Thursday, July 10, 2008

عذرا ايها الحب

طبعا انا كنت بفكر اخد اجازة بس بصراحه بقى مقدرتش
ومن هنا ورايح هرفع شعار
مدونتى وانا حره فيها اغسلها انشرها اكويها اوحتى اولع فيها
مهى مدونتى بقى اكتب اللى انا اللى عاوزاه بس بقى هو كده
وبعد الداخله الجامده دى عايز اقول ان البوست ده كان رد على بوست انا كتبته قبل كده اسمه
وهم اسمه الحب مكنتش رديت على تعليقاته وقولت انى هنزل بوست ارد فيه على كل التعليقات
وهاهو اى خدمة مش كئيب اهو انا قولت ناخد اجازه سوا من الكآبة ولنا عودة لها طبعا ان شاء الله


عذرا أيها الحب
عذرا لكلماتي القاسية
التي صغتها
فصارت سهاما قاتلة
عذرا لاتهاماتي الباطلة
التي بك ألصقتها
فأصبحت نيران حارقة
عذرا لأنني في لحظات غضبى
لا املك إلا أحرفي ملجأ
وفى أوقات ضيقي
ليس لي إلا أسطري منفذا
عذرا لأنني ظننتك وهما
وما أنت لي إلا سكنا ووطنا
فكما أن لسحرك ضعفا
أوقات يهزمنا
إلا أن له أيضا
قوة تحيينا عمراُ
وبريق يجذبنا دوماً
وحنين يغلفه شوقاً
وضياء يهدينا طريقاً
ودفئ يقهر برداً
عذرا أيها الحب
لأنني في لحظة جرح
تناسيت عمدا
كل لحظاتي الحالمة
وبراءة أشواقي الماضية
وشكرا
لأنك لازلت بقلبي نابضاً

44 comments:

youma said...

منقدرش نعيض من غيره

وبصراحة هو بيستحمل مننا كلام كتير
بنقعد نلومه ونقول عليه كلام ومبنفتكرلوش اي حاجة حلوة عيشنا فيها

بس اهو كاتبة عليه كلام حلو قوي


ربنا يدوم الحب
على قلوبنا كلنا

ومنك لله ياشيخة
اجيب منين انا حد يحبني دلوقتي؟

كاميليا said...

:D

ايوه كده ..

الاعتراف بالحب فضيلة

مش تقولي

وهم اسمه الحب


فاكرة لما انا كتبت بوست آيها الحب انت كاذب؟

هههههه

عملت زيك كده
بس كتبت بوست جوه التعليقات
علشان الاعتراض اللي ملا التعليقات


عارفة يا سارة؟
لما بنتوجع اوى من الحبيب
ومش بنلاقيه
بنلوم الحب نفسه
ويمكن نلوم قلبنا
مع انهم ابرياء

المهم
البوست جميل ورائع كعادتك


بحبك اوى كتير
اكتر من الكتير بكتير

موناليزا said...

عودة موفقة
ايوة كدة ياجميلة تظلمى الحب ليه هو الحب ماله ومال اى فعل يسئ له
دمتى بخير حبيبتى

سنووايت said...

مش هاقدر اقولك غير ان البوست دا انا كنت محتاجاله اويييييي
حسيت اني مبسوطة من جوايا وانا بقراه
جمييييل يا رحيل
وما تغيبيش تاني ابدا
وما تحرميناش من الاحساس الجميل اللي بتاخدنا كلماتك فيه
يارب دايما متالقة ومحبة

S@G! said...

حلو الشعار
---
بتصالحي الحب يا رحيل من تاني
واهو رجع ينبض القلب بالحب
---
مستني بوست القلبه القادمه
بس شعرك بقي راقي جدا بجد والله
--
فكري ف الإحتراف
--
تحياتي واوعي تزعلي
سلام

راجى said...

مشاعر جميلة وصياغة محبوكة

فارس بلا جواد said...

رحيل
اول زياره لمدونتك
كلماتك رقيقه جدا تنم عن مشاعر عذبه قويه
بوست مميز
تحياتى

التنين المحارب عرفة فاروق السيوطى said...

