Monday, June 9, 2008

احلام عمرنا


كثيرة هي أحلام عمرنا بس قليل منها اللى بنحققه
حتى اللى بنحققه مش بيكون زى ماحلمنا

المهم إن إحنا بنحلم وجايز يكون عندنا نفس الاحلام

ممكن تكون مختلفة في التفاصيل بس اكيد فيها نفس الأحاسيس
إحساسنا لما نحلم ونخاف على حلمنا
إحساسنا لما نحلم و أحلامنا تضيع
إحساسنا وإحنا بنهرب لأحلامنا من واقع مهزوم
إحساسنا بطعم الفرحة لو حققنا حلم لينا
إحساسنا إن إحنا بنحاول مجرد محاولة

أول ما اتعلمت احلم كان مع ميرا صديقة طفولتي وحبيبتي وبنت عمتي
كنا بنلعب لعبة إحنا اللي اخترعناها وإحنا صغيرين لسه في ابتدائي عبارة عن تخيلنا لحلم معين
نشد الغطا على عنينا شويه وبعد كده كل واحده فينا تقول حلمها اللي حلمته او تخيلته
ولما كبرت شوية احترت فى حلمي شوية
كان نفسى اكون صحفية وشوية مضيفة طيران وشوية مرشدة سياحية وشوية مذيعة
وفى نفس الفترة كان فى حلم كمان حلم

بحب حقيقي يفهمني من غير ماتكلم ويحسني من نظرة عيني حلم بالأمان
وكبرت كمان وبقى المفروض أنى احدد أي حلم اللي عليه الدور انه يتحقق
حلمت أخيرا أنى اشتغل في مجال إدارة الأعمال وقررت ادخل كلية تجارة

كنت حاسة أنها الأنسب لشخصيتي
غالبا هو الحلم الأول ليه اللي اتحقق بس ده كان مجرد وسيله لحلم اكبر ما أتحققش
واتخرجت
وبعدين
فين أحلامى
ملهاش وجود
حاسة أنى عايشه حياة مش حياتي

وأنى حد تانى غير اللي المفروض أكونه
اشتغلت فى وظيفة حكومية روتين وملل وخنقة
ومكتب عليه كومة أوراق وملفات
بس اللي واثقة منه إن ده مش أخر طريقي وان لسه قدامى طريق تانى جايز صعب وجايز الناس شايفاه جنان بس انا حاسه انى هوصلوا فى يوم هسعى ليه دايما وعمرى مهتنازل عنه
للأسف فى حاجات كتير أوقات بتكون مش بأيدينا وبيفرضها علينا القدر بس المهم أنها تكون بالنسبة لينا مسألة وقت ونسعى ان إحنا نغيرها
بقيت أوقات بخاف احلم بس برضه مبطلتش
مقدرش اعيش من غير احلامى حتى لو انا اوقات بحس انها خلاص مبقاش فى مجال انها تتحقق
اصل الحياة كل يوم بتفرض علينا احلام جديدة وانا لسه عندى شوية امل صغيرين فى حلم بعيد بحاول ميضعش من قدام عينى ممكن ابعد بس هحاول اوصل
عشان كده مش هبطل احلم
برضه قلبت دراما
على فكره انا نزلت البوست ده فى محاولة منى للتفاؤل اللى مفتقداه جدا بقالى فترة
دلوقتى انتو بقى غمضوا عنيكوا وسيبوا هنا وروحوا هناك
هناك فين؟ اه سؤال منطقى برده, هناك ده اى مكان نفسكم تكونوا فيه
وانسوا كل احزانكوا انتوا جايين النهارده عشان حاجة واحدة بس تحلموا وتحلموا وتحلموا
.دور جواك على حلم حلمت بيه زمان فاكر اول ماحلمت؟
ايوه وانت لسه صغير,,,,,,,, ولما كبرت شويه ورحت المدرسة,
حلمك وانت فى فتره المراهقة احلامنا العبيطة الصغيرة. ايه نسيتها؟
وحلمك بأول حب
وحلمك بشغل كان نفسك فيه
وحلمك ببيت جميل واحساس بالامان
وحلمك انك تفضل مع اصحابك بتوع زمان وايام الجامعة
طب ولو كنت اتخرجت ياترى لسه بتحلم ؟
وحلم كان غالى قوى عليك مستخبى جواك بتبتسم اول لما تفتكره
وطيب اللى انت بتحققه فى حياتك دلوقتى كان حلمك زمان ولا حلم جديد خالص عمرك ماحلمت بيه قبل كده ؟
احلموا معايا
حققت ايه؟ و ايه احلامك اللى متحققتش
و خلينا نحلم مع بعض مش جايز نصبر بعض

61 comments:

ghoneem said...

أهلا بيكي

أول تعليق

.....!!!!ايه الصدف السعيدة دي

هقرا وأرجع تاني أعلق

تحياتي

Salwa said...

الله عليكي

وهذا هو المطلوب

هروح أغمض عيني واحلم بقى

بجد

برافوا عليكي

هي دي ساره

عـــفـــراء said...

يالهوى
اية دة بقى ياست سارة هو حد قاعد على باب المدونة غيرى
مالحقتش اقرا بس المفروض انة يكون اول تعليق ههههههه
يلا بقى مش مشكلة ياصديقتى المبجلة
هروح اقرا واجيلك حالا
سلام

عـــفـــراء said...
This comment has been removed by the author.
رحاله said...

