Wednesday, May 28, 2008

امرأه يهابها الرجال


لا رجل ابيض ولا اسود يريد أن يكون زوجا لامرأة طموحة
أنيس منصور

إستوقفتى تلك العبارة كثير عند قراتى لها منذ سنوات عدة وكنت وقتها لازلت في المرحلة الثانوية
لم أكن وقتها على فهم كامل لها لقلة خبرتي وصغر سني او لان مفهومي عن كلمة الطموح كان مختلف عن ألان وكنت أكثر حماسا وإصرار على تحقيق ذاتي ولان كلمة الطموح وحدها كانت طريق ابغاه وليس لي هدف سواه

اليوم وبعد مرور سبع سنوات تقريبا اختلف الأمر وقد مررت بتجارب وتعاملت مع أناس مختلفة ذو عقليات متنوعة وتعرفت على وجهات نظر كثيرة واجبرتنى الأيام على الدخول في تجارب عدة وان كانت سيئة من منظورها الخارجي الا اننى على يقين تام أنها كما أخذت منى أضافت إلى الكثير من الخبرات التي جعلتني أرى الحياة بشكل أعمق ومن زوايا أخرى

ليه بقى المقدمة الطويلة العريضة دي عشان أقولكم فهمى لمقولة أنيس منصور في الوقت الحالي من خلال تجاربي الشخصية ومن خلال رؤيتي لتجارب الآخرين من حولي

كان يقول لنا دائما أحدى زملائنا فى الكلية انه لا يريد زوجته أن تكون جامعية إطلاقا مش عايزها خرجت وسافرت واتغربت ولا ليها تجارب فى الحياة عايز واحده كانت من البيت للمدرسة ومن المدرسة للبيت
والأخر كان عايزها صغيرة سنا وتكون خام وعجينة سهلة يشكلها زى ما هو عايز
واحد أصدقائنا المدونين له صديق جامعى يقول انه يريد ان تكون زوجته امية أساسا
وأخر كان يريدها أن تكون قطة مغمضه او تابلوه يتعلق في البيت مع أن هو أساسا مقطع السمكة وديلها زى ما بيقولوا

أما البنت اللي بتفكر واللي بتشغل دماغها اللي الحياة اتاحت لها فرصة أن تبنى شخصيتها بشكل مختلف اللي بتسعي دايما أنها تحقق هدف ويكون ليها دايما دور ايجابي فى المجتمع قد تكون جريئة طموحة اجتماعية مثقفة

تلك الشخصية يعجبون بها ويثنون عليها ولكن حين يفكرون بالزواج فهي ابعد ما يكون عن تفكيرهم وليس تفكير الرجال فقط ولكنها نظرة المجتمع بصفة عامة فهي فتاة متحررة لا تصلح أن تكون زوجة
ولكنها ليست مشكلة هؤلاء الفتيات
بقدر ما هي مشكلة رجل ليس لدية الثقة في نفسه فهو يهابها لإحساسه بأنه دوما إما انه لن يستطيع أن يصل إلى فكرها او ظنا منه انها ستكون هي المسيطرة على زمام الأمور
هي مشكلة مجتمع أعطى كل الحقوق للرجل في أن يعمل وان يفكر وان يحلم وان يكون دوما رأيه هو الصواب
هي مشكلة مجتمع منذ الصغر ربى أبنائه الذكور على أنهم ملوك الأرض وغيرهم من الإناث جواري لهم
هي مشكلة مجتمع متناقض يعجب بفتاة هكذا ثم يمنع بناته من مجرد المحاولة أن يكن هكذا

مع أنها الأقدر على تربية أبناء خاصة في تلك الأيام التي نفتقر فيها لثقافة التربية الحقيقية فهي خرجت وتعملت وعملت وشاركت فى الحياة الاجتماعية فاكتسبت خبرات تؤهلها لان تكون صديقة لزوجها قبل أن تكون زوجة وصديقة لأبنائها قبل ان تكون ام
فهي الأقدر على التعامل مع متغيرات هذا الزمن
الكثيرات من المدونات يتكلمن عن تلك القضية اعرفهن عن قرب واخريات لا اعرفهن الا من خلال كلماتهم ومدوناتهن واقل ما يقال عنهم أنهن شخصيات فى منتهى الروعة حقا فتيات لا املك لهن سوى كل الاحترام والحب والتقدير
وكلمتي الأخيرة لهن لا تتنازلن عن حقكن فى حياة تبغونها بشكل مختلف متميز إياكن والخضوع لضغوط مجتمع ملئ بالمتناقضات من اجل حياة متكررة حياة فقط من اجل إرضاء الناس وإسكاتهم

54 comments:

klmat said...

ازيك يا ساره . يارب تكونى بخير
احييكى على الموضوع الجميل ده
اغلب الرجال ايا كانت جنسيتهم يشعرون
بمتعه فائقه عند احساسهم بالتفوق فلو
كانت زوجته اكثر تفوقا فقد هذه المتعه
بينما المرأه العكس

شاهدت مباره مفيد فوزى يحاور اسامه الباز وخيره بين ان يكون فى رحله مع امرأه
فائقه الجمال ولكن مش ذكيه واخرى ذكيه
ولكن مش جميله فاختار الجميله قال له
لست محتاج الذكاء قدر احتياجى للجمال فى الرحله . ربما يكون بيمزح
هى مقوله صح . بنسبه عاليه جدا
اذا كانت الزوجه او المحبوبه تريد ان تحتفظ بحبيبها فلتشعره بأنه الأكفأ
جميل جدا ان تكون المراه طموحه ومتفوفقه ولكن بتواضع.
سعيده جدا بطرحط هذا الموضوع باسلوبك الرشيق والشيق
خالص حبلى وتقديرى

ra7eel said...