رحيل

اولا آسف على غيابى الفترة الماضية

ثانيا انا فاتنى كتير بس اكيد هعوض

ثالثا

جميل قوى البوست بتاعك والله هايل وجديدة حكاية الاعتذار للحب دى

اكيد الحب اسمى شعور على وجه الارض وعمره فى يوم ما كان وهم

تحياتى

البوست السابق بتاع رحلة عشق

هايل جداااااااااااااااا

ادام الله عليكى نعمة الكلام الرقيق والجميل

تحياتى ودمت بكل ود

وخليكى فاكرانى

linda said...

اصلا مش راح نقدر نستغنى عنو بكل شيء فيه

هو الي بيخلينا بنى ادميين

بنحس وبنتألم وبنحب وبنطير وبنفرح وبنذوق طعم الدمع بكل حالاتو


وبعيد يابت يارحيل مانتى بتكتبي كدا عليه بتخوفينا ليه؟


عودة موفقة


ويارب تكوني ديما بخير وبكل هالحب على طول يارب

arsenalwy said...

رحيل


بين عليكى وقعتى فى شباكه علشان كدة غيرتى رأيك كلام جميل سوقتيه فى معانى شعرية رائعة

ماتحرميناش من زياراتك لينا

zOzO said...

انا لما قرات البوست بتاع
وهم اسمه الحب
كان ايام الامتحانات بتاعي
دخلت اتصدمت والله

ودلوقتي
بتعترفي ان الحب حاجه اساسيه
وغصب عنك قلبك هيحب وهيفضل ينبض
ايوه كده
هههههههههههههههههههه

كلماتك حلوه
ما شاء الله تسلم ايديكي

amal said...

جمييييييييييييله

انتى فعلا اتكلمتى صح

كلنا لما بتعدى علينا اوقات صعبه بننسى فيها او بنتناسى لحظاتنا الحلوه

دايما نتهم الحب اتهامات باطله
العيب فى المحبين وليس الحب نفسه

برافو عليكى
بتتكلمى صح جدا

مهيار said...

بوح جميل و عبارة شعرية رائقة و راقية تكشف عن إحساس مرهف و عن ذوق رفيع .. موسيقى الكلام تتابعت فأعطت جملا تشد القارئ لأنها تصل الى اعماق كيانه

دمت مبدعة

صوت من مصر said...

كلام جميل جدا واحلى حاجه اختلاف مشاعرك فى الموضعين
البوست الاول والبوست التانى يعنى

عمرو الطاروطي said...

خطر على بالي اغنية قديمة شوية لما قريت البوست بتاعك
الاغنية بتقول
كثر الحديث عن التي اهواها
كثر الحديث من التي اهواها
ما اسمها
ما شكلها
ما سرها
شقراء أم سمراء
عيناكي أحاى انتي ام عيناها؟
تساؤل أبدي يبدأ دائما بـ (من) ولا ينتهي أبدا بـ (كيف).. مين جاوب على سؤاله؟.. ومين لسة مجاوبش؟

sendrlla said...

عذرا ايها حب
بجد عنوان تحفة
وبوست هايل
...............
تحياتى
سندريلا

klmat said...

العزيزه ساره
ازيك ياساره يارب تكونى فى احسن حال وبعتذر متاخره كتير بس غصب عنى ان شاء الله اقرا كل مافاتنى
جميل اوى اعتذارك للحب الواحد لما بيزعل
من حبيبه بيصب غضبه على الحب
فى مقطع فى اغنيه لأم كلثوم بتقول فيها
ياللى ظلمتوا الحب وعدتوا وقلتوا عليه مش عارف ايه . العيب فيكو يافى حبايبكو اما الحب ياروحى عليه فى الدنيا مافيش ابدا اجمل من الحب نزعل نفرح نشتكى منه لكن بنحب
ربنا يجعل حياتك كلها حب فى حب
ويسعدك يارب بوست جميل باسلوب مميز جدا
سلاااااااااام

blue-wave said...

ايوة كدا
جلو دا:))
تحياتى

مدحت محمد said...

شكرا
لأنك لازلت بقلبي نابضاً

نقول الحمد لله على رجوعك

اولا

وثانيا وانتى بتغسلى مدونتك يعنى
تاخدى بالك عشان متنقطش علينا

المهم الحب هو الحب طبعا

هو الشىء الجميل جدا فى حياتنا
احيانا احنا البشر بشخبط عليه بايدينا

بس بيظل محتفظ بملامحه وهيئته داخل قلوبنا

عذرا لأنني ظننتك وهما

كنت صادقة جدا فى بوست وهم اسمه الحب

واصدق واشجع فى بوست
عذرا ايها الحب

تحياتى ومودتى

منى said...

