذكرنى
وارحل لبعيد
ودعنى وحدى اعانى الرحيل
وحدى انا من اخطأ
و وحدى سأتعذب لايوجد بديل
عرفتك قلبا جريحا
فلملمت جراحك وتركتنى
انزف دماك
والان
كن فى حياتك كما كنت
وكما ستكون
عش فى حياتك كأننى لم اكن
ومارس فنون التمثيل فيها
فأنت تجيدها بالتأكيد
ولكن مهلا
فانت لا تخدع سوى ذاتك الحائرة
ولن تتغير بى او بغيرى
ستظل دوما شريد
يبحث عن مأوى
ولكنك ابدا ستبقى وحيد

-------------------
لا تذكرنى
وابدأ من جديد
ودعنى اداوى جرحا اكيد
جرحا سيأخذ وقتا ليطيب
فأنا رأيتك غير كل الرجال
فوجدتك عنى غريب
اودعتك ثقتى فخنتها
امنتك نفسى فكسرتها
ووهبتك حبا صادقا فسحقته
وعمر لك وحدك فأضعته
عذرا
كفاك نفاقا وكذبا
فاليوم انتهينا
وكلمتى الاخيرة
شكرا كثيرا
شكرا على جرح وعدتنى الا يكون

.

.

.

.
وقد كان

28 comments:

فرنسا هانم said...

حطيت ايدى على دقنى وهرشت
وقلت الشعر ده ليه ؟ ومعناه ايه ؟؟؟
وليه التوقيت بتاعه ده ؟
وعموما
هو ميستاهلشى

مدحت محمد said...

لايذكرك
ولا تذكريه
دعيه
ولا تبكيه
تعبيراتك فى النص رائعه سارة
اد ايه مؤلمة
فلملمت جراحك وتركتنى انزف دماك
اد ايه خاين
شكرا على جرح (انتى كتباها جرحا خطأ نحوى ماعلينا) وعدتنى الا يكون وقد كان
الف تحية ليكى سارة

s@gi l'ombre said...

السلام عليكم
الحمد لله إنك عديتى المحنه
عهدى بيكى قويه وإن شاء الله مافيش حاجه تقدر تهدك..ربنا يارب يثبتك
فرحت قوى لما قريت الطمانه ف البوست اللى فات .. وقوى قوى
لما حسيت مشاعر الإنتفاض والثوره فى الشعر ده..إباء وعظمه
قتل لحب أدمى القلب
طرد لشخص خدع .. خان
وعد ورسم قناع ..بس طلع زى غيره
بجد كلمه بعزها قوى
(هو الحد اللى هيخسر )
مش انتى ..انتى كسبتى كتير قوى قوى
هو كفايه عليه أنه خسرك
وأنه هيتنيه سارح فى دنيا واسعه
ممكن يقابل نفسه اللى تايهه
او يبقى ف امان
حمد الله ع السلامه يا رحيل
****
ماما امبارح الساعه 9 مساءا كده
كنا قاعدين بنسمع خطبه عن التوبه والامل ..لقيتها رفعت ايديها للسما وبتدعيلى
قلت اوبا لحظه تجلى للست ماما
ماما ماما ..ياريت تدعى لرحيل
نعم يا بنى مين رحيل دى ؟؟
إنت تقصد ..... يا بنى (فى همس
لأ ..لأ..دى بنت طيبه قوى
هى صحيح أكبر منى بخمس سنين
بس كنت أتمنى تبقى أختى بجد
ودى عرفتها منين يا بنى
من عن النت ياماما
بصى ادعيلها قوى ..
هى محتاج الدعاء المستجاب بتاعك عنى
دعت بقه وحسيت إن السماء اتفتحت والدعوه الحمد لله استجابت
اطمنت شويه
الحمد لله إنك بخير
***
بخصوص الحلم ..هو كان متلخبط وفيه مشاعر ممزوجه كده
كره ..قرار..مدون معانا..رحيل
باب مغلق .. صراخ
خيالات ..شويه أشباح بتتحرك
من غير معالم
بس كان المود العام حزن
وقلبى كان مقبوض قوى لما قمت
**
هى الاحلام كده زى قطرات المطر مش بتعرفى تمسكى منها غير إحساس النشوه
بعد كده كله بيتبخر
**
حمد الله ع السلامه تانى
***
امتحنت النهارده وحليت حلو الحمد لله
خلى بالك من نفسك
سلام

صوت من مصر said...

بجد نفس الموقف عندى غريبه حال الدنيا

Soooo said...

اودعتك ثقتى فخنتها
امنتك نفسى فكسرتها


ياه
حلو قوي السطرين دول
حلوين بجد


بس اقولك حاجه وماتزعليش منني
لولا الموقف ده .. ما كناش هنقرا كلام حلو ومشاعر جميله وحالة نفسيه زي دي




سلامووووووووووووز

رئيس جمهوريه نفسى said...

كل الجراح ليها دواء
داوى نفسك بنفسك وكملى فى حياتك الجرح صعب ومر اكيد بس لازم ولا بد تداوى نفسك بنفسك
خلى بالك من نفسك

نداء said...