بسم الله
السلام عليكم ورحمه الله
تعرفي
اول مابنتولد ونكبر شويه ونعي للامور شويه والدنيا من حولينا بتكون احلامنا بريئه وبسيطه وبتكون من وجهه نظرنا اكبر حلم فى الكون كلو
تقريبا بيكون الحلم انى عاوزة اكون دكتورة مع الوقت الحلم يغير او ازود عليه حلم كمان مثلا احلم بعربيه او انى اكون انسانه مشهوووورة اوى واحلام تانيه كتيرة وكتيرة ويمر الوقت ويروح ويجي الزمن علينا ونكبر ونكبر وفجأه فين الحلم ضاع الحلم
اول ماتولدنا كان الحلم كبيييييييير اوى بعد شويه يصغر يصغر يصغر واحنا مش حاسيين بنندم ع عمر فات ووقت عدي من غير مااعطيه حقه وحلم اصبح سراب ونهرب اننا نحلم تانى بس باحلام عدت وسابتنا
احيانا بنحتاج للحظه صفاء لحظه بنخطفها من بين كل اللحظات بنعطيها حقها كلحظه وهى بتعطينا حقنا اننا نعشها وتكون اجمل لحظه فى عمرنا بنمزجها مع الهوا النقي والسما الزرقا وعلى ضوء الشمس الخافت وقت الغروب زى الشموع ونسرح معاها ونحلم ونحلم اننا طيير مع سرب حمام طاير فى السما مش بنحس باى قيود ونبدا نبنى لنفسنا بيت فى المكان الى حبيناه فوق فى السما ممكن يكون فى ذهننا من زمان ومخططين ليه ع ارض الواقع بس كل لحظه بنعرف انو سراب وشئ ضاع بس فووووووووووق بنحلم ونحلم ونعمل كل الى عاوزينو لانها لحظه بتاعتنا احنا ولان ببساطه محدش هيحاسبنا ع الاحلام
من غير الاحلام كان زمانا مش عايشين
الاحلام بتختلف من شخص للتانى
اقدر اقولك اننا ع الرغم ان كل واحد فينا عندو احلام وطموحات غير التاني واهداف مختلفه الا اننا بنشترك في حلم واحد وهدف واحد الى هو الحب وايجاد الحب من اول يوم بندرك فيه الدنيا كلنا بنبحث عنو ****
كل واحد بيفتكر ان اما الحلم بتاعو مش اتحقق يبقه العيب في القدر لا ربنا مقسم كل شئ عندو وكل خلق لما هو ميسر له
انا كانت امنيه حياتى انى ادخل علوم بس رحت اداب وكرست كل جهدي فى تالته ثانوي علشان ادخلها لانى لقيت نفسي فيها
تحياتى سيدتى الرقيقه
وعذرا ع الاطاله
جيلان صالح

رحاله said...

اه معلش
نسيت اقولك
اد ايه الصورة الى فوق دى معبره وجمييييييله جدا
بس يارب القلوب دي تفضل طاير فى السما ومش تنزل على الارض
تحيااااااااتى بجد

Wish I were a Butterfly ... said...
This comment has been removed by the author.
Wish I were a Butterfly ... said...

من أحلامي إني أكون صحفية،بس مش صحفية وخلاص..بس صحفية ناجحة أوي.... لسة من أيام قليلةجدا قررت أتخلى عن الحلم دة،بس يمكن كلامك يخليني أرجع أفكرتاني!! مش عارفة لسة :). حلمت ولسة بحلم إني ألاقي فعلا الحب الحقيقي اللي صاحبه يفهمني من غيرماأتكلم...إن شاء الله هيحصل.ليه لأ؟

الكلام عن الأحلام دايما جميل أوي، بس كلامك بجد خلاه أجمل وأجمل :) وخلاني أسرح معاكي بعيدفي دنيا الأحلام
كل تحياتي ليكي يا رقيقة أوي
أتمنى تقدري تحققي جزء كبيرمن أحلامك قريب

عرفة فاروق السيوطى ( الاديب العاشق) said...

ايه الاحلام دى كلها

يا ست سارة

المفروض اننا نحلم معاكى صح

طيب ممكن احلامنا تتخبط فى بعضيها

هههههههههه

والله وانا بقرأ البوست الجميل قوى ده

افتكرتك حلمى الكبير قوى اللى تقريبا

كنت حققته بس جاته واحدة ربنا يسامحها
اخدته منى

مش حققته بس بعدتنى عنه ولسة لدوقتى بحلم بيه

المهم

ياريت الناس كلها تحلم

بس تحاول تحقق احلامها

مش هطول كتير واحكى

بس احلامك هى احلامنا

حياة كويسة وحب حقيقى

تحياتى

dr.gesho said...

تموت مع المرء حاجاته و حاجة من عاش لا تنتهى
اكيد لازم نحلم لان الحلم هوا الطموح مينفعش نبقى عايشيين كده و خلاص ماشيين مع اللى ماشيين اكيد لازم نحلم بس كمان لازم الاحلام دى تكون ممكن تتحقق يعنى ماينفعش نحلم بحاجات مستحيله
انتى متاكده انك متفائله فى البوست ده وبعدين فين البوست الللى فات ؟ اختفى ليه
عموما لو بطلنا نحلم نموت
تحياتى

Tamer Nabil said...

حمد الله على السلامة عزيزتى رحيل

اتمنى تكونى مبسوطة يارب

الحلم مش بيموت جوانا رغم اى ظروف وطول ما احنا عايشين هنفضل نحلم وحتى لو مش اتحقق يكفى شرف التجربة وتمسكنا بالا احلام حياة

ربنا يوفقك

تحياتى

princess dodo said...

