Sunday, May 17, 2009

العرافة


فى مكان مهجور على شط البحر
كان بيتها
و بخطوة مهزوزة و خايفة
وبرعشة ايد
دقيت على باباها
اتفتح الباب على عمري الجاى
من غير متقوم من مطرحها
ضحكت و قالتلي
لسه الحيره ساكنة عنيكى
استغربت
ضحكت تاني و قالت
مش فاكراني؟
بس الروح الساكنة فى قلبك
عارفاني
مسكت فنجاني وبصت فيه
فاتخضت ملامحها و قالت
فنجان خرفان
شدت كفي وسرحت في
وبصوت مبحوح قالت
مكدبش الفنجان
بحر الحزن اللى فى روحك
ملوحته عذاب
و فراقك ويا الاحباب غلاب
و الفرح فى عمرك كداب
لكن رغم ظلام الكف
العمر طويل
وفى حلم بعيد
جاى منه النور
جايلك فارس بيعدى بحار وبحار
ماسك سيف بيحارب بيه الاشرار
و فى ايده التانية
جايب وردة لحبيبته التايهه
بيحاول يوصل
قبل العمر ما يخلص
وقبل الحب ماينقص
و بصوت ملهوف و بنبرة خوف
سألت هيوصل؟
ضحكت وقالتلى يابنتى
مش قولت
فراقك ويا الاحباب غلاب
والفرح فى عمرك كداب
هيتوه فى طريقه من قبل ما يوصل
او جايز يوصل يمكن يوصل
لكن
هيكون عدى الوقت و فات
خلص الحلم
و لاقيتنى قدام بيتها
مقفول بابها
ولا غير صوت الموج صوت
ولا غيرى هناك كان موجود
غير قبر و بيت
و على القبر تاريخ واحد مكتوب
ميلادي و موتها
*****************
شكرا جدا لكل الناس الحقيقيين فى حياتي
شكرا لانكم مش مزيفين ولانكم موجودين ودايما قريببن

17 comments:

رحله البحث said...

اخيرا اقتنصت التعليق الأول بعد عذاب
البوست مفاجأه ليا صراحه
مكنتش اعرف ان فيه شاعره جامده كده
بس بجد الفكره جميله جدا جدا ورغم انهاقد قد تبدو مألوفه للزهله الأولى لكنها مغلفه باحساس وتسلسل أكثر من رائع
عاوز بس اقول حاجه حسيتها
فيه شويه ابيات محتاجه تتوزن فشوفي لك ميزان بقى
لا بجد البوست جميل جدا مش مجامله عجبتنى الفكره اوى ونفسى تحاولى تكتبى لنا اكتر حاجات زى دى
تحياتى يا فندم

رحــــيـل said...

رحلة البحث

يادى النور
عيشت وشوفتك تعليق اول يامحمد :)
شكرا جدا جدا على تشجيعك من قلب الصحراء
بالنسبة للوزن ناس كتير بتشتكى منى معندكش ميزان سلف اوزن بيه وبعدين ارجعهولك ههههههههههههه
:D
حاضر هحاول اظبط الوزن

شكرا ليك

youma said...

يعني اقول ايه بس
ما انا قولت حلوووووووووو حلو حلو جدااااااااااااااااااا

بوست بجد هايل
يعني هو صحيح كان نفسي اكتب حاجة كده
بس مكنتش حأعرف اكتبها بالجمال لي انتي وصفتيه ده

حاجة في منتهى الجمال
كلامها مليان احساس

برافو يارحيل
ايوة كده ماتبقيش تقفلي المدونة تاني


بحبــــــــــــك يابت

رحــــيـل said...

هيامى

تسلميلى دايما ياقمر
وانا قولتلك قبل كده عايزاه اقرا اللى انتى هتكتبيه
مليش دعوه بقى انى كتبت حاجه كده
مستنيه كلامك انتى

لاء مش هقفل المدونة تانى عشان الناس الجميله جدا اللى زيك مقدرش ابعد عنها

انا كمان بمووت فيكى

موناليزا said...

ليه الحالة دى مش راضية تنتهى جواكِ؟
بصى افتكرى دايما اننا لسه عايشين فى الدنيا:)
على فكرة توقعت انى هلاقى الجزء التانى من البوست السابق"الازهر الذى كان"هو انتِ مش هتكمليه ولا ايه؟
شدى حيلك بقى عايزين نعرف البقية:)

رحــــيـل said...

موناليزا

اهلا بيكى
هحاول افتكر :)
شكرا ليكى كتير

الجزء التانى انا بجهزه قريب ان شاء الله
نورتينى

ادم المصرى said...

انا بجد مش عجبنى حالك يا رحيل
حاسس انك متقلبه كتييير

ومش عجبنى اليأس الى انتى فيه ده

وغيابك الدايم وحالك الى مش رادى يتغير يا رحيل ما هي الى دنيا نعيش ونفنا بها

وعلى فكره ابياتك جميله جدا مع انى قرأتها كتير عشان كنت حاسس ان فيها بشيئ غريب كان نفسى اكتشفو لكن مكتشفتوش

حسن حنفى said...

ستظل قناعتي بوجود الامل معي مهما حييت ومهما طال بي الزمن ومهما اشتدت الازمات مع اشتداد عودي فالامل موجود والا لما احيا حتي هذه اللحظه ؟

Anonymous said...

البوست جميل جدا واجمل حاجة الجملة اللي بعده انتي انسانة مرهفة الحس والوجدان ودايما عندك عطاء فعلا يا سارة اجمل حاجة في الدنيا الحقيقة مش التزييف كل تجربة مهما كانت قساوتها حاولي تستفيدي منها اكيد الأحلام بتتحقق والأهم ان يكون لها واقع اكيد اتمني دايما اشوفك بخير وسعادة وبنفس الروح اللي كتبتي بيها خلي بالك من نفسك دايما

همس الاحباب said...

بسم الله ماشاء الله
رغم حزنها وكلماتها التى تشع حزن
لكن اسلم ايديكى واختبارك للالفاظ رائع جدا
بجد انتى موهوبة
ومبدعة حقا
تحياتى ليكى

رحــــيـل said...

ادم المصرى

اهلا ادم
ممممم ولا انا يادم عاجبنى حالي هههههههههه
بس ان شاء الله خير
وان شاء الله مش هيكون فى غياب تانى
 شكرا جدا على تعليقك ووجودك الدائم
_____________________________________
حسن حنفى

يابنى روح ذاكر اومال لو مكنتش ثانويه عامه
ههههه
بهرج طبعا منور والله يا ابو على
اكيد لسه فى امل طالما لسه عايشين
روح ذاكر بقى
____________________________________
الغير معروف باشا
هههههههههه
مش عارفه انت مش بتعلق بحسابك وليه وتريحنى
احم احم شكل الكلام ده مش ليا مش كده
ايوووون اهم حاجه الواقع الاكيد ده واخد انت بالك منه؟
شكراااا جدا على متابعتك دايما ليا وتشجيعك
________________________________________________
همس الاحباب

اهلا اهلا خالد
شكراااااااااااااااا من هنا لحد القاهره
ربنا يخليك ويخليلك همس يا ابو همس
منور دايما

صوت من مصر said...

رحيل دائكما تبحث عن نفسها

احساس طفلة محبة للرومانسية بس واقعية said...

رحيل
البوست دا يتفق تماما
مع عنوان المدونة
مش عارفة حسيت كدا

محاولة للبحث بس بحزن
بأمل بس قليل

بس برضو البوست حلو
مكتوب بشكل جميل

تقبل مرورى

Soul.o0o.Whisper said...

السلام عليكم و رحمة الله و بركاته

مش عارفة ليه يا سارة حسيت الكلمات حزينة
حسيت انك خايفة تتعلقى حتى بشبح أمل

على فكرة يا سارة
أصعب شئ فعلا اننا نفقد ثقتنا
و خوفنا يكون من جوانا
و نتوقع الاسوء دايما و نعيش فى أحزانه


الله اعلم ربنا كاتب ايه
و ماتنسيش
"كذب المنجمون ولو صدفوا"

ان شاء الله الفارس جاى
و مش هيتوه

أتأكدى انه بس بيجهز نفسه
عشان يكون أهل لأميرته
:)



تحياتى ليكى يا قمر

ســـهــــر said...

رحيل
عجبتنى اوى الجزئية دى


العمر طويل
وفى حلم بعيد
جاى منه النور
جايلك فارس بيعدى بحار وبحار
ماسك سيف بيحارب بيه الاشرار
و فى ايده التانية
جايب وردة لحبيبته التايهه
بيحاول يوصل
قبل العمر ما يخلص
وقبل الحب ماينقص

وحسيت أن فى أمل وبكرة أحلى بكتير

لكن بصراحة صدمتنى عرافتك
فى الجزء دة


و بصوت ملهوف و بنبرة خوف
سألت هيوصل؟
ضحكت وقالتلى يابنتى
مش قولت
فراقك ويا الاحباب غلاب

:( أن شاء الله يطلع كلامها مش حقيقى يا قمرة

وبوست هايل والله والقافية فية روعه
تحياتى يا ست الكل

حسن حنفى said...

هههههههههههههههه

خصلت المذاكره

وياريت مش الاقي كلمه هي المذاكره بتخلص

:d

عشلان بتتقالي كتييييييييييييييير

:d

ويعدين لسه شهرين علي الاجازه طبعا

وشهر علي الامتحانات او 23 يوم

يعني 552 ساعه

لسه كتييييييييييييير

رحــــيـل said...

صوت من مصر


اهلا محمد ازيك
فعلا رحيل دائما تبحث عن نفسها
وتقريبا رحلة البحث دى مش هتنتهى للابد
دمت بكل الخير
______________________________________________
احساس طفلة محبه للرومانسيه

اهلا ياجميلة ازيك
عنوان المدونة من اول كلمه انا كتبتها هنا وانا عارفه انه فعلا حاله بعشها
وكل يوم بتمنى انها تنتهى اكيد مسيرها فى يوم هتخلص وهلاقينى بس الخوف يكون فات الوقت فعلا

شكرا جدا لتعليقك ومرورك
نورتينى
_______________________________________________
سول

وعليكم السلام ورحمه الله وبركاته
اهلاااااااااا اهلاااااااااااااااااا من هنا لحد عندك
اكيد طبعا كذب المنجمون
الفكره كلها محض خيال ملهاش اى اثر فى الواقع
شكرا لتفاؤلك الجميل زيك

خالص مودتى وحبى
________________________________________________
سهر

ازييييك
مهو انا قتلت العرافه بعد ماقالتلى الكلام ده هههههههههههههه
اصلى اتصدمت كده زيك فخوفت تقول الكلام ده لحد بعدى فرحمت الناس من كلامها اللى زى السم ده

شكرا جدا ليكى وجودك
_____________________________________________
حسن حنفى

طيب الحمد لله انك خلصت وبعدين انت حاسبها باليوم والساعه
ههههههههه
ربنا يطلعك من الثانويه العامه على خير
وتدخل الكليه اللى انت عايزها وتخلص الكليه على خير
هههههههههه وبعدين نفرح بيك وبولادك
اقولك ابقى اكتبلى قايمه احلامك عشان وانا بدعيلك