Monday, July 21, 2008

تاج رابع وخامس

تحــديـــــث
اصل انا فضيت للهانم الصغيرة كل شويه
عايزة انزل موضوع عايزة اشوف التعليقات
فضيت انا خلاص لاء وايه اجى اعلق الاقى حسابها هو اللى مفتوح
ويتنشر التعليق بيه وحاجه هنا
غلطة ان البنت دى عرفت سكة المدونات اصلا
المهم هى نزلت موضوع جديد على مدونتها امى ثم امى


مفيش فايده تاج الاحلام ده حاولت ازوغ منه كتير بس بيلف ويرجعلى تانى
ههههه المره دى مدحت مررلى تاجين شكرا بجد يا
مدحت كنت محتاجه اكتب فى حاجه مختلفة
التــــــاج الاول
اذكر 16 صفة عن نفسك؟
اعتقد انى قولت منهم 10 قبل كده فى تاج 10 اشياء عن نفسك

يبقى كده فاضلى 6 اه هى عافيه بقى ملكوش عندى غير 6 صفات بس ههههههه
1- اسمى ساره سامعه ناس بتقول قديمه يالا بقى معلش بحب اسم رحيل جدا وبحسه قوى

ب تجارة ادارة اعمال 2005
2- بشتغل إدارية فى احد المعاهد الازهرية الابتدائية
وبكره شغلى جدا جدا جدا
3- للوهلة الاول هادية جدا وعاقلة جدا بس انا مجنونة جدا اصلا
4- فى شغلى بكون بشخصية ومع اصحابى شخصية
ولما بكون مع ناس لوقت محدد بشخصية تالته
المهم انك كل حد من الناس اللى بتعامل معاها لما بيشوفنى فى مكان غير
اللى متعود عليه فيه بيحس بفرق وبيستغرب
، بس اكيد فى حاجات ثابتة مش بتتغير ،المكان الوحيد اللى بيجمع كل شخصياتى هو مدونتى
5- فوضاوية جدا فى افكارى وفى طريقة حياتى لما بتطق فى دماغى حاجه بعملها

يعنى مش بعرف اعيش بنظام واحد جربت قبل كده اعمل جدول تنظيم وقت
بعد محاضرة لادارة الوقت وفشلت جدا انا مش بحب امشى بالورقه والقلم بحس بملل جدا
بحب اعيش حياتى كده زى ماتيجى واستمتع بلحظاتى ومواقفى المفاجأة اللى بيكون مش متخططلها
المشكله انى فعلا تعبت من الحياه بالشكل
6- اوقات بوصل لمرحلة حزن غير عادية بحس انها هتموتنى

او هوصل بعدها لحالة من اللامبالاة وانى قلبى اسود جدا وانى مش مسامحة اى حد جرحنى او قسى عليه
اوقات تانيه بحس انى منطلقه جدا وبعيش حياتى بمنتهى المرح والسعاده والصفاء الداخلى
وانى مش زعلانه من اى حد ومش شايله اى قسوه جوايا
7- بستمد كتير من قوتى وطاقتى من حب الناس ليه ومن ابتسامتهم الصافية لما بيشوفنى

اكتر دافع بيخرجنى من اى حالة حزن سعادتهم لما بحاول اخرج وارجع معاهم زى ماكنت
اصحابى بحبكم جدا
يالا سبع حاجات اهو اى خدمة
-------------------------------------
تــــاج الاحلام
اللى ياما هربت منه لامفر
أذكر أحلاما تخص ماضيك كنت هتتخلى عن إيه فيهاوهتتمسك بأيه لحد دلوقتى؟
1- حلمى انى اكون صحفية او مذيعة او مرشده سياحيه اومضيفة طيران
طبعا هتخلى عنهم كلهم مبقاش فى مجال انه يتحققوا
2- انى ادخل كلية تجارة قسم ادارة اعمال الحمد لله اتحقق
3- انى لما اروح الكلية مرجعش البلد تانى بكرها جدا

بس للاسف رجعت – بس الحلم ده انا مش هتخلى عنه
4- كان نفسى اسافر بره مصر جدا لاى بلد اجنبى بس دلوقتى بقى اى بلد عربى اجنبى

المهم اسافر بره مصر- بس ارجع تانى متكونش هجرة-
5- كان نفسى اشتغل جدا فى مجال دراستى يا اما فى مجال الاستشارات الادارية او انى اكون سيدة اعمال

