Thursday, November 26, 2009

طهق مش عادى بمناسبة العيد السنادي

تحديــــــث
على مجلة رؤية مصرية
نشر لي الاخرون ليسوا كما نراهم دائما

كانت دايما اكتر حاجة بتعجبنى فى الغرب استقلال الابناء فى مرحلة عمرية معينة عن اهلهم كانت بجد امنية حياتي انى استقل بنفسى واعيش بعيد عن البيت واشتغل ولا احتاج لاي حد نهائى
لاسباب كتير اهمها اننى بميل لوحدتى مش بحب حد يدخل فى خصوصياتى ولا حياتي بستمتع كتير انى اقعد مع نفسى فى هدوء افكر واتأمل كمان انا بكره الدوشة جدا والرغى الاسرى المعتاد والكلام المكرر اللى بنسمعه كل يوم وطبعا احنا شعب اصلا متطفل بطبعه وحشرى جدا فمن الصعب انك تلاقى حد بيتمتع بحقه فى الخصوصية والاستقلال جوا البيت بدافع الخوف والقلق او اننا مهما كبرنا فى نظرهم اطفال او لاننا مش عارفين مصلحتنا طبعا اللى هما ادرى بيها وان احنا دايما غلط وطبعا مش بنعرف ناخد قرار – ما احنا تربيتهم لا مؤاخذه هنعرف ناخد قرار ازاى واحنا اصلا محرومين من ابسط حقوقنا من حريتنا فى الحياة من غير اوصياء بيفكروا وبيخططوا وبينفذوا لينا كأننا المفروض مالناش وجود- بصراحة انا ممشيها بلطجة
المهم يعنى ان المشكلة فى ايه بقى انك مع الوقت الاهل بيحسسوا ولادهم انهم عبء عليهم او ان المفروض ان دورهم مؤقت وليهم رسالة معاهم تنتهى لما كل واحد فيهم يبدأ حياه جديدة لو ولد يشتغل ويتجوز طبعا ولو بنت يبقى نهارها وليلها مش فايت لان ذنبها الوحيد انها بنت دى بقى اهلها يتعاملو معاها على انها كارثة وطول الوقت لازم يحسسوها انها لازم تتجوز وانها مش ينفع تقعد اكتر من كده كأنها ضيفة وكأنه مش بيتها وانها حتما ولابد ولازما يجى يوم وتمشي طيب مش كانت استقلت بحياتها احسن وريحتهم منها بدل الزن والقرف ده لاء ازاى عيب ما يصحش دى بنت الناس تقول ايه ونخاف عليكى ازاى تعيشى لوحدك يعنى لا كده عاجب ولا كده عاجب حاجة تقرف بجد
حقيقى اوقات كتير كنت بكره كلمة عيب انتى بنت وبكره كونى بنت وانى مش راجل
خوف زايد وقلق وعادات وتقاليد ومجمتع عقيم وعقول عفنة ومحدش بيحس ولا بيقدر ولا بيشوف ابعد م الساقية اللى المفروض نتربط فيها واللى يفكر يخرج من الساقية يبقى وقعته طين
انا بقى مش عايزة اتجوز ولا هريحهم لو شايفين ان ده الحل الوحيد عشان اتحرر من كوني احمل لقب انثى لانى مش تابع لحد انا كيان مستقل بذاتي ليا حياة وليا حق انى اعيش من غير ما استني حد يحررني من اسر عادات وتقاليد وافكار بالية وهفضل اسعى انى استقل بذاتى ومش محتاجة لحد واقدر اعيش لوحدي
-----------------------------------------------
ملحوظة من ملاحيظي العبقرية
انا كنت بفكر اكتب من زمان عن الموضوع ده بس بشياكة اكتر من كدة وروقان واكتبه فصحى بقى واغني والحن واقول بس بصراحة الغنا مكلش دماغى فى الموضوع ده اصلى دمى محروق اثر خناقة اسرية معتادة مكررة مملة فطلع البوست ردح مصرى معتبر اى خدمة زرونا تجدو من كل صنف ولون


اه صحيح كل سنة وانتم طيبين وعيد سعيد وكده يعني

58 comments:

الحياه said...

انا مش هقولك كاني ولا ماني
انا موافق على كلامك لأن هما الوالدين فعلا بيحبونا أوي وبيخافوا علينا أوي أوي لدرجة الخنقة وانهم بيغلطوا كتير
وعلى فكرة بس هنعمل ايه بس دول الوالدين برضو ما علينا غير الإستحمال
--------------------------------
وبما إنك بنت
انا ضد ان البنت تتجوز بسرعة وأى حد كده إزاى يعني إزاى
بس انا حبب أنصحك بالتحلي بالصبر
--------------------------------
آه صحيح
كل سنة وانتى طيبة وعيد سعيد عليكي

رحــــيـل said...