كلمات
عزيزتى اميره
شكرا لسؤالك
انا بخير الحمد لله ربنا يخليكى

انا معاكى طبعا ان تشعر المراه الرجل بأنه الاكفأ لانهم زى مانتى قولتى هما اغبلهم كده
وغير كده كمان انا لا اقلل ابدا من شأن الرجل ولا من قوامته
هذا وان كان رجلا بكل ماتحمله الكلمه من صفات رجوليه نفتقدها كثيرا فى تلك الايام

بس هى مش مشكلةالمراه بس
هى كمان متوقفه على قدره الرجل انه يتفهم شخصية المراه ويكون قادر على احتوئها واحساسها بذاتها وبكيانها
مش اهانتها والاستخفاف بعقلها لمجرد انه شايف انها انثى لاحق لها فى التفكير


اما بالنسبة لموضوع الذكاء والجمال
طبعا موضوع نسبى
بس بفرض ان الزوجه كانت جميلة وغبية هتكرهوا فى حياته وهتعكنن عليه رحلته
ههههههههههه
على العكس فهى قد لاتكون جميله ولكن بذكائها تستطيع ان تهون عليه رحلته ومشقه السفر
وايضا بذكائها تجعله يراها جميلة

تحياتى لكى وتقديرى

DayDreaming said...

ايه يابت الكلام الجامد ده

ايوه كده انا عايزه بوستس من دي على طول بلاش البكاء على الاطلال اللي فات ده ماشي

بوست رائع ومعبر واكتر حاجه بيعبر عنها هو انتي
:)

رئـــــيسـة حزب الأحلام said...

موضوع فى الجون وانتى اخذتية من زاويه فى منتهى الجمال احييكى عليها وانا كمان كاتبه فى الموضوع دة بس مش بالجمال دة البوست اسمه السادة الرجال
الف تحية لكى

مدحت محمد said...

عارفة يارحيل فيلم مراتى مدير عام

هو ممكن يحصل غيرة وممكن المجتمع بتاعنا يقول ده جوز الست وكدة
ممكن يكون المقولة بتاعت انيس منصور صح

بس فى حاجة
الزوجة دايما متفوقة بس متكونش احسن منه لسبب انه اكيد زى ماهى بتفتخر بيه اكيد هو عايز يفتخر بيها
فحتة انى انسان جامعى يقول اخدها مش متعلمة
فهى اكيد هتكون فى وشه
فى اجتماعات فى مقابلات
لو هى انسانة متفوقة هتشرفه ولو انسانة غير
اكيد هيكون العكس

لكن فى كافة الاحوال مش هيبقى عايزها تتفوق عليه دى حقيقة
واعتقد طبيعة عند الرجل
تحياتى ليكى يارحيل

ayman badr said...

اولا احييكى على الموضوع الجميل ده يا سارة
ثانيا: مش كل الرجالة بتفكر التفكير ده منكرش ان كتير من الرجالة بيفكروا بالطريقة دى بس ده نابع من النماذج اللى قابلوها فى حياتهم خليتهم يقتنعوا بالفكرةدى
اما الجزء التانى فعاوزين واحدة طموحة وليها فكر عشان حتى تقدر تربى اولادها ويبقى فيه توازن بين عقلية الزوج والزوجة لازم يبقى فيه طرفين يرسل ويستقبل مش طرف يرسل دائيما والتانى يستقبل دايما والا الحياة هتبقى مستحيلة
شكرا وبجد موضوع جميل واسلوبك زاده جمال
تحياتى

منى said...

سبحان الله
مقطع السمكه وديلها زى ما بيقولوا
لكن عايز واحده متعرفش السمك انانى
مش عشان بيحلل لنفسه ويحرم لغيره
لاء
عشان عايز ياخد كل حاجه
مع ان الفتاه المحترمه دى الاحق بيها واحد بنفس اخلاقها
انما موضوع الطموح ده كبير اوى
يعنى فيه ست تقدر تحقق طموحها من غير ما تجور على حق اى حد
وفيه واحده مش تقدر توفق
والرجل برده كده ممكن فى سبيل نجاحه ينسى ان فى ناس لها حقوق عنده

هنا بقى بيظهر دور المجتمع اللى يقول يعنى يسيب شغله ويقعد جنبك
او يقول للست انتى ما لكيش اللى بيتك
اللىلكن لو تلاقى حد مش انانى زى ما يحب النجاح يسبها تتذوقه وهى تقدر ده
يااااااااااااه
يبقى مفيش احسن من كده
على فكره انا لسه بكتب على الورد وااقص والزق
تحياتى وحبى وكمان تقديرى

HANY YASSIN said...

السلام عليكم
لا اعتقد ان كلامك صحيح فاذا كانت النسبة الاكثر كما تقولين فليس معنى هذا الا انفصام فى الشخصية فكيف اعجب بفتاة لانها شخصية قوية وطموحة ومثقفة ثم اخاف منها فالموضوع ليس حرب بين رجل وامرأة من حقك ان تتحدثى عن رجال هكذا لكن ليس بالتعميم واعتقد انك لا تقصدين التعميم لانه مستحيل خاصة فى هذه الحالة
خالص تحياتى
\هانى يس

HERO said...

على فكرة كلامك كله صح وبعدين لو المرأة متعلمة ولديها خبرة زي ما بتقولي يبقى اكيد هترتبط بواحد متعلم وبيفهم زيها لأنها لو عملت غير كده يبقى هي خسارة في اللي ارتبطت بيه وبعدين اانا واحد من اناس احب الانسانة اللي ترتبط بيا تكون ذكية وبتفهم وعندها خبرات في الحياة خصوصا في الايام دي

تحياتي

dr.gesho said...

امممممممممممممم
والله مانا عارف ارد المره دى
اكيد عندك حق فى كتير من اللى قولتيه
سيبك من اللى مقطع السمكه و ديلها ده هوا لازم يكون كده اصلا لانه نيته مش بتكون سليمه و هوا بيقطع السمكه
بس اكيد اى راجل بيكون عاوز اللى يتجوزها يكون اهتمامها الاول بيه و ببيته و علشان كده بيخاف ان المراه الطموحه دى يكون طموحها على حساب بيتها
واكيد ده بنشوفه كتير حوالينا
عموما الموضوع ده كبييييييييييييير و عليه اختلاف كتيييييييييييير و عاوز قعده
بس البوست جامد و اهم حاجه انه مافيهوش لخطاء املائيه ولا اكتئاب
:))
تحياتى

youma said...

بجد كلام صــح جداً
بنعاني منه جدا خصوصي نظرة الرجل الدونية للمرأة واحساسُ الظاهر عليه جدا عندما يشعر ان المرأة اعلى منه ثقافياً

يبدأ يتعامل معاها وكأنه مريض نفسي
ويبدأ يحاول الانقاص من قدرها كلما ارتفعت قدرا

لما دائماً نعتبرهم انداداً لنا يشاركونا الحياة

ويعتبرنا معظمهم حجر تبنى عليه امالهم وطموحاتهم

فعلاً شيء يولد الحسرة فينا

ayman badr said...