– وده انا قربت افقد الامل فيه-
6- فى بداية التزامى من اربع سنين كده كان حلمى الوحيد فى الفتره دى انى اكون داعية
اذكر احلام تخص مستقبلك وماتتنماه منها؟
1- نفسى ارجع تانى اقرب من ربنا زى ماكنت فى بدايات التزامى
2- عايزه اسيب شغلى الحالى ومش ناوية فعلا استمر فيه عشان كده

انا بكره الشغل الحكومى جدا لابعد الحدود ده غير انه اصلا مش مناسب لشخصيتى
3- امنية حياتى ابعد عن البلد هنا واعيش فى المنصوره او بورسعيد او بره مصر خالص
4- نفسى ابنى بيت صغير وهادى واربى ولادى صح واعلمهم يعنى حياة

وازاى يكون عندهم هدف وليهم دور فى مجمتعهم وانهم يكونوا ايجابين
وقررت لو حصل نصيب واتجوزت فى يوم انى مش هشتغل نهائى رغم حبى للشغل جدا
وانى اوجه طاقتى لبيتى وللعمل التطوعى الاجتماعى
5- بتمنى اعيش لحظة هدوء من غير قلق وتفكير وزحمة ودوشة وحزن وكأبة وملل
اذكر شخصين على الاقل متواجدين فى حياتك كنت تتمنى وجودهم من قبل؟
كل حد بنعرفه بيكون مناسب للفتره اللى هو ظهر فيها اكيد وجوده فى الوقت ده لحكمة ما
انا شايفه ان كل حد موجود فى وقته المناسب معايا
المشكلة فى كيفيه وجوده والطريقة اللى بيكون موجود بيها
يعنى هو موجود بس مش زى ما انت عايزه او بتتمنى
أذكر شخصين غير متواجدين فى حياتك وتتمنى وجودهم مستقبلا في حياتك وحياة أولادك ؟
محدش عارف الايام مخبيه ايه ولا المستقبل هيكون ازاى عشان كده معرفش هتمنى وجود مين
****************************************
انا الحمد بقيت كويسة بدأت اخرج من حالة البوست اللى فات بس عاملة زى اللى كانت رجلة مكسورة وفك الجبس وبيمشى بحذر قوى رغم انها ممكن متكونش وجعاه حاسه انى عايزه ارجع بس براحة واحده واحده بس بدأت اخرج ونزلت قابلت اصحابى فى الجمعية كانوا مبسوطين قوى انى رجعت وكمان قررت انى اول لما هقبض هشحن واكلم كل اصحابى اللى من زمان مش كلمتهم ورشه رسايل جريئة انا كنت مقصره مع ناس كتير وورايا زيارات كتير وناس كتير زعلانه منى وناس كانت زعلانه عليه بس انا هصالحهم كلهم ان شاء الله وبجد شكرا للناس اللى بتستحملنى هنا وبحسهم قريبين وبحس كلامهم وبيفرق معايا جدا رغم البعد

25 comments:

ahmed said...

رحيل هانم
اولا اى الاخبار واى الاحوال؟
انا اولا تعليق ولا اى ؟
مش عارف
المهم
انا قرات البوست لحد قبل الاخر بسطرين تلاتة جاتلى فكرة كدة قولت اكتبهالك فى التعليق
شوفى

فى الدنيا بتاعتنا
معظم البنات بيكونو عاوزين يبنو بيوت هادية ويعيشو مع اولاد زى القمر وحياة سعيدة وهنية بس مش بيبصو للاستعداد والتهيئة للكلام دة
زى ميكون الارتباط دة حاجة بتيجى من السما مش حاجة تراكمية او حاجة مرنبطة باحوالنا وطباعنا
لازم نعرف ان الارتباط والحياة الاسرية علشان تكون جميلة لازم نكون احنا قبلها على قدر كبير من الجمال دة وطبعا انا اقصد الجمال يعنى الاستقرار والهدوء والسعادة مش الشكل
انا مش عارف الكلام دة له علاقة بكلامك ولا الموضوع وسع مننى

على العموم تحياااتى
ويا رب تحققى احلامك اللى ممكن تحققيها

dr.gesho said...

