Sunday, April 27, 2008

تاج تالت

تـحـــديــــــث


انا بهنئ المدون الشاعر علاء سالم وبقوله الف الف مبرووووووك على الخطوبه ربنا يهنيك ويوفقك دايما
والله و شوفتك عريس ياعلاء اخيرا هشمت فيك هههههههههههههه ربنا يسعدك
-------------------------------------------

التاج ده انا خدته من سلوى وكمان شرين عدته عليه شكرا ليهم
اذكر عشر حاجات عن نفسك؟
كنت زمان مش بعرف اتكلم عن نفسى او جايز كنت بتحرج او بخاف مش عارفه بس التاج ده انا مقلقتش منه ومكنتش خايفه وانا بكتبه ولا ترددت ولا حسيت انى كتبت حاجه كنت المفروض مكتبهاش جايز لان فعلا بعتبر محاولاتى هنا محاولات حقيقة بجد, وانى محتاجة انى اكون صادقة فيها مع نفسى من قبل ما اكون صادقة مع اى حد بيقرا هنا بس فعلا اعتبرت التاج ده من اهم محاولاتى
ورجاء للناس اللى ممكن يكونوا عارفين سارة كويس ان يكون التعليق برده محاولة منكم معايا انى الاقينى ومش هزعل من اى كلمة هتتقال
----------------------------
اولا انا عنيده جدا بدرجة فعلا ممكن تكون سلبية اكتر منها ايجابية وخصوصا لما احس انى اللى قدامى هو كمان بيعند معايا وكمان عشان بكبر دماغى جدا ومش ببقى على حاجة ممكن الامور توصل لمرحلة صعبة وبكون
عصبيه جدا روغم انى هادية ومش غاوية مشاكل بس لما بتعصب بكون حد تانى خالص لدرجة ان الناس بيكون عندها
ذهول ان انا ممكن صوتى يعلى بالشكل ده او انى اطيح فى اللى قدامى كده
-----------------------------------
ثانيا باخد الامور بحساسية جدا جدا ممكن كلمة تتقالى افضل افكر فيها ودماغى تودينى وتيجبنى او موقف جايز مش مقصود يضايقنى بس الاكيد ان مهما كانت الكلمة او الموقف صغير فيدل على شئ جوا الانسان اللى صدر منه الكلمة او الموقف ده ,وعلى العكس برده يعنى مش حساسه فى الحاجات اللى تزعل بس لاء كمان فى المواقف الحلوه الصغيرة من الناس اللى حواليا تفاصيل صغيرة قوى ممكن تسعدنى بجد
------------------------------------------
ثالثا متناقضه طبعا لابعد الحدود لدرجة انى اوقات بحس انى هتجنن فعلا, ساعات بحس انا مش عارفه انا عاوزه ايه
بالظبط يعنى عملت زى اللى بيرقص على السلم
--------------------------------------------
رابعا علاقات الصداقة فى حياتى من اقوى واهم العلاقات واصدقها عندى فعلا اصحابى بيمثلوا الجانب الاهم عندى بقضى معظم وقتى معاهم بجد بحبهم جدا جدا وعلاقتى بيهم كويسه بحبها قوى, انا بحب اساسا العلاقات اللى بحس فيها بصفاء وهدوء وصدق
ومن اهم العلاقات حاليا عندى كمان علاقاتى فى عالم التدوين اللى بقيت بجد بعشقه وبحب كل الناس اللى عرفتها منه
---------------------------------------------------
خامسا بكره جدا الروتين والتقاليد مش بحب الامور التقليدية وبكره الشغل الحكومى جدا بحس انه بيقتل اى طاقه او طموح وانه بيحولنا لالات فقط لا غير, عشان كده بكره شغلى جدا ودايما بسعى انى ادور على حاجه فى مجالى يكون فيها مجال للنجاح بجد مجال انى اشغل عقلى واثبت تميز ونجاح
----------------------------------------------
سادسا اعتقد انى شخصيه اجتماعيه ومحبوبة ومريحة نوعا ما, انا بحب علاقتى بالناس اللى حواليا وتعاملهم معايا واحترامهم ليا وخوفهم عليا رغم اختلافات كتير فى وجهات النظر,اعتقد انى ممكن اكون بتعامل بزوق نوعا ما وانى بعرف احترم وجة نظر الاخرين حتى لو اختلفنا (اكتسبت الصفه عن قريب من عالم التدوين
-------------------------------------------------
سابعا صادقة جدا مع كل اللى حواليا معتقدش ابدا انى فى حاجه ممكن تخلينى اكدب او ان فى حاجه تستدعى ان حد يكدب عليه عشان كده بتصدم جدا جدا لما اكتشف ان حد بيكدب او بيلف ويدور بحب اتعامل بصراحة مطلقة وشفافية ووضوح
---------------------------------------------------
ثامنا مستمعة جيدة اوقات بوصل لدرجة الفضول بس مش عشان حشرية او بحب ادخل فى حياة حد بس اوقات بيكون الحد اللى بسمعه يهمنى امره واوقات بيكون الحد ده محتاج بس يفضفص والاكتر انى بحب اعرف الدنيا ماشية ازاى واحوال الناس من حواليا
----------------------------------------------------
تاسعا مجنونة جدا وبعمل كل حاجة بجنون بغضب بجنون وبعشق بجنون وبزعل بجنون ولما بصفى من زعل بصفى بجنون كأن مفيش حاجة حصلت بعشق السفر, والخروج, والمشى ,وبحب البحر وانا مكتئبة وخصوصا مع اميره بنت عمتى وبكره الصوت العالى جدا جدا
---------------------------------------------
عاشرا بحب شخصيتى جدا بخوفها وجنونها وهدؤها وعصبيتها وضعفها وقوتها وحزنها وفرحها لحظاتها الحلوة وتجاربها وكل التناقض اللى فيها بس مش غرور مع انى اوقات بخاف منه جدا بس معتقدش ان اى حد اتعاملت معاه فى يوم خد الانطباع ده عنى , وبدور على حاجة حاسه دايما انى مش هلاقيها وانى هفضل عمرى كله تايه وحيرانه
-------------------------------------------------------------------
امرر التاج لخمسة




