Saturday, November 7, 2009

ابقوا تعالو كل يوووم


هييييه دونيا كنا فين امبارح ومع مين وبنعمل ايه والنهارده كل واحد من الناس اللى كانت موجوده رجع لحياته لوحده او مع ناس تانيه بس الاكيد ان احنا سايبين بصمة فى روح بعض

بجد كان يوم جميل جدا جدا الناس حقيقى احلى من مدونتها بكتير جايز لان فى مشاعر انسانيه مش بنحسها غير لما نشوف بعض ونسلم على بعض ونبص فى عنين بعض من غير شاشات ولا كيبورد ولا كلام مكتوب وتعليقات

امبارح كان يوم مختلف حقيقى كان فى ناس كتير مكنتش متوقعه كل العدد ده من اماكن مختلفة ناس شوفتها قبل كده وناس اول اشوفها وناس اصلا مكنتش متوقعه انى اشوفها

مجموعه حلوة قوى جميل ان يكون فى صحبة كده حتى لو كنا من اماكن متفرقة الحب اللى كان بين الناس امبارح والود والدفا بجد دوب اى مسافات بين الناس بجد شكرا جدا لكل الناس اللى كانو موجدين م القاهره ودمياط وكفر الشيخ والمحلة وكل ناس الدقهلية من جنوبها لشمالها وشرقها وغربها

كنت بعيد بقالى فترة ففى ناس كتير ما كنتش اعرف مدونتها بس حقيقى ناس جميلة واعتقد ان بعد الناس اللى واحد قابلها امبارح وشافها هرجع تانى ادون واتابع واتواصل معاكو من جديد

بالنسابلى اليوم كان مليان مفاجأت من اوله هحاول افتكر الناس بحسب ما شوفتهم احم احم اعذرونى لونسيت حد انا من امبارح بحاول اجمع فى المدونات بتاعتكم

او لما ركبت العربية م البلد قابلت بنتين مكنتش اعرفهم ومن كلامهم عرفت انهم رايحين اللقاء واذ فجاة طلعت ايناس صاحبة مدونة احزان ومعاها مروه صاحبتها اللى فضلت اعصر فى دماغى لحد ما اتفكرت شوفتها فين

اول ما وصلنا جالنا صلاح مسدس صغير قدام المستشفى عشان يدخلنا واللى كمان طلع بلدياتي من الناس اللى جدعه بجد مش عشان بلدياتي يعنى بس الحقيقة

قوم بقى قابلت مين واحنا داخلين داليا قوس قزح شربات داليا احنا اصلا نعرف بعض من لعبه ع الفيس بوك كنا جيران فى فارم تاون جميله داليا ولذيذه خالص حقيقى

وكان معاها صبرنى اللى ما كنتش اعرف انها من المنصورة جدعة جدا جدا بجد وبذلت مجهود جبار عشان اليوم امبارح

دخلنا المستشفى لاقيت تجمع كويس وناس بتتبرع بالدم

ارتحت لما شوفت وجوه اعرفها كان اولهم سول طبعا اللى كان بقالى كتير مش شوفتها بدات احس بقى بالامان شويه هههههههه وكان معها سلوى قريبتها وكمان قابلت ايمان سما مصر طيبة خالص والحمد لله رجعت فتحت مدونتها تانى

كمان لاقيت خالد همس الاحباب وضياء وعسقول اللى قابلتهم قبل كده فى بورسعيد حقيقى شخصيات محترمة جدا جدا جدا من هنا لحد القاهره عندهم وكان جمبهم واحد معرفوش فمسلمتش عليه واذ فجأة شويه وسمعته بيقول انه صاحب مدونة رحلة البحث واتارية طلع محمد الغرباوى اللى بقاله اكتر من سنه ونص عايز يحضر لقاء وكل ما نظبط ميعاد ميكونش موجود فى مصر كان شايف انى مستقصداه عشان ما يحضرش كل مره الحمد لله اخيرا حضر لقاء قبل ما يسافر حد محترم جدا بجد من الناس اللى سعدت بلقائها

كمان كان فى سالى عاشقة وغلبانة اللى ما كنتش اعرف مدونتها دمها خفيف جدا شربات حقيقى وفضلت هى والغرباوى يتكلموا فى مصطلحات بترولية باحتة

كان فى كمان فاتيما جميله جدا شكلا وروحا حقيقى وبنت خيخه كمان ربنا يكرمها يارب ومعاهم ميرا امرأه بعقل رجل