معنديش احلام لسه محققتهاش
متتخضيش
انا مش طموحه بالقدر ده
لكن قصدى
ان اللى مقدرتش احققه بجد
كتبته
وحسيت انى حققته
واللى مقدرتش اكتبه
رسمته وحسيت انى حققته

واكتفيت


.
.

يارب تحققى كل اللى بتتمنيه

youma said...

معنديش حلم كبير قوي لدرجة انه مبيتحققتش في حلم صحيح متحققش بس لسة حلمي ومنغير أمل

وحلم بأمل ابتديت أحقق جزء منه تقريباً

ومعرفش كل الاحلام الباقية بسيطة جداً

على فكرة احلا حاجة اننا نحلم

صوت من مصر said...

يارحيل والله مش قادر الاحق على مواضيعك تمام عموما البوست جميل وهايل وبالنسبه للحلم هحلم وعيش الحلم دلوقتى مش بعدين
صح ولا ايه ؟

Anonymous said...

رحيل ارجعي بقى من بور سعيد
بس مترجعيش ايدك فاضية
بجد عايزة اتكلم معاكي اوى
اختك الصغنتطة

summar said...

:)
ايه الكلام ده
انتو بتتكلمو عن الاحلام؟
:)
هوحد لاقي ياكل يابنتى علشان يحلم
::
عموما انا هقلك
وانا صغيرة اوى اوى كنت بحلم ارجع مصر..ولما رجعت كنت بحلم اسيبها
:)
وبعدها بقيت عادى جدا الحاجات بتحصل بيومها
مكنش ليا توقع معين عن حياتى غير ان انا بكره العربي ولازم ابعد عنه وبحب الرياضة ولازم اقرب منها
كان نفسي ادرس علم الفضاء بصراحة بس مالقيتش التخصص فى مصر قلت خلينا فى الهندسة
اول حب والكلام ده مخدش حيز كبير من حياتى علشان كنت على طول فاكرة ان سنى صغير وماينفعش احب حد وهو يحبنى من غير مااكون دارسة عواقب الموضوع
كان نفسي اوى اتعلم جيتار وهارب وبيانو وعود وفلوت ولسة الموضوع ده فى امكانية لتحقيق جزء منه طبعا مش الالات كلها
مدخلتش تربية موسيقية علشان مالهاش مستقبل اوى..ومدخلتش فنون جميلة لنفس السبب
:)
وبعدين كان نفسي اوى اتعلم المانى وفرنسي وبرده شكلى كده هتصفف على حبة الانجلش اللى انا عارفاهم وخلاص
مش احلام كبيرة اوى بس اهى توقعات
ومعظم الحاجات اللى مابتتحقش فى وقتها عندى بتتحقق بعدين
وحبة بصرف نظر عنهم
وحبة بجرب والاقى نفسي مش معجبة اوى بالوضع ده
وحبة بيحصلى احباط ومابيتحققش
:)
وقليل من الحاجات اللى انا تعبت نفسي فيها علشان تستمر وتكبر واحافظ عليها
بس كده
دى قصة حياتى
بس اهم حاجة ان انا لسة لغاية دلوقتى محققتش اول حلم
ولسة فى مصر
:)

la3lahakhier said...

انا يا ستى جيه اسلم وامشى
بطلنا نحلم نتقلب عشان نجرى على اكل عيشنا
الحلم الوحيد اننا ننام شوية هههههههههه
دمتى يا جميلة

Noha El-arabi said...

مش لاقياه
الحلم اختلط مع حاجات تانية
و اختفي
حارجع ادور تاني

زهرة الياسمين said...

فكرتينى بحاجة حصلت من فترة يمكن من سنتين او اقل شويه صغيرين
كنت بلعب لعبه جميله مع شخص اجمل
كنا بنغمض عينينا و نحلم و بعد ما نفتحها نقول كل واحد حلم بإيه
و سبحان الله دايما الحلم بيكون واحد
برغم الفوارق الكبيرة اللى بيننا فى كل حاجة لكن دايما حلمنا كان واحد
قد ما احنا مختلفين قد ما احنا متطابقين
و فى يوم الشخص ده راح منى و من بعدها لما بقيت بغمض مش بشوف غير الظلام الظاهر انى فقدت القدرة على الحلم
أشكرك على البوست الرائع رجعتينى لأيام جميلة قوى

L.G. said...

مش ححلم
من 10 سنين كده كانت عندي واحدة كانت صاحبتي وقلتلها تعالي نكتب في أجندة أحلامنا وبعد 5 سنين نشوف ايه الي اتحقق منها

هي اتحققلها حاجة واحدة اتجوزت جوازة والسلام الحلم متحمض كويس

وأنا اتعلمت أركب عجل ده في عشر سنين مش خمسة

يديني ويديكي طولة العمر بأه

المستنصر بالله said...

وانا باقرا البوست حسيت انى انا اللى باتكلم عن نفسى انا كمان بحب احلم جدا واغمض عنيا ما شاء الله اسلوبك جميل وكلامك رقيق

ادم المصرى said...

السلام عليكم
******
انا عن نفسى هتكلم بكل صدق
وهتكلم عن حلمى الى نفسى يتحقق ولو حتى اموت سعتها لكون اشوفو ادام عينى بيتحقق
نفسى نحرر جميع بلاد المسلمين من الكفرا واكون انا بحارب معاهم وترجع الغلبه لى الاسلام والمسلمين والنصر لله
*******
سعتها بقه اموت اول اتحرق بجاز لكن اشوف اليوم ده بعنيا
******
اتمنا ات تزورو مدونتى

ادم المصرى said...

