Sunday, April 27, 2008

تاج تالت

تـحـــديــــــث


انا بهنئ المدون الشاعر علاء سالم وبقوله الف الف مبرووووووك على الخطوبه ربنا يهنيك ويوفقك دايما
والله و شوفتك عريس ياعلاء اخيرا هشمت فيك هههههههههههههه ربنا يسعدك
-------------------------------------------

التاج ده انا خدته من سلوى وكمان شرين عدته عليه شكرا ليهم
اذكر عشر حاجات عن نفسك؟
كنت زمان مش بعرف اتكلم عن نفسى او جايز كنت بتحرج او بخاف مش عارفه بس التاج ده انا مقلقتش منه ومكنتش خايفه وانا بكتبه ولا ترددت ولا حسيت انى كتبت حاجه كنت المفروض مكتبهاش جايز لان فعلا بعتبر محاولاتى هنا محاولات حقيقة بجد, وانى محتاجة انى اكون صادقة فيها مع نفسى من قبل ما اكون صادقة مع اى حد بيقرا هنا بس فعلا اعتبرت التاج ده من اهم محاولاتى
ورجاء للناس اللى ممكن يكونوا عارفين سارة كويس ان يكون التعليق برده محاولة منكم معايا انى الاقينى ومش هزعل من اى كلمة هتتقال
----------------------------
اولا انا عنيده جدا بدرجة فعلا ممكن تكون سلبية اكتر منها ايجابية وخصوصا لما احس انى اللى قدامى هو كمان بيعند معايا وكمان عشان بكبر دماغى جدا ومش ببقى على حاجة ممكن الامور توصل لمرحلة صعبة وبكون
عصبيه جدا روغم انى هادية ومش غاوية مشاكل بس لما بتعصب بكون حد تانى خالص لدرجة ان الناس بيكون عندها
ذهول ان انا ممكن صوتى يعلى بالشكل ده او انى اطيح فى اللى قدامى كده
-----------------------------------
ثانيا باخد الامور بحساسية جدا جدا ممكن كلمة تتقالى افضل افكر فيها ودماغى تودينى وتيجبنى او موقف جايز مش مقصود يضايقنى بس الاكيد ان مهما كانت الكلمة او الموقف صغير فيدل على شئ جوا الانسان اللى صدر منه الكلمة او الموقف ده ,وعلى العكس برده يعنى مش حساسه فى الحاجات اللى تزعل بس لاء كمان فى المواقف الحلوه الصغيرة من الناس اللى حواليا تفاصيل صغيرة قوى ممكن تسعدنى بجد
------------------------------------------
ثالثا متناقضه طبعا لابعد الحدود لدرجة انى اوقات بحس انى هتجنن فعلا, ساعات بحس انا مش عارفه انا عاوزه ايه
بالظبط يعنى عملت زى اللى بيرقص على السلم
--------------------------------------------
رابعا علاقات الصداقة فى حياتى من اقوى واهم العلاقات واصدقها عندى فعلا اصحابى بيمثلوا الجانب الاهم عندى بقضى معظم وقتى معاهم بجد بحبهم جدا جدا وعلاقتى بيهم كويسه بحبها قوى, انا بحب اساسا العلاقات اللى بحس فيها بصفاء وهدوء وصدق
ومن اهم العلاقات حاليا عندى كمان علاقاتى فى عالم التدوين اللى بقيت بجد بعشقه وبحب كل الناس اللى عرفتها منه
---------------------------------------------------
خامسا بكره جدا الروتين والتقاليد مش بحب الامور التقليدية وبكره الشغل الحكومى جدا بحس انه بيقتل اى طاقه او طموح وانه بيحولنا لالات فقط لا غير, عشان كده بكره شغلى جدا ودايما بسعى انى ادور على حاجه فى مجالى يكون فيها مجال للنجاح بجد مجال انى اشغل عقلى واثبت تميز ونجاح
----------------------------------------------
سادسا اعتقد انى شخصيه اجتماعيه ومحبوبة ومريحة نوعا ما, انا بحب علاقتى بالناس اللى حواليا وتعاملهم معايا واحترامهم ليا وخوفهم عليا رغم اختلافات كتير فى وجهات النظر,اعتقد انى ممكن اكون بتعامل بزوق نوعا ما وانى بعرف احترم وجة نظر الاخرين حتى لو اختلفنا (اكتسبت الصفه عن قريب من عالم التدوين
-------------------------------------------------
سابعا صادقة جدا مع كل اللى حواليا معتقدش ابدا انى فى حاجه ممكن تخلينى اكدب او ان فى حاجه تستدعى ان حد يكدب عليه عشان كده بتصدم جدا جدا لما اكتشف ان حد بيكدب او بيلف ويدور بحب اتعامل بصراحة مطلقة وشفافية ووضوح
---------------------------------------------------
ثامنا مستمعة جيدة اوقات بوصل لدرجة الفضول بس مش عشان حشرية او بحب ادخل فى حياة حد بس اوقات بيكون الحد اللى بسمعه يهمنى امره واوقات بيكون الحد ده محتاج بس يفضفص والاكتر انى بحب اعرف الدنيا ماشية ازاى واحوال الناس من حواليا
----------------------------------------------------
تاسعا مجنونة جدا وبعمل كل حاجة بجنون بغضب بجنون وبعشق بجنون وبزعل بجنون ولما بصفى من زعل بصفى بجنون كأن مفيش حاجة حصلت بعشق السفر, والخروج, والمشى ,وبحب البحر وانا مكتئبة وخصوصا مع اميره بنت عمتى وبكره الصوت العالى جدا جدا
---------------------------------------------
عاشرا بحب شخصيتى جدا بخوفها وجنونها وهدؤها وعصبيتها وضعفها وقوتها وحزنها وفرحها لحظاتها الحلوة وتجاربها وكل التناقض اللى فيها بس مش غرور مع انى اوقات بخاف منه جدا بس معتقدش ان اى حد اتعاملت معاه فى يوم خد الانطباع ده عنى , وبدور على حاجة حاسه دايما انى مش هلاقيها وانى هفضل عمرى كله تايه وحيرانه
-------------------------------------------------------------------
امرر التاج لخمسة




