Sunday, May 10, 2009

يوميات في الازهر الذى كان 1


شئ غريب جدا ان اللى تفضل طول عمرك تبعد عنه حتى فى احلامك تلاقيه قدامك سهل جدا على طبق من فضة
وده اللى حصل معايا حقيقي لما كنت بهرب طول عمرى من مجرد التفكير انى اشتغل فى وظيفة حكومية فعلا كان كابوس لانه لا يناسب طبيعة شخصيتى ولا كان يناسب مع طموحي ولا حتي قدراتي عشان كده كانت كلية تجارة بالنسبالى اكتر كلية مناسبة ليه وايام التنسيق رفضت تماما كلية تربية لان مكنش عندى اى استعداد انى اكون مدرسة
وعدو الاربع سنين وخلصت كلية تجارة 7-2005 اللى كانت امنيتى فعلا، كانت فى مسابقة فى الازهر9-2005
ماما اصرت انى اقدم، قدمت بس عشان اريحها وطبعا انا طول عمرى اسمع عن المسابقات دى محدش بيتعين فيها اساسا وانها افلام محروقة فقدمت وانا مطمنة انها مش هتيجى ونسيت اصلا انى قدمت فيها
ظهرت نتيجة المسابقة انى اتقبلت طبعا جالى حالة احباط خصوصا ان كل اللى حواليا بيقولوا مبرووك ومبسوطين جدا وحاجه جميله خالص انى جتلى وظيفة هنا زى دى ولما قررت انى اعترض قالوا عليا مجنونة ازاى الناس كلها هتموت على وظيفة ومفيش شغل فى البلد وانتى ترفضى كده بالساهل هو حد لاقي وكانت معظم الاراء انى اروح واجرب لحد مالاقى فرصة احسن وسمعت الكلام – تقريبا كانت اول مرة اسمع كلام حد طول عمرى ماشيه بدماغي ومغلبة كل الناس بس عرفت فعلا انى احسن حاجه انى امشى بدماغى لان انا اللى هعيش مش الناس غلطة عمرى فعلا انى سمعت كلامهم
المهم بدأت فى دوامة تجهيز الورق وبعد دوخة التنقل من مبنى لاخر فى منطقة المنصورة الازهرية وسلالم طالعة نازلة مش عارفه ليه مش بيحطو المكاتب اللى تبع بعض جمب بعض ويريحو الناس لكن ازاى
المهم جتلى الوظيفة ادارية فى احد المعاهد الابتدائية فى بلد قريبه لينا - المسمى الدارج ليها كاتبة
روحت يومها الصبح وانا قلبى بجد حاساه موجوع مش متخيلة انى اخرى ادارية فى معهد ابتدائى يارب معقول بقى بعد كل الطاقة والطموح والاحلام اللى كانت عندى اخرها اعقد على مكتب وقدامى كومة ورق ودفاتر من العصر الحجرى مهو اكيد الدفاتر دى يدوب كان قدماء المصرين هما اللى بيستخدموها بناء على حجمها العملاق
واعتقد برضه انهم خلال القرون اللى فاتت محاولوش حتى مجرد محاولة انهم يعملوا غيرها لان كان عليها كمية تراب غير عادية، اتعمل معايا زى الافلام بالظبط كل اللى الدفاتر ظهرت وبانت واحطت قدامى هههههههه اول مروحت وقدمت ورقى وطبعا بدا ينتشر فى المعهد ان ادراية جديده جاية وكنت وقتها اصغر واحده فى المعهد 21 سنه وكان كل للادراين اللى هناك كلهم فوق الاربعين ستات ورجالة
المهم بعد الاستقبال اللى نوعا ما كان كويس ومطمئن من الناظر اللى كان موجود وقتها والوكيلة والادرايين وكل حد يقولى انتى متسمعيش كلام حد هنا غيرى اى حاجه اسالينى انا انا هنا الكل فى الكل – سمعت الحوار ده مكرر من يجى اربع اشخاص – بعد الاحتفال الرائع بقدومي وفرحتهم بيه اللى عرفت سببها بعد كده الا وهو ان رغم كنا فى بدايات شهر 12 وعدى على بداية الدراسة 3 شهور الا طبعا كان قلبهم حاسس ان جايلهم ادراية جديدة فكانو محوشين شغل شئون التلاميذ تقريبا كله لحد مانا اشرفهم بحضورى – المفروض الشغل ده يكون خالص على اخر شهر عشرة - وقد بدأ اول يوم بدفاتر القدماء المصريين وكتابة اسماء تلاميذ المعهد للمرة الاولى واللى معرفش ليه بنفضل نكتب فيهم لحد اخر سنة لاسباب مختلفة ومتخلفة وغريبة و عقيمة جدا – النظام الادراي فى الازهر سئ للغاية ومحتاج تعديل وتقريبا فى اختراعات حديثة كتير لسه مش وصلت ليهم -
قابلت مواقف غريبة جدا اتصدمت فى وسط الازهريين كنت متخيلة وانا راحة الازهر انه ازهر بقى بما كل ما تحمله الكلمة من معاني المفروض انها معروفة لجميع المسلمين بس بجد اتصدمت مواقف كتير هحكى عنها بعد كده ملخصها ان الازهر زيه زى اى مؤسسة حكومية مصرية بكل ما فيها من اهمال وغش ومحسوبية ورشاوي وكسل وتكبير دماغ وفوت علينا بكرة مفيش اى حساب لكلمة ازهر واللى كانت بتعنيه فى يوم من الايام زمان
يتبع
شكرا كتير جدا لسلوى :)