كمان من الناس اللى كانت عاملة جو حلو جدا وواقفت واقفة جامده مع كل اللى اتبرعوا شيما الشعب لابد له من حكومة تشكمه سكر سكر سكر حقيقى من الناس اللى ما كنتش اعرفها خالص ومبسوطة بمعرفتها قوى البنت كانت راحه جايه تتطمن على كل الناس اللى اتبرعت وتشربهم عصير وتاكلهم حلويات

الناس كلها كانت خايفة على بعضها وكان فى جو حلو جدا

كمان كانت احلى مفاجأه بجد اللى ما كنتش متوقعاها خالص انى اشوف ليساندرا صاحبة مدونة على الهامش انا اعرفها من المدونة والتعليقات حقيقى انسانه جميلة ورقيقه جدا واصلا هى ليها مكانة فى قلبى من زمان رغم ان ما كنش فى تواصل

كان فى كمان ساسو شربات ودمها خفيف كنت اول مره اقابلها

كان فى ميادة صاحبة مدونة ايامنا الحلوة كنت اعرفها بقالى مدة عسوله خالص بس ملحقتش المركب

ودعاء سلطان اللى لسه اعرفها قريب م الفيس بوك لذيذه خالص

كمان طبعا كان فى ابراهيم العدوى صاحب مدونة كأنى اتكلم ومن الناس اللى اعرفها من زمان بس اول مره نتقابل شخصيه جميلة ومحترمة

وكان فى ليدى روح طفلة مش عايزه تكبر واميرة على كوكب مهجور من دمياط

و مى مدونة حلم كان

وبوبو وكينك توت وابنهم عمر

ومصطفى فك زنقة و محمد عبد الرحمن بلاد السحر والخيال

وبنت المنصورة واختها بس مشيوا بدرى وخافت تركب مركب معانا

فى ناس ملحقتش اتعرف عليها كويس واتكلم معاها جايز بسبب العدد فكنت عمالة راحه جايه من اول الترابيزه لاخر الترابيزه اصلها كانت طويله قوى كنا فعلا محتاجين مايك عشان نسمع بعض ههههههه

مشكلتى اميارح ان فى ناس يعرفوا رحيل م المدونة وناس تعرف ساره م الفيس بوك فكان فى لخبطة شويه وانا نفسى بقى ما حد يسألنى او اجى اعرف نفسى احتار اقولهم سارة ولا رحيل هههههه يالا الحمد لله طول عمرى بحاول اثبت ان الاتنين واحد يالا حصل خير المهم ان فى الاخر بيجمع بين سارة ورحيل محاولات للبحث عنى

مممم مش عارفه ممكن اكون نسيت حد احتمال انا اصلا لسه بدأ افوق الوقتى من امبارح ومروحتش الشغل

بس التجمع امبارح عاملى حاله حلوه قوى وحاسه انى عامله دماغ هههههههههه

انا حاولت اجمع مدوناتكم

بس ما اعرفتش اوصل لحسابات ع الفيس بوك فياريت لو حد عنده حساب يضفنى عليه ده حسابى

اللى نفسه يعرف تفاصيل هتلاقوها عند

فاتيما

سول

شيما

دعاء سلطان

مسدس صغير

صبرنى يارب

كاتب مصرى

عاشقه وغلبانة

حكايات بوبو

ليساندرا

روح طفلة

رحلة البحث -محمد الغرباوى

سما مصر

فك زنقة

كينج توت

بنت خيخة

خالد همس الاحباب

ملحوظه الصورة للمنصورة بليل من مدونة على الهامش لليساندرا

32 comments:

الشعب لابد له من حكومه تشكمه said...

انا جيييييييييييييييييييييييييييت.ياخلاثى والله حبيتك مع انى اول مره اشوفك ووقت التبرع كنت خايفه اوى عليكى تقريبا الارواح بتتلاقى:)
انا مبسوطه انى عرفتك بجد اصلى حسيتك حد مريح جداااااااا وانا نادرا لما احس الاحساس ده مع حد:)
وزعلانه انى معرفتش مدونتك قبل كده بس خلاااااااااااص لاجئه هنا وترجعى للتدوين بالامر..

بس زعلانه منك مش قلتلك ننام شويه فى المسجد بعد صلاة العصر ونريح تقومى قايمه ومقيمانا ينفع كده ههههههههههه.

ربنا يسعدك ويكرمك يارب ويفرح قلبك:)

رحــــيـل said...