هروح اقولهم حالا
ومش همرره لسلوى وشرين تانى طلب غريب جدا مهو جاى من عندهم هبعته تانى ليه؟
سبحان الله

44 comments:

dr.gesho said...

جميل جدا انك تكونى عارفه الحاجات السلبيه فى شخصيتك بس الاجمل انك تحاولى تتخلصى منها
انا عن نفسى شايف انك شخصيه جميله جدا بس لو تتغلبى على حالات الاكتئاب اللى بتجيلك هتبقى 100 100
فعلا اجمل حاجه فى الدنيا الاصدقاء الحقيقيين
تاج جميل
تحياتى

s@gi said...

لو بنقيم من 10
كلو تمام
ما عدا
الفضول لدرجه تقتل وأكيد فاهمانى
بس بنعوضها بالإستماع الجيد ..يخربيت كدا انتى اساسا بحس انك ودن من غير لسان حاجه كده نادره اوى كلو دلوقتى عايز يتكلم وبس
بس لو حطينا عليها رغبتك انك تعرفى الدنيا ماشيه ازاى ودى بتقلل من ثواب العمل الاستماعى الجيد ده
يبقى النقطه تقريبا لاغيه
وتقيمنا يبقى من 9
نيجى بقه لنقطه تانيه عايز اعمل عليها سكووب

العنديه شئ جميل
بس توصل لحد ما تبقيش باقيه على حاجه
صعبه اوى ..ساعتها ممكن بعصبيتك وتهورك تحذفى حاجات من حياتك تخسرى عليها
وتدوسى على مشاعر ناس بتحبك
وكلمه " أسف " اللى انا وانتى بندمنها بتبقى مره أوى

بكره الصوت العالى جدا جدا
هههه.. الإضافه الوحيده اللى ف التاج
عارفه انى كده بغباء ..بحس انى بتوتر كده .. وكمان شويه هقوم أخبطه بالقلم ولما كذا واحد يتكلم ببقى متنرفز مووت .. بنعش الهدوء والصفااء