21 comments:

سلوى said...

:) جميل أوى يا ساره

وجديده طريقتك
ربنا يوفقك

في انتظار البقيه
ماتتأخريش

Soul.o0o.Whisper said...

ايه دا بئا؟؟؟

طب انا كنت جاية احجز اول تعليق

ماليش دعوة

عاااااااااااا


الاولى مكرر
الاولى مكرر
الاولى مكرر

هه
بس

Soul.o0o.Whisper said...

طب نعلق بئا

بجد سبحان الله يا سارة

الواحد بيكون راسم و حاطط تخيل معين
و بعدين ييجى تقدير ربنا

بس صدقينى هتلاقيكى الوقتى بتقولى
فعلا ماكنش يناسبنى غير كدا


مش كدا؟؟


ربنا يوفقك يا جميل
و مستنية البقية

:)


خالص ودى يا جميلة

رحــــيـل said...

سلوى

تسلمى يارب ليه وبجد

شكرا كتير جدا خالص تشجيعك ليا دايما

ربنا يخليكى
______________________________________

سول

حبيبتى
المدونة منورة بمدونات الدقهلية
خلاص هنمشيها اول مكرر
فعلا معاكى حق الواحد يفضل يحلم ويخطط ويصحى من احلامه على حاجه تانيه خالص
امممم لاء هو مش كده خالص انا لسه حلم حياتى امشى من الازهر ومن شغلى بجد بكرهه جدا من اكتر الحاجات اللى معكننه عليا حياتى
اساسا بلا شغل بلا نيله
انا هتجوز واعقد فى البيت
بجد التعامل مع الناس بقى مقرف جدا جدا
ههههههههههههههههههههه

منورانى دايما ياقمر

Diyaa' said...

مستني :)

وعلي فكرة..مين عارف يمكن مع كل الغيظ ده كله وبرضه يطلع في خير ربنا رايده ليكي ؟:) ولو مفيش ..اديه ابتلاء ومسيره يخلص يا ست الإدارية

يا عيني ..21 سنة وسط الأربعينات..حيتان يعني :(

وبالمناسبة..لو يوتوبيا فتحت في مصر هتبقي فاسدة برضه..طالما الأصول فاسدة والأسرة متخربأة..طبيعي الإدارة هتبقي بالشكل ده خصوصاً إنها قايمة علي المحسوبية

ربنا معاكي يا ست المناضلة :)))

رحــــيـل said...

ضياء

اهلا اهلا بجارى العزيز هههههههه
جايز الله اعلم
وبعدين الناس مش معترفين كمان بكلمة ادرايه دى ياضياء
دول كمان يدوب بيقولوا كاتبه كركركركر
عااااااااااااااااا
متفكرنيش اه فعلا مناضله لحد مااطلع من الازهر ده على خير
معاك حق كل الانظمه فاسده مجتش على الازهر يعنى
بس اصل انا مكنتش متوقعه كميه الفساد دى فى الازهر بالذات
امممممم مش مشكله الازهريين مشكلتى انا فى توقعاتى

شكرا على متابعتك

صوت من مصر said...