ايه النووور ده يا بنتى

انا كمان والله حبيتك لله فى لله مش عشان العصير ولا التمر ولا البسكوت اللى انتى اكلتهولى لالالالالا خالص خالص
بس احتمال انى ممكن كنت اعيد نظر فى موضوع حبى ليكى لو مكنش ده حصل ههههههههههههه
عسل يا شيما والله
وبعدين يابنتى انا لو كنت خليتك نمتى فى المسجد شويه كنت انا هنام لتانى يوم احسن انا كمان حسيت انى فصلت
اقولك اللقاء الجاى نبقى نروح بدرى شويه ونام عشان نصحى فايقين هههههههه
ها انا ذا عدت للتدوين من جديد بس يارب مش تشتكى وتقوليلى رياح حزن واعاصير وبرق ورعد

مجرد حلم... صغنتوت said...

تسلمي يا رحيل
ملحقتش اتكلم معاكي بس ملحوقة ان شاء الله :)

رحــــيـل said...

دعاء

انا كمان كان نفسى اتكلم معاكى اكتر

بس ولا يهمك احنا نعمل لقاء تانى قريب ونتجمع طالما احنا بلديات

:))

dandana said...

والله يابنتى انتى احد الاسباب الرئيسية اللى كانت مخليانى عايزة آجى

وحشتينى بهبل

مختفية ليه يا قطة

رحــــيـل said...

ميويا

وحشانى والله بجد انا فرحت لما لاقيتك انتى وويسا قبلتو الدعوه فى الفيس بوك وقولت هشوفكم
ليه الكسل ده بس
بجد كان يوم حلو كان ناقصكم لان انتو كمان واحشنى جدا
والله عارفه انى مقصره مع البشريه كلها
بس خلاص انا جيت ورجعت تانى هنا
وحشتوووونى

عاشقه وغلبانه said...

انا جيييييييييييت
انتي حد هاااااااااادي اوي وطيب وبشوش وشكلك حنينه وحاجات كتير حلوه
انا مبسوطه جدا جدا اني قابلتك وبأذن الله نبقي صحاب ونتقابل تاني في اقرب فرصه

رحــــيـل said...

عاشقه وغلبانة

سالى سالى سالى
ازيييييك
بما انى حد هادى انا عايزاكى تمسكى فى الكلمه دى ولما الايام تلف بينا وتدور ونبقى اصحاب متغيريش رأيك فيا هههههههههه هطالب بيها فى يوم م الايام
سعيده بيكى وبروحك الحلوه وخفه دمك
:))

فاتيما said...

رحييييييل
انتى شخصية جميلة قوى
قوى
انا اتشرفت بيكم يا حبيبتى
و بصراحة آه ..أنتى بتقولى فيها
انانفسى آجى كل يوم عندكو
بلدكو جميلة قوى
و ناسكو أجمل و أجمل
و انا ماشية و بسلم عليكو بقول لصبرنى و صاصا هتعزمونا امتى تانى
اصلا كلكم وحشتونى من وانا راكبة العربية و راجعة ف السكة بفكر ف البوست و فى انى اقول بحبكم قووووووى
ربنا يسعد كل ايامانا و لقاءاتنا و بفرح قوى لما كل قاء ينتهى على خير و انطباعات الحاضرين تكون ايجابية
بحس إن ربان باركلنا عشان نيتنا خير
بحبك قوووووى
و بوسة و حضونة يا حبيبتى
على رأى يوسف

Saso said...

رحيل
ساره
صاحبه اجمل عيون فى الليله دى
انا على فكره متابعاكى من فتره وكمان مدونتك عندى فى القايمه لكن تقريبا موش فاكره علقت عندك ولا لا
المهم ياقمر انتى وانا بيجمعنا حبنا لاحلام مستغانمى
انا كتبت عن كتابها نسيان دوت كام بوست اخدت منه شويه حاجات عجبتنى
اليوم كان حلو اوى وبجد استمتعت بيه جدا
تحياتى

الشعب لابد له من حكومه تشكمه said...

خلاص اتفقنا اللقاء الجاى ان شاء الله نريح بعد صلاة الضهر شويه ونقوم فايقين:)

ياستى براحتك خااااااااالص رياح حزن ,تسونامى اكتئابى مش مهم المهم انك تكتبى علشان اعرفك اكتر:)

بس بالله عليكى براحه عليا اصلى بتاثر بسرعه وممكن انتحر:)

أميرة علي كوكب مهجور said...

والله انتي زي العسل ومبسوطه اني شوفتك

علاء سالم said...

السلام عليكم

إزيك يا سارة

بجد شكله كان يوم جميل فعلا

أكيد بجد التعارف على الطبيعه بيكون له طابع تاني أجمل من النت

كان نفسي بجد أحضر معاكم بس إن شاء الله متعوضه في اللقاءات القادمه

samamasr said...