يبقى كده وصلنا
8
من
9
يعنى امتياز

بس الميزه ان عندك طيف من كل حاجه
يعنى تشيكله رائعه ..بس هى مسأله التوليف .. الموجب بيقلل من حده السالب.. بس لو زاد هيدى نتيجه عكسيه واكيد انتى مجربه

هى مسأله .. انتى عندك منجم ذهب وكنز كبير مليان لالئ ومجوهرات
عايشه على أمل .. تلاقيى اللى الحاجه او الحد النقى أو الطيف اللى بيشبهك وتسلميله مفتاح الكنز بس بشرط يبقى معاه الخريطه
ده غلط
أولا تعيشى لنفسك
بس كل يوم تطلعى جرام ذهب كده وتعيشى به . .بلاش اسراف
أكيد الموجب لما بيعلى بيتقلب للضد

****
حسيتك إيجابيه وانتى بتكتبى
بس ف كلمه دايما بقولها
مش بنخاف نكشف أنفسنا وأوراقنا قدام حد .[.س بيبقى ف مطلب واحد ماحدش بيلبيه .. ساعدونى انى الاقينى
هههههههههههه
كالعاده ... رائعه
بس فى حبه ألوانات غريبه كده زى البنى ده .. قوليلى بقه انك بتحبيه ف الملابس كمان
انا بموت
ف الاسود والاخضر بدرجاته والبنى ده رائع..كمان الازرق
والأبيض
حتى الألوان مليانه تناقض وتنوع
التناقض بتاعك تناقض تنوع وتكامل
مش تضاد
صدقينى انتى شخصيه هايله
سلام
******
بس نسيتى تقولى عيب قاتل
لا تجيد اللغه الإنجليزيه
انتى مش اختى ولا أعرفك .. ها

ra7eel said...

قثشةسdr.gesho

اهلا اهلا دكتور احمد
فعلا انا تقريبا عارفه معظم سلبياتى المشكله انى اوقات مش بعرف اتحكم فيها

شكرا ليك بس على فكره حالات الاكتئاب دى انا اوقات بستمتع بيها
ههههه
يالا معلش مجنونه بقى
نورتينى
تحياتى وتقديرى
-----------------------------------
s@gi

مصطفى باشا

شوف بالنسبة لموضوع الفضول
اعتقد انى قولت انه لوحد يهمنى بكون فعلا محتاجه اعرف اخباره او انى اخفف عنه
بس فى اوقات الظروف بتخليك تسمع حد ممكن ميكونش مهم بالنسبالك وبدا يحكى فى موضوع قدامك او حد بيحكى عن حد انت اساسا متعرفوش خالص
انا برده بكون فضوليه حتى لو حد مش بيهمنى بس بكون كده فعلا عشان اعرف الدنيا ماشيه ازاى

على فكره انا اوقات بكون رغايه جدا

اما بالنسبة للعند فعلا بيكون مشكلة اوقات معايا
بس بحسه وسيلة حمايه لشخصيتى
لانى لو بطلت عند تقريبا هكون واحده تانيه خالص

بالنسبة لكشف الورق شوف انا اساسا مدونتى عملاها عشان بجد الاقينى كنت فى فتره تايه جدا
ولسه تايهه بس مااقدرش انكر ان فعلا دخولى عالم التدوين ضافلى كتير وعلمنى كتير واكتشفت حاجات فى نفسى مكنتش اعرفها وبقى عندى ثقه اكبر فى نفسى

والمطلب اللى محدش بيلبيه
انت اول واحد بتعليقك ونقاشنا بيلبيه
ومش انت بس
هما صحيح قليلين
بس ممكن كلمة تتقال هنا تفرق معايا كتير

وبالنسبة للالوان بحب كل الالوان اللى انت بتحبها بمختلف درجاتها
جت على الالوان يالا بجملة التشابه
هههههههههههههههههه

اما بقى الانجليزى فهاخد كورس ان شاء الله عشان تبطل تشمت فيه
شكرا ليك
تحياتى وتقديرى

youma said...

دا انتي مفترية ياشيخة
ما انتي عارفاني معنديش وقت ارغي الرغي الذيذ دا كلو

بس بجد كلام خلانا نعرف اكثر
نقرب منك اكثر ونفهمك اكثر

شخصية مليئة بالمتغيرات
ذكية وبتعرف ازاي تكون قريبة منك

ربنا يخليك ليا
انابحبك قوي يارحيل

فرنسا هانم said...