هايل

احساس طفلة محبة للرومانسية بس واقعية said...

رحيل

عارفة فعلا الانسان بيكون متخيل منهج معين وطريق واحد لحياتة

ولو خرج عنة يزعل ويتضايق ويتردد بس لو كمل فية بكل جهد ومأصبهوش اليأس
ممكن يكون الطريق دا افضل من اللى كان رسمة لنفسة

كمان انا اتعلمت حاجة من الحياة فعلا زى ما بتقولى مش معنى ان انتى رايحة الازهر ان الناس اللى فية معتقداتهم الدينية واخلاقهم تكون زى ما انتى متخيلة
زى بالضبط الحدائق
مش دائما كلها ورود جميلة
فى الحشائش وسط الورود
احيانا بتفقدها جمالها

متابعين معاكى
تقبلى مرورى

رحــــيـل said...

صوت من مصر

اهلا محمد يارب تكون بخير

شكرا لمرورك
___________________________________________
احساس طفلة محبة للرومانسيه

ياهلا ياهلا بقى انتى بقى طلعتى فى اليابان :)
ترجعى بالف سلامه انا شاء الله

فعلا محدش عارف الخير فين كل الفكرة ان فى حاجات ممكن نتحملها وفى حاجات بنفقد قدرتنا على التكيف معاها مع الوقت خصوصا لما يكون مجرد احساسنا بيها انها مسأله وقت ولازم تنتهى

وفى الاول والاخر اللى ربنا عايزه هيكون

شكرا جدا لمتابعتك
وربنا يهون عليكى الغربة

ادم المصرى said...

الله ومشاء الله

بجد انا بعتبر ان الازهر من بعد الشيخ الشعراوى مبقاش ازهر ومبقاش بيطلع علماء حتى اغلبيه الشباب الى بيدرس فيه تروحى تشفيهم دلوقتى تلاقى سجاير وقرف ولبسهم غريب حتى البنات واكيد الا من رحم الله

فعلا مفيش حاجه بتفضل على حلها

فى انتظار البقيه

رحــــيـل said...

ادم المصرى

شكرا لمرورك
على فكره فعلا الواحد بيشوف العجب فى الازهر والازهريين
يالا ربنا يهدى ان شاء الله

شكرا ليك

همس الاحباب said...

هههههههههه
حد قالك ادخلى تجارة يا سارة
ربنا يوفقك
عامة كل الشغل فيه مشاكل وروتين خنيق
تمنياتى ليكى بالتوفيق
مع ان فعلا الوظيفة مش متماشية اطلاقا مع مواهبك وروحك المرحة
تحياتى

بسنت said...

شوفى شغل الحكومه كله كدا
انا لما اشتغلت فى الحكومه اللى بدأ بالتكليف الاجبارى
كنت فاكره زى ما انتى فاكره انه ازهر بقى
انه شغل دكاتره بقى
يعنى مستوى رفيع ومخ كبير وشغل نضيف ما شفت غير قله قليله ينطبق عليها الوصف دا غير كدا شغل حكومه وفوت علينا بكره وتمتم زى ما قلتى
واضح ان قانون الحكومه واحد والمزور واحد
وطاحونه واحده
ربنا يرحمنا برحمته
وطبعا فى انتظار الباقى
دمتى بكل الخير

رحــــيـل said...

همس الاحباب

شوفت ياخالد ادى اخرة تجاره
ههههههههههه بس اصل انا كنت ادراه اعمال كمان مش محاسبة

فعلا كل الشغل فى قرف ومحدش مرتاح بس اللى بيفرق ان الواحد يعمل حاجه بيحبها ويستحمل قرفها احسن لما يكون حاجه مش طايقها اصلا

شكرا جدا ليك مرورك وتعليقك
------------------------------------------
بسنت

عارفه المشكله مش فى الناس المشكله فينا لاننا متخيلين ان الناس كويسه وان هنلاقى نفس المعامله بتاعتهم زيينا لما نتعامل
وبالتالى بنصدم فىا لواقع وفى الناس

ربنا يسترها لان بجد المصيبه لا نبقى مع الوقت زيهم

شكرا جدا على مرورك ياقمر

نهر الحب said...

ممتاز انسانة غير نمطية ومحبة للتغيير
ولا تحب النظام الحكومة وماذا بعد؟؟؟
فى نتظار جديدك يا سارة

رحــــيـل said...

نهر

اهلا باحلى واجدع بنات فى بورسعيد
وحشانى

شكرا جدا ليكى ياقمر على مرورك

الازهرى said...

انا اصدقك فى ان الازهر جزء من المجتمع وليس منفصلا عنه وعلى الرغم من اننى من ابنائه منذ الابتدائى الا اننى فوجئت تماماا بالامثلة السيئة التى حكاها لى زملائى فى المعاهد الاخرى بعد دخول الكلية
فقد كان معهدنا ولانه فى مجتمع شبه مغلق ومدرسوه غالبا من ابناؤه فكان مثالا جيدا لما يجب ان يكون عليه المعهد الازهرى وذلك ليس بشهادتى ولكن بشهادة من حولى جميعا

تحياتى دوما

mohammed alsha3r said...

سبحان الله
نفس السيناريو معاي
بس انا لسه مجتش لي الوظيفية الحكوميه

ghoneem said...

رحيل
بعد التحية
والتقدير
وخالص الشكر لمتاببعتك وارائك وردودك الجميلة

ربنا يعينك ويوفقك وتلاقي نفسك ف مكان احسن وتحققي فيه طموحك

ولحد ماده يحصل اوعي تتنازلي عن طموحك ورغبتك واهدافك ف الحياة وخليكي زي ما انت لحد الفرصة ما تيجي
لانها هتيجي ان شاء الله
بس لما تيجي تكوني انت جاهزة

تمام

تحياتي
بالتوفيق.....................

رحله البحث said...

ازيك يا رحيل اسف على التاخير رجعت الصحراء من يومين ومن هنا من قلب الصحراء اجد الصفاء الذهنى عشان اركز فى بوستات كل الناس اللى باتابعهم
بوستك رائع شامم فيه ريحه سخريه كده
بس انتى من النوادر يا بنتى ازاى لاقيتى وظيفه حكوميه فى الزمن ده فكرتينى اول ما اتخرجت وكنت مستنى تعيين الأوائل اللى اتغلى على وش سيادتى وكنت زعلان بس دلوقتى باحمد ربنا انه اتلغى
على فكره انا كمان حاربت عشان ما ادخلش كليه تربيه لانى مكنتش شايف نفسى مدرس رغم محاولات اهلى الفظيعه بس انا دماغى ناشفه الحمد لله
تحياتى يا فندم وياريت ما تغيبيش علينا فى يوميات ساره فى الأزهر

رحــــيـل said...

الازهري

معاك حق فعلا انه جزء من المجتمع
بس المفروض يكون فى تاسيس من البداية صح على اسس اسلامية صحيحة
جميل ان فى مكان قدر يحافظ على ازهريته فعلا

تحياتى لك وتقديرى
*******************************************
محمد الشاعر

اهلا يامحمد يابنى الوظيفه الحكوميه دى بتقتل اى طموح واى احلام جوانا
لو مش عايز تبقى بعد عشر سنين حد متبلد الاحلام والطموح يبقى ابعد تماما عن الوظيفه الحكومية

منور يابلدياتى
**********************************************
غنييم

ياهلا ياهلا يادكتور
فينك من زماااان؟
لعل غيابك خير 
بحاول مش اتنازل بس المشكله ان مع مرور الايام بنفقد جزء من طاقتنا فىا لسعى لتحقيق احلامنا
دعواتك

تحياتى وتقديرى
***********************************************
رحلة البحث

اهلا بيك ياغرباوى من قلب الصحراء
ربنا يعينك على الحر يارب والغربة والوحدة
شوفت لاقيت فى نفس سنة التخرج هههههههههههه
بس اديك قولت رغم انك كنت بتحلم بيها بس بتحمد ربنا الوقتى
الوظيفه الحكوميه ملل الى ابعد الحدود

شكرا جدا على وجودك وتعليق
البوست ده غريب بدأ بتعليقات من مدونين من الدقهليه
هههههههه وختم برضه بتلات تعليقات لمدونين دقهلاويه
اجدع ناس