إمبارح,كان جميل,صح:)

رحله البحث said...

اختى العزيزه
رحيل - محاولات للبحث عنى - ساره
سعيد سعاده لا توصف انى اخيرا حضرت لقاء وانى قابلتك
بجد يا ساره انا كنت رايح وباقول ييا رب ساره تيجى لانها الوحيده اللى تعرف مدونتى
ساره فى الحقيقه لا تختلفى عن مدونتك كثيرا
طيبه وبشوشه وانسانه
بجد بجد سعيد جدا للتعرف على حد محترم ورائع زيك
بالتوفيق يا ساره وربنا يوفقك ويسعدك

قوس قزح said...

رحيل الجميلة
انتى احلى كتير مما اتوصف لى عنك من لقاءات بورسعيد
لان بيكون صعب حد يوصف روح الشخص اللى شافه عاملة ازاى
و انت ماشاء الله عليكى جميلة شكلا و موضوعا

ربنا يسعدك و يتمم لك جوازك على خير
و تيجى بقى تقعدى هنا علشان نتقابل كتير

مسدس صغير said...

والله انا سعيد جدا باليوم ده
وسعيد انى اتعرفت علكى وعلى كل الناس الحلوين دول
بجد لقاء ولا اروع
اتمنى تكراره
شفتى بنت خيخة قايلة عليكى ايه؟
هههههه

mayada said...

انت سكوره موت يارحيل وزي باقي شعب المنزله تحبوا جامد وان شاء اشوفك قريب لان انا جيت في السريع عارفه

رحــــيـل said...

فاتيما الجميلة

هنستناكووووو قريب ان شاء الله
انتو يدوب ترتاحوا م المشوار
وترجعو تانى
وبعدين ماسمعتش صوتك ماليش دعوه
ربنا يجمعنا تانى على خير يارب
-------------------------------------
ساسو

ايه الاحراج ده بس ههههههههه
ربنا يخليكى يارب تسلمى
انا فعلا بحب احلام جدا كتباتها روعه وكنت برضه عملت بوست عن كتاب نسيان
مبسووطه انى قابلتك
وروقى وفكك ولا يهمك اى حد فى الدنيا
انتى شربات جدا بجد وانسانه متميزه حقيقى
ربنا يكرمك يارب ويسعد قلبك

رحــــيـل said...

شيما حبيبتى

خلاص اتفقنا هعمل حسابى المره الجايه نريح شويه بعد الضهر
حتى ارتاح من المشوار هههههههه
ان شاء الله هرجع اكتب مش تقلقى
بس صحيح انت اللى يعوز يجيب اميلك يجيبه منين
هههههههههه
مش عارفه انا مخدتش اميلاتكم ليه
انا حاسه انى مكنتش مركزه فى حاجات كده وقعت من دماغى
هاجيبك هاجيبك
---------------------------------------------
اميرة على كوكب مهجور

وانتى كمان عسوله خالص وكنت طول اليوم حاسه ان انتى وشك مألوف ليا وشوفتك قبل كده
كنتى منوووره ياقمر

رحــــيـل said...

علاء سالم

وعليكم السلام
انا تمام الحمد لله
اه كان يوم جامد جداااااااا
كنت اتمنى تكون موجود بس انت بكااااااااااااااااااااااااااااااااش كبير
ايووون بكاش
يابنى كان فى ناس كتير من شعب بلقاس موجودين
يالا لما اشوف المره الجايه هاتيجى ولا لاء
---------------------------------------------------
سما مصر

اهلا اهلا ايمان
فعلا كان يوم جمييييييييل جدا
ان شاء الله نتقابل تانى
مبسطوه انك فتحتى مدونتك تانى
اكتبى اكتبى اكتبى

رحــــيـل said...

رحلة البحث

محمد باشا
اخيرا يا محمد هههههههه بجد انا كمان كنت سعيده بحضورك
شكرا بجد ربنا يخليك
احم احم اخجلتم تواضعنا يا افندم
المره الجاية بقى هيكون الشعب كله عارف مدونتك ههههه
تروح وتيجى بالسلامه ان شاء الله
ربنا يكرمك ويبارك فيك
------------------------------------------------------
قوس قزح

داليااااااااااا
مبسوووطه جدا جدا انى قابلتك
تسلمى بجد ربنا يخليكى
انتى ماما عسولة جدااا ولذيذه قوى
ان شاء الله نتقابل تانى كتير

رحــــيـل said...

