Thursday, September 18, 2008

امبارح كان عمرى عشرين


امباااااارح كان عمري عشرين
وإذ فجأة ودون مقدمات لاقيتهم أربعه وعشرين
إمتى بقى وازاي وليه وكيف ولماذا وكل الأسئلة اللي ملهاش إجابات دي مش عارفه؟

أول مره أحس إن العمر بيجري بيه
وأنى بدأت اكبر فعلا من غير ما احقق اى حاجة من اللي كنت بحلم بيها
دنيا غريبة جدا فجأة بنلاقي نفسنا قدام تجارب كتير
مكنتش في حُسبنا بس اكيد على قد ما بنتألم منها
بنتعلم وبتضيف لينا كتير

كل سنة كنت بسأل نفسي سؤال لابد
منه يا ترى السنة الجاية هبقى عامله ازاي؟
وهيكون ايه جديد في حياتي ؟ ويا ترى هتتغير امتى ؟
وهحقق ايه من اللي انا كنت دايما بحلم بيه ؟
وتعدي سنة ورا سنة والاقيني زي ما أنا
مش عارفة اخرج من دايرة بلف فيها بقالي كتير
الخروج منها خروج عن مألوف والناس شايفه انه مش منطقي
أنا كمان بقيت اوقات بخاف اخرج منها وبرده مش عارفه اتأقلم
على اللف جوا الدايرة اللي الكل عايزني جواها

بجد مش قادرة صعبة قوووي الحياة بشكل أنا مكنتش مخططاله
او بحلم بيه بالعكس حياه دايما كنت خايفة انها تكون
السنة دي مش ناوية اسأل نفس السؤال بتاع كل سنه
لأني خلاص إجابته مبقتش تهمني كتير ومبقتش هتفرق
كل الأيام بقت شبه بعض اصلا مبقتش مستنية حاجة تحصل
لا حلوة ولاوحشة مستنية بس الأيام تخلص
ايه يعني لما الواحد يعيش اليوم بيومه
مش هتفرق كتير اني افضل اخطط اواحلم

لاء هحلم بس مش عشان احقق اللي بحلم بيه بس عشان
انا احلامي بقت مجرد هروب مش اكتر طريق بهرب ليه
احقق فيه كل اللي معرفتش احققه فعلا
هحلم عشان اسرق من الدنيا لحظات قليلة اعيشها زي ما أنا عايزه
عشان تصبرني على واقع انا بقيت عايشة فية تأدية واجب
و وجودي فية أمر لا فرار منه ومش بإيدي

دايما مكنتش بعرف اتخيل نفسي غير وانا فى
العشرينات جايز لاني دايما مكنتش بعرف احلم لابعد من كده
بتمنى اموت صغيرة مش عايزه اكبر عن كده
مش عايزه احتاج لحد في يوم
عايزه لاخر يوم فى عمري محتجش لحد يبقى معايا

احساس من زمان مسيطر عليا اني هكمل لوحدي حياتي من غير حد
مأقلمة نفسي جدا بس كنت دايما راسمه لنفسي وضع تاني اكمل فيه
مكنتش عايزه اكمل حياتي هنا في البلد
نفسي اسافر اعيش في مكان كبير اتوه فيه اعيش فى شقة لوحدي
ومحدش يكون ليه دعوه بيه اتجوزت متجوزتش
حياتى بقى وانا حره فيها من غير تدخل من حد

كل حد بيكلم من وجهة نظره وبس
وكأنه نصب نفسه إله يحاكم ويحاسب ويدى خطب ونصايح
لما بغلط انا لوحدي اللى هتحاسب وانا لوحدي اللي هدفع تمن اخطائي
واللي بيكلم وبيحاسب ده مش ملاك
وتجاربي رصيدي فى الحياة
مش صغيرة انا عشان حد يوجهني ويقولى ده صح وده غلط
و من صغري كنت بتعامل على اني كبيرة
مش هاجى الوقتي حد يقولي اعملي ومتعمليش
او اعيش على مزاج حد او ارضي أي حد على حساب حياتي
, حياتي انا بس اللى هعيشها مش أى حد تاني

الشئ الوحيد الجديد السنة دي فعلا في حياتي عالم التدوين
ده بقي ليه بوست لوحده كمان اسبوعين
ان شاء الله عيد ميلاد مدونتي اللي عرفت منها
ناس جميلة جدا جدا هحاول اخليه بوست مش كئيب

47 comments:

ساجي said...

كول سنه وانتي جدعه
--
اول " اول كومنت " احرص على اقتنائه
دا انتي مسهراني معاكي

ساجي said...

ههههههههههه
والله انا لو من بتوع وقفه مصريه
أخبطك لوحه تنادي بإعدامي ف ميدان عام
--
يعني اليوم اللي جيتي فيه للعالم وعاملين قلبانه والكول واقف طوابير علشان يقولك كل سنه وانتي طيبه يا أميره الستات وست الأميرات
" غاششها من مسلسل نجيب محفوظ "
-----
تقلبيها كآبه ومكثفه كمان
وايه الاحلام المشعننه دي
طب يارب السنه دي يبقى فيه يوم جواز سعيد كده
وواحد عقد يحبسك ف البيت ويمنعك م الشغل وم الخروج والذي منو
---
سيبك انتي العمر بيعدى هوا
بقى عندك 24 سنه خبط لزق كده
انتي عارفه إن أهم حدث ف عالم التدوين بلا منازع إنو أنا عرفت رحيل
---
انتي لازم تفخري بكونك انتي
اه والله . ربنا يديم عليكي نعم ربنا في شخصيتك الجميله
سلام
- الكومنت اتقص منو كتير -
كووووووول لحظه وانتي اجمل

علاء سالم said...