اولا اتمنا من كل قلبى ان تتحقق احلامك كلها ان شاء الله
وثانيا انا حلمى الوحيد هوا النصر وتحرير جميع بلاد المسلمين
على فكره البوسيت دا انا عشت فيه كتير كل شويه اخش اقرأ ومردتش لحد مرديت اهو الحمد لله اتمنا زيارتك ان شاء الله

إبـراهيم ... معـايــا said...

لســــه الأحــلام كثيييير ... بس انتوا تحلموا

ولو بطلنـــــــــا نحلم
هنحاول نرجع تاني. . للوقت اللي مانعرفش نكمل فيه
ونحاول نفتكر الأيام الحلوة
علشان بتفكرنا بأوقات حلوة

ولو بطلنا نحلم هنعيش، لأننا مش عايشين بمزاجـنــا

شكرًا رحيـــل
مرور أول

ومدونة حلوة

DayDreaming said...

طب ليه الفضايح دي يعني هههههه
يلا كويس انك محكتيلهومش احلام الطفوله دي كانت شكلها ايه

بوست جميل وانا عارفه انك بتكتبي فيه من سنه :)
بس فيه لمسة اكتئاب برضه

كاميليا said...

ساعات بنخاف نحلم

نغمض عينينا ونخاف نحلم

ولو فكرنا نحلم
نحلم حلمين
حلم جميل كله امانى
وحلم للوقاية من ضياع الامانى

لكن لا نتوقف عن الاحلام


بوست جميل يا سارة
محتاج كلام كتييييييييير



تحياتى وحبى

نوره الخشن said...

جميل اننا نحلم بس الاحلى نحقق الاحلام ومتهوش مننا

تحياتي

rovy said...

فعلا فيه حاجات كثير بتنفرض علينا و احيانا بتخنق الحلم جوانا بس ده مش معناه اننا نستسلم طول ما احنا قادرين نحلم يبقى اكيد احنا لسه موجودين وكفايا احساسنا بوجودنا وبأننا عاشيين ..
احلامنا هى الشىء الوحيد اللى ملك لنا لوحدنا حتى لو مقدرناش نحققها يكفينا اننا قدرنا نحلمها ..
يااارب تحققى كل احلامك و ربنا يوفقك دايما .
دمتى بخير و سعاده

تحياتى
rovy

حاول تفتكرنى said...

اعتقد أن احلامنا بتتغير حسب كل مرحلة نمر فيها ، ربما تزداد نضجا ، ربما تزداد عمقا ، ربما تزداد صعوبة ، وربما لا نحلم ابدا

ولكن تبقى الرغبة فى الحلم شاخصة حتى لو لم نستطيع


تحياتي

linda said...

رحيل انا حلمت كيتر بس مش مفيش ولا حلم تحقق

كنت بحلم أكون محامية
ولما كبرت دخلت الهندسة

كتير احلام متحققتش

مش حعددها دلوقتي يمكن تكون سادجة بس هي بتعنيلي لحد اليوم

monaliza said...

جيتى ع الجرح ياجميلة
كان زمان بحب الاسئلة دى اوى واجاوب عليها بكل اسمتاع دلؤتى انا فى مرحلة عدم اتزان ورغم تمسكى بالامل الا انى فقدت القدرة على الاحلام
بس سيبك انتى القادم اكيد اجمل

راجى said...

ياريت الظروف تسمح بالاحلام
ازيك ياسارة
لكى التحية

walaa said...

انا عارفه اللى انت اسمك ساره بس انا بحب اقولك على اسم راحيل علشان انت بتحبيه فخلينى اقولك يا راحيل عارفه يا راحيل بخاف احلم اصحى منه على كابوس انا زيك تمام حلمت حاجات كتيره وانا صغيره بس مفيش حاجه اتحققت كان نفسى ادخل كليه التجاره زيك بجد والله مش بهزر كنت هلاقى نفسى فيها زى ما بتقولى بابا واقفلى وقالى معقوله تكونى جايبه مجموع عالى وتدخلى تجاره فلتله خالص ادخل سياحيه قالى بلا مسخره وقله ادب ههههههههههههه
دخلت تربيه غصب عنى وانا مش حبه اساسا اسمها ما علينا سبيها على الله احسن
تحياتى يا قمر ولاء

dr.Roufy said...

احلاااااام
ياما حلمت وياما ندمت على أحلامي
بس الغريب يا سارة اني ياما نسيت أحلامي من كتر ما اتخيلت اللحظة ضاعت مني يا سارة
تخيلي؟

Sharm said...

صيف سعيد ليك و للكل

funckydoctor said...

:(
الواقع قاس ونعلم ذلك
أتعب نفسى وأحلم ليه
تفائلى واعلمى ان الله معكى

مدحت محمد said...

اوكى انا هغمض عينى

لا مش نافع لازم اغمض عينى وانا فى هدوء

مينفعش نغمض عنينا فى وسط الزحمة

وفى وسط المشاكل لازم نبعد الاول عن الزحمة والمشاكل بعدين نغمض عنينا


ونحلم زى ماحنا عايزين
احلام يقظة
مش القصد نهرب بيها لعالم خيالى
لا
نحلم بيها باهداف نفسنا نحققها

بتبقى متعة احلام اليقظة
اجمل كتيييييييير من تحقيق الهدف نفسه

على العموم انا عشان زيك على مكتب حكومى
وروتين وملل وارف
وشغل بطيخى
بكل ماتحمل الكلمة من معنى

بحس انى شغلى بيوأد احلامى

بس برضه باذن الله مش هستسلم

وهسمع كلامك
ومش هبطل احلم

ra7eel said...