طبعا تحياتى لكل اللى علقوا بس ليه تعقيب صغير طبعا انا مش موافق يوما انها تعمم على كل الرجالة انهم بينظروا للمرأة نظرة دونية واكيد ان الراجل مبينظرش للمرأة نظرة دونية إلا اذا كانت هى ادينه الانطباع ده عنها واكيد مش كل الرجالة زى بعضها
تحياتى ليكى يا سارة كان تعقيب لابد منه
سلام

عرفة فاروق السيوطى ( الاديب العاشق) said...

رحيل

والله كلامك احسن بكتير من كلامى

عارفة ليه لانى ثورت وزعقت وغضبت

والامر يخرج من يد الغضبان

بس اكيد كلامك صحيح مية المية

فعلا انا شفت نماذج كتير زى اللى قلتى عليها

وللاسف النماذج دى بتزيدنى غضب

لدرجة ان واحد كلمنى كدة قلتله انت جاهل وكانت هتوصل لاكتر من الكلام

بس ربنا ستر

المهم

طبعا المرأة الطموحة المثقفة الخبيرة هى الاقدر على مساعدة زوجها انه يكون انسان ناجح

وهى الاقدر على تنشئة جيل واعى مثقف

بنات واولاد

وياريت البنات يسمعوا كلامك وميسبوش

حقهم الشرعى

فى انهم يكونوا لبنة اساسية من لبنات

الحضارة المتقدمة

وياما سمعنا عن نساء غيرت التاريخ

ويارب يوعدنا هنا فى مصر بنماذج كتيرة

وانا بشوف بنات جامعية كتيرة وغير

جامعية فكرهم عالى

لكن المجتمع حجر العثرة قدامهم

وكلام انيس منصور جميل وصادق لكنه مش

مطلق

بمعنى ان فى رجال _ وانا واحد منهم

يتمنوا الارتباط بنساء على قدر عالى

جدا من الفهم

علشان عارفين انهن

الاقدر عى مساعدتهم اكتر حتى من عائلاتهم

دمتى بكل ود

وللحديث بقية

الاديب العاشق

عرفة فاروق السيوطى

ra7eel said...

Daydreaming

ههههههه بقى كده يااميره انا ببكى على الاطلال
طيب بس لما جيلك اصبرى عليه

طبعا انتى من اكتر الناس اللى حاسه ان البوست بيعبر عنى
ههههههههههه
منوره دايما
----------------------------------
رئيسه حزب الاحلام

شكرا ليكى ياسلوى
ربنا يخليكى
خالص تحياتى وتقديرى
-----------------------------------
مدحت محمد

شوف بقى يامدحت انا مش بكلم على عمل المرأه على فكره
عشان انا اساسا مش من انصار عمل المرأه بعد الجواز
انا بكلم على الفكر المصرى عامة تجاه البنت اللى من النوعيه دى
ازاى بيشوفوها وازى بيتعاملو معاها

وبرده مش بقول انها تتفوق عليه انا بكلم فى حاجه واحده انه يحترمها
ويحترم فكرها مش يستخف بيها او يكون مهمش دورها فى حياته
شكرا ليك

ra7eel said...

ايمن بدر

اهلا اهلا بمدونين الدقهلية
شكرا ليك ياايمن
ثانيا انا عارفه ان مش كل الرجاله كده
بس للاسف اغلبيه
وفى ناس بيكونوا عايزنها تستقبل بس
من غير ماتبدى اى اراء او يكون فى حوار
وعامة النوعيه دى مش هتغلب لان برضه فى بنات كتير كده
بيكونو عايزين يستقبلوا وبس

تحياتى وتقديرى لك
-----------------------------------
منى

اه يامنى للاسف النوعيه دى كتير جدا بس هو مش انانى
هو معقد نفسيا ومعندوش ثقه فى نفسه
بيكون متخيل دايما ان مراته هتخونه وبيكون شكاك جدا

اما بالنسبة لمضوع الطموح انا معاكى فيه لو قبل الجواز اكيد هيكون اسهل
لكن طبعا بعد الجواز بيكون فى اولويات فى بيتها
انا زى ماقولت قبل كده
اان شخصيا مش من انصار عمل المراه بعد الجواز
بس قبله ايوه جدا جدا
منوره يامنى

خالص مودتى وحبى
-----------------------------------
هانى ياسين

وعليكم السلام
شوف هواساسا المجتمع مليان متناقضات
انا شوفت شخصيات كتير بالشكل ده ومش رجاله بس دى اسر كمان
بيكونوا معجبين جدا ببنت شخصيتها قوية وطموحه ومثقفه
بس بيخافوا منها لاعتقداهم انها مسيطره او متحرره
عادى جدا موضوع الانفصام ده فى مجتمعنا
مش موضوع حرب موضوع ثقافة شعب وتربيه غلط من الاول
طبعا لااقصد التعميم بس هم اغلبيه

تحياتى لك

ra7eel said...

هيرو

انت فعلا كلامك صح
هى لوعملت كده تبقى هى اللى خسرانه
بس المشكله ان اوقات المجتمع والناس بيجبروها انها تعمل كده
وده غلط لانها حياتها هى وهى اللى لوحدها اللى هتدفع التمن غالى من عمرها
شكرا على التعليق
واهلا بيك فى اول زيارة
تحياتى لك
--------------------------------
Dr. gesho

اهلا يااحمد ملناش دعوه بالنوايا ههههههه
شوف طبعا انا مش مختلفه معاك على ان الاهم طبعا البيت ولازم يكون ده فى المقام الاول

وهكرر للمره التالته عشان محدش يفهم كلامى غلط
انا مش بكلم على عمل المراه دى مش قضيتى لانى مش انصار عمل المرأه بعد الجواز
انا بكلم على احترام الرجل للمراه بصفه عامة واحترام المجتمع لفكرها

اى خدمه مفيش اكتئاب ومفيش اخطاء املائيه
هههههههههههههههه
-----------------------------------
يوما حبيبتى

شوفى الراجل لما بيحس بكده بيكون فعلا مريض نفسى
وبيتعامل بجنون وده لانه مش عنده ثقة فى نفسه

انا معاكى ان فى رجاله كتير جدا كده للاسف هى مشكلة مجتمعنا العربى كله
التربيه من البدايه غلط
بحبك جدا

ra7eel said...