انا احيى صاحب التاج ده
او مخترعه
لانه ببساطه بيخلى المدون بيتكلم من قلبه
وبنعرف حاجات كتير عنه
وفعلا يا رحيل انتى شخصيه اجتماعيه ومرحه وحبوبه

د/اجدع بنوته said...

صادقه ومجنونه ومستمتعه

وعصبيه وهاديه وصاديق ومحبوبه

زى السكر يارحيل

walaa said...

جميله اجابتك يا راحيل
ربنا يوفقك يارب
وجميله قوى شخصيتك
ومتفقين ان عالم التدوين اضاف لينا كتييير
وفعلا احنا كلنا بنحب نكسب خبرات وبنحب نعرف الدنيا اكتر
تحياتى للاجمل بنوته
ولاء

ra7eel said...

يوما

حبيبة قلبى
اه بقى مفتريه لما اشوف بقى هتزوغى من التاج ده ازاى

انا كمان بموت فيكى
---------------------------------
فرنسا هانم

انا كمان صاحب التاج ده
شكرا ليكى ربنا يخليكى يارب

تحياتى وتقديرى لكى
----------------------------------
د/اجدع بنوته

ده انتى اللى سكر بجد
ودمك شربات

ربنا يكرمك ويوفقك دايما
تحياتى وحبى
--------------------------------
ولاء

فعلا عالم التدوين ضافلنا كتير

كفايه فعلا ان الواحد عرف ناس عسل زيكم

ربنا يباركلك فى حنين

تحياتى وحبى لكى

Whispers just for a Night said...

قُلْ بِفَضْلِ اللّهِ وَبِرَحْمَتِهِ فَبِذَلِكَ فَلْيَفْرَحُواْ هُوَ خَيْرٌ مِّمَّا يَجْمَعُونَ [يونس : 58]

بتوفيق من الله وفضل تم تحويل طلب الحملة التي تقودها المدونة بشأن سن قوانين للحد من التجديف على الإسلام خاصة والأديان عامة إلى المسئولين في هولندا
http://kawlansadida.blogspot.com/2008/04/blog-post_28.html

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التاليhttp://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"

كاميليا said...

ياخبر ابيض

D:

كل دول شخصية واحده؟
ياعم انت صعب قوى

بس جميل وقلبك رقيق برضو

البوست ده وتعليقاته والنصائح اللى هاتيجى فيه
اقرئيه بعناية قوي
لانه هايفيدك جدا

تحياتى لاجمل قلب

عـــفـــراء said...

حاضر هاخد التاج من عنية
بس لما اتلم على الجهاز مانتى عارفة بقى اللى فيها ادعيلى انتى بقى

حلوة الصراحة بتاعك دى يارحيل
ههههههههههه قربتنى منك اكتر تصورى
وكأن 8سنين مش كفيلة للمعرفة

خالص تمنياتى

Salwa said...

إنت أصلا حد جميل يا ساره

وواضحه جدا
وطيبه

وفعلا بتسمعي اللي قدامك
لما نكون ع الإيميل وأقولك إني مضايقه
وإنت بتسمعيني

أشكرك

باقي إجاباتك جميله
والأجمل إن يكون الإنسان عارف نفسه وراضى عنها

دمت بكل خير وسعاده

DayDreaming said...

تناااااااااااااااااااااااااااقض
بس مش انتي لوحدك تقريبا كلنا كده هو صحيح زايد عندك شويتين بس ميضرش المهم انك معترفه اصل الناس كلها مبتحبش تعترف بنقطة التناقض دي

وبعدين يوم ما تجيبي سيرتي تقولي بحب لحظات الاكتئاب ع البحر روحي يا شيخه وتعالي بسرعه:)

شكرا على تمرير التاج اللي بعتبره اصعب تاج شوفته لحد الوقتي

رئيس جمهوريه نفسى said...

التاج بتاعى فين ليه مش اتمرر ليه ما علينا كويس قوى انك عارفه وكاشفه نفسك وعجبتنى قوى صراحتك

rara said...