غنيم

ياهلا ياهلا بيك

ههههههههههههه اه فعلا صدفه سعيده
وحجزت اول تعليق وزوغت
فى كل الاحوال منور يافندم

تحياتى وتقديرى
***********************************
سلوى

ههههههههههههه انتى غمضتى عنيكى ولسه نايمه من ساعتها
يارب تكونى حلمتى احلام سعيده وربنا يحققهالك

تحياتى وحبى
***********************************
عفراء

هههههههههه
اه غنيم وسلوى كانو قاعدين هما كمان على باب المدونه

ولا يهمك المره الجايه ان شاء الله

بس ايه الرساله الغريبه اللى انت باعتهالى دى؟؟؟؟؟
*******************************
رحالة

وعليكم السلام ورحمة الله وبركاته

انتى عملتى تدرج حلو لاحلامنا
بس الغريب ان احنا اول لما ما نتولد احلامنا بتبقى كبيرة وبعد كده بتصغر
مع ان المفروض العكس بس للاسف المشاكل والهموم والاحباط اللى بيقابلنا فى حياتنا
بيخلينا نفقد القدرة على الحلم
فعلا بنحتاج لحظخ نهرب من كل الديا نهرب لاحلامنا نقضى وقت ميل فيها وبعد كده نرجع لواقعنا المهزوم

يارب تحققى كل احلامك وشكرا ليكى بجد
وياست الكل بلاش تعتذرى على الاطالة المدونة مدونتك ولا يهمك
تحياتى وحبى
**********************************
Wish I were a butterfly

شوفى بجد لو لسه فى امكانك تحقق حلمك اوعى تتنازلى عنه العمر بيجرى والفرص مش بتيجى غيره مره واحده
حاولى تانى وتالت ورابع
لو محاولتيش الوقتى هتحاولى امتى اوعى تيأسى
اوعى تحسى ان العمر جرى بيكى من غير ماتحققى ولو جزء بسيط من حلمك
ربنا يرزقك بحب حقيقى يارب ويسعدك
شكرا ليكى ربنا يخليكى يارب
***********************************
عرفة فاروق السيوطى

اهلا بيك
ههههههههههه ده الاحلام اللى انا كاتبها هنا حاجه بسيطة قوى من الاحلام اللى حلمتها
انا قولت اختصر يعنى
فى احلام بيكون مش مقدر ليها ان احنا نحققها بتكون نصيب وقدر ومكتوب
بس ده مش يمنع ان احنا نحلم تانى وتالت ورابع
احلى حاجه بجد الاحلام دنيا تانيه
ربنا يحققلك كل احلامك يارب
تحياتى

ra7eel said...

Dr.gesho

ايه ده ؟انت بستقرضنى ومكتبتش احلامك
اممممممممم بقى كده ماشى ماشى
اهو محاولة للتفاؤل
ماشيها تفاؤل بقى اعمل نفسك مش واخد بالك
ايه ده بوست ايه اللى اختفى؟ انت بيتهيألك حاجات اليومين دول ولا ايه
ههههههههههههههههه
منور ياحمد دايما
***********************************
تامر نبيل

الله يسلمك اهلا ياتامر

ربنا يخليك
ويحققلك كل احلامك
شكرا لمتابعتك
تحياتى
**********************************
برنسس دودو

ازيك ياقمر نظريه حلو قوى
اللى مش حققتيه كتبتيه
او رسمتيه
قد حاجه بجد جميله

ربنا يوفقك يارب ويسعدك
***********************************
يوما حبيبتى

احلامنا مهما كانت صغيره
بس احساسنا بيها بيفرحنا
الحلم من غير امل يبقى وهم
بلاش نضيع عمرنا فيه

ربنا يسعدك يارب ويهنيكى
بحبك
***********************************
صوت من مصر

اهلا بيك

معلش هم اليومين دول وبعد كده مش تقلق موضوع كل اسبوع وخلاص
ههههههههههههههههه
احلم على قد ماتقدر دلوقتى وبعدين
تحياتى لك
*********************************
Anonymous

انا رجعت ياقمر
هههههههههه
مين؟ مين؟ مين؟
انا عارفاكى وكل لما اقابلك على الميل انسى اتاكد منك
ههههههههههههههههه
منوره

ra7eel said...

سموره الاموره

ههههههههههه مهو عشان كده هنحلى هو لينا غير احلامنا
شوفى فى الاحلام لسه فى ايديك تحققهيا اوعى تتنازلى عنها مهما حصل
هنعيش مره واحده وفى احلام لما الزمن بيعدى بيبقى صعب تحققيها
فالحقى حققيها الوقتى
ربنا يهنيكى ياقمر
*********************************
لعلها خير

انتى تنورى فى اى وقت
ربنا يخليكى وتسلمى يارب

ههههههههههه نامى ياستى زى مانتى عايزه
تصدقى الواحد نفسه ينام من غير قلق وتفكير وهموم وكوابيس

ربنا يسعدك يارب
تحياتى وتقديرى
**********************************
نهى العربى

اهلا يانهى
ضاع وسط حاجات كتير هموم واوهام وزحمة

لازم تدور تانى
احلمى
الحلم بيهون علينا كتير
ولما تلاقيه تعالى قوليلى عليه
شكرا على مرورك
**********************************
زهرة الياسمين

مش عارفه اقولك ايه
بس صدقينى
الحياه بتستمر
حتى لو احلامنا فى لحظة ضاعت وتاهت
حتى لو مبقناش نشوف غير ظلام
صدقينى
الاحلام بتهون كتير
تحياتى لكى
**********************************
l.g

هههههههه
الله يطمنك
بس كفايه بجد ان احنا بنحلم
جايز فى يوم حاجه تتحقق
او جايز حلم مكنش فى بالنا نلاقيه قدامنا
وساعتها حاجات كتير تتغير
لسه فى شويه امل صغيرين
ان احنا نعيش حياتنا زى مااحنا عايزنها ومش زى الناس

يارب ترجعى تحلمى تانى
حبى لكى
***********************************
المستنصر بالله

اشكرك على مرورك

ويارب تتحقق كل احلامك

تحياتى لك
***********************************
ادم المصرى

وعليكم السلام

اميييييييييييييييين يارب
وتحقق كل احلامك

شكرا على مرورك وتعليقك
تحياتى لك

mohammed alsha3r said...