ايمن بدر

كلاكت تانى مره
اهلا بيك ياايمن
شوف يوما ان عارفه انها مش بتعمم ولا انا فى كلامى كنت بعمم
بس للاسف الاغلبيه كده
يابنى دى تربية وثقافة مجتمع مش موضوع انها ادته الانطباع ده عنها
مهو اساسا لو مش بيفكر بالكل ده على اى وضع مش هيبصلها كده حتى لو هى كده

منور ياايمن
---------------------------------
عرفه فاروق السيوطى

اهلا اهلا
لا طبعا شوف ان يكفى ان كلامك وجهة نظر رجل ده فى حد ذاته فعلا شئ جميل
عشان انت مثال حى فعلا على ان مش كل الرجاله كده

طبعا انت كلامك صح جدا جدا
شكار ليك بجد على متابعتك وتعليقك
وربنا يوفقك فى الامتحانات والمذاكره

ghoneem said...

ra7eel

اهلاً بيكي

الواضح انك بقيتي أحسن وعدتي الي الكتابة وبتميز كمان

عنوان البوست رااااائع عجبني جداً "إمرأة يهابها الرجال
بجد إختيار موفق للعنوان

قلتي
لا يريد زوجته أن تكون جامعية إطلاقا
مش عايزها خرجت وسافرت واتغربت

"دي غيرة وعدم ثقة في النفس"

قلتي
يريد ان تكون زوجته امية أساسا

"رأي يدل علي أنه لايزال يعني الأمية"

قلتي
قطة مغمضه او تابلوه يتعلق في البيت

"هوة الخسران ..."

قلتي
فتاة متحررة لا تصلح أن تكون زوجة

"طموحة..جريئة..إجتماعية..مثقفة
يااااابخت اللي تبقي دي زوجته "
بس تسيبها من منظمات المرأة والحاجات اللي ملهاش لازمة دي ....
بيتها وزوجها وأبنائها أروع مجتمع يمكن أن تبنيه ..وتبني منه المجتمع الأكبر

وده طبعاً لا يتعارض وطموحها
لا يتعارض وثقافتها
لا يتعارض ودورها في المجتمع

المرأة هي أقوي عناصر الحياة
هي الأم
الأخت
الزوجة والصحبة
الإبنة
........................
!!!!!؟؟؟؟؟؟إيه أقوي من كدة ....

المجتمع أعطي للمرأة كل الحقوق
حتي في الصعيد اللي المرأة المفروض تعاني فيه الأمرين
معدش صعيييييد زمان خلااااااص
الموضوع بقي غير زمان خالص

المجتمع أعطي للمرأة حقوق كثيرة وكثيرة وللأسف عيوبها أكثر من ميزاتها
1- سوء في الفهم
2-سوء في الإستخدام
3-حرية تسئ للمرأة أكثر مما تضيف إليها
4-حرية ممسوخة"مغلفة بثقافة غربية بعيدة عن ديننا "
5- حرية بدأت تنكشف سوءاتها وستنكشف أكثر في ماهو قادم
.........................
رحيل
أنا أكن لشخصك الكريم ولنساء مصرنا كل تقدير وإحترام

لا رجل عاقل يريد أن يكون زوجاً لأمرأة غير طموحة

آسف علي الأطالة
أشكرك علي دعوتك
ومرورك الدائم
تحياتي

بالتوفيق..............

karim said...

السلام عليكم
دى اول مره ليا عند حضرتك يارب اكون خفيف عليكى
الموضوع اولا حلو اوى و مكنتش حاسس انو مطروح كتير
عايز اول اللى بيفكر انو يجوز واحده خام زى ما بتئولى عشان متسيطرش عليه ده حد تفكيره عيان
ثانيا ف نظرى اصلح ام و زوجه هى اللى تكون متفتحه طموحه عرفه ايه اللى بيحصل حوليها مش جهله واميه زى اراء بعض الناس اللى انتى عرضاها


تحياتى ليكى...و اتمنى تنورينى

mostafarayan said...

كلام مقنع ومعقول ومنطقي
ولكن هل تفتكري ممكن النظرة تتغير ؟
تحياتي ليكي

smraa alnil said...

بعيدا عن الموضوع

ياريت تشاركوني في موضوع علي مدونتي
وتنشره معانا
تحياتي

د/أبويحيى وادم said...

السلام عليكم ورحمه الله وبركاته
اختلف كثيرا معك فى كثير من الامور اختنا الكريمة
المراه الطموحه التى يهابها ويرفضها الرجال
هم فى الحقيقه لايصح ان نقول عنهم رجال لما؟
لانهم متكاسلون
نائمون اتريدى ان تكون الموحه لمتكاسل؟؟؟ كيف ؟؟
ان لم يكن متكاسل ويرفض فسوف يكون انانى وحب ذاته فقط ويكره نجاح الاخرين اليس كذلك ؟ ايتريدى الزواج من مثل هذا النوع ؟؟
ليس كل الرجال كذلك اليس كذلك؟
الامر الاخير
حكمه جميله تقول من ارادت (محمد فلتكن هى خديجه )

Salwa said...

جميل يا سارة

بس عارفه
الراجل اللي بيبقى مقطع السمكه وديلها
بيكون عايز واحده قطه مغمضه
لأنه بيكون معندوش ثقه في حد من أعماله

لكن الشخص الكويس بيكون واثق في نفسه وفي اللي بيعرفهم

بوست جميل يا ساره

دمتى بكل ود

ra7eel said...