مسدس صغير

انا كمان سعيده جدا يا صلاح احنا طلعنا تقريبا بلديات
فعلا لقاء ولا اروع
هههههههههه وبعدين بلاش فضايح بنت خيخه عامله بوست تحليلى تفصيلى
نتقابل تانى على خير ان شاء الله
------------------------------------------------------
ميادة

انتى كمان عسوله خالص كنت اتمنى نتكلم ونرغى مع بعض اكتر بجد
يالا متعوضه المرات الجاية
منوره يا جميلة

همس الاحباب said...

الحمد لله اليوم كان رائع
بس على فكرة انتى محسوبة على بور سعيد مش المنصورة
لانى قابلتك فى بورسعيد مرتين
والمنصورة مرة
ههههههه
بس بجد انتى من الشخصيات اللى بعزها جدا وبحس ان بناتنا لسه بخير
ربنا يديم المعروف بين الجميع
ونلتقى دائما على خير
تحياتى

samamasr said...

بإذن الله يارب,نتقابل تاني,كلنا:)

الأحــــــ إيناس ــــــزان said...

وحشتينى قووى

ومبسوطه انى اتعرفت ليكى بجد من الشخصيات المحترمة والقليله فى الزمن دة
ربنا يكرمك يارب ويسعدك
بحبك فى الله
ومروة بتسلم عليكى كتير
ويارب متجمعين بالخير على طول
ايناس

dr.gesho said...

يا ريتنى كنت معاهم يا ريتنى كنت معاهم
اهئ اهئ
اعاااااااااااااا
مش هتظبط معايا واحضر لقاء من اللقاءات دى من نفسى بقى
ربنا يبارك لكم و فيكم
تحياتى

Soul.o0o.Whisper said...

صباح الخير عليكى يا سارة
:)

فعلا اليوم كان راااائع
و مختلف

و دا طبعا لأن الناس كانت حاضرة بأرواحها قبل اجسادها

ربنا يديم الود ما بينا جميعا يارب


و الحمد لله اليوم عدا بدون كسر رجلين
ههههههههههه


دمتى بكل الخير يا جميلة

رحــــيـل said...

خالد همس الاحباب

اهلا اهلا ابو همس منور يا افندم
ههههههههه اساسا بورسعيد اقربلى من المنصورة
وكمان مجموعة بورسعيد ليهم معزه عندى جامده جدا
شرف ليا انى محسوبه عليهم وبعدين خلاص مانتو عرفتوا
طريق المنصورة يعنى تشرفونا اكيد تانى

ربنا يكرمك يارب ويباركلك فى يناتك ونشوفهم عرايس زى القمر
-------------------------------------------
سما مصر

اهلا اهلا ايمان
ان شاء الله نتقابل تانى ويفضل فى تواصل
بين الناس كلها دايما
منوره يا حبيبتى

رحــــيـل said...

ايناس

يا اهلا يا ايناس
هههههههههه شوفتى الصدف طلعنا بلديات
ان شاء الله نتقابل تانى قريب بقى هنا
سعيده انى قابلتك انتى ومروه
اشوفكم على خير
-----------------------------------------------------
دكتور جيشو

اه ياريتك بجد ههههههههه
اللقاء الجاى حضورك هيكون اجبارى
المنصورة مش بعيد عن دمياط وكان فى ناس من عندكم
يعنى مش هيكونلك حجة
ربنا يكرمك ويوفقك
--------------------------------------------------------
سووول

حبيبة قلبي
صباح الفل عليكى
حقيقى بجد حلو قوى وصفك ان الناس كانت حاضرة باروحها
لان ده فعلا كان حاصل
ربنا يكرمك يارب ويسعدك ونتجمع تانى على خير
تحياتى وحبى

شفـقــة و إحســــان said...

الله بجد شوقتينى اننا نبقى معاكم بس للاسف يا سوسو اخواتك معندهمش دم عندهم فقر دم
وبصراحة اتحرجنا نيجى ومنقدرش نتبرع
نعوضها المرة اللى جاية
بجد وحشتينى موت نفسى اعرف كنتى مختفية ليه
وكمان مبروك لو كان خبر خطوبتك صحيح
وزغروطة كمان
لولولولولولىىىىىىىىىىىىىىىىى

رحــــيـل said...

شفقة

ياحبيبتى ولا يهمك كان كفاية وجودكم وبعدين فى كذا حد مش اتبرع بدم
شاركونا وجدانيا ههههههه
والله كان نفسى تكونوا موجودين فعلا انتى وحشانى بجد
معلش ع الاختفاء
بس خلاص ها انا ذا عدت من جديد
شكرا ليكى
تسلمى يارب