حمدالله على السلامه

طيب مش اللى يصالح حد يجيبله حاجه يصالحه بيها ولو حتى كيس شيبسى
خدى الغلطتين دول فى الاول كده يا رب مايقطعلنا عاده
- اوقات بوصل لمرحلى حزن
لمرحلة يا هانم
وبعيش حياتى بمنهتى المرح
بمنتهى يا انسه
هفضل اعلم فيكى لامتى؟
ماعلينا المهم
سيادتك اسمك مايعتبرش صفه ولا شغلك كمان يعنى من الاخر كده انتى اختصرتى التاج فى 6 صفات و ضحكتى علينا فى اتنين منهم لا سورى التاج ده مضروب و لازم يعاد
تاج الاحلام ممكن نعديه مع اننا عارفين اللى فيه قبل كده برده
كفايه رخامه عليكى كده النهارده
تحياتى

كاميليا said...

والله انتى عسل

اجابات جميلة

فيها براءة وطفولة عسولة خالص

كل تاج وانتى طيبة


بحبك اوى كتير
يا أجمل رحيل


تحياتى وحبى

blue-wave said...

حلو التاج
بجد اجاباتك حلوة اوى
واحلى حاجه انك خرجتى من المود الوحش اللى كنتى فيه

zOzO said...

حكايه الرسايل دي يا جماعه صح
انا جاتلي رساله
اه وربنا جاتلي رساله
بسيحلك اهو يا ساره اي خدمه


انتي حد كويس او وحلو اوي
وانا بحبه
اوي
ربنا يوفقك يارب

فى القلب said...

جميله أجابتك يا جميله وصريحه وحساكى أكثر تفائل

تمسكى بماتوصلتى أليه من معرفه ذاتك

أحمد المصري said...

جزء من احلامك كنت بحلمه فعلا بس لسة متمسك بيه..برضه حتة الشخصيات الكتير عندي بس الموضوع رخم أوي..بيحسسني بالتوهان..مفيش أحلى من المدونة..اللي اخترع الإختراع ده لازم ياخد جايزة نوبل والله..إلا مين اللي اخترعه صحيح؟

دعاء مواجهات said...

مهو الصيف طلع بقى

والتاجات انتشرت زى الفيرس بالظبط

بس الاجابات اغلبها فى صالحك

دمتى عسوولة

بيس

سنووايت said...

حسيت ان اجاباتك كلها واضحة من كتاباتك
او يمكن انا بشوفها كدة

احلامك كمان كلها بتقول كدة
انتي زيي بتكرهي الروتين وبتحبي تنطلقي وتعيشي حياة بسيطة من غير قيود ومشاكل

ربنا يحقق لك احلامك كلها يا سارة واجمل منها كمان

dr.Roufy said...

سلامتك من الجبس يا سارة
تعرفي صحيح اصعب جبس الي احنا بنكتشف اننا وقعنا ارواحنا فيه في محاولة مننا لجبر كسر الروح
مع ان كسور الروح لو كان ليه دوا ..لو كان
بيكون بالحرية مش الجبس اطلاقا
وطبعا طبعا اجابات التاجات حلووووووة

كل المودة

funckydoctor said...

هقولك يا رب يا رب تحققى أحلامك بجد
معلش ماكنتش ليه قريت البوست اللى فان بس قريته والحمد لله طلعت من الحالة المزاجية ده
وما تنسيش تحوليلى رصسد :P

و القادم....أجمل said...

مليش دعوة
لازم نبدأ في مشروع تحديد البوست
:\

أنا بغمض عيني و أفتحها
ألاقي خمسين بوست اتكتبوا
الرحمة شوية


-----
هههههههه بهزر معاكي
بصي عجبني حلم السفر للخارج
على الرغم حبي الشديد لمصر
و أهلها
بس نفسي أدرس بره
متهيألي هيفرق معايا جامد
خصوصا في الطب

بس نفسي برضوو أرجعلها تاني و أنا
حاجة كبيرة
نفسي أفيد البلد دي

المهم
ربنا يوفقك و يحقق كل أحلامك يارب
و أهم حاجة الرسايل الجرئية
:)

ربنا يسعد القلوب كلها


محبتي

:)

منى said...

يعنى انتى دلوقتى فى مرحله النقاهه؟
طيب بالراحه على ساره يا جماعه
رغم ان اسم رحيل جميل
لكن طول عمرى بموت فى اسم ساره
ربنا يحقق لك كل احلامك
ومش تتنازلى عنها
على الاقل تنولى شرف المحاوله
وفى النهايه كله على الله
تحياتى

مدحت محمد said...