ماشى يا ساره صالحتى الحب
لكن ما مش صالحتى الاحاسيس
فاكره لما قلتى تسقط الاحاسيس
بس انا مسمحاكى برضه
وليه بس بتفولى وتقولى هنرجع للكابه
مش يمكن ربنا يفكها من عنده
خلينا فى الكلام الجميل ده
تسلم ايدك يا ساره
تحياتى وحبى

عـــفـــراء said...

السلام عليكم
عذرا ايها الحب
الحب اسمى المعانى التى وجدت بين البشر ولكننا نشكلة كما يحلو لنا ونسمية مسميات لا تليق بمعناه الحقيقى المدفون بداخلنا ولكن ماذلت اقول
ان الحب قانون بيحكمة الحياة والاقدار
اما مايدور بيننا وبزمننا هذا فلا يطلق علية حب على الاطلاق
فعذرا ايها الحب
فجئت فى زمن لا يستحقك
سلام.....

L.G. said...

نحاول معاكي ايه يا شيخة غلبتينا
مترسيلك على قارة الحب حلو ولا لأ

شكلك فيه حاجة جديدة :)

قابليني على الماسينجر
بتطفشي الزباين من مدونتي وتقولي ده وهم وتيجي هنا وتقوليله معلش


لالا حنادي على سلوى تشوفلها صرفة في الموضوع ده

mo7amed mamdo7 said...

كلام زى الفل وربنا يوفقك

قهوة بالفانيليا - شيماء علي said...

صدقيني يا بنتي ..
و الله العظيم العيب مش في الحب
العيب في الناس
العيب في الكذابين اللي بيتغطوا بيه ..
لكن الحب جميل و رقيق و راقي و بريء
:)
اكيد الحب هيقبل الاعتذار هنا
لأنه طيب .
:)

كراكيب said...

رحيل: كلماتك رقيقة جدا
وبلوجك حلو اوي
انا عمالة اقرا في البوستات اهو ودخلت قولت اعلق بقى

دي اول زيارة ليا عندك
وبجد مبسوطة اني جيت :)

اكيد هتشوفيني تاني...
هسيبك واروح اكمل بقيت البوستات

miro

nahla.a said...

عودة موفقة
موضوعك به احساس جميل والبوست ده فعلا جميل
تحياتى

بنت النيل said...

عذرا ايها الحب

بصراحة دى اول زيارة ليا

ومش هتكون الاخيرة

العيب مش فى الحب العيب فى البشر فى الانسان

الحب شىء جميل

ميعرفش معناة الا اللى يحب بيصدق

تحياتى لكى

بنت النيل

kafrawy said...

ههههههههههههههههه

الحب مرمطة



سلام

حنين.. said...

رغم اننى لا اعرف الحب, لكننى مممن يقول( ابعد عن الحب وغنيله), بس بحلم بيه كتيررررررررررررررررر, وحاسه انى لو يوم عشته او حسيته, يا هموت , يا هو هيموت من الدنيا, والدنيا من غير الحب ايه, وهو الحب ايه, كلماتك اكثر من رائعه بدون مجامله, وانا بحب اقرأللك اوى اوى اوى, تسلم ايديكى ويسلم قلببك, تقبلى مرورى... اختك حنين.. فى انتظار المزيد

و القادم....أجمل said...

مش بقولك قمة الحب

;)

الحب وطن زي مقولتي
و واحة جميلة بنرتاح فيها
سعادة و جمال

راااااااائعه

دُمت ِ بحب

:)

funckydoctor said...

يااه
ايه الروعة ده بس أحلى اعتذار
أكثر من رائعة

dr.gesho said...

ايوه كده خدى بخاطره علشان مانزعلش منك

رغم كل شئ هيفضل الحب موجود واللى مش عاجبه يشرب من البحر
خدى الغلطه دى(عذرا لأنني في لحظاتي غضبى
قصدك فى لحظات غضبى
:) اى خدمه
على فكره الاكسبلورر اتصلح لوحده من غير مانزل حاجه
سلام

مواطن زهقان said...