السلام عليكم

مش هقولك انتي متشائمة زياده عن اللزوم في البوست دا لأن يمكن إحساسك دا مريت بيه كتير وعارف مدى قساوتة وأثره على النفس

لكن اللي هاقولهولك هو إنك ماتفقديش الأمل في إنك تعيشي زي ما انتي عايزه مهما حصل ومهما كان الأمل قدامك مفقود

للأسف حالك دا هو حال الأكثرية من الناس دا إذا مكنش الكل

دايماً للأسف أحلامنا أكبر من قدرتنا على تحقيقها

خالص تحياتي

رئيس جمهوريه نفسى said...

كل سنة وانتى طيبة لربك قريبة ومحققة كل احلامك في الحياة

حسن حنفى said...

كل سنه والمدونه طيبه

مقدما

بس انا برضه صحيت لقيت نفسي 11 سنه ونص

يبقي الاربعه بتوعي جولك بقي

اخطاء زمنيه ولا يهمك

:d

بس فعلا الحياه كلها بقت شبه بعضها

مفيش فيها اختلاف الا قليل

وكل اما حد يحاول يرضي الناس

بيجي علي حساب نفسه وبرضه مش بيرضيهم

تحياتي بوست متميز

ShimaaMahdy said...

اولا كل سنه وانتى طيبه

ثانيا انا مش هاقولك انتى غلط ولا صح

لكن هاقولك لسه فى امل و زى ماانتى بتحلمى لمجرد الحلم مش عشان تحققى

طيب ماتعيشى الامل لمجرد انك عايشه امل مش شرط يجى

لازم يكون فى تفاؤل عشان نقدر نعيش برضه مع شويه الاحلام


كل سنه وانتى طيبه لتانى مره


بس التورته بقى هه مش تنسى


تحياتى

(:

linda said...

كل سنة وانت طيبة

صوت من مصر said...

كل سنه وانتى طيبه
والسنه الى جايه تكون حلوه واحلى من كل سنه عدت عليكى تكون طفله فى عين الكون ؟
كونى حره

حنين.. said...

كل سنه وانتى طوووووووووووووووووويبه
ايه دا
24 بس
بس
يا ستى قدامك العمر طويل ان شاء الله
بصى والله يا رحيل كأنى انا اللى كاتبه البوست
حتى كنت فاكره دايما وحاطه فى دماغى وانا صغيره انى هموت
مش هكبر , بعد ما كبرت بدأت اخطط واحلم
وصدقينى ولا حلم تقريبا اتحقق
الا احلام بدل احلام
وادينى عايشه بحلم برده لغيت دلوقتى
وعندى امل
اه والله جوايا كل الاحاسيس اللى انتى حاساه
وحاسه كأنى انا اللى كاتبه البوست مش انتى
وحاساكى اوى
لكن هقولللك وهقول لنفسى
احنا عايزين حاجه جامده نعملها فى حياتنا احناااااااااااااا تحقق
وبالله عليكى با لله عليكى
امسكى ورقه وقلم
وخططى احلام تا نيه كمان
وحتى لو مكنتش هتحقق
ومالوا
عيشى واسرقى لحظات

( احلم وما يحصلش
احسن ما اعيش ما احلمش
وهى ايه الحياه
غير فرحه
ومليون اه
ولو كات الدنيا فرحه
ما كنتش تبقى دنيا
كانت هتبقى الجنه
, نفسى بالله عليكى
البوست اللى جاى
تكتبى فيه عن احلامك للسنه اللى جايه
بالله عليكى
وعارفه ايه السؤال اللى مفرود بجد نسأله, هل بعد كل دا ربنا راضى عنا ولالا
بس ما تبقاش فى اسئله تانيه
سيبك من الناس والدنيا
ما دمتى بترضى الله عز وجل
انسىىىىىىىىىىىىىىىى
عايزة اتكلم كمان وكمان معاكى
بس طولت عليكى
دمتى بخير
يا احلى البنات كلها)

oRiGiNaL HeArT said...

كل سنة وانتى طيبة
ربنا يديكى شوية امل
حاسة انك لازم تبقى اقوى من كدة ولازم تغيرى اى حاجة مش عاجبكى فى السن دة
لان بعد كدة فى حاجات بتبقى اصعب
وميهمكيش اى حد ولا رضا اى حد
اهم حاجة رضا ربنا عنك
وكل سنة وانتى طيبة مرة تانى :)

princess dodo said...

كل سنة وانتى طيبة يا ساااره
يارب تكوني بخير وصحه وسعاده
وتحققى كل اللى تتمنيه

:)

جوجو said...

السلام عليكم

والله انا مش قريت البوست مش فاضية

بس عارفة انه بمناسبة عيد ميلادك

كل سنة وانتى طيبة كله فوق دماغى

ههههههههه

بسيحلك زى ما بتسيحيلى امرك عجيب والله

كما تدين تدان

سلاااااااااااااام

منى said...

كل سنه وانتى طيبه يا ساره
24 وعامله محزنه امال انا اقول ايه
ههههههههههههه
خلاص انا مش هخطب ولا هقول نصايح
لكن اتمنى فى عيد ميلاد مدونتك تقدرى فعلا تكتبى بوست فرايحى
مش عشان مبحبش الكابه
لكن عشان نفسى تفرحى
تحياتى يا احلى ساره

youma said...

ده اسمه عد ميلاد
عيد ميلاد
عيد ميلاد

ياساتر انتي مبتعرفيش تفرحي ابدا
طب سايرينا ياستي

كل سنة وانتي طيبة
وغصبا عنك سعيدة وفرحانة ومبسطة

ها

تسنيم حسين said...