شخصيتك جميلة اوى وهى فعلا شبه شخصيتى اوى ربنا يوفقك ان شاء الله
تحياتى

Miss. Sosa said...

السلام عليكم

ماشاء الله شخصية جميلة

اجتماعية - صادقة - مستمعة جيدة

صفات جميلة اوى

بس خلى بالك من الحساسية الزايدة والعند والنرفزة والصوت العالي ماتخليش دول يفقدوكى الناس اللي بتحبيهم

تحيــاتى

صوت من مصر said...

تاج ده هيتسمى تاج البلوجريه روح وهتلاقيه فى كل مكان

أبو خالد said...

مثال طيب للصدق و الشفافية بنيتى
اتذكرين يوما ما طلبت منك البحث عن صاحبة همسات ساكنة يا ترى و صلتى
لأنها لازالت منقطعه

Tamer Nabil said...

ثانيا باخد الامور بحساسية جدا جدا ممكن كلمة تتقالى افضل افكر فيها ودماغى تودينى وتيجبنى او موقف جايز مش مقصود يضايقنى بس الاكيد ان مهما كانت الكلمة او الموقف صغير فيدل على شئ جوا الانسان اللى صدر منه الكلمة او الموقف ده ,وعلى العكس برده يعنى مش حساسه فى الحاجات اللى تزعل بس لاء كمان فى المواقف الحلوه الصغيرة من الناس اللى حواليا تفاصيل صغيرة قوى ممكن تسعدنى بجد
------

النقطة دى زى ما تكونى بتكتبى عنى فيها

كل تاج وانتى طيبة

تحياتى

Barrak said...

جميل هو وصفك لنفسك


كلام جميل

منى said...

احلى حاجه انك عارفه عيوبك قبل مميزاتك
وده ياكد ان من مميزاتك انك مش مغروره

زى ما بتزعلى بسرعه برضه بتهتمى بغيرك

واضحه وعلى طبيعتك
وبكره اقولك الباقى
تحياتى يا قمر

EmY said...

جميله جدآ اجاباتك و تعرفي انا دايما اقول العند يولد الكفر بس بقول كده للي يعاندني و بس لان انا شخصيه عنيده جدآ اكتر مما تتخيلي

و اعتقد كلنا جوانا تناقضات كتيره اوي

تحياتي يا قمر

la3lahakhier said...

سلام عليكم يا رحيل بصراحة اللى اتكتب باللون الابيض قريته والباقى العمى صابنى
فعلى الابيض ماشاء الله شخصيتك جميلة
والله اعلم بالباقى بقى ههههههههههههه
كل التحية يا ستى

دمعاتي said...

ماشي يارحيل
مردودالك

ra7eel said...

Whispers just for night

جزاكم الله خيرا
وفقك الله

تحياتى لك
------------------------------
كامى

شكرا كاميليا

انا هسمع كلامك وخلى بالى من التعليقات بتاعه التاج ده

تسلمى يارب
-------------------------------
عفراء

يانهار اسود 8 سنين مش كفايه عشان تعرفينى

كنت معتقده ان التاج ده للناس اللى مش يعرفونى خالص
ههههههههههه

مستنيه اجابات على التاج
--------------------------------
عزيزتى سلوى

وش احمر ومكسوف
ربنا يخليكى ياسلوى
وبعدين تعالى هنا هو انتى بتتكلمى اصلا عشان اسمعك
كل مره تضحكى عليه وتخلينى انا اللى اتكلم
ههههههههه
تسلميلى
-----------------------------
Daydreaming

مجنونه بقى يااميره ايه الجديد
متقوليش اكتشفتى حاجات جديده انتى كمان دى تبقى مصيبه
هههههههههههههه
هو انا فعلا حاسه ان الموضوع زايد
مش بذمتك احلى خروجه اللى بنخرجها واحنا مكتئيبين على البحر
منوره دايما
----------------------------------
رئيس جمهوريه نفسه

اهلا محمود
انا تقريبا شوفت حدد كان مررلك التاج ده
ولا يهمك جاوبه يالا اجبارى
ههههههههه
شكرا على مرورك

ra7eel said...