عبد الحميد باشا
نورت التدوين يا افندم

وهو انا لو كنت قولت كانى ومانى كنت هسيبك
انت مش عارف انى ممشياها بلطجه هنا وفى اى مكان تبعى
قال كانى ومانى قال
ههههههههههههه

بهرج بهرج
هى فعلا بتبقى خنقة جدا انا لو حصل لو حصل يعنى فى يوم وبقى عندى اولاد هعطيهم حريتهم واطلق يديهم فلينطلقوا فى الحياه من غير خنقة

اما بالنسبة للجواز فانا على قلبكوا
الواحده يابنى ملهاش غير مدونتها برضه راحت ولا جت اهى حته تلمها
واهو ضل بلوجر ولا ضل راجل

وانت طيب
هى شغلانه بقى هنا وع الفيس بوك
كل شويه كل سنة وانتى طيبة
خلاص عرفنا
:))

الحياه said...

ماشي يا ست سارة
انا عارف انك ممشياها بلطجة منا فاهم يا فندم
ههههههههههههههههههههههههه
هو انتي هتقوليلي انا
----------------------------------
نورت التدوين بوجودك يا فندم

romansy said...

كل عام والمسلمين فى مصر والعالم الاسلامى بكل خير ومحبة وسلام لكل الانام

عيد اضحى سعيد

اعاده الله على الجميع بالامن والاستقرار

والسرور والتسامح

مجرد حلم... صغنتوت said...

الاول كل سنة وانتي طيبة يا احلى سارة :)

ثانيا.... معاكي في كل كلمة ولو لقيتي حل للحالة دي عرفيني علشان انا فيها زيك بالظبط

احساس طفلة محبة للرومانسية بس واقعية said...

طيب خلينى اقول مش معاكى فى كل كلمة كتبتيها يعنى متفقة على اننا شعب حشرى موت ومتطفل وبنهزر ونرخم فى اوقات عجيبة ممكن متتفقش مع اللى قصادنا
متفقة معاكى مع ان فى عادات وتقاليد عايزة الشنق وان بسببها نتج خوف الاهل علينا مش العكس وان الاهل بيعملوا حساب انك بنت والناس هتقول اية

بس نيجى عند الام والاب والاستقلال
وتلاقينى حودت يمين منك على طول

يعنى انا برفض الاستقلال بعيدا عن الاسرة مع المحافظة على كيانا ووحدتنا وخصوصياتنا
بتهيالى الموضوع مش صعب بس محتاج مجهود ومسايسة مننا
وتبقى غلطانة لو افتكرتى ان الاستقلال حل بالعكس دا زوووووم ان على المشكلة زيادة وخوف وخنقة زيادة حتى بعد الجواز الاهل معانا بخوفهم وقلقهم منقدرش نلومهم على دا ولا نلوم نفسنا لما نلاقى نفسنا فى يوم زيهم

زى ما قلتى احنا تربيتهم :)
عيد سعيد عليكى

دمتى بكل خير
تقبلى مرورى

رحــــيـل said...

عبد الحميد

اى خدمه يابنى
افتكر الجمايل دى
سلامى لكل مدوني بورسعيد
:))
-----------------------------------
رومانسى

وانتى بخير دايما

عيد سعيد
-----------------------------------
حلم صغنتوت

وانتى طيبه ياقمر وبخير

هحاول اشوف حل
انا بقول اعمل تجمع بناتى وناخد خيمه ونروح صحرا لوحدنا
هههههههههههههه
ونعيش من يغر رجاله نياهاهاهاهاهاها
منوره

الشعب لابد له من حكومه تشكمه said...

لقيتك مختفيه قلت ادخل البلوج لقيتك قفلاه فى وشى:(


المهم بالنسبه للبوست تحبى ارغى,اه قولتى تحبى,شوفى باه ياساسو انا ليا 3 اخوات شباب رجاله يعنى وانا الصغيره والبنت الوحيده مش عاوزه احكيلك باه :
وانا صغيره,ماما عاوزه اعمل زى بسام,؟لا انتى بنت وهو ولد.
ماما اخرج مع سمسم لا انتى بنت وهو ولد.
ماما خلى هشام ياخدنى معاه.لا انتى بنت وهو ولد.