السلام عليكم

يعز على ان احس هذا اليئس فى كلامك
وفى نفس الوقت التمرد على الحياه الت تعيشيها.....ولكن الله ترك لكل منا أسباب نأخذ بها...فخذى بها فالأسباب هى سر الحياه....وارضى بما قسم الله لكى حتى يرضيكى واذا رضيت شعرت بالسعاده....
واذا لم ترضى فانظرى الى نعم عندك وغيرك محروم منها......
ولقد أمرنا الرسول *صلى الله عليه وسلم*(ان ننظر الى ما هو اقل منا فى الدنيا)واعلمى ان احلى ساعات الوحده هى ما يقضيها الانسان فى ألأنس بالله.....
فاذا رجعت الى الله وتقربت الى الله شرح الله صدرك واحسست بالسعاده.....
ولا تعطى الدنيا اكبر من قدرها...واعملى لأخرتك تسعد دنياك....
قال تعالى :(ولا تيئسوا من رحمة الله)

والسلام عليكم

Sherif said...

اربعة وعشرين سنة .. بس؟

ياااه .. امال الثلاثينات يعملوا ايه؟

كل سنة وانت زى مانت .. دايما طيبة .. ورقيقة .. وجميلة فى مشاعرك واحاسيسك .. وجميلة كما انت

على فكرة.. حين تتحقق آمالنا لانسأل انفسنا كثيرا متى وصلنا .. المهم انناوصلنا .. وعلى المستوى الشخصى فان الماجستير الثانى لى حصلت عليه بامتياز .. عندما اكملت الخمسين .. وقلت لنفسى .. تفرق كتير انى حصلت عليه الان او قبل ذلك؟ ومالفرق بينى وبين واحد سبقنى بعشر سنوات؟ كلانا يحمل الدرجة .. يمكنى ان اتخيل انى حصلت عليه منذ عشرين سنة حتى .. المهم انى حصلت عليه

كذلك آمالك .. يوم ان تحققيها باذن الله .. ويوم ان نراك فى الابيض .. ستنتهى القصة كلها كاجمل مايكون

واذكرى هذه الكلمة

رحــــيـل said...

ساجى

وانت طيب يارب دايما ومفرحنى بيك ههههه
ايوه سهرتك انا عارفه دايما كده انا تاعبه الناس معايا

ربنا يخليك ليه يااجدع اخ فى الدنيا
شوكرااا كتير علىا لبوست الكئيب الجميل طبعا انت عارف اعز الكابه قد عنيه
منورنى دايما
************************************
علاء سالم

ياهلا ياهلا
عودا حميدا ياافندم
هحاول ماافقدش الامل بس دى مجرد محاوله مش وعد

شكرا ليك ياعلاء
***********************************
رئيس جمهوريه نفسه

محمود باشا

وانت طيب دايما
شكرا جدا على وجودك
ربنا يخليك
***************************************************
حسن حنفى

هى كل سنه والمدونه طيبه مقدما
وانا مليش كل سنه وانتى طيبه
ماشى ياحسن شووووكرا

المهم نرضى ربنا الناس مش هتنفع حد ومش بيرضيها حاجه

شكرا ليك

رحــــيـل said...

شيماء مهدى

وانتى طيبه
شكرا ليكى
التورته بعد رمضان انشاء الله
ويا الكحك والبسكوت
توفير بقى تقولى ايه
الامل بيروح وبيجى واقات بس الدنيا بتتعبنا كتير
فبتخلىا لواحد كتير مش عارف يعمل حاجه

تحياتى
***********************************
ليندا
حبيبتى وانتى طيبه دايما
وشكرا جدا جدا للبوست الجميل بجد فرحنى كتير
تسلميلى يارب
****************************************
صوت من مصر

اهلا محمد وانت طيب دايما
شكرا جدا ليك

شكرا للنصيحه كونى حره

تحياتى لك
**********************************************
حنين

وانتى طيبه ياقمرايه
ههههه اه 24 لا طويل ولا حاجه الاعمار بيدى الله
محدش عارف بكره فى ايه

شكرا جدا على تعليقك وعلى كلامك
ووعد منى ان شاء الله هحاول بجد البوست الجاى مش يكون كئيب
منوراااااانى كتير جدا

رحــــيـل said...

اورجينال هارت

وانتى طيبه ياجميلة
تعرفى فعلا اكتر سن الواحد ممكن يغير فيه هو السن ده
بيكون صعب قوى لو عدى ومعملناش حاجه

شكرا جدا لوجودك
************************************
برنسس دودو

اهلا يادعاء
وانتى طيبه يارب

ربنا يخليكى ياقمر
****************************************
جوجو

وعليكم السلام

يابت بطلى لماضه مش كفايه مستحملاكى فىا لبيت
هنا كمان لماضه
وبعدين لما انتى مش فاضيه تقرى البوست بتعلقى ليه
كان ممكن تقوليلى كل سنه اونا طيبه فىا لبيت مش لازم هنا
وكمان كله فوق دماغك
طيب ياجهاد
انا بقى قاعده على قلبك
وش بيطلع لسانه
ههههههههههههههههههههههه
************************************
منى

كل سنه وانتى بخير دايما يامنى
ربنا يخليكى
هحااااااااااااااااااااااااااااااول بجد
حاضر
تسلميلى يارب

رحــــيـل said...

يوما

حبيبه قلبى
شوفتى اى خدمه انا قولت بقى افرح معاكم هناك وانكد على نفسى هنا
هههههههههههههههههههههههه
ناس غاويه قرف بعيد عنك
انا قولت افضفض معاكم
طيب افضفض مع مين
بحبك مووووووووووووووت
ومرسى كتير على كلامك الجميل وشى بيحمر يابت وبتكسف كل لما بدخل اقراه
بعمل مؤدبه بقى
هههههههههههههههههههههه
*************************************
تسنيم حسين

وعليكم السلام
اهلا بيكى شوفى المسألأه مش مساله رضا
بس مممكن يكون طموح لو مكنش فى طموح عند الناس مكننتش البشريه اتقدمت ولا خطوه واحده
انا مقتنعه بكلامك جدا وانتى طبعا معاكى حق

شكرا جدا ليكى
***********************************************
باشمهندس شريف

اهلا اهلا
بجد حضرتك مش متخيل تعليقك بيعمل معايا ايه
دايما بيدينى امل وتفاؤل وبهجه
ربنا يكرمك يارب
وبجد شكرا ليك جدا

تحياتى وتقديرى واحترامى

مصري بالغربة said...