بجد حاسس ان انا اللى بتكلم

بس مهما طال الليل

ومهما حصل

مش هبطل أحلم

وهسعى لتحقيق احلامى

ولو بطلنا نحلم نموت

بجد لو مفيش حاجه اسمها احلام كان ممكن الواحد فينا ينتحر يجى له حاله عصبيه

يتجن

فلله الحمد والمنه ان فى حاجه اسمها احلام

ra7eel said...

ابراهيم ......معايا

ومتخافوش تحبوا قولوا اتكلموا
انا بحب الاغنيه دى جدا

بس عيشه عن عيشه تفرق
صعب حياتنا من غير احلام من غير امل فى بكره حتى لو ضاع ساعات

شكرا ليك
بس حاجه غريبه كل مره تقولى انها اول مرور
دى تقريبا زيارتك التالته

تحياتى لك
**********************************
ميرا

اى خدمه يابنتى هههههههههه
كنت لسه هستنى بلوج مقبره الاحلام اللى اتؤدت من قبل ماتطلع للنور
هههههههههههههههههه
اه فاكره لما كنا سوا وانا بكتب البوست ده ههههههههههه
كنا قاعدين على السلم وبنمخمخ لمدونه احلام عمرنا الله يرحمها
منوره يامرمر
**********************************
كامى

عروستنا الحلوه
ربنا يهنيكى يارب ويملى كل ايامك احلام سعيده وتتحقق

ولو فكرنا نحلم
نحلم حلمين
حلم جميل كله امانى
وحلم للوقاية من ضياع الامانى

جميل ياكامى بجد فعلا كده
تحياتى وحبى
***********************************
نوره الخشن

اهلا بيكى
فعلا الاجمل ان نحققها
بس للاسف فى احلام بتفضل احلام
اوقات بتكون متعتها فى كده

شكرا لكى
***********************************
Rovy

من حقنا نحلم مهما الاحلام اتخنقت جوانا

شكرا لمروك وتعليقك

وتحققى يارب كل احلامك انتى كمان
تحياتى وتقديرى
**********************************
حاول تفتكرنى

ولكن تبقى الرغبة فى الحلم شاخصة حتى لو لم نستطيع

حقا تبقى رغبتنا دائما فى الحلم
الاحساس نفسه انه فى حاجه بنعيشها زى ماحنا عايزين
من غير فشل ولا احباط
فى الحلم نفسه

تحياتى لك
**********************************
ليندا صديقتى الجميلة

احلمى من تانى دورى على احلام جديده
حاولى فى اللى لسه باقى من الاحلام القديمه
مفيش حلم ساذج كل احلامنا بتمثل لينا حياه مهما كانت صغيره
المهم مش تيأسى

حبى ومودتى

ra7eel said...

موناليزا

ياااااااااارب تكون مرحلة وتعدى
وتطلعى منها اقوى وانقى
وتستعيدى قدرة على الحلم تانى

ياريت فعلا يكون القادم اجمل

ربنا يهنيكى يارب
تحياتى وحبى لكى
***********************************
راجى

حتى لو الظروف مش سامحه
خلينا نسرق احلامنا من الايام وهى مش واخده بالها
انا بخير
شكرا لسؤال حضرتك ومرورك
تحياتى وتقديرى
********************************
ولاء

وانا كمان بحب اسم رحيل شكرا ليكى
ههههههههههه تعرفى انا هربت فعلا من تريبه دى باعجوبة
كانوا برضه مصممين ادخل تربيه
بس على مين
وحاليا مبقتش فارقه كتير برده لفت ودرات واشتغلت فى ادرايه فى معهد ازهرى
حاجه تخنق بجد

يالا ربنا مع الجميع
تحياتى وحبى تقديرى
*************************************
د/روفى

يااهلا بيكى
اخبارك ايه؟

صدقينى ممكن نتوه عن احلامنا او ناخد اجازه منها
ونحس ان احنا عايشين وخلاص اليوم بيومه
بس بيكون احساس صعب قوى
مهما حصل لازم نرجع نحلم تانى
مش جايز بكره احلى

ربنا يوفقك يارب
***********************************
Sharm

يارب

شكرا لمرورك
**********************************
Funckydoctor

تحلم عشان تهون الواقع القاسى
انا بحاؤل اتفائل
انت كمان حاول

تحياتى لك
**********************************
مدحت محمد

حاول توجد لحظة هدوء مع نفسك
اهرب من كل الدوشه والزحمه
لمكان انت لوحدك فى بس

ههههههههههه اخيرا لاقيت حد مش طايق شغله زى
وشايف الشغل الحكومى كده اصل لما بتكلم قدام بيقولوا عليه مجنونه
مش بزعل مانا اصلا مجنونه
المهم
اوعى تبطل تحلم

تحياتى لك وتقديرى
**********************************
محمد الشاعر

اهلا بيك

بالظبط كده المهم مش تبطل تحلم
اكيد ورا كل ليل نهار

فعلا الاحلام بتهون كتيير جدا
انا بحس فعلا انها جنتنا على الارض
هى اوقات كتير بتكون هروب
بس بجد احلى لحظات بنعشها

شكرا على مرورك
تحياتى وتقديرى

واحد من البلد دى said...