غنيم

اهلا بيك
شكرا جدا على ردك على النقاط اللى انا ذكرتها فى البوست
فعلا كلام حضرتك صح جدا
وبعيدا عن منظمات المرأه والحاجات اللى ملهاش لازم دى
فعلا بيتها وزوجها وابنائها اروع مجتمع يمكن ان تبنيه
انا معاك جدا جدا فى الكلام ده
فانا عن نفسى رغم كل ثورتى على كثير من تقاليد المجتمع وعاداته
الا اننى لا افضل عمل المرأه بعد الزواج فى حالة انها لن تستطيع ان توفق بين بيتها وعملها
لان طبعا الاهم بيتها
وانا قولت فى ردود سابقة ان كلامى مش بيدور عن عمل المراه بعد الزواج من عدمه
وان كلمة طموح مش مش مطلقة برضه على العمل فى حد ذاته

لكن كلامى على احترام المرأه ككيان وفكر مستقل مش انها مجرد تابع وبس

تقول ان المجتمع اعطى للمراه حقوق كثيرة
هى حقوق ظاهرية مجرد صور خارجية لكنى اعتقد ان المرأه منذ زمن كانت اكثر امانا واستقرار من زمننا الحالى
اه فعلا الموضوع اختلف عن زمان بس زى ماحضرتك ذكرت فعلا العيوب دى حقيقه واقعة

ومن خلال سوء الفهم وسوء الاستخدام وغيرها من العيوب اللى ذكرتها
يرى المجمتع هذا النموذج بشكل تحررى مبالغ فيه جدا
يجعله يهابه دون التميز بينهن
فهى حقا حرية ممسوخة
شكرا جدا على تعليقك
ولا تعتذر على الاطاله المدونة مدونتك يافندم
شرفتنى

ra7eel said...

كريم

وعليكم السلام
اهلا بيك وشكرا على مرورك جدا

هو فعلا اللى بيفكر كده بكيون انسان مريض
بس للاسف الاراء دى موجوده فعلا وبكثره

نورتنى وان شاء الله اكيد هزورك
تحيات لك
-----------------------------------
مصطفى ريان

اهلا مصطفى
سؤال منطقى جدا جدا ؟
اعتقد ان اجابته بتقول ان التفكير ده ناتج عن سوء تربيه
وبما ان احنا هايجى علينا فى يوم واحنا اللى هنربى
يبقى محتاجين نعلم ده للجيل اللى جاى ونزرعه فيه
ازاى يطلع جيل يحترم المرأه وده مش كلام جديد
دينا الاسلامى بيحترم المرأه جدا يعنى مش هنعلمهم شئ غريب عنهم

تحياتى لك
-----------------------------------
سمراء النيل

اهلا بيكى
وان شاء الله هحاول اجى واشوف ايه الموضوع
تحياتى لكى
-----------------------------------
د/ ابو يحيى وادم

وعليكم السلام
اهلا يافندم
انا معممتش يادكتور انا قولت انها نسبة بس فعلا مش قليله
ومش موضوع زواج وبس ده مجتمع كامل بتكون دى نظرته للمرأه

حكمه جميله جدا جدا
شكرا على مرورك وتعليقك
تحياتى وتقديرى
-----------------------------------
سلوى

وحشااااااااانى
فعلا هو بيكون موضوع ثقة هو مش واثق انه قادر يكون الوحيد فى حياتها
دايما هيشك فيها
بس الحقيقى انه بيشك فى نفسه مش فى حد تانى
ربنا يخليكى يارب ومايحرمنى من طلتك فى الصفحة

Rosa said...

بوست في الصميم يا رحيل
للأسف دي الحقيقة
بس النوعية دي من الرجال الي معندهاش ثقه في نفسها ماتستحقش الوقوف عندها كتير
لأنها حاجه تأخر بجد
للأسف هما بيشكلوا عدد مش قليل
بس في نفس الوقت اعرف برده ناس بتفكربطريقه جميله وعقليتها محترمه ومنطقيه و عندها ثقه في نفسها
هو فعلا زي ما قلتي هيا أزمة ثقه في النفس
موضوع ممتاز بجد و احيكي عليه

رحاله said...

بسم الله
اظن انك مصعباها شويه
يعنى هما يعوزو الى يعزو
بس فى الاخر احنا لينا اننا نرفض او نقبل
بمعنى ايه الى يغصب واحدة مثلا تتجوز واحد عاوزها كدة او هو مش هيتقدم اصلا لو هو عارف انها عاوزة تكمل وبتاع بس صدقينى فى رجاله الوقتى عادى يعنى وممكن يساعدوهم كمان انهم يكونو احسن واحسن وفى الاخر دة بيكون فخر ليه انو متجوز واحدة زى دي
واظن ان زى مافى كدة فى الرجاله بردو فى كدة فى الستات
خلينا موضوعين
وبعدين ممكن نحسبها مساله كبرياء شويه
فى النهايه اظن ان الكلام دة يمكن كنا نلاقيه اكتر زمان لكن دلوقتى اظن ان المجتمع بقه مجتمع مفتوح والتفكير اتغير الى حد ما شويه
................
بس فى الاخر موضوعك حلووووووووووو اوى
تحياتى
جيلان

عـــفـــراء said...

بصراحة انا نفسى مسدودة
وماليش مزاج اعلق نهائى لاى حد
وتعرفى بقى ان البوست دة قفلنى اكتر ومش هعلق
اول ماتيجى من بورسعيد عرفينى
دة يعنى لو حبيتى
سلام بقى

el_assel said...

اعتقد ان الموضوع من اسود قوي كده زي ما انتي متخيلة

اللي بيقول انه عايز يتزوج واحدة امية او ما كملتش تعليمها
دول أقلية
واكيد من حيكون في حب بينهم

اكيد لازم الواحد يتزوج واحدة تكون في نفس درجة تفكيره
في نفس طموحه
نفس اهدافه
علشان يعينوا بعض علي مواصلة طريق الحياة الوعر


لكن اللي انتي بتقولي عليهم دول عايزين حد يطبخ ويغسل ويمسح
وما اعتقدش انهم كتير

اكيد ده من حقك
انك تتزوجي انسان يعاملك انك انسانة طموحة لكي اهدافك
بل ويساعدك علي تحقيقها
وانتي برده نفس الكلام بالنسبة له



سلاماتي

funckydoctor said...

ماتصدقيش ده كلام بس أنا نفسى بقوله لكن ساعة الجد هيتغير
أنا مش هستحمل واحدة غبية يعنى
تحياتى

حمامة said...

بصى انا ليا رأى ف الموضوع ده
انا شايفه انى لو ربنا كرمنى بواحد بس تفكيره مش زى العالم اللى انتى ذكرتيهم دول وانا محققة نفسى وطموحى عندى استعداد اكيد اضحى بحياتى دى عشانه وعلشان البيت
لكن الزوج المستغل المتسلط اكيد لأ
ميستاهلش ان حد يضحى علشانه
غير ان الرجاله اللى من النوع ده فعلاً عندهم ازدواجيه
يحب البنات اللى كده علشان شخصيتها لكن يتجوز واحده خام علشان يشكلها بمزاجه
ربنا يهدى ويرزق كل البناتيت الحلوين بالأزواج الصالحين

:)

nanooo2100 said...