Rara

شكرا ليكى

وعلى مرورك
تحياتى لكى
----------------------------------
مس سوسا

وعليكم السلام
شكرا على التعليق انتى معاكى حق

لازم اخلى بالى شويه عشان مااخسرش حد
تحياتى لكى
--------------------------------
صوت من مصر

ههههههههههههه
فعلا اكتر تاج حسيت انك كل البلوجريه جاوبه
بس تعرف انا بحب التاج ده جدا
-----------------------------
ابو خالد

شكرا جدا لمرورك

اممممممممم هو حضرتك اللى كنت سالت
وكان توقيعك محمود وحصلت لخبطه
ههههه
على العموم اهلا بيك
---------------------------------
تامر نبيل

شكرا على متابعتك

تحياتى لك
-------------------------------
Barrack

شكرا على مرورك

شرفتنى

ra7eel said...

منى

اه تقريبا انا فعلا عارفه عيوبى
ربنا يسهل واقدر اغيرها

ههههههههههه
بقى ان بكره عدى ممكن اعرف الباقى؟
شكرا ليكى يامنى
بجد كان يوم حلو قوى
----------------------------------
ايمى

فعلا العند اوقات بيكون مشكله
واقات تانيه بينفع جدا جدا

نورتينى ايمى
-----------------------------------
La3lahakhier

وعليكم السلام

ههههههههه الازرق كان هيبان لو حركت الماوس على الخلفيه
بس ولا يهمك مش هكتب تانى بيه

شكرا على المرور
----------------------------------
دمعاتى

هههههههههههههههههه
اى خدمه مستنيه اجابات على التاج
لما اشوف اخرتها
كده هنفرج الناس علينا
هههههههههه

klmat said...

الجميل فى اجابتك الصدق الكلام طالع بتلقائيه من القلب وقلتى العيوب قبل المزايا
زى العند والعصبيه اغلب العصابيين قلوبهم
بيضاء لأنهم واضحين وبيقولوا اللى فى قلبهم
انتى انسانه ضادقه وضريحه مع الناس وقبل كده مع نفسك وتلقائيه ومحبه للناس والخير
الانسان اللى عارف عيوبه بيعرف يداويها
انتى جميله ربنا يسعدك يارب
عميق تحياتى

مدحت محمد said...

ياسلام يارحيل على الاجابات
جاوبتى بكل صدق قلتى عيوبك ومزاياكى
وقلتى بتحبى ايه وبتكرهى ايه
اعتقد كدة تاخدى عشرين من عشرين فى الامتحان ده

الف تحية وتقدير والف مبروك لعلاء هباركله
لانى بجد فرحت جدا
والف مبروك تجديد المدونة شكلها بقى جميل جدا
تحياتى وتقديرى

shreen said...

كما قلت انت يا صديقتى فى تعليقك عندى
اننا نتشابهة فى الكثير من الجوانب

وانا مثلك اردد اجابتنا متشابهة فى الكثير

ما عدا موضوع العصبية والصوت العالى
انا كنت كده

لدرجة ان ساعات من كتر عصبيتى مناخيرى كانت تجيب دم

وكنت ممكن اكسر حاجه
او اضرب زجاج او مرايا

اجيبها على الارض

لحد ما مرة اتنرفزت جدا
وقعت من طولى
ودونى لدكتور

قالى لو كان ضغطى اصلا عالى
كان ممكن يجيلى انفجار فى شرايين او سكتة

ودة ممكن يحصل لما اكبر فى السن

المهم لميت نفسى يعنى
مش حبا فى الحياة طبعا

بس خوفا من انى اعيش عالة على اهلى وانا مشلوله او حاجه زى كده

الاختلاف التانى
انا ماعنديش اى نوع من الفضول اعرف اى حاجة عن اى حد طالما هو مش عايز يقولها

لدرجة ان اصحابى زمان كانوا بيهزروا ويقولولى انى مش انثى


كل الحب ليك صديقتى

لحن الحياه said...

مش عارفه اقولك يا رحيل

بس حسيت من كلامك انك تقريبا انا

بجد والله

عموما انتي جميله اوي يا رحيل

وانا بحبك اووووووووووي

mostafarayan said...