حاجه جميله جدا
انك ترجعى وترضى الحب ياساره
بجد مشااعر جميله جدا

بس كنتى تكبرى المقدمه اللى فى الاول دى
انا جبت نضاره عشان اقراها

ahmed said...

الى الامام

انطلقى

HANY YASSIN said...

السلام عليكم
الحب شئ رائع
رغم ما به من الام
لكنه مؤقت مثل كل المشاعر
فكرة النص جميلة وختلفة
احييكى عليها
دمتى بكل ود
هانى يس

حاول تفتكرنى said...

لا مفر

انه ينبض

تحياتي

رحــــيـل said...

يوما

حبيبه قلبى

ههههههههههههه لا عادى اوقات بنقدر
لما الجرح يكون جامد قوى
من ناحيه هو بيستحمل فعلا انا معاكى فى دى


انا موجوده
بحبك اهووووو
***********************************
كامى

عروستناااا الجميله
ههههههههه

اه بيستمل الحب معانا وزى مابيهدلنا
احنا بنبهدله

واحنا مجروحين بنكون زى الطير المدبوح
بنصرخ ونتالم فمش بنكون حاسين باللى بنقوله

انا كمان بحبك جدا جدا
ربنا يخليكى ومايحرمنى منك
***********************************
موناليزا

الله يخليكى
تسلمى يارب

يارب يارب تكونى بخير دايما
شكار على زيارتك
*********************************
سنووايت

بجد اان فرحت لما قولتى انى بسطك من جواكى
يارب تكونى جدا دايما
فرحانه ومبسوطه
منوراانى بجد
تحياتى وحبى لك
********************************
ساجى

اى خدمه

ههههههههههههههههههههههه
لا مش بصالح حد
انا عارفه انى هفضل انا وهو متخاصمين
انا بصالح الناس
هههههههههههههههه

واستنى بوست القلبه قريب جدا جدا
احنا ملناش غير الكابه يابنى

شكرا جدا ليك
منوررررررررررر
***********************************
راجى

شكرا لك زيارتك

تحياتى وتقديرى
***********************************
فارس بلا جواد

اهلا بيك زيارتك الاولى
شكرا جدا جدا

تحياتى

رحــــيـل said...

عرفه فاروق السيوطى

اهلا بيك
ولا يهمك انا بكون متفهمه انها مشاغل فعلا
شكرا جدا جدا ليك

اعتذر عن تقصيرى انا الاخرى

تحياتى لك
***********************************
صديقتى الجميله لندا

هههههههه
مش قوى كده هنفض ننفخ فى الحب
وبعد مايجرحنا نقول ونعيد تانى

بس بتعرفى هو برضه حاجه تانيه

ربنا يخليكى يارب
*********************************
arsenalwy

اهلا بيك

ههههههههههه لالالالالا دى اشاعات مغرضه
انا غيرتى راى عشان الناس كان كلامها صح وقت الجرح بيعدى

انا اسفه على تقصيرى ليك
بجد نورتينى
*********************************
زوزو الشقيه العسل

ازيك ياقمرى
نصيحه ايام امتحاناتك قاطعى المدونه بتاعتى
ههههههههههههههه
عشان مش تتصدمى

ربنا يخليكى ومايحرمنى من شقاوتك ابدا ابدا
***********************************
امل

ياهلااااااااا ياهلاااااااااا
شكرا جدا على زيارتك وتعليقك

يارب تكونى اتبسطى

تحياتى لكى
*****************************
مهيار

اهلا بيك

شكرا جدا على كلامك وزيارتك
ربنا يخليك

تحياتى لك

رحــــيـل said...

صوت من مصر

اهلا بيك يامحمد
شكرا على متابعتك وزيارتك دايما
تحياتى لك
*****************************
عمرو الطاروطى


تساؤل أبدي يبدأ دائما بـ (من) ولا ينتهي أبدا بـ (كيف).. مين جاوب على سؤاله؟.. ومين لسة مجاوبش؟

فعلا محدش بيفكر هينتهى ازاى

شكرا جدا على زيارتك نورتنى
*********************************
sendrlla

شكرا جدا مرورك

وتعليقك

تحياتى لكى
******************************
كلمات

عزيزتى اميره

انا الحمد لله بخير
عادى ولا يهمك المهم تكون كويسه دايما
اه اانا كانا لمفروض اشغل الاغنيه دى مع البوست

تحياتى لكى ومنورانى دايما
***********************************
blue-wave

كويس انه عجبك
هههه

تحياتى لك
*********************************
مدحت محمد

مرسى بجد لييييك
ههههههههههههههه
اه هغسلها كل يوم من هنا ورايح
واولع بخور وكده يعنى

بجد بجد شكرا على تعليقك جدا
بستناه دايما ورياك من الناس اللى بتهمنى جدا

تحياتى لك

رحــــيـل said...