ساره
هو موضوعك جميل جدا
وفيه اكتر من زاويه عايزه اتكلم فيها
اولا هو النموزج الي بتتكلمي عنه موجود كتير في الدنيا
ويمكن في كتير مش بيقولو احنا عاين واحده اقل مننا في التعليم
بس في ناس كتير بترتبط عادي بنفس ستواها التعليمي بس بيبقى ديما عندهم رغبه في تحطيم الناسانه دي لو حسو انها ممكن تعديهم واو مجرد توصلهم حتى لو في مجال غير مجالهم
دول موجودين وشوفت منهم بعيني
,,,,,,,,,
وفي بردو رجاله كويسه
بيشوفوا ان ناج مراته من نجاحه وان البيت كله لازم يكون ناجح
الشخصيه دي بتكون شخصيه متزنه واثقه من نفسها
ماعنهاش عقد وكلاكيع
تخليه يهدم مراته
طبعا انا حاسه انهم قليلين في الدنيا
بس بردو انا نشفت نموذد ليهم في حياتنا
.........
بغض النظر بقى عن انواع الرجاله
انا شايفه ان الزوجه مهما وصلت لمناصب ودرجات علميه مش لازم ابدا تنسى ان في بيت زوجها مافيش الكلام ده
يعني في بيتها لازم تنسى كل حياتها العلميه والعمليه
وتفتكر بس ان ربنا اوصها بطاعه زوجها
وانه ليهالقوامه
وان رضى الزوج من رضى الرب
لاااااااااااازم تحسسه ديما بالقوامه
ودي بقى الزوجه الزكيه

عمرو النوبى said...

بوست جميل جدا بجد موضوع تحفة مهم فعلا

بس مش كل الرجاة تفكيرهم كده اكيد فى كتي تفكيرهم متحضر شوية وانا عن نفسى احب شريكة حياتى تكون امرأه متفتحة وليها دور اجابى فى مجتعها وفى حياتها مش تكون واحده عايشة وكأنها ميتة

تحياتى ليكى

واتمنى لو تشرفينى فى امدونة بتاعتى

L.G. said...

من يهابها لا يستحقها

Mohamed Sakr said...
This comment has been removed by the author.
Mohamed Sakr said...

أول شيء البوست جامد جداً

بس أما بوجهة نظري الشخصية المتواضعة بأختلف معاكي

أنا أرفض أن أعترف بوجود المرأة متدنية الاهداف و مستوى التفكير

و ارفض و أسخر أكثر من الرجل الذي يفضل المرأة الخام ، ليشبع نقص منتشر في جميع ربوع روحه

أنا عن نفسي أتمنى إني أتجوز مرأة طموحة و دة هدف مش أمنية إن شاء الله

نحن كرجال و إناث مكملين لبعضنا البعض

بس يالمشكلة إن ياريت يكون في بنات كتيير بتقام النظرة المجتمعية الذكورية المريضة و تتحدى نفسها و المجتمع و تثبت للجميع إنها جديرة بتحقيق ما ممكن ألا يستطيع رجل أن يحققه

أنا عن نفسي و الله و بدون نفاق بأبقى في قمة سعادتي لما بلاقي بنت متوازنة و متميزة في أكتر من مجاااال

أسف للإطالة

Sherif said...

الرقيقة رحيل

حينما كنت فى المرحلة الثانوية .. كنت مقتنعا تماما بانه لابد لزوجتى أن تكون متعلمة وأن تعمل

الاسباب لم تكن حاجة الى مال بقدر ماكانت توافق عقلى .. وطموح مستمر .. فالمرأة المثقفة العاملة هى المعلم الأول لاولاودها .. وهى التى ستدفع زوجها الى الأمام .. لأن أقصى طموح لزوجة تقليدية هو أن ناكل ونشرب .. وليس أن تزداد خبرة ومعرفة واقتحاما للحياة .. فهى أكثر واقعية .. وأكثر ثقة ..وأكثر فهما لزوجها واحساسا به وقدرة على التصرف

خدعة كبرى من يبحث عن واحدة خام .. فأنا لااعرف فى عصر النت والقنوات المفتوحة تعريفا لمعنى خام .. وصدقينى أن المرأة الناجحة هى أكثر الناس حبا لزوجها وتقديرا واحتراما له

عن نفسى .. كنت اتقبل اى شئ .. مش مهم الأكل والشرب .. المهم أن تكون ناجحة وفى أعلى المراتب والمقامات .. وبفضل من الله ..حقق لى ما تمنيته من سنين طويلة

مش عايز أقول عددها

ra7eel said...

Rosa

اهلا بيكى
شرفتينى
هى فعلا مسألة ثقة اولا واخيرا
وكمان تريبة منذ الصغر

نورتينى
-----------------------------------
رحالة

اهلا بيكى
شوفى ياقمر انا مش بكلم على موضوع الجواز بس
انا بكلم على نظره المجتمع بصه عامه للبنت اللى كده
لاء للاسف موجود دلوقتى برضه مش زمان
على الاقل اعتقد ان زمان كان فى امان للمراه عن دلوقتى
نورتينى يارحاله بجد
شكرا على مرورك
-----------------------------------
عفرااء

بس على مهلك بس مالك فى ايه
متعلقيش ياستى لا تضايقى نفسك
ههههههههههه
وعلى فكره انا فى بيتنا مسافرتش
روقى ياروشا
مسيرها تروق وتحلى
----------------------------------
El-assel

لاء اسود ياافندم اصل اانا شوفت النماذج دى واتعاملت معاها

على العموم انت صح فى كلامك انا بسرتغرب جدا لما لاقى واحد متعلم عنده خبره فى الحياه وتكون دى مواصفات البيت اللى عايز يرتبط بيها

للاسف دول اغلبيه

شكرا لمرورك تحياتى

ra7eel said...