الحمد لله انى التاج جه فى ميعاده
حاسس ان خرجتى حاجات كتير اوى جواكى

الواحد لما بيفضفض بيستريح اوى

تعرفى انى فعلا الشغل الحكومى بيقتل اى طموح لانى زيك خرجت من الجامعة لاقيت نفسى مرمى فى نارها بس هنعمل ايه الحمد لله

انتى طالعة بتلت ادوار فى الدنيا دى ههههههه
اى انسان كدة على فكرة
بس فى ناس انا ممكن اكلمهم اول مرة احس انى ببقى عارفهم من زمان فبعاملهم نفس معاملة اصحابى
ـــــــــــــــــــــــــ
غريبة جدا انك بتقولى
هوجه كل مجهودى لبيتى بعد ماتجوز
ومش عايزة شغل
رغم انى انا
او يعنى فى بنات بتفضل شغلها على جوازها
ياللا جايلك رمضان ياستى
تتقربى فيه من ربنا ان شاء الله

اولا واخيرا
ميرسى يارحيل انك قبلتى التاج
وربنا يكرمك يارب
ويحققلك كل احلامك

mostafa rayan said...

ربنا يحققلك كل امنياتك

أحسن تـستاهـل said...

فكرتيني بيا
برضه اللي يعرفني في الاول يقول عني هادية
انما شوية ويكره نفسه انه قال كده عليا
وفعلا انا كمان في الشغل بشخصية واول ما أمضي انصراف واخرج بره باب الشركة بكون بني آدمة تانية هههههههههههه
ربنا يشفينا بأه ويتولانا

سارة،، سكرة

مها ميهوووو

موناليزا said...

ربنا يحقق لك كل احلامك ويهيئلك كل الخير ويبعدعنك كل الحزن

حنين.. said...

ياااااااا الله, فى حاجات كتير فيكى فيا, والله يا رحيل ويا سارة اى اسم فيهم, لانى بحب الاسمين اوى اوى, كلامك واجاباتك وجعتنى, تعرفى , ان كل مواضيعك..... بحبهااااااا اوى وبعشها معاكى وبحسها معاكى اوى, بصى... اقوللك ايه. انى احبك فى اللله وانتى عسل اوى اوى اوى.. اختك حنين مع خالص الشكر والجرير.. فى انتظار المزيد

رحــــيـل said...

احمد

اه اول تعليق منور يااحمد

لاء الموضوع موسعش ولا حاجه
بس انت بتكلم عن الاستعداد اصلا فى البداية
شوف اهم حاجه الاستعداد للاستقرار بغض النظر عن التراكمات اللى انت بتتكلم عنها عارف ايه العامل الاساسى فى نجاح اى زواج مدى استيعاب كل طرف للتانى واستيعابه لتراكماته اى ان كانت
الرغبه فى الاستقرا والاستيعاب بيعالجوا النقطة اللى انت اتكلمت فيها

تحياتى لك وشكرا على تعليقك
**********************************
Dr.gesho

الله يسلمك ياحمد
ههههههههههه اوك انا موافقه بس هاتوا انت وملكش دعوه
انا هعمل زعلانه لو انت شايف ان اللى يصالح حد يجيبله كيس شيبسى

شكرا على تصحيح الاخطاء انا مش عارفه بجد هفضل اتعلم لامتى فعلا
الناس كلها بتشتكى

هههههههههههههه عدى يااحمد انا مصدقت خلصت التاج ده
وكمان بتقول انى كلامى متعاد وملل ومكرر ياخبر
انت متوصى بيه قوى ماشى ماشى

شرفتنى
***********************************
الجميلة كامى

شكرا ليكى انتى كلامك وتواجدك الدائم

ربنا مايحرمنى منك

خالص حبى ومودتى
دومتى بكل سعاده
**********************************
Blue-wave

اهلا دكتور

شكرا جدا جدا ليك

تحياتى وتقديرى

رحــــيـل said...