بصي كلنا عنديين ودماغنا ناشفة
وكلنا عندنا حالات التناقض دي لكن بلاش تخلي الكلام يأثرفيكي بلاش تخلي كلمة تحرقلك اوتبوظلك اليوم بلاش تحطي في دماغك من اللي حواليكي علشان تعرفي تعيشي
وكمان بلاش تحبي اصحابك قوي وحاولي تخلي بينك وبين الناس مسافة لا يتعدوهاعلشان لماتنجرحي منهم ماتتعبيش قوي
تحياتي ليكي

علاء سالم said...

السلام عليكم

أولاً بأشكرك بجد على التحديث دا اللي بجد أسعدني .

بالنسبه للتاج فهو تاج جميل فعلاً وزي ما قالت فرنسا هانم أجمل مافيه إنه بيخلي الواحد ياخد راحته ويتكلم عن اللي هو شايف إنه بيعبر عن شخصيته .

وطبعاً معظم إجاباتك يا ساره انا عارفها من قبل مت جاوبي على التاج
طبعاً ما إحنا بلديات وفاهمين بعض كويس
هههههههههههههه

إن شاء الله هاجاوب على التاج في البوست القادم بإذن الله تعالى.

ghoneem said...

اهلاً بيكي

سعيد بمعرفة مدونتك جداً وأكثر سعادة ان أول حاجة أقراها تبقي التاج اللي بيقول شخصية حضرتك بوضوح وبصدق

وطبعاً أشكر ليكي تشريفك وردك اللي أسعدني جداً وأسعد المدونة كلها

ارجو دوام الزيارة واتمني ليكي كل التوفيق

تحياتي........

ra7eel said...

كلمات
عزيزتى اميره

شكرا جدا على كلامك

ربنا يخليكى
نورتينى
-----------------------------------
مدحت محمد

اهلا اهلا

عشرين من عشرين مره واحده مرسى قوى يامدحت

عقبال كده لما انزلك تهنئه عندى ان شاء الله

ربنا يوفقك ويبارك فيك
-----------------------------------
صديقتى شرين

ادركنا التشابه من زمن فى بداية دخولنا عالم التدوين
كويس فعلا انك قدرتى تتخلصى من العصبيه
بجد هى مقرفه قوى

اما بالنسبه للفضول ممكن تقولى انه حب استطلاع وتأمل فى احوال الدنيا
بس اكيد فى ناس يهمونى مش بيكون الفضول معاهم بالدافع ده
لاء بدافع انى بكون محتاجه اسمعهم عشان هما قريبين

شكرا ليكى شرى
----------------------------------
لحن الحياه

زوزو جميل قوى اليوزر نيم ده

شكرا ليكى وربنا يخليكى
ونعرف نتقابل قريب جدا جدا
عشان انا حاسه كده ان هنكون اصحاب اكتر ان شاء الله لما نتقابل

انا كمان بحبك
تحياتى لكى

ra7eel said...

مصطفى ريان

فعلا انا ممكن كلمه بجد تعكنن عليه يومى كله
شئ صعب قوى

اما بالنسبه للمسافه اللى انت بتحكى عنها انا بدات اعملها من فتره
بس مش عشان لما تجرح وبس
عشان الايام بتفرق واللى معاك النهارده مش هيكون موجود بكره
من غير جرح بس ظروف الدنيا

شرفتنى زيارتك الاولى
----------------------------------
علاء سالم

وعليكم السلام
الف الف الف مبروووك ياعم علاء
شكرا على ايه بس يابنى عيب مش تقول كده

انا عارفه ان فعلا معظم الناس اللى عارفنى مش هيكون الكلام جديد عليهم

شكرا ليك ياعلاء مرورك وتعليقك
خالص تحياتى واحترامى
----------------------------
Ghoneem

ياهلا وسهلا

انا كمان فعلا سعيده بمعرفه مدونتك
وان شاء الله اكون متابعه دايما وخصوصا ان احنا بلديات

شكرا على مرورك
تحياتى وتقديرى

Yuki said...

جميلة اوي اجاباتك

و احلى ما فيها صراحتها

أول زيارة لمدونتك

تحياتي و بالتوفيق

أبو دواة said...