منى

انا اقدر برضه يامنى
ازعل احاسيس ده كفايه انها مدونتك
هههههههههههههه
يااارب بجد ربنا يفكها من عنده
بس انا عارفه نفسى اصلا
ربنا يخليكى يامنى يارب
********************************
عفراء

وعليكم السلام
اهلا روشا

ان الحب قانون بيحكمة الحياة والاقدار

فعلا بجد

نورتينى
********************************
l.g

اه يالا حاولى
هههههههههه
والله مافى حاجه جديده
انا اصلا بقيت بقلق من اى جديد
اصل بقيت عارفه اخره يعنى
اه بطفشهم عشان يجوا هنا
مع ان الجو فى اسكندريه احسن الوقتى

منوره يالولو
***********************************
محمد ممدوح

ربنا يخليك
ببس هو انت قفلت مدوتنك ليه
ولا هو فى ايه؟

شكرا ليك
تحياتى
*********************************
قهوة بالفانيليا

اهلا شيماء

فعلا ياشيماء العيب فى الناس

شكرا جدا جدا على مرورك
******************************
كراكيب

مرسى جدا ليكى ياميرو
لاء مش اول زياره على فكره
هههههههههههه
تانى مره

هستنى اشوفك تالت ورابع وعاشر
نورتينى

رحــــيـل said...

nahla.a

اهلا بيكى

شكرا جدا جدا على متابعتك
تحياتى لكى
**********************************
بنت النيل

انتى تنورينى فى وقت
فعلا عيب فى الناس
بس اللى عاش الحب الحقيقى قليل قوى
يارب ماحد ينجرح بسببه

شكرا جدا على الزياره
تحياتى
********************************
كفراوى

فعلا مرمطه
ههههه

عاش من شافك


سلام
***********************************
حنين

يارب اليوم اللى تعيشه فيه تعيشه صح ومش تنجرحى
ياخبر كل ده هحيصل لو حبيتى
هههههههههههههههههه

منوره ياقمر
تحياتى وحبى لكى
*********************************
والقادم اجمل

اهلا اهلا
مش عارفه اقولك ايه بجد
انا مبسوطه ان فى حاجات عجبتك
ربنا يخليكى يارب
منوره بلوج سبوت كله
***********************************
funckdoctor

اهلا يادكتور يارب بخير

شكرا جدا جدا ليك

تحياتى

رحــــيـل said...

dr.gesho

نفسى اعمل بوست من غير اخطاء
بالعند فيك انت هههههههههههههههه
مرسى بجد على انك بتاخد بالك
ايوه كده صحصح معايا

وكمان الاكسبلور اصلح لوحده
ده دعواتى بس
احم احم
افتكر الجمايل د
منور دايما
***********************************
مواطن زهقان

اهلا ياحمد
مبروك النجاح

المره الجايه هكبرها ولا تزعل

تحياتى لك
*********************************
احمد

شكرا ليك

اتمنى فعلا انك تكون بخير
ومبرووك النجاح ويارب تطلع من تجاره على خير
******************************
هانى يس

وعليكم السلام

هو فعلا مؤقت بس ده بيكون عيب وميزه فى نفس الوقت
لما بننجرح بياخد وقته وبينتهى
المشكله بقى ان لو اكتمل برضه بينتهى مع الايام

مش عارفه بجد

شكرا ليك جدا
******************************
حاول تفتكرنى

اهلا بيك
حقا لا مفر

تحياتى لك

قطرات من شواطئ الحياة said...

love is something we can't describe.. like the look of a rose .. the smell of the rain.. or the feeling of Forever !!

you are really talented .. keep up writing !!

warm greetings

kariman..

Sara said...

عبرتي عن تقلباتي فعلا
معرفش هي عند البنات كلها ولا لأ بس انا لما بنجرح من اي حد بقعد اجيب العيب على الحب وبعديها انسى واشتاق للحب

بوست معبر بجد وجميل
تحياتي