Funckdoctor

هههههههههههههههههه
يعنى كلام وبس وانت كمان تقوله ياخبر؟

المشكله انى اعرف ناس بيكون ده فعل عندها مش مجرد كلام

نورتنى
----------------------------------
حمامة

ايون انا معاكى فعلا فعلا فى كلامك
انتى تضحى لو حد يستاهل انك تضحى
لو هو متفهم شخصيتك وكيانك ومقدر ده وبيحرتم ده فيكى
هو فعلا يستاهل انك تضحى عشان انتى بيتك واسرتك اهم

تحياتى ليكى ياقمر
----------------------------------
Nanooo2100

اهلا بيكى شكرا بجد
انا مش مختلفه معاكى نهائى
وقولت قبل كده فى التعليقات اللى فاتت
احنا مش نقدر ننكر ابدا القوامة

انا بكلم فى احترام الجرل لعقل وفكر زوجته
ومعاملتها على انها كيان مستقل مش مجرد تابع ليس لها الا تنفيذ اوامره دون نقاش

معاكى جدا ان البيت والاسره اهم طبعا
شكرا جدا لتعليقك
تحياتى لكى

ra7eel said...

عمرو النوبى

اهلا بيك

شكرا لمرورك وتعليقك
اكيد مش كل الرجالة بس للاسف
فعلا معظمهم كده

نورتينى
واكيد هاجى مدونتك ان شاء الله
تحياتى لك
---------------------------------
l.g

صح جدا جدا
من يهابها لايستحقها
منوراااااانى دايما
----------------------------------
محمد صقر

شكرا ليك
معتقدش ان فى اختلاف انا ذكرت الامثله دى على سيبل انها حصلت قدامى
لكن طبعا انا مش عممت الموضوع على كل الرجال

ومعاك جدا ان البنت تكون متوازنة فى حياتها
وبرضه عارفه ان فى بنات مزودنها شويه بس اتعقد ان بيكون السبب برده نظره المجتمع ليهم فيحاولوا يثبتوا العكس

شكرا على مرورك وتعليقك
تحياتى لك
----------------------------------
Sherif

اهلا بيك
اولا حمد لله ان حققلك ماتتمناه
ثانيا
بجد ياريت الشباب يبفكروا بفنس الطريقة
ياريت فعلا ميكونش وجهه نظرهم للامور سطحية
للاسف مش اقليه اللى بيفكروا كده

تحياتى وتقديرى واحترامى لحضرتك

monaliza said...

اختى الحبيبة: صدقتى فى كل ماقلتى فغالبية الرجال تفكيرهم عقيم يعجب بفكر واحدة ولايريد زواجها وحين يتزوج من امية مثلا يفضل يذلها ويقارن بينها وبين المتعلمة
تناقض غريب فى شخصية الرجل
اعذرينى حبيبتى اليومين دول مشغولة وجلوسى ع النت قليل
دمتى بخير

رئيس جمهوريه نفسى said...

بصى يا ساره هى مساله نسبيه بخصوص نظرة الراجل للست
انا بقول انى عمل الست ودراستها بتكسبها خبرات بتقدر تضيفها لاولاده احسن مليون الف مره من ست قعدت طول عمرها فى بيتهم ومنعت من الاحتكاك بالعالم الخارجى وده بيعمل قصور فى الخبرات ونقل عملية التربيه للاولاد ومش عارف فى القرن العشرين ولسه النظره دى متوفره لدى بعض الرجال عرفت البلد دى ليه عمرها ما حتتقدم

صبرني يارب said...

السلام عليكم اولا

لا فض فوك يا اختاه

بصي الى بيفكر كده حقيقى بيبقى شخص غير سوي

وبيكون هو اساسا شخص مش مظبوط عكاك بمعنى اصح .
وشايف انه مافيش ست تكون محترمه كده من نفسها لازم تكون مكبله بالقيود ده فى حدود ونوعيات الى شافهم
ده غير ان المشكله يا بنتى مش فى دماغ الرجاله بس والله
لا دماغ البنات اصلا كده.
يعنى تكون هى بتشتغل ومتعلمه وزي الفل وبعدين اول ما تتخطب يبدأ بقى ما تكلميش فلان حاضر ما تعمليش كذا حاضر وبعد الجواز بلاش شغل وخليكى فى البيت حاضر
ما تدخليش نت ولو دخلتى ما تكلميش حد حاضر
فلان قريبك ده الى كان فكر انه يخطبك انا باغير منه تاني مره ما تروحيش عند والدك وهو هناك حاااااااضر
ويفضل هو يمسح فى شخصيتها واحده واحده
وهى تقول حاااااااااضر
ولو ناقشته يديها درس عن طاعة الزوج وان الملايكه هايباتوا يلعنوها
وهى تخاف بقى
ولا هو عارف يعنى ايه طاعة الزوج ولا هي عارفه امته الملايكه تلعنها

وما حدش قال ان طاعة الزوج عمياء اطلاقا
زوجات الرسول كانوا يناقشوه ويراجعوه ودوروا فى السيره وانتم تعرفوا .

وزي ما انا دايما اقول للستات ما تخلوش دخان الطبيخ وسطوة الزوج يمسحوا عقلكم وتفكيركم حتى لو ما اشتغلتيش خلي لك راي وعلم وفكر خاص

انا عامله بوست كامل اسمه دخان الطبيخ
وباقول للرجاله صدقونى بعد ما تخلص فورة الشباب وموجة التسلط الى بتماروسها دي هاتكونوا مسحتوا شخصيتها وحولتوها لاله فقط
اله مهمتها تربية الابناء وشغل البيت والعلاقه الى بتتحول للبرود وبس على كده
وانت اول من سيفتقد الروح والعقل والفكر فيها
ولما يبقى عندك 45 سنه هاتتجوز السكرتيره عشان عندها مخ لسه ما حدش مسحه

ولكل واحد بيعك قبل الجواز ويقول انا هاتجوز واحده خام وعجينه واشكلها والهبل ده
هاسأله سؤال تفتكر حضرتك هاتتذاكى وتضحك على ربنا ؟؟؟
معاذ الله لا طبعا الى عملته هاتشوفه هااااااتشوفه فى اهلك
ولو ما كانتش مراتك هاتبقى بنتك

وما تقول هاخد واحده بلا تجارب وبلا ماضي

قد تكون انت اول شخص لكن ممكن اوي ما تكونش كمان اخر شخص

انا رغايه مووووووووووووووووت
معلش يا بنتى اصلها عاده بقى
بتهيئلى كتبت بوست لوحدي

سنووايت said...