كل سنة وانت طيبة

الاختلاف في وجهات النظر لا يفسد للود قضية ... ده مبدأي على فكرة

وبصراحة ملقتش احسن من كلام تسنيم لان هو ده اللي كنت عايز اقوله وهو : -

السلام عليكم

يعز على ان احس هذا اليئس فى كلامك
وفى نفس الوقت التمرد على الحياه الت تعيشيها.....ولكن الله ترك لكل منا أسباب نأخذ بها...فخذى بها فالأسباب هى سر الحياه....وارضى بما قسم الله لكى حتى يرضيكى واذا رضيت شعرت بالسعاده....
واذا لم ترضى فانظرى الى نعم عندك وغيرك محروم منها......
ولقد أمرنا الرسول *صلى الله عليه وسلم*(ان ننظر الى ما هو اقل منا فى الدنيا)واعلمى ان احلى ساعات الوحده هى ما يقضيها الانسان فى ألأنس بالله.....
فاذا رجعت الى الله وتقربت الى الله شرح الله صدرك واحسست بالسعاده.....
ولا تعطى الدنيا اكبر من قدرها...واعملى لأخرتك تسعد دنياك....
قال تعالى :(ولا تيئسوا من رحمة الله)

والسلام عليكم

نهر الحب said...

كل سنة وانتى طيبة
ويارب تحققى كل احلامك ومتكونيش متشائمة اوى
تفائلى

رحــــيـل said...

مواطن بالغربة

وانت طيب وشكرا لمرورك

لاء الاختلاف يفسد لما يكون طريقه الحوار بالشكل اللى انت بتكلم بيه

مع انى قولتلك قبل كده مش مهم الاختلاف المهم ازاى نختلف وشكل الاختلاف
بس من الواضح ان احنا معرفناش نختلف عشان كده الاختلاف افسد للود قضيه

شكرا لمرورك
_______________________________________
نهر الحب

اهلا نوسه ازيك
وانتى طيبه يارب دايما
شكرا جدا ليكى
يالا معلش اهو الواحد بيفضفض شويه معاكم

هتفائل اكيد
منورانى دايما

دمعاتي said...

كل سنه وانت طيبه
انا بعتبر ان الفتره من 20 ل 30 هي من اهم فترات عمر الانسان
فيها عنده عنفوان الشباب و الافكار المجنونه و الدوافع الجباره
والقدره انه يحلم ويجرب ويحقق
استغلي الفتره دي
لانها زي ما هي مهمه فهي بتعدي بسرعه
فلازم نلحقها
قبل ما نلاقي نفسنا 34 ونقول ياترى السنين اللي فاتت كان نفسنا في ايه وحققنا ايه منه

على الاقل نحاول عشان ساعتها يبقه عملنا اللي علينا
ربنا يعينك وتحاولي
فربما تنجح احدى المحاولات

رحــــيـل said...

دمعاتى

وانت طيب ياسامح ربنا يخليك

مهو يابنى عدى من الفتره دى اربع سنين فاضل سته
هههههههههه

بس تعرف انت معاك حق فعلا اهم فتره
ربنا يسهل بقى فى السته الجاييين
محدش عراف الايام مخبيه ايه
نورتنى

مصري بالغربة said...

انا زعلت جدا على فكرة انك مقرتيش تعليقي عليكي

وبما ان اختلاف الراي يفسد للود قضية وده عندك انت بس

فانا عشان كده حانزلك تعليقي عليكي

في ردي على فتوتك بتحليل الكذب

بس يا ريت يكون عندك الشجاعة للرد وليس حذفها ثم تقولي بانه كان بها سباب

وانا فعلا اسف اذا كان تعليقي حيكون فيه تدني لاسلوب الحوار

بس ده للاسف ردا على اسلوبك المتدني جدا باسلوب الحوار

مصري بالغربة said...

انا قريت ردك اللي للاسف اتصدمت ان فيه واحده زيك تدخل عالم التدوين اصلا

بس الغلط مش عليكي انتي

الغلط على اللي سمحلك تدخلي وتكتبي زي ما انت عايزة

اللي يفتي يفتي واللي يقل في ادبه يقل في ادبه

واللي تشجع البنات والشباب على الكذب والخداع والنفاق

واللي تلف وتدور في الحوار عشان بس تثبت انها صح , وانها مثقفة ورايها هو السديد

واللي تخلي اي واحدة من صاحبتها تدخل باي اسم عشان ترد علي بوست قديم عشان بس تثبت نظرية صاحبتها

كل الحركات ديه مفهومة طبعا

وانا اسف لنفسي اولا على اني للاسف اضطريت انزل لاسلوب الحوار الفاشل بتاعك ده

واني اضيع من وقتي للرد على امثالك بس مش مشكلة

في سبيل الناس اللي بتقرى هنا تعرف حقيقة كذبكم وخداعكم وتضليلكم

اللي للاسف حتى عمالة تقولي بادور على النص او على المبرر اللي بيعطي للست الحق في انها تكذب على جوزها

يا اللي اسمك رحيل ولا غدير انت

يا ريت متفتيش بعد كده بحاجة ولا تكتبي اي حاجة الا لما تكوني متأكدة منها كويس قبل ما تكتبيها