حالة اعيشها في حياتي
تحياتي ليكي علي هذه الكلمات الرقيقة

دنيتى الجميله said...

المغنى الحزين
ودلوقتى
لاتذكرنى
ايه الحكايه يا رحيل
ليه المود الحزين ده
انا مبحبش الخيانه ولا احب اسمع عنها
بالذات لما تحصل لناس حلوه زيك
ما يبقى معى الا الدعاء لكى
ربنا يحلى ايامك برضاه وغفرانه
ويسعد ايامك

princess dodo said...

هناك اشياء تمثل جزء من الثانية
لكنها تبقى طوال العمر
نذكرها
ونشتاقها
ونشعرها
وكأنها عمر بأكمله

وهنا سنوات
نجعلها لحظات


نحن من ننفخ البالون
يصبح كبيراً
ويرتفع فى الهواء

ونحن من نفقأه بأيدينا

.
.

أجعلى هذه الذكرى
جزء من الثانية


لأنك اعظم واكبر من مجرد لحظة

.
.

اتمنى لكِ السعاده ايتها المبدعه الرقيقة

princess dodo said...

نسيت اقول لك
انا صلحت مشكله الريال بلاير
ياقمر
اسفه انى ضايقتك
بخصوص الاغنيه

.


سلام يا جميلة

arsenalwy said...

موقف سيأخذ ما يأخذة من وقت ولكنة سيمر وسينسى بمرور الايام وانتى اقوى من أى موقف


شكرا و على راحتى

Sherif said...

يااااه

كل هذا الحزن ؟ .. اعط قلبك لمن يصونه ويعرف قدره ..

اعتقد انهم كثيرون .. واقرب مما نتخيل .. لكننا لانراهم .. او لأننا نعيش عواطفنا .. لانريد ان نراهم

أحمد المصري said...

هيا الرجالة كده..
يا مأمن الراجل يا مأمن المية في الغربال..
جنس ما يختسيش..ههههههههه
كلامك رائع وحلو أوي ..و الكلمات قوية و في مكانها..تحياتي.

مصطفى السيد سمير said...

وقد كان

اسوأ نهاية لأي قصيدة
ولأي قصة

نهاية التوقع
بحصول اللي خايفين منه

جميلة يا رحيل

dr.gesho said...

هوا مين الماسوف على عمره ده
كويس بترجعى لمودك شويه بشويه اهوه
ههههههه الانسانه الوحيده اللى بعرف ان مودك تمام لما تكتبى بوست مكتاب
سلام

youma said...

معاش لي يكسر قلبك ويخون ثقتك
من لم يستطع ان يرى روعة قلبك فهو اعمى بالتأكيد فليرحل ولن يسعفه النسيان وسيندم اكيد

طمنين عليكي بجد وبسرعة

Salwa said...

إنت دايما متميزه
في آلامك وفرحك

إرمي ورا ضهرك

كلمات كلها عزة وإباء

جميله يا ساره

دمتي بكل خير عزيزتي

Ahmed Al-Sabbagh said...

:)

الصديقة الرائعة

رحيل

كلمات جميلة حقا

افكر جديا فى الذهاب الى ساقية الصاوى يوم السبت

بس محتاج تشجيع

ممكن سقفة ؟

:)

تحياتى

أحمد الصباغ

روح شرقيه said...

مرحبا
احيانا كتير بنختار اشخاص غلط فى حياتنا وللاسف بتميل مشاعرنا ليهم ونتعلق فيه
لكن اكيد الناس دى بتعلمنا كتير برغم قسوه الطريقه التى نتعلم بها
الا ان العثره دائما ما تدفعنا خطوات للامام
البوست كتير رائع
لكن خليكى اقوى
لان الحياه اجمل من اننا نبكى على ما فات
.
تمنياتى لكى بالتوفيق

مواطن زهقان said...

بجد ياسارة عجزت عن
التعبير عما بداخلى من اعجاب بكلماتك الجميلة
ياسارة بجد انتى فنانة

كاميليا said...

فانت لا تخدع سوى ذاتك الحائرة
ولن تتغير بى او بغيرى
ستظل دوما شريد
يبحث عن مأوى
ولكنك ابدا ستبقى وحيد
---

صح كدة

كاميليا

linda said...

رحيل

أتركيه يجرب مرارة فراقك
أتركيه يتعلم معنى خسارته وحده

فأمثاله لا يستحقون حتى الذكرى


أما انت فأترك لنفسك شرف الحب العميق واحساسك به

وكون كما انت

-----------------------------------------

رحيل وحشتيني جداااااااا

ومشغولة عليك اكتر

Whispers just for a Night said...

السيدة رحيل

دعيني أولا ألهب كفي تصفيقا تحية مني لكي لجمال ما سطرتي.ولي بعض التأملات فساعديني فيها. فقد آلمتني فتاتك كثيرا. وبرق في ذهني قصيدة نزار التي قال فيها

إغضبْ كما تشاءُ..

واجرحْ أحاسيسي كما تشاءُ

حطّم أواني الزّهرِ والمرايا

هدّدْ بحبِّ امرأةٍ سوايا..