زوزو حبيبتى

ههههههههههههههههه
ايه يازوزو بس انتى لحقتى سيطينى
هههههههه


انا كمان بحبك جدا وبموت فى شقاوتك
***********************************
فى القلب

اوشا اهلا اهلا منوره

شكرا جدا لمرورك ربنا يخليكى

تحياتى وتقديرى
***********************************
احمد المصرى

اه فعلا اخترااااااااااع رائع
الواحد بيبقى براحته بس هما ناوين يعكننه علينا ويعملوا تراخيص
حاجه خنقه يابنى

شكرا لوجودك ياحمد
تحياتى
***********************************
دعاء مواجهات

اه هوجه يابنتى والله
بس المشكله التاجات شغاله صيف وشتا مش بتقف

نورتينى يادودو شكرا ليكى بجد

تحياتى
***********************************
سنووايت

اهلا سنو
اه مهو انا هنا ببقى بكل شخصياتى بكتبنى
انا بحس ان مدونتى مرايتى
انا فعلا بكرها لروتين جدا جدا بيموتنى اصلا

شكرا سنو
منورانى ياقمر

رحــــيـل said...

د/ روفى

ياهلا ياهلا

تسلمى روفى
اه ياروفى من كسر الروح واى كسر

شكرا ليكى ياجميلة
*********************************
Funcktoctor

اهلا يادكتور
ربنا يخليك

شوف اان سمعت اول التعليق
اخر سطر ده النت هيس والصفحه باظت
ههههههههههههههههه
قال احوله رصيد قال
ولا اعرفك يابنى
ههههههههههههههههههههههههههههه
منورنى يادكتور
**********************************
والقادم اجمل

لولو ازيك ياقمر

شوفى ياستى بالنسبة لموضوع نحديد البوست اان والله مكنت كده
انا كتن تقريبا بنزل بوست كل اسبوع او اكتر شويه
بس ممكن تقولى انها حاله نفسيه وهتعدى استحملوها بقى
هههههههههه

يارب انتى كمان تحقى كل امنياتك ويارب تسافرى تكملى دراستك بره

منوره منوره منوره منوره
***********************************
منى

ازييييييييك يامون مون
حقا انها فتره النقاه ادعى بس مش يحصل انتكاسه

ربنا يخليكى ليه يامنى يارب
انا هحاول انول شرف المحاولة يبقى اسمى حاولت
معاكى حق بجد

حبى ومودتى

رحــــيـل said...

مدحت محمد

مدحت اهلا بيك هو فعلا جه فى معاده
مفتكرنيش يابنى بالشغل الحكومى احسن انا شايله فى نفسيتى وساكته
ههههههههههههههههه
بس هطلعه قريب هنا

بس غريبه ليه انى قولت انى هوجه طاقتى لبيتى بعد جوازى؟
ههههههههههههههههههههه

اه اللهم بلغنا رمضان

لااا مرسى ليك انت على التاجين دووول

تحياتى وتقديرى
***********************************
مصطفى ريان

اهلا بيك

ويحققلك كل امانيك يراب

تحياتى لك
*********************************
احسن تستاهل

مها ازيك

هههههههههههه كده احنا مجانين رسمى
يابنتى احنا ندور على شقه ونجمع فيها المجانين اللى زينا
بلا دوشه وكلام ووجع دماغ مهو احنا لما نكون كلنا مجانين
محدش هيقول مجانين

تسلميلى يارب
***********************************
موناليزا

ربنا يخليكى يارب
ويهنيكى ويسعد قلبك

تحياتى وحبى
***********************************
حنين

يابنتى مش تغيبى كده
مرسى جدا على كلامك ده
ربنا يخليكى

انا كمان والله من اول مره قريت فيها تعليق وزورتك حسيتك قريبه

ربنا يوفقك يارب

زُمُرده said...

هو انا معلقتش عليه ازاي؟؟؟؟

احلى ما في التاجات انها بتعرفك اد ايه الناس دي فيها منك
اد ايه في قلوب شبهك وعايشه زيك
اد ايه ساعات الناس ممكن تكون مختلفه بس ليها وجهه نظر



كلامك مقدرش اعلق عليه لان كتيييير منه بحسه صدى صوت جوا جوايا

جميل بوستك وانت اجمل منه
ربنا يوفقك لكل خير
وتقربي من كل اللي بتحبيهم

mercy devil said...

طب كرهتك لشغلك علشان فى الازهر ولا علشان اللى جانبك ؟
وعموما اللى بيهرب من التاج مصريه يلاقيه
اللهم لا شماته

دمعاتي said...

اللهم ابعدنا عن التاجات
اميييييييييييييييييين

ربنا يحققلك اللي في بالك ياساره
امييييييييييييييييييييين كبيره قوي اهي اكبر من بتاعة التاجات