موضووووووووووووع جميل
من فترة كنت كتبت مقولة كدة عندي علي الماسنجر باللغة الانجليزية
ان الرجل بيعجب جدا بطموح المرأة لكنه بعد كدة بيبذل اقصي ما في وسعه علشان يدمر الطموح دا

للاسف كتير بيفكروا بالطريقة اللي قلتيها انه عايز قطة مغمضة مطيعة ولما تحطيها علي الكرسي ما تقومش وما يطلعلهاش حس ولا ليها ري ولا ليها تفكير مجرد تابلوه يتعلق في البيت , وييجي بعد كدة يدور علي واحدة تشاركه افكاره طيب مانت اللي اخترت كدة من البداية

كلام...للستات said...

عزيزتى

موضوع اختيار الزوجة يختلف من رجل الى اخر ويمكن اللى بتتكلمى عنه زواج بلا حب ومن يختار زوجة لمجرد الزواج

سوف يبحث عن ما يريده فى هذه الزوجة

فهذه الاايام مثلا ازواج يبحثون عن الزوجه العامله لزيادة الاعباء المعيشية

وزوج يبحث عن عائله تكون سند له

المراه الطموحة يهابها الرجل لشئ واحد
انها تعطى الاولويات لحياتها فى شئ ليس بالاهمية الاولى للمراه

فاحلى شئ فى حياة المراه زوجا يحبها وتحبه وابناء ترعاهم

الرجل يرى ذلك

ومعظم النساء يرون ذلك

علشان كده بتلاقى كتير اوى لما بيتجوزا يتركون عملهم بارادتهم

طبيعة المراه كده

تحب الاسرة عن العمل

وطبيعة الرجل

العمل والاسرة شيئان لا يقدر الرجل الاستغناء عن احدهما

تحياتى

سلام

Dr-hema said...

امم الموضوع عميق

ومحتاج فهم من كلا الطرفين

أولاً المرأة المتعلمة تمام تتعمل ولها طموح عشان تقدر تفهم الحياة وتربى اولادها

أما بالنسبة بقى عشان تشتغل بعد التعليم ده ليه موضوع خاص


د/هيما

عرفة فاروق السيوطى ( الاديب العاشق) said...

السلام عليكم

بعد قراءة التعليقات ولقيتها كلها فى صالح الستات

احب انتصف بقى للأولاد

دة طبعا مش حبا فيهم ولا لأنهم الاحترام كله

لا بس لأن فى نماذج كتيرة كويسة

اولا احنا طبعا مسلّمين ان الخطأ بيقع من الرجل والمرأة على السواء

علشان كدة المفروض المرأة خصوصا عند جزيئة الزواج يكون ليها موقف

يعنى مثلا لو ولد وبنت بيحبوا بعض وجه عريس للبنت

المفروض تتمسك بحبها رغم كل الظروف

والمفروض بالنسبة للمرأة الطموحة متقفش عند حدود

يعنى لو اهلها عارضو نشاطها المفروض طالما نشاطها سليم

تتمسك بشخصها وبدورها فى المجتمع


المهم

يارب اولاد يتعلموا احترام المرأة

وتقبلها كعضو فاعل فى المجتمع من غيرة

المجتمع يفشل

وكمان يارب

البنات تتمسك بدورها وتكون اقوى

بكتير من التحديات

تحياتى

Tamer Nabil said...

انا مش مع كلام انيس منصوردة


اانا راى ان فى فرق بين الطموح والغرور والاول لااختلاف علية انة حق من كل انسان من الجنسين

اما تحديد الرجل انة ضد طموح المراة فضد مش صح

نوعية معينة من الرجال ترى انة من الغير صحيح ولايصح نفوق المراة فى مجال معين

زى مافى بنات الغرور سيطر عليها نظزا لظروف معينة فدوس على كل شىء للوصول الى ما تريد

تحياتى

.:.-=- ELGaZaLy-=-.:. said...

بصى يا رحيل...هو دة الطبيعى ...

بصى الطبيعى ان الراجل الشرقى عادة بيشوف ان تفوقة بيجيى من قهرة للمراة ...دة الطبيعى

دة الى رضعة من امة الى هي ست برضة...

صدقينى المراة مشكلة مشكلة بحق

مشكلة صنعتها المراة

وان كان هناك رجل لا يقبل ذالك فلان امرة اخرى علمتة ذالك

Anonymous said...

السلام عليكم
ازيك يا سارة
عاملة اى ؟
يا رب تكونى سعيدة
انا بصراحة لسة مش قرات الموضوع بس انا جاى اسلم بس

خالص تحياتى بجد


احمد(no chance)

كلام على بلاطة said...

كل ا مرة
مهابة من الرجال
سواء التى يقصدها انيس منصور او غيرة
سواء كانت ذكية او غبية
لان تربيتنا غلط وتزرع الخوف من الرجال والنساء
وكان يوجد تار بيننا وبين النساء
لماذ لا اعرف

abdullah SH said...

عزيزتى رحيل ولو انى اختلف معكى فى بعض السطور الا انه اتفاقى معك اكتر من تلك السطور الشاده بنظرى لانه طبييعا ان يكون لكل قاعده شواد وانا بنظرى هناك رجال عكس اولاءك الرجال تماما وعلى العكس ساندو زوجاتهم بل وحتى تركو اعمالهم فى سبيل ان تحقق زوجاتهم حلمهم بأخد شهادات عليا متلا فى بلد اغتراب متلا وانا هنا جلبت معى متل واحد من عدة امتله رغم يقينى التام بأن اللاتى يعانين اكتر من تلك النساء... مع كامل اعجابى وانبهارى بمدونتك الرائعه

monaliza said...

فى انتظارك وتيجى بالسلامة واهى فرصة تعيدى ترتيب حساباتك
يارب تكونى بخير

مصري بالغربة said...

جميل جدا ان تكون المراه طموحه ومتفوفقه ولكن بتواضع

عجبني جدا الرد ده

انا كرجل فعلا اعجب بالمرأة الذكية والطموحة

ولكن ذكائها يفيد تربية ابنائها واسعاد زوجها

وطموحها في انجاح بيتها وتربية ابنائها ووصولهم لاعلى مراتب الاخلاق والالتزام

وليس طموحها في ان تصبح مديرة او ترتقي اعلى المناصب لتزاحم الرجال

فهذه المراة تذهب بطموحها وذكائها

وافضل عليها المتوسطة التعليم والتي ترعى ابنائها وزوجها