Friday, April 10, 2009

عارفاك


عارفاك

رغم الجرح اللى ما بينا

لسه بتشتاق

بتدراى غرام جواك

بيصرخ م الشوق لعنيه

نرجع ليها وكفايه فراق

حساك

رغم البعد لسه فاكرنى

وفاكر انى عاشقه هواك

ونبرة صوتي فرحة قلبك

وانا رغم بعادك بستناك

عارفاك

لسه بتحلم نتقابل صدفة

يجمعنا طريق تتلاقي عيونا

وبرغم الخوف لسه بتتمنى

نلون سوا ايامنا الجاية

حساك

رغم فراقنا

لسه بتحلم بنهار لينا

شمسه يوماتى تنادى علينا

وقمرها يونسنا فى ليالينا

عارفاك

لسه الذكرى عايشة معاك

وطيفى فى كل الاوقات وياك

زى ما طيفك ولا لحظة فارقنى

ولا قلبى فى يوم حاول ينساك

حساك

قريب رغم المسافات

وحنانك واصل رغم القسوة

الظاهرة فى الحكايات

هو أمانك بس ناقصنى

وراح يكمل بوجودى معاك

ومسيرها الايام هتروق

وهتجمع من تانى قلوبنا

وتدواى الجرح اللى ما بينا

ونكمل من غير خوف سكتنا

22 comments:

احساس طفلة محبة للرومانسية بس واقعية said...

ومسيرها الايام هتروق وهتجمع من تانى قلوبنا وتدواى الجرح اللى ما بينا ونكمل من غير خوف سكتنا

رحيل

اكيد اللى انتى حساه صح
لان لما نحب حد اوى ساعتها نعرف ان اللى بنحبة بيحبنا اوى ولما نشتقلة اوى يبقى هو كمان مشتاقلنا
دا حديث القلوب

اول مرة اجى هنا بس الاكيد
انها مش الاخيرة
كلماتك بسيطة واسلوبك عجبنى


مودتى
تقبلى مرورى

صوت من مصر said...

ممكن اقولك انه هيرد عليكى ويقولك هو كمان فاكرك ؟
فكرتينى باغنيه لواما اسمها لما قبلتها

HAPPY said...

انتى هتتجهى للشعر الغنائى ولا ايه؟؟

بس طبعا حلوه اوى

فكرة من الزمن ده said...

جميل التاكيد عارفاك حساك عارفاك حاساك
والكلام عارفين ان انتي حاساه اوي
تحياتي

سلوى said...

جميله أوى يا ساره

kafrawy said...

رب صدفه خير من الف ميعاد

حاول تفتكرنى said...

زجل بلغة مختلفة

دائما تحتوي كلماتك على معاني كثيرة جميلة

أحييك بشدة

camara said...

ايه الروعة دى
كلمات تلقائية تخرج باحساس عميق للحظة اشتياق
دمتى مبدعة
تحياتى

حسن حنفى said...

يؤسفني اني اقولك ان للاسف مش كل احساس الانسان بيحسه بيطلع صح وده للاسف اللي بيوجع ممكن احس انه لسه بيحبني وهو مقرر ينساني الي الابد بل ربما انها تحب غير ساعتها هفضل اعيش في الوهم :(

Sherif said...

كل هذا الحب الطاغى الا اننى لم

افهم .. لماذا الفراق؟

ربما للسفر .. فهل اختلفت العهود

ام انها لازالت مقيمة؟

ألف سؤال .. اجابة واحد منها تنبئنا

ان كان الحب يعود

Soul.o0o.Whisper said...

رحيل الجميلة

صح أحيانا الظروف بتحكم بالفرقة
و أحيانا بيكون غصب عننا

لكن دايما بنفضل على امل
أن هييجى يوم يجمعنا

ربنا يجمعك بمن تريدين
و يقر عينك بما تشتهين



دمت بكل الود يا جميلة

Anonymous said...

وهو كمان بيسعي للحظة دي لأنو هو كمان بيعشق كل اللحظات اللي عشتوهاالبوست رائع ومعبر بس مش احساس طرف لكن احساس الطرفين
مش رحيل لكن عبير يفوح بكل جمال وسيظل
تحياتي لقلب مبدع وعقل رائع ويد تتألق دوما

أحسن تـستاهـل said...

ايه الجمال ده
تسلم ايدك اوي

مها ميهوووو

موناليزا said...

كلماتك جميلة
وكأنها رد على موضوعى الاخير

قطرات من شواطئ الحياة said...

بغيييب و أغيب و ارجع الاقيكي أكثر إبداعا من ذي قبل

تحياتي لكِ و لقلمك

:)

شجر الليمون said...

السلام عليكم
كدة أقدر أقول اني عرفت أعلمك تكتبي عامي كويس
بسم الله ماشاء الله عليكي
كلامك واصل بسهولة
ربنا يوفقك ويقرب المسافات

L.G. said...

جميلة

يمكن تكون حقيقة مين عارف بكرة فيه ايه ربنا يقدرلك الخير حيث كان

حازم سويلم said...

أحيانا ما تنتظم الكلمات بعفوية, لتنسج احساس قوى ومحسوس بين السطور, مثلما قرأت هنا
تحياتى

الشاعر محمد عبدالرحمن said...

رحيل
أكيد كلماتك جميله بلا شك
لكن الأجمل انكِ تستطيعين التعبير عن النفس بكل شجاعه
كل تقدير واحترام

غروب said...

المدونه حلوه جداااااااا
كشكل وتنسيق وكلام بجد

بس ليه الرحيل الاخير ده؟


عموما انا هتغدى واجى اتعمق في باقي البلوج


اتفضلي

هههه

Diyaa' said...

بعد التحية :)
ازيك يا سارة :)
محاولتي الأولي

أقدر أقولك إني شايف
حالة تفاؤل وقودها العشق :)
ورغبة في الكمال ناقصها الأمان :)

وتعبير بسيط ورقيق أرفعله القبعة :)

خالص التحية وممكن اسأل

ليه ..رحيل ؟

mohammed alsha3r said...

جميله الكلمات
وتبقى اجمل لو اتغنت