هروح اقولهم حالا
ومش همرره لسلوى وشرين تانى طلب غريب جدا مهو جاى من عندهم هبعته تانى ليه؟
سبحان الله

Tuesday, April 22, 2008

لا تكن مغرورا

اولا انا بشكر صديقتى المدونة يوما كتير جدا على مساعدتها ليه فى تغير القالب بجد جننتها معايا الليومين اللى فاتوا فى تغير القالب شكرا ليكى بجد ويارب متكونيش قررتى تقطعى علاقتك بيه بعد اللى شوفتيه منى
ثانيا انا بعتذر لاخى الصغير والمدون ساجى عشان انا كنت وعدته انى اول بوست هنزله هيكون تاج اكسير التفاؤل معلش بقى يامصطفى للاسف خرجت من مود التفاؤل مش هعرف اجاوبه الوقتى بس اكيد فى يوم ما هنزله شكرا ليك على كل حاجه بجد



حبيبي لا تكن مغرورا
ولا تظن أن سحر عينيك يغرقني
ولا أهدابك السمراء تنقذني
احبك نعم وألف احبك
ولكن لا تدع الغرور يصيبك
فإن أغضبتني مرة ستكون الاخيرة
فليس بحبك وحده أحيا
فكرامتي عندي أولا وثانيا وأخيرا
احبك كثيرا كثيرا
ولكن صدقني إن تركتني
لن أسهر ليلى أناديك
وان طال فراقك
قد أتعذب وقتا قصيرا
لكنني لن اندم كثيرا
فأنت اخترت الرحيل
وأنت منذ البداية
نصبت نفسك ملكا على قلبي
لقد قررت ان تهواني
وقررت أيضا أن أهواك
وظننت أنني
في بحور حبك هائمة
وفى غابات عينيك تائهة
وفى حنين صوتك عاشقة
فأصابك الغرور سيدي
وظننت أنني لن أحيا بدونك
وأتعذب لرحيلك
حاول أن تعود كما كنت
كما عرفتك
كما أحببتك
ودع هذا الغرور جانبا
فقلبي يهواك
وعيني تهواك
وإن عدت
فستجدني كما كنت
انتظرك دائما فى جنتى
ودعني أنصبك ملكا
على قلبي بإرادتى

-----------------

2002

Friday, April 18, 2008

وحشتوووووونى


وحشتونى بجد كلكم نفسى ارجع تانى بينكم تانى مفتقداكم جدا مفتقده مدوناتكم وتعليقاتكم والتواصل بينى وبينكم

وبجد شكرا لكل الناس اللى كانوا بيسألوا عليه الفتره اللى فاتت سؤالكم كان بيسعدنى جدا وكل اللى علقوا على البوست اللى فات اسفه انى مردتش بس فعلا مش بعرف اتابع من سيبر عشان كده مكنتش بعلق عند حد
انا ان شاء الله راجعه قريب جدا