هههههههههههه مش فاهمه انا كانو جابونى ليه فى البيت الذكورى الغريب ده.
ولحد 3 ثانوى كانوا بتعاملوا معايا على انى من الزجاج هتكسر يعنى وخوف زاااائد عن الحد تصل لمرحلة الخنقه.

الى ان تحررت هههههههه وروحت ادرس فى القاهره واستقليت زى ما انتى بتتمنى.

ورجعت طبعا بعد مكانت شخصيتى اتكونت وباخد قراراتى بنفسى ومبحبش حد يدخل فى حياتى لانى عيشت 4 سنين لوحدى بعتمد على نفسى.

لما رجعت واشتغلت حصل صدامات كتير لانهم اتفاجأوا انى مبقتش الكتكوته الصغيره:)
ووالدتى تقولى فين بنتى هههههههه راحت فين:)
واحاول اقنعها انى كبرت ومبقتش البنت الصغيره اللى عاوزه اخواتها يوصلوها اى مكان ويطمنوا عليها وناقص يدوها ساندوتش فى ايدها..
لكن مفيش فايده هيفضلوا شايفنا صغيرين..

لا تقلقى كلنا فى هذا سوااااااااااااء.
بس عاتى عاتى تأقلمى وتكيفى:)

كل سنه وانتى طيبه وعيد سعيد.

عاشقه وغلبانه said...

استني كده يمكن اردح معاك..
تعالي احط خيبتي علي خيبتك يووووووه قصدي همي علي همك وافرحك واقولك انك مش لوحدك في هذه المأساه للاسف
انا بعيش اللي انيل من كده
زودي عليهم عادات وتقاليد القريه
تحسي ان النفس اللي بتخديه محسوب عليكي
ممنوع التأخير بره البيت
ممنوع الضحكه
ممنوع المشيه دي
ممنوع العلاقه دي
ممنوع
ممنوع لحد ماجالي احباط
عايزه اكره كوني بنت بس للاسف مش قادره
معايا اللي يحسسني باستقلاللي ويأمن ليا حياه حره من غير ماعتمد علي حد ولا احتاج لحد ورغم كده عايشه كل يوم في دوامه مستنيه اللي هايتكرم ويتعطف وينتشلني من بئر الضياع اللي عايشه فيه من غيره ى
ويكمل نصف انسانه في نظر مجتمعها ... انسانه كامله جدا في نظر روحها
انا مش عايشه علشان اتجوز
انا عايشه علشان روحي
هاتجوز علشان بحب
وهاحب علشان روحي
يعني مش هاتجوز علشان حاسه بنقص في كياني وهو جاي يكملهولي
زهقت من نظره المجتمع والناس ليا
يمكن انا ليا ظروف انيل من بتاعك
ههههههههههههههه
مره من ذات المرات وفي مشكله من ذات المشاكل الاسريه اللي انتي قولتي عليها ماما الست الشرقيه اللي الجواز عندها هو غايه الحياه قالتلي وبكل بساطه لما تبقي تتجوزي ابقي اعملي اللي انتي عايزاه
يااااااااااااااااااه قد ايه وجعتني الكلمه
واستفذتني لدرجه قله الادب والاباحه
اه والله
وفضلت منقطعه عن الكلام مع ماما مده طويله بسببها

ماما بتشوف اللي مش عيب عيب علشان مش متجوزه
بدأت وبكل اسف احس اني حمل رغم اني مستقله ماديا ومعنويا تماما
كل اللي يربطني ببتنا هو الاقامه والنوم
تصدقي حتي الاكل باكلعه في شغلي

صدعت من اتلاحاديث السريه الممله المتكرره ونجيب في سيره فلانه وعلانه ولو ماشتركتيش في الكلام تبقي لا تفقهي شئ في العلاقات الاجتماعيه مع اني ساعات او دايما بحس ان اللي حواليا بيضحكوا علي بعض

شكلنا بنعيش نفس الماساه سيدتي الفاضله

مشكله مجتمعنا طول مانتي مش متجوزه السؤال اللي بيطاردك زي ضلك هانفرح بيكي امتي ... بحس بالسؤال اني عانس ههههههههه

وبعد الجواز السؤال الاغلس ها في حاجه في الطريق ولا لسه .... السؤال ده بيبتدي بعد الجواز بيومين علي مايجي ضيف حشريين

وبعد ماتخلفي ... وتربي وتكبري
ها
هاتموتي امتي وتخلصينا


دائما في سؤال

كل سنه وانتي طيبه
قلبتي عليا المواجع
وقال ايه بتقولي غيري الاسود
ده لو في اغمق كنت لبسته
ههههههههههههههههههههههه

الشعب لابد له من حكومه تشكمه said...