باحلم أكون بحار
واعدى بحر الويل
باتمنى ابقى نهار
ينشق وسط الليل
باتمنى ابقى شراع
باحلم اكون قارب
والحلم يبقى دموع
احلم اكون منديل


أتمنى تعجبك

دمتى بخير

منى said...

احلمى يا ساره ومتخافيش
لو الحلم اتحقق خير
ما اتحققش يبقى برضه خير
احلمى غيره
انتى بتتغيرى والدنيا حواليكى بتتغير يبقى اكيد حلمك هيتغير

زمان انا واخواتى كنا بنعمل زيكم
ونقول يلا نحلم
دلوقتى كل واحد بيحلم لوحده
دلوقتى بتمنى مش بحلم
تعرفى بحس ان عالم المدونات هو احلام اليقظه بتاعتى
يلا نحلم بقى

زُمُرده said...

مش قلتلك
كأنك بتحكي عني في اجزاء كتير
وبتفكريني بيا في تفكيري

اه اصلي تايهه عني من كتير وساعات بلاقيني صدفه في اي مكان من غير مواعيد

ياريت كل الاحلام لما تنتهي متوجعناش اوي
وياريت تبني فينا ومتهدش
ونقدر دايما ندور على احلام وحاجات ضُغنونه تفرحنا تاني

------------
اغنيه ايمان البحر
جوووووووووووون وجوووووون

مرسي على سؤال الدايم

كاتب مصري said...

هل يسمح لي صاحب هذه المدونة بدعوته لزيارة مدونتي المتواضعة جدا على العنوان التالي وترك لمساته هناك
http://kanyatklam.blogspot.com/
تحيتي

ادم المصرى said...

رحيل
اد ايه انا نفسى احلم والحلم يتحقق كتير بحلم وكل الناس بتحلم لكن كان نفسى ان احلامى كلها تتحقق كان نفسى اكون فى زمن الفن الجميل او زمن العندليبيات زمن الجمال زمن الحب زمن البساطه زمن الفضاااء مرسى جدا على بوستك يا رحيل واتمنا زيرتك مدونتى

ayman badr said...

ايه يا بنتى اليأس ده هيا ناقصاكى احلام ضايعة احلام بتضيع واحلام لسه بتضيع
كلها احلام وربنا يدينا طولة العمر ونحققها
تحياتى

نهر الحب said...

احلامك اوامر
ربنا يحقق لك كل احلامك يا سارة
وبالتوفيق يارب

Sherif said...

بس اللي واثقة منه إن ده مش أخر "
طريقي وان لسه قدامى طريق تانى جايز صعب وجايز الناس شايفاه جنان بس انا حاسه انى هوصلوا فى يوم هسعى ليه دايما
"وعمرى مهتنازل عنه

رحيل .. هذا أروع مافيكى ..

نور said...

ازيك يا ساره عامله ايه
تصورى اننا فينا شبه من بعض خصوصا فى حلم الحد اللى تحبيه و يفهمك من غير ما تتكلمى دا حلمى برده وكان نفسى قبل كده ابقى مذيعه ومخرجه وصحفيه وحاجات كتير اوى
و برده بعد ما اتخرجت حاسه ان دى مش انا و انى عايزه حاجات تانيه غير اللى حصلتلى بس متقيده مش قادره اخرج من خيوط العنكبوت اللى اتحاكت على نفسى
و بصراحه بقيت بخاف احلم او اتمنى لأن مفيش حاجه راضية تيجى بس ربنا اكيد هيجب الأحسن الله اعلم بقى
طولت عليكى بس موضوعك مس جزء جوا نفسى حزين تحياتى ليكى يا جميل

Rehab Mostafa said...

عارفه انك زعلانه مني علشان مش باجي أكتب تعليق ... بس أنا متابعاكي والله :$ سامحيني :)

تصدقي بالله... أنا لسه حااااالاً قبل ما أدخل البلوج بتاعك كنت بفكر في الموضوع ده وكنت بشوف أحلامي .. وفي حلم شاغلني أوي خايفه ما يتحققش والمشكله انه مش وقتي لأ ده حلم مستقبلي كله
وبفكر في حياتي من غير تحقيق الحلم ده هتكون عامله ازاي ... هكون أنا مش أنا خااالص.. عايشه علشان في حياه وبس مش علشان عايزه أعيش

كان عندي فكره ولسه موجوده... الذكرى حاجه بتحصل وبنفتكرها زي الحلم طب ليه مانحلمش بالحاجه اللي مش قادرين نحققها نحلم بيها ونعيش فيها شويه بس مش معنى كده اننا نفضل مغمضين وعايشين فيها على طول لازم نفتح عنينا ونحاول نحققها

ربنا يوفقك ويكرمك ويحققلك أحلامك يااااااارب
أرق وأعذب تحياتي:)
بجد بوست رائع وتحفه

maha miho said...

وانا صغيرة كنت بلعب مدرسة واكتب ع الحيطة
فأكيد كنت عايزة ابقى مدرسة
وبعدين حلمت اني اكون رسامة مع اني مش بعرف ارسم بس كنت بحب اوي الوقفة ادام البتاعة ده الاستاند اللي بيرسموا عليه وماسكة الباليته
وبعدين لقيتني مذيعة
والحلم ده لسه معايا اني اشتغل في الاذاعة
ان شا الله يا رب اذاعة المترو: القطار الذي وصلنا حالا على رصيف 3 غير شغال الرجاء النزول، القطار القائم أولا الموجود الان على رصيف واحد

الطـــائر said...