ويا ريت بما ان ثقافتك الدينية وغير الدينية محدودة للدرجة ديه

يبقى الاحسن متكتبيش من اصله
وشوفيلك حلجة تانية تعمليها

تقشري بصل , تقوري كوسة , اي حاجة تانية مفيدة غير الكتابة

لانك من الواضح جدا انك فشلتي فيها اساسا

حتى اسلوبك في الحوار متدني لابعد الحدود

يا ريت تكوني فهمتي طبعا

اما بالنسبة للمدونة
فاعتقد فيها فتاتين كويسين بالفعل في موضوعاتهم

واعتقد انك لسه منضمة حديثا للمدونة
اللي من الواضح جدا انك فشلتيهابارائك واسلوبك المنفر جدا لاي حد يدخل يقرا فيها

وعشان كده باقترح انك تبعدي عن المدونة ديه
عشان تنضف
وترجع زي الاول

انا اسف لنفسي اولا وللي ممكن يقرا التعليق ده
على الاسلوب اللي باكتب بيه
بس للاسف الاسلوب ده ما ينفعش غير لوحده زي الشخصية ديه
وانها السبب في تدني الحوار للدرجة ديه

بس للاسف فيه ناس مينفعش معاهم غير كده

مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
مصري بالغربة said...
This comment has been removed by a blog administrator.
رحــــيـل said...

مصرى بالغربه

اتمنى انها اخر مره اشوفك هنا فى المدونة
انا مش همسح تعليقك انا هسيبه انا مسحت بس تعليقاتك المكرره اللى مش عارفه انت مكررها اربع مرات ليه

وبالنسبة لتدنى الحوار فاى حد يقرا تعليقات حضرتك من اولها هناك يعرف اصلا ان السبب فى التدنى ده هو انت لانى كذا مره ردينا على حضرتك بالزوق بس مش نفع معاك

انت راى حضرتك لا يعنينى بالمرة
ولا يهمنى انى ارد على اى كلام انت قولته عشان رديت قبل كده
وانت اصلا مش فاهم غير اللى انت عايزه

انا مخلتش سلوى تدخل ترد على موضوع قديم ليه
ولا اى من اصحابى ولااعرف ولا واحده من اللى دخلو علقوا

احنا التلاته بنرد على اى بوست فينا
واعتقد انى دخلت ورديت عليك قبل كده بس انت مش شايف غير اللى انت عايز تشوفه

انا هسيب تعليق حضرتك وعارفه كويس ان اى حد يعرفنى وبيدخل عندى هيبقى عارف انه مجرد كلام من حد اقل ان انا ارد عليه

وعلى فكره انا سبت التعليقات هنا مفتوحه وانا واثقه ومتأكده انك هتيجى وتعلق

بجد شكرا انك جيت انا كده استريحت لما عرفت انت قولت ايه

بس اخر تعليق هنشره ليك هنا
واتمنى فعلا انك متجيش هنا تانى

رحــــيـل said...

عشان الناس تكون فاهمه انا بتكلم عليه وتعليقك ده بناء على ايه
ده لينك البوست والتعليقات اللى بسببه الباشمهندس المحترم كاتب التعليق ده


http://kalamalbanat.blogspot.com/2008/08/blog-post_13.html

شظايا said...

أنا بحب أمسك الخيط من أوله . أحب احيي طبعا أخويا محمود رجل الفضيله
اللي بينهي عن المنكر بتعاليم الإسلام السمحه .. ربنا يديمك زخرا للدين
وليا عندك عتاب بسيــــط أول قاعده كسرتها
بالحكمه والموعظه الحسنه
أسلوبك واضح إنو مبني على تجربه سابقه حد ادالك على قفاك مثلا
وكذا عقده اترسبت ف دماغك على انك مش هتلاقي البنت الشريفه اللي هتصون شرف سعادتك
داخل شمال من اول سطر : للأسف دلوقت البنات ماشيه مع الموضه ولو عملت أي حاجه
شيطانها بيحللها الحرام وذكرت كام مثال صفيق مش محل البوست إطلاقا
ده بينم على جهل مترسخ ف خلايا دماغك . او من باب حسن النيه بقدرتك الذهنيه
انك سفيه وماقرتش الموضوع أصلا .. هنا ينبغي على الراشدين امثالي
ينبهوك وياخدوا بإيدك علشان تتحدى الإعاقه. انت مالكش ذنب بردو
يا حبيبي البوست بيتكلم بطريقه أدبيه بحته . عرض رأيين دون تبني أحدهما
ولو أشرت شبهه ضعيفه إنك بترد عل الكومنت اللي قالت فيه رحيل
ان الكذب ف الحاله دي مباح ..هقولك انت معاك حق بس من حق المسلم عل أخيه
حسن النية . يعني انت بالضبط عملت زي اللي بيضخم حاجه صغيره من غير تروي
فأكيد اللي قدامه هيتمسك بالرأي .. وهو يتبجح علشان يحارب عل رأيه بإسم الدين
والنتيجه صفر

شظايا said...

لو مشيت مع سياق الحديث هتلاقي رحيل تقصد ان الزوجه . وليست الخطيبه
تتحلى ببعض الكياسه علشان مش تخرب بيتها . تعرف : في خلال قعداتي مع ستي
حكتلي عن مرات كتير دارت عن جوزها . عن بيع عجله و فلوس علشان مصاريف الولاد
و و و و .. أظن دينا دين عقل ولا ايه ؟؟ الكذب حرام طبعا مافيش كلام .. بس
ربنا سبحانه وتعالى بيغفر وطالما ذنب وعدى . وربنا ستره . ما اجيش أكشف ستر ربنا وأفتكره
والزوج ده يبقى مريض أصلا . حاجه عملتها من قبل ما تعرفه واستغفرت منها
طبعا أنا بتكلم عن المعرفه السطحيه بردجاتها : تليفونات شات كليه .. مافيش داعي تخرب بيتها
يعني مثلا في صنعه لطافه تقوله : انت لما جيت مليت عليا حياتي . كان في واحد كده
بس اختفى من اول خطوه ليك ف قلبي .. يعني مش لازم تقوله اه / لأ صريحه
ده اللي قصدته رحيل - حسن النيه يا اخ محمود - ده اللي بيقوله العقل
انما لو سألت أي عيل صغير الكدب حرام ولا حلال يابني
هسيبك السؤال تفكر فيه بقه على رواقه مع كوبايه نسكافيه علشان التركيز
ده اسمه كلام ياراجل . دا انا زعلان منك وليا حق أعتب عليك
منها لله البت اللي عملت فيك كده . إلهى ربنا يسامحها يارب ويعوضك خير

شظايا said...

يستمر الأخ الفاضل / محمود مرسي في الذود عن حوض الفضيله
واقفا ً على ثغر شاهرا ً سيف الحق ليبطل الباطل
ربنا يكثر من أمثالك يا عسل
بعد خطابه الطوييل عن انتشار الفساد ف الشارع اللي واضح انو ملم بيه بدرجه مدقق
يعني حضرتك مش عاتق جايب قرار الموضه . ذو بصيره بجد
أثبت ان المشكله مشكله مرأه ولازم لما يتقدم لوحده من الجنس النمرود ده
تنسجله قصص خياليه عن مدى طهرها وانها قطه مغمضمه علشان ينشكح
ويمصمص لعابه : اشطا . لقيتها اللي هتصون شرفي
ياعمونا اللي بيجي يتجوز بيدخل بيت عارف أصله .. بناءا عل الثقه دي سؤال خفيف
هيوصل لإطمئنان قلبه . مش يقرر البنت وما يقولش حاجه من تجاربها
خدها مني نصيحه علشان سوقك ما يقفش وتعنس وتبقى موشكله
خليها تيجي بود . ف ساعه صفا وفضفضه مش تقرير وشرطه ومحاضر
كمان عتاب بقه : ناقصات عقل ودين .. يعني يا واد يا شقي
كنت بتزوغ من حصه الدين وتلعب صلح مع العيال ف الحوش .. دي مش معناها كده خاالص
النبي صلي الله عليه وسلم يقصد بيها : النقص العقلي فهو نقص عارض مؤقت بسبب الحيث والحمل
او طويل المدى بسبب الضغوط النفسيه وفترات الحيض وليس ف القدرات العقليه .
لذلك نجد ف الشهادات . امرأتين بشهاده رجل.. اما عن نقص الدين
فهو نقص مؤقت في الصيام والصلاه لاجل الحيض والنفاس . وصبرها له أجر عظيم
----
" يا ريت لو تفتحوا مخكم شوية وتقروا وتفهموا حتى اللي انتوا بتكتبوه"
وهنا بيستكمل حملته الشرسه . حيث خبط ف مدونه أخرى .علشان ارتكبت إثم
التندر مع صاحبتها ببعض الكلام اللي أكيد بتنبذه ومش بتفكر تعمله
وبدأ بقه التفافه بتاعته : يعني لو مشيتي مع واحد واتنين وتلاته ما تقوليش لخطيبك
وهنا لازم اوعيك يا سيدي الفاضل : الكلام هنا على سبيل الإفتراض الهزلي
ما ينفعش تكلم واحده بالأسلوب الهمجي ده . مش ذنبها ان عندك عقده غن كل البنات عاهرات
وده سبب جوهري ليه ما حدش رضي بيك لحد دلوقت . انك بتنفر الناس بطبعك ده
اقعد قدام المرايه كده وكل يوم الصبح مع معلقه عسل قول بصوت عالي
أنا حونين . انا حونين .. ممكن ربنا ينتعك بالسلامه . بالشفا
----

شظايا said...

" الموضوع استفزني جدا وللاسف تفكير البنات بردوا استفزني جدا جدا "
يا جماعه الراجل ده بيعرف يجيد الحوار بشكل فعال
بيوجه سؤال للبنات اللي هنا كلهم . يا عيني عل الصبر
عن إمكانيه وجود فتاه لم تلوث بعد وصاغ سليم .. تمام زي سعادته
هل هذا ضرب من المستحيل ؟؟ هنا بقه بيكلم نفسه
واضح إن إنت اتقرصت كام مرة .. خربس تاني جايز تكسب ومش تطلع قرعا
ياعم الحج في بنات كتير غايه ف الادب والاخلاق بس انت بتدور ف حته غلط
يستكمل تساؤلاته العديده كانه بيخاطب الفتاه اللس صفعته الألم المؤلم
ويختم بجمله صاخبه من فوق منبر نشر الوعي ف صفوف البنات
"اذا كان كذلك فالعيش بدون زوجة افضل الف مرة من الزواج بامراة لها ماض"
ربنا يكون ف عون اللي هتلبسك يا صاحبي .. هتتعب كتير
-------
في نقطه في شخصيتك لازم تقف عليها وتعالجها . انا ممكن أساعدك لو تحب
لو بنت اعترفتلك بإنك مش اول شخص ف حياتها . حبت واحد قبلك
حتى لو فضل الحب ده مشاعر جواها وبس .. انت مش واثق ف نفسك
وعلى الرغم من انك بتحبها .. هتسيبها . يا إما هتضغط على نفسك على حد تعبيرك
وبعد كده " الغيره " زي ماقولت هتقلب حياتكوا جحيم
بص يا كابتن انت مهزوز من جوا ومش واثق ف تأثيرك عل البنت اللي هتختارك زوج
صعب صعب تتعايش مع نفسك كده . انت طايق نفسك ازاي أساسا
----
"هذه حياة جديدة سوف تبدأ واذا بدات على الغش والتضليل سوف تكمل على ذلك ومئالها الى الفشل الذريع"
على فكره انا صبري بدأ ينفذ ... مش معقول دا عاشر كومنت ليك ماهو انت فاضي فصصت
ياعم الأمور . الست رحيل بتتكلم عن ما بعد الجواز يعني حياه اتبنت بالفعل
بفرضيه ان الراجل واثق ف نفسه زياده وما سألش . وف قعده لطافه سألها
مش هيزودها حاجه المعرفه .. ممكن تداريها من غير كدب بدل ما تخرب بيتها
اما عن فتره الخطوبه لازم طبعا تقوله ولو جبت نفس العيل الصغير اللي فوق
هيقولك طبعا تقوله وتبدا الحياه عل المصارحه .. انت مش معانا م الاول ولا ايه
اصل كلنا متفقين على كده
-----