مش قادره همووووووووووووووووت من الضحك,لما قريت كومنت سالى وكمنتى وكومنت حلم حسيت ان البنات هيقوموا بثوره,لااااااااا وعاملين زى اللى هننضم لجمعية المرأه المتوحشه هههههههههه.

انا خايفه لو راجل دخل وسط البوست ده هيتعض هههههههههههههههه.

رحــــيـل said...

احساس طفلة

اهلا بيكى وكل سنة وانتى طيبة
شوفى انا كتبت البوست وعارفه ان هيكون محل اعتراض من وجهة نظر ناس كتير

هو انا شايفة البعد بيقلل الاحتكاك اليومى اللى بينتج عنه مشاكل مكرره مش بتنتهى لان ملهاش حل
لا هما هيقتنعوا ولا احنا هنرضى نلبس توب مش توبنا
فبكده المشاكل هتقل وحرق الجاز هيقل وتعب الاعصاب هيقل
امممم مش عارفه هى وجهه نظر ممكن صح او غلط بس انا شايفها مريحه على الاقل ليه
نفسى اعيش فى بيت لوحدى براحتى من غير تدخل فى تفاصيل شخصية بحتة
وبعدين هما بيكونوا شايفين ان احنا مش قد مسؤوليه اتخاذ قرار طيب من البداية مهتموش بتريتنا كده؟؟؟
مش عارفه حاسه ان الموضوع شبه البيضة ولا فرخه الفرخة ولا البيضة

شكرا ليكى مرورك وتعليقك وعيد سعيد يارب عليكى

خواطر شابة said...

موضوع مهم وجاي على الوجيعة ومش وقته الصراح احنا داخلين على عيد لازم نفرح وننسى الهموم مش نحكي عمها أقول لك اييه ربنا يسامحك ههههه
انا مثلك اكره كوني انثى لان ميزان المجتمع مختل كفة الذكر فيه راجحة في كل شئ حتى الحطأ منه يتقبله المجتمع مهما كان خطأه كبير ويقول لك انه رجل لاشئ يعيبه هذه الجملة ثثير جنوني
ايضا ما يثير جنوني فكرة أن الاعمال المنزلية فرض على المرأة وحدها أنزل بها استغفر الله العظيم قرأن من السماء حتى لو كانت تعمل وتتحمل نصيبها في مصاريف البيت
فكرة الزواج ايضا مشكلة اصبحت اكره الاجتماعات العائلية لان منذ ان أجلس والموضوع المطروح لم لم تتزوجي أليس هناك شئ في طريق وتنفتح ماسورة الادعية بالزواج القريب
أسفة أطلت عليك ماأنا قلت لك من البداية سامحك الله فالليلة ليلة عيد
على فكرة عيد سعيد وكل سنة وانت طيبة وبخير

موناليزا said...

إيه الكلام ده بس!!
نفهم من كده أن خطوبتك هتطول ولا إيه!:)
ده احنا قلنا خلاص هانت وهنحضر الفرح قريب:)
اوعى ترجعى فى كلامك بالعِند يعنى

===
بغض النظر عن طريقتك فى تهنئتنا بالعيد غير التقليدية:)
كل سنة وانتِ طيبة وفى وسط أهلك منورة
على فكرة بجد مش هتحسى بقيمة القاعدة فى وسطهم والكلام معاهم الا لو بعدتى عنهم غصب عنك
ربنا مايحرمك منهم ياحبيبتى
يارب يكون عيد سعيد علينا جميعا

Lady E said...

وحشتيني يا قمرايا بجد وحشتيني وكل ما كنت بدخل البلوج كنت بلاقي الباب مقفول في وشي عاااااااا حتى كنت بكلم اميرة على كوكب النهاردة في الموضوع ده
الحمد لله ع السلامه :)

ثانيا موضوعك عايز كلام كتييييييييير وأكيد هاجي تاني بس بجد بحييكي ع الجملة دي "لانى مش تابع لحد انا كيان مستقل بذاتي ليا حياة وليا حق انى اعيش"

كل سنة وانتي طيبة وبخير وصحة وسعادة وعيد سعيد عليكي من غير طهق ان شاء الله

عاشقه وغلبانه said...

بمناسبه كلام شيما
مره المدير بتاعي المحترم قالي احنا عايشين في مجتمع ذكوري يادكتوره انتي مش واