Saturday, October 3, 2009

مهزلة


كان اول يوم دراسة النهاردة

وفى ظل الظروف الراهنة اللى هي اعلان حالة الطوارئ عشان انفلونزا الخنازير – طب بذمتكم مش انفلونزا الطيور كان اسمها اشيك- المهم يعنى النهاردة كان مهزلة بكل المقايييييييييييس

مش عارفة عشان احنا ازهر ولا بصفة عامة فى كل ما هو خاص بالدراسة

اصلا طول الاسبوعين اللى قبل الدراسة كان كل يوم رأى جديد

شوية هيقسموا المعهد فترتين صباحية ومسائية شوية لاء البنات يوم والبنين يوم ويبقى يوم كامل لحد يوم الاربع اللى فات مكنش اتحدد يوم الخميس اذ قرروا اخيرا انهم هيستقروا على يوم ويوم وبدأنا نقسم الفصول ونظبط القوايم على هذا الاساس

صحيت الساعه 6 و نص وخرجت على سبعه ونص كان الجو حلو جدا والشارع زحمة وكله طلبة راحين المدارس والموظفين افتكرت اول يوم دراسة لما كنا بنبقى طلبة ماحستش بحنين غير لاول يوم دراسة وانا فى الجامعه جايز لان كنت بحب اصلا جامعة المنصورة جدا وجايز لان الجامعه مكنتش زى المدرسة قيود وروتين وحضور ومواعيد واساسا كنت منفضة كنت بحضر محاضراتي تغير جو مش اكتر

كنت بحب كليتي جدا والجامعة ياااااااه خدت الصبح شحنة حلوه وانا فى طريقى للمعهد

ومن اول ما دخلت ولاقيت زحمة زى كل سنة واولياء الامور اكتر م الطلبة والمدرسين ورغى ورغى وكل واحد عايز يقعد ابنه قدام ده غير ان تلاميذ سنة اولى ابتدائى شغالين عياط والمدرسين مش عارفين حصصهم والناس تايهه اصلا ومحدش قادر يخرج اولياء الامور بره المعهد وواقفين فى الفصول مع ولادهم كأننا جايبنهم نعذبهم وهنعاقبهم طول اليوم ونوقفهم فى على رجليهم

ده العادى فى اول يوم الدراسة عندنا اللى مش عادى ان اروح الاقى ان النظام اتغير بناء على منشور وصل المعاهد يوم الخميس اخر النهار قال ايه قرروا فجأة قبل الدراسه بيوم وتانى يوم جمعه اجازه يعنى ومحدش هيعرف ان احنا نقسم المعهد فترتين م س خ ر ه بجد بلد ملهاش حل

بخلاف اصلا الجداول اللى مش متظبطه وبخلاف الفصول اللى اتقسمت من اول وجديد فى لحظتها وكل واحد بكلمة بخصوص كثافة الفصل ما بين ان المفروض مش يزيد عن 35 تلميذ وما بين ان اصلا ما فيش مدرسين ان احنا نعمل فصول زيادة

من يوم الخميس وانا عارفه انى هتخانق مع ناظر المعهد – اصل انا وهو فى معزه بينا جامدة- لان كان فى حوار فى اعادة تقسيم الشغل علينا

المهم انى اتخانقت بسبب تانى - على اساس ان السبب ده اجلت خناقته لبكرة احنا ورانا ايه الايام بينا شكلها طويلة المهم انى زعقت وفضيت الشحنة اللى جوايا واصلا انا بفضل هادية هادية ومحدش بيسمعلى صوت ولما بنوى اتخانق بيبقى يوووووووووم وانا اساسا عصبية ومجنونة ومش بيهمنى وبدوس ومش بخلى فى نفسيتى حاجه غير لما اقولها الناس بيكون عندها ذهول انى بتحول بالشكل ده

اصل نظرا لحالة الطوارئ اللى كل ما كلم حد من الموجهين يقولى اصل احنا فى حالة طوارئ المفروض ان فى زائرة صحية او ممرضه هتيجى من الصحة تقيم عندنا فى المعهد فبيجهزوا ليها مكتب وقال ايه ما فيش مكاتب فجاى بسلامته ياخد مكتبى او مكتب زميلتى – احنا الاتنين متعاقدين كان يقدر مثلا يعمل ده مع حد من الناس القديمة كانوا كلوووه اساسا – فطبعا انا رفضت وزعقت واتخانقت وطلعت اللى جوايا وزمايلى يهدوا فيا ويقولولى مستقبلك؟؟؟؟؟ مستقبل ايه مش عارفه ؟ على اساس ان احنا متعاقدين ومكتوبين بالقلم الرصاص نتهزأ وما يتعملناش حساب ده انا اقعد فى بيتنا بكرامتي احسن

المهم زميلتى خرجت قالتلى هـ يحولك للتحقيق قولتلها عادى هو اكتر حد عارف انى مش بيفرق معايا ولا بخاف ولا بتهدد ولا بيتلوى دراعى شويه ولاقيته جاى بيحكى تانى فى حوار المكتب قولتله اصلا لو خدت المكتب مش هشتغل قالى هكتب فيكى مذكرة وهحولك للتحقيق قولتله انت لو عايزنى اكتبهالك بإيدى اكتبهالك انا ولا يهمنى

اصلى عارفه انو بيموووت لما يحس ان مش خايفه ولا باقيه على الوظيفة وان مش فى ايده انى يضايقنى بأى شكل

المهم اقنعوه ان فى مكتب تانى مش مهم بنفس درجة مكتبنا

زعيق وخنقة وزحمة ولخبطة ودوشة وقرارات ادارية فاشلة واجتماعات مملة وكلام مكرر- مش هيتعمل منه حاجة - وعقول فارغة

وصوتي اللى راااااااااااااااح وراجعه من غيره

هكذا كان اول يوم دراسة قصدى هكذا ستكون الاسابيع القادمة من الدراسة بما اننا يعنى فى حالة طوارئ الله اعلم هتنتهي امتى

رحمتك يارب واخرج م الازهر على خير قبل ما يجرالى حاجة او اقتل حد – غالبا هيكون ناظر المعهد نظرا للمعزة اللى بينا من يوم ما مسك ناظر المعهد -

10 comments:

همس الاحباب said...

يا سبحان الله ده اول يوم بس
ومال باقى الايام ايه اللى هيحصل فيها
ربنا يستر
وفعلا هى مسخرة وتخبط قى القرارات والاجراءات
بس بلاش موضوع القتل ده عايزين نفرح بيكى الاول بلاش القتل مع سبق الاصرار
كل سنة وانتى طيبة
وربنا ييسر الاحوال

P A S H A said...
This comment has been removed by the author.
dr.gesho said...

هههههههههه
كل سنه وانتوا طيبيين
باك تو سكووول
وهوا ايه اللى فى البلد حاله عدل اصلا عشان الدراسه تبقى عدله
انا لو من الناظر ده اروح المدرسه بعد نص الليل واستولى على مكتبك واغير الكالون وابقى ورينى هتعملى ايه بقى
تحياتى

رحــــيـل said...

همس الاحباب

اهلا خالد
لسه المهزلة مش هتنتهى الوقتى خالص
ههههههه
دى سنة ما يعلم بيها الا ربنا
تفتكر هلحق افرح؟؟؟
اممممم
شكلى هفرح على يد عشماوى
عامة مش مشكله لو خدت اعدام
المشكله لو رأفوا بحالتى لاته اصلا مستفز وخدت مؤبد
ههههههههههههه
وانت طيب دايما وبخير
شكرا ليك كتير
-------------------------------------
باشا

:))
وانت طيب دايما
بس لو لعب فى عداد عمره ياعمرى
مش هنلحق نتجوز
فكرنى اقولك وصيتى قبل ما انوى اقتله

دعواتك اصل بجد لما بتهور بعور
وشكلى هجيب لنفسى مصيبه بسبب الراجل ده
تسلملى
------------------------------------------
دكتور جيشو

ياهلا ياهلا
وانت طيب
ايون
باك تو سكوول
واخيرا حضرت طابور الصباح
قصدى طابور الضهر تصور بقالى اربع سنين فى المعهد عمرى ما حضرت طابور كنت بروح متاخر دايما
النهاردة اخيرا شوفته
وبعدين يابنى احنا لا اى اى ولا زى زى
ياخد مكتب ميييييين
انا بتحوووووول لما حد بيعصبنى ويستفزنى بجد
قال ياخده قال

نيهاهاهاهاهاهاهاهاهااهاها

صوت من مصر said...

الموضوع كونجستال مع شويه عصير لمون ونفوق وبس

ادم المصرى said...

والله انا تابعت الموضوع عبر الجرائد ووجت ان فى فوضى عامه جمده جدا فى البلد نتيجه لقرارات بيظه وبدون تنظيم وفوضى فى كل مكان بس ربنا يعديها على خير

دينا الدسوقى said...

انا اتشليتلك سلف والله يابنتى دا بقى العادى انا انزلت المنصورة اول يوم كان عندى شغل فى الدبلوما كان ناقص ابوس ايد التاكسى عشان يقف لدرجه انى قولتله خد اللى انت عاوزة ووصلنى موقفش برضه دا غير الزحمه الرهيبه فى القطر والجامعه بجد مسخرة

حسن حنفى said...

ههههههههه

ربنا يكون في عونك في بقيه الايام :)

وخصوصا ان السنه طويييييييله

:d

سلوى said...

ده اول يوم ؟ :)

ربنا يصبرك لسه السنه طويييييييييييييله
طوارئ بقى

مش عارفه هي البلد دي بتعز الطوارئ كده ليه:))
بس نتفاءل خير

zezo said...

ازيك يا سارة اخبارك ايه
اول يوم دراسة خناقات كدا
ربنا يكون في عونه بقي
المهم ان مشروع فاشل انفلونزا الخنازير دا وجعين دماغنا بيه