أنا مدوّن

أنا قرّبت أموت

عاوز حد يقول لي:
إنت فين؟؟

nanooo2100 said...

انا بجد سعيده جدا اني قرئت مدونتك
وسعيده جدا باني اتعرفت على شخصيتك
الي بان جدااا في كتابتك كمان انك انسانه جميله جدااا
وعجبني كمان حبك انك تكوني مختلفه
وحسيت بجد انك شبهي جدااا في
بوست جنون التناقض
وبجد اسعدني جدا البلوج بتاعك

Sherif said...

رحيل الرقيقة

دعوت لك فى الكعبة بأن يصلح الله حالك .. ويرزقك من أوسع الأبواب .. ويحفظك من كل شرّ

اللهم تقبل دعاء

دنيتى الجميله said...

انتى اسمك ساره
اسمك جميل جدا
وشخصيتك حلوه جدا مع كل التناقضات اللى فيها
انا استغربن جدا
صوتك عالى ازاى
مجنونه ازاى
عنيده ازاى
انا كنت شيفاكى بالصوره التانيه اللى انتى كتباها من مرح وحب وصداقه
ومستمعه جيده
بس فيكى حاجات منى زى الحساسيه فى اتخاذ الامور حاجات تانيه
هتعرفيها لما اقدر اجاوب على التاج ده سلاااام

L.G. said...

نحاول معاكي زي ما بتقولي
شوفي يا سارة انتي كما كتبت زب ما شفتك بالظبط
خلي بالكواستعدي ولا تثقي جدا في الصداقات مهما بدت لك متينة فالتغير من طبيعة البشر والقليل من يصمد أمام متغيرات الحياة ولا يتغير معها
التناقض بداخلك ستطوعيه مع الوقت وستعرفي كيف تتحكمي فيه وحتى الاكتئاب ستتحكمي فيه ولكن لن تتحكمي في تغير البشر لا تضعي ثقتك الا في الله
أنت تماما كما رأيتك
حتى أغنية ماجدة الرومي
لا تطلبي من الرجل مالا يستطيع تقديمه
وللحديث بقية بإذن الله

دكتور مستكنيص said...

لو هختار اكتر حاجة حبيتها في صفاتك هتبقي الجنان ربنا يديمه عليكي نعمة انا بعتبر الشخص اللي مش مجنون حد ناقصه حاجة كبيرة اوي
تحياتي

ra7eel said...

yuki

أهلا بيكى فى اول زياره

وان شاء الله مش تكون الاخير

شكرا ليكى جدا
تحياتى لكى
--------------------------------
ابو دواة

ههههههه
انت فين؟

ولا ضايق نفسك
-----------------------------------
nanoo2100

اهلا بيكى
اسعدتنى كلماتك بجد

واكيد هاجى ازورك
مدام احنا شبه بعض هتلاقينى كل ساعه والتانيه عندك
نورتينى بجد
تحياتى وحبى
-----------------------------------
shiref

الف حمد الله على السلامه

نورت مربع التعليقات تانى والمدونات كلها

عمره مقبوله ان شاء الله

تحياتى وتقديرى
-----------------------------------
دنيتى الجميله

اهلا اهلا
ايه ده هو انتى كنتى لسه مش تعرفى اسمى
ههههههههههه
ده مدونين مصر كلهم عارفين

معلش بقى سامحينى انى كنت غير ظنك بس انا صوتى مش بيعلى غير لما اتعصب قوى

ربنا مايحرمنى من طلتك وزيارتك
---------------------------------
L.G

اهلا الى اجى

اخير ظهرتى انا قولت مش معقول كل ده لسه فى طريقها لاسكندريه
ههههههه
عارفه انا تقريبا بقيت مش بتصدم فى حد دايما متوقعه اى حاجه من اى شخص
اما حلات الاكتئاب فعادى بتيجى وتروح

شكرا ليكى
ومستنياكى تانى انشاء الله
تحياتى وحبى
----------------------------------
دكتور مستكنيص

تعرف ان اكتر حاجه بحبها بجد فى نفسى جنانى
فعلا ربنا يديمه نعمه
اهو هو ده اللى بيهون علينا مفاجات الدنيا

نورتنى
تحياتى لك