جميله لعبه الأحلام

وجميل أسلوبك

ربنا يحقق كل أحلامك

إن كانت خيرا لك

وفقك الله

رهف said...

رحيل
اه منكى ومن كلامتك ومواضيعك
مش عارفه اقولك ايه الموضوع تحفه جدا ورجعتينى لأيام زمان وفى احلام مشتركه بينا وجمل جميله اوى حاسها اوى انك عايشه حياه مش الى كنتى بتحلمى بيها
ده هو نفسه الى بعيشه بس انا حققت حلم واحد انى احب واتجوز الى بحبه بس تكمله الحلم اننا نعيش فى رومانسيه للأبد اكتشفت انه حلم بس مالوش تحقيق فى ارض الواقع
اما على الصعيد العملى فبرضوه حققت جزء من حلمى انى اى شغل اشتغله انجح فيه والحمدلله وصلت لدا بس لسه الحلم الكبير انى اكون سيدات اعمال ناجحه وام وزوجه ناجحه انا طماعه مش كده
رحيل اسفه على التأخير وبجد اتمنى ان اراكى قريبا
تحياتى ياجميله

رحــــيـل said...

واحد من البلدى

جميل جدا الابيات

شكرا على مرورك وتعليقك
تحياتى
**************************
منى

اهلا يامنى
بحلم مش تقلقى اوقات باخد اجازه
واوقات تانيه بهرب لحلمى من كل الدنيا


ربنا يحققلك كل احلامك
تحياتى وحبى
********************************
زمرده

اهلا ياقمر
ياريت بجد الاحلام لما تنتهى متوجعناش
ياريت فعلا

ربنا يهنيكى وتلاقى نفسك وانا كمان

ابقى طمنينا عليكى ومتغبيش

تحياتى وحبى
**********************************
كاتب مصر

ان شاء الله ياافندم
شكار علىا لمرور
*********************************
ادم المصرى

شوف ياادم الاحلام معظمها بيكون من نسج خيالنا
فى احلام ممكن تحقق وفى احلام مهما نحلمها هتفضل خيال

شرفتنى وشكرا علىا لتعليق
***********************************
ايمن بدر

يأس ايه بس؟
ده محاولى للتفاؤل يابنى
حاول تتفائل واقرا البوست تانى هتلاقى متفائل جدا
اقنع نفسك يعنى ههههههههههههه
منورنى ياايمن
********************************
نهر الحب

اهلا بيكى
وانتى كمان يارب تحققى كل احلامك الجميله
شكرا على مرورك
تحياتى لكى

رحــــيـل said...

شريف

بجد شكرا ليك تشجيعك الدائم

تحياتى واحترامى وتقديرى لك
******************************
نور

ادركت انا هذا التشابه عند زيارتى الاولى لكى وقراتى لتاج الاحلام بتاعك
انا حسيت تعليقك قوى عشان عايشه تقريبا نفس المشاعر

ربنا يوفقك يارب نورتينى
حبى لكى
***********************************
رحاب مصطفى

ازيك يارورو
شوفى ياجميل انا بجد ببقى عارفه انها ظروف اوقات انا كمان بغيب عن اصحابى وبخاف يزعلوا
عشان كده دايما لما حد يتاخر عنى بكون دايما عارفه انها اكيد ظروف بس اكيد بفتقده

رحاب احلمى واحلمى بقولك وبقولى اوقات بنتعب حتى من الحلم بس هو منفسنا الوحيد

نورتينى وشكرا ليكى
******************************
مهاميهو

هههههههههه
تعرفى انا بحب احلامى قوى ايام مكنت صغيره
كانت بريئه قوى وصافيه قوى
ومكنتش تعرف لسه طعم الهموم ولا المستحيل
لو جالك شغل فى اذاعه المترو احجزيلى معاكى

نورتينى تحياتى وتقديرى
***********************************
الطائر

شكرا لك
مرورك وتعليقك

تحياتى لك
***********************************
الجميلة رهف

هههههههههه تعرفى انا باين خايفه اتجوز عشان كده
الامور بعد الجواز بتختلف تماما
انا كمان لسه نفسى اكون سيده اعمال هااااا دنيا
لما نشوف هتودينا على فين

ياريت لما اجى القاهره اشوفك فعلا انا هاجى نهايه الاسبوع ده ان شا ءالله
تحياتى وحبى لكى

حنين.. said...

انا والله كل احلامى ضاعت ولا حلم اتحقق من احلامى. بس لسه بحلم, مع انى عارفه مليون فى الميه ان احلامى مش هتحقق. بس ما اقدرش اعيش بدون حلم. انا بحلم كل يوم قبل ما انام...... حلم قبل كل نوم. تعرفى انا ما بنمش الا با الحلم دا, وكل يوم وليله حلم مختلف. بحس انى مجنونه وموهومه. بس ومالوا.

nour shahen said...

احلام ورا احلام عايشين عليها عمرنا يمكن هيجى اليوم نقدر نقول حلمنا
المشكلة ان الاحلام كتتيره لكن كل ما الواحد يسعى ورا حلم ومتحققش يحس بخيبة امل فيرجع وييأس
برغم ان عنده الف حلم وحلم بديل
يقدر كل ما يفشل حلم يدور علي غيره
تقبلى تحياتى

الحياه حلوه يلا نعشها بجد said...

ههههههههاى ههههههههههههههههههههههههه ايه الموضوع ده حلو بس دحكنى تعالى يا امر زورنى فى المندونه بتعتى