فكلُّ ما تفعلهُ سواءُ..

كلُّ ما تقولهُ سواءُ..

فأنتَ كالأطفالِ يا حبيبي

نحبّهمْ.. مهما لنا أساؤوا..

إغضبْ!

فأنتَ رائعٌ حقاً متى تثورُ

إغضب!

فلولا الموجُ ما تكوَّنت بحورُ..

كنْ عاصفاً.. كُنْ ممطراً..

فإنَّ قلبي دائماً غفورُ

إغضب!

فلنْ أجيبَ بالتحدّي

فأنتَ طفلٌ عابثٌ..

يملؤهُ الغرورُ..

وكيفَ من صغارها..

تنتقمُ الطيورُ؟

إذهبْ..

إذا يوماً مللتَ منّي..

واتهمِ الأقدارَ واتّهمني..

أما أنا فإني..

سأكتفي بدمعي وحزني..

فالصمتُ كبرياءُ

والحزنُ كبرياءُ

إذهبْ..

إذا أتعبكَ البقاءُ..

فالأرضُ فيها العطرُ والنساءُ..

وعندما تحتاجُ كالطفلِ إلى حناني..

فعُدْ إلى قلبي متى تشاءُ..

فأنتَ في حياتيَ الهواءُ..

وأنتَ.. عندي الأرضُ والسماءُ..

إغضبْ كما تشاءُ

واذهبْ كما تشاءُ

واذهبْ.. متى تشاءُ

لا بدَّ أن تعودَ ذاتَ يومٍ

وقد عرفتَ ما هوَ الوفاءُ...


كلا الفتتاتين تنسبان الفضل لنفسيهما أنهما من أقاما هذا البناء المسمى بالرجل، فلما شب وثب بعيدا عنهما. ففتاتك قالت


عرفتك قلبا جريحا
فلملمت جراحك وتركتنى

وكذا قالت الأخرى

وكيفَ من صغارها..

تنتقمُ الطيورُ؟

ولكن فتاة نزار أعترفت بأنها -على الرغم من ثورتها - إلا أنها تحتفظ بنوع من الثبات الإنفعالي لأنها بالفعل تحبه على الرغم من تهديداته التي أعدتها هي طلقات فارغة في السماء لأحداث فرقعة تثير ضحك الأطفال. وفتتاتك ثائرة إلى حد الهجران. وبين تعدد شخصيات النساء تقف حائرا ولا تعلم ما هو الحد الذي قد تسامح عنده المرأة رجلا؟

فتاة نزار هددها رجلها بأنه سيفعل ما تستعظمه النساء كأن يحب أمرأة أخرى. وردا عليه قالت أن الصمت كبرياء والحزن كبرياء.فبين طبائع النساء المتباينة تجد النبي صلى الله عليه وسلم يختار ذات الدين. ألهذا مغزى؟...أعتقد في ذلك

shreen said...

رحيل
دى المره التالته اللى اقرى فيها البوست ده

يوم ما نزلتيه
قريته مرتين

والنهارده التالته
وكنت باقول مش هاعلق

لانى وانت طبعا عارفه
اكيد معيطه
ومتنحه

النهايه نفسها رهيبه
باحسس احيانا اننا اغبياء
اننا بنصدق الوعود
الغلط فينا احنا علشان بنصدقها
ولا الغلط فى اللى بيدوها وما ينفذوش

طب ليه بيدوها اصلا لو فى مجال ان الوعد ما يتنفذش ؟

دماغى هتفرقع يا ساره

بس ما قدرتش ما علقش المره دى

خالص الود

klmat said...

كلام جميل اوى ياساره
قصه قصيره بتكرر . الجميل عدم
الانكسار ووضوح الرؤيا واستيعاب الدرس
والامل الجرح حايطيب ون شاء الله يزيدك قوه
معانى جميله صادقه ومحسوسه باسلوب
رائع .اللى ينساك انساه وانت الكسبانه فهو لايستحق هذا القلب الشفاف.
ربنا ينور بصيرتك وتسقطى الاقنعه المزيفه
امنياتى بالتوفيق والسعاده
خالص حبى وتقديرى

zOzO said...

عندك حق معظمهم كده
بس
كبررررررررررررررررررررري
وده احسن حل
وربنا يقويكي
وهو قادره يعطيكي احسن منه مليون مره

walaa said...

تحياتى لقمك الرقيق الاحساس قوى بجد
ساعات لما الجرح يكون جامد بيطلع حاجات جامده
بس النصحيه اللى ما يقدرش الحب ميستهلهوش
تحياتى ولاء

marool said...

اول مره ازورك لكن كلماتك جميله ومعبره فعلا..اتعملت من الحياه ان فى شخصيات دايما تايهه دايما بتحتاج من يلملم شتاتها وما ان تقف على قدميها تؤثر ان تبحث من جديد وستظل هكذا الى ان تموت وحيده لن تجد معنى الاستقرار الحقيقى ولا الحب الصادق الدافىء..سيظلون بحاره يتنقلون ووحدهم سيموتون ويغرقون..منتظره المزيد من كلماتك..وزيارتك كمان http://www.black-roses-candles.blogspot.com/