شظايا said...

ساب الموضوع كله ورصد نفسه للرد على الداعيات للفتنه ف الأرض
ده المفروض الرجاله تعملك تمثال يا راجل .. فصص كل كومنت على حده
وهو حاطط ف باله ان كل بنت من دول عدو لازم يوقفه عند حده
--------
"افهمي الاول معنى الكلمة وتتوظف في المكان الصح"
الجمله دي لا تصدر إلا عن جلنف صرف
يعني في أخت ردت عليك بالحسنى وتغاضت عن كونك اتهمتها بالإثم
لما بتمشي مع واحد وتلاته واربعه . وهي كانت بتعمل فرضيه
ونبهتك إن لو هي مجرد ميل قلبي .. يعني مشاعر من غير تطبيق عملي
حبت بس ما مشيتش مع الواحد ده .. في حالات بتحب لعشر سنين من غير ما تقول
انا اعرف حد كده .. بس ازاي . هوب صدر الوش الخشب وبدأ بقذف التهم
علشان يخرس صوت الباطل قبل ما يطغى عل الحق .. انت راجل بتفهم يابني . قولتلي اسمك ايه ؟؟
-----
بدأ يتخلي عن الوش العجيب ويقول كلام لين ولذيذ
"ويا ريت تاخدي كلامي ده على انه نصيحة من مسلم لجميع البنات المسلمين "
حركه حلوه منك يا راجل كانت فين من بدري .. لأ بجد لو كانت ف الاول كانت وفرت كتير
كأنك حسيت إنك كنت أوفر . فبدأت تلين
أو انت غرضك لفت الإنتباه .علشان قعدت ف الزقر كتير من غير ماحد يعبرك
وهنا عاوز اوجهلك كلمه بجد : احنا مش أطفال ولا مراهقين ولا حد ف الجيل ده
مش عارف ايه الصح وايه الغلط .. في ناس بتكابر وناس بتعترف بغلطها بس ضعفها أقوى
انما مش هكون بحب واحده وبكلمها وحاسس بإثم . بمجرد ما تلقيني الأقدار ف
طريق الكومنت بتاع أحد المدونات على موضوع هو تصنيفه بناتي أصلا
هيزول الشعور بالإثم وأبقى كول خالص دا احنا بنتقي الله دا حتى الشيخه مش عارف مين قالت
ياعم بطل هيافه بقه .. الناس عدت المنطقه المتحجره دي من زمان . انت لسه هنا
----
لو بنت جيت ترتبط بيها وسألتها : حبيتي قبل كده
جاوبت قالت أه بس ما عصتش ربنا هتعمل ايه ؟؟
بمنتهى الصراحه يتحفنا بإجابه فظيعه انو يرفضها علشان خياله هيصور ليه حاجات تضر
بمستقبل الجواز ده .. يا سلام بجد مش عارف ازاي بتعمم التصرف ده
لو كده يبقى مافيش حد هيتجوز أصلا .. وياما في جوازات اعرفها تمت عادي جدااا
يظهر ما كانوش رجاله بقى

شظايا said...

انا ماعنديش طول صبر أكمل كورس الحوار اللولبي بتاع حضرتك
مبوب تحت عنوان : كيف تحصل على ميل فتاه وتحاورها بعد صراع ؟؟
فقد اتضحت نيتك الخبيثه .. اللي عاوز يبلغ مش بيجادل بالشكل ده
لأن النبي صلى الله عليه وسلم قال
: أنا زعيم بيت في ربض الجنه لمن ترك الجدال ولو كان على حق
الكذب حراااام .. وفي سوء تفاهم مش قصه يعني
تعمل خمسين كومنت ف وقت القيام وكان من باب اولى انك تتقرب لربنا
انت من واجبك انك تنهى عن المنكر ونهيت ماشي ربنا يجازيك خير
مش شرط اللي قدامك يستجيب .. مش هتنقنع حد بأسلوبك الهمجي ده
بالعكس هتنفره منك وم الدين وم اللي بتدعيله
عليك ان تدعي وليس عليك ان يستجيب .. مش هترفع عليه فاس يعني
انت شيطانك غلبك اوي وواضح انو شاطر وهيألك انك كده تبخدم الدين
وصرفك عن امور الطاعه . نصيحه كفايه جدال وما تزودش ذنوبك
انت صح ياعم .. بس مبالغ فيك أوي
شوف ضيعت من وقت كام حد وكام حدايه .. ف وقت مفترج الاولويه فيه للقيام
مش دينا بيقول بردو ف قاعده فقهيه : اتقاء السيئه مقدم على جنب المنفعه
----
اما عن : زحبيل - مختله عقليا و فكريا ونفسيا - اذهبي للمستشفي
والكلام الجميل بتاعك ده . اللي مش بيندرج تحت السباب ف رأيك الخاص
ورجاء خاص لا تمارس ألعابك الصبيانيه معي فعلى ما يبدو انك قضيت طفوله معذبه
ولست بصدد الترفيه عن سيادتكم ف وقت فراغك اللي واضح انو كتييير ف العشر الأواخر
من شاكله : هي اللي شتمت الاول .. طب اشمعنا حذفتي كومنتي انا وهي لأ
ياعم الحاج من امتى المعامله بالمثل تندرج تحت بنود الحلال

شظايا said...

عاوزك تمسك ورقه وقلم وتحسب كام سيئه عملتها ف الحوار ده
النبي صلى الله عليه وسلم بيقول فيما معناه "
ليس المؤمن بطعان ولا لعان ولا فاحش ولا بذئ
انت عديت مرحله البذاءه جدااا
لا وايه الحرب مكر ودهاء .. كتب كومنت سخيف ومسيفه علشان ما يقلوش معاه
وذهبت لمدونه رحيل الشخصيه وف بوست يوم ميلادها وسط التهاني
دست سمك اللئيم ..بل وافتخارا ً بفعلتك الشنعاء وبسيطره شيطانك الماكر
كررته خمس مرات .. خمس مرااات .. تخيل مدى إيمانك بالإثم
انت اتجرجرت ف الإثم وبتكابر .. انا ماعنتش هاخدك مثلي الاعلى
انت كت حلو ف الاول بس عجنتها .. ربنا معاك
استغفر الله لي ولك
--
علشان اوفر عليك إثم انتقادي .. انا وحش ياعم
ومش بدعي للخير .. انا بس صعبان عليا العك اللي بتعكه
والغلط اللي غلطته ف إنسانه مالهاش ذنب ف عقدك
سلام يا صاحبي
بوزت بس على رحيل الفرحه بيوم ف حياتها . وبترجع تحسبن عليها
سبحان الله . ربنا يهدينا وإياكم يا اخي

رحــــيـل said...

شظايا

مش عارفه اقولك ايه اشكرك على التعليق اللى وضحت فيه بجد تقريبا مجمل اللى حصل

رغم انى كنت مستنيه تعليقك من زمان هناك عشان عارفه انك متابع

ولا الومك على طريقتك اللى مش متعوده عليها منك وان ده مش اسلوبك

بس رغم عدم اقتناعى بلهجه السخريه اللى فى كلامك اللى مكنتش احب ان يترد بيها على الاخ ده بنفس اسلوبه

بس برضه التعليق بتاعك وضح كتير عشان كده قررت انى انشره رغم قرارى بعدم نشر اى رد عليه

بس معظم الناس هنا مش فاهمه هو فى ايه اصلا ولا ايه اصل الحوار والمشكله

يالا ربنا يهدى بجد

زُمُرده said...

لالالالالالا
لالالالالالالالالالالالالالالا
دي خيانه بقى
انت قولتي هتريحي في رمضانادخل صدفه لاقي بوست بقاله اياااااااام
إهيء إهيء إهيء إهيء

هاجي بكررررره
وش مطلع لسانه

رحــــيـل said...

زمردتي القمره
ازييييييييييك


انا قولت هريح اه وقولت هنزل بوست واحد يوم عيد ميلادى


انتى زى العسل

مستنياكى كل يووووم
وحشتينى

mo7amed mamdo7 said...

اهم حاجة الاحد يكون راضى عن نفسة ومش مهم اى حاجة بس كلو طبعا فى نطاق الصح كل سنة وانتى طيبة وجدعة وتحققى كل الى حلمتى بيه ومتستعجليش محدش عارف بكرة فى اية مرحلة وتعدى وكل مالواحد بيكبر نظرتة لدنيا بتختلف كل سنة وانتى طيبة كمان مرة

المحارب المتيم said...

سارة

مش عارف اقولك ايه

كل سنة وانتى بكل خير يارب

وكل سنة تبقى اجمل واسعد من اللى قبلها

رغم انى زعلان على لهجة الحزن دى

بس بتمنى والله تبقى دايما اسعد ويجعلك من اسمك نصيب يارب

وانا اللى كنت مستنى تورتة وجاتوه وساقع
ماشى يا ستى تتعوض فى عيد ميلادى

كل سنة وانت طيبة

رحــــيـل said...

محمد ممدوح

اهلا بيك كل سنه وانت طيب دايما

شكرا جدا لوجودك ومرورك

تحياتى لك
***********************************************
المحارب المتيم

عرفه باشا اهلا اهلا

معلش التورته المره الجايه ان شاء الله

هستناها فى عيد ميلادك
شكرا جدا

Hossam said...

كل سنة وانتى طيبة وعقبال ربعميت سنة
بس عايز اقولك حاجة
انا دلوقتى 16 وحاسس انى معملتش اى حاجة فى حياتى
نفسى اتكلم 20 لغة خلصت اربعة وهخلص الباقى قريب انشاء الله
نفسى اخد كل شهادات المعادلة وفعلا باخد دلوقتى الsat
كان نفسى اسافر المانيا عشان اخد كورس المانى هناك مكثف ودلوقتى الحلم بيتحقق وهسافر باذن الله يمكن 6 او 8
عايز اوصلك ان طول منتى عندك هدف هتحققيه يعنى هتحققية
وعايز اقولك برغم ان اكاد اجزم ووالله مش شكر فى نفسى ان مش فى ولا واحد فى حد
من زملاتى عندة حجات زيى
ومع ذلك حاسس نفسى فاشل ومخلصتش اى حاجة فى حياتى
البنى ادم طول مهو على الارض مش هيخلص تعليم وهيموت برده وه جاهل حتى لو كان واخد الف جايزة نوبل فى الف مجال مختلف
تقبلى مرمروى
سلام

david santos said...

Really beautiful posting.
Good imagination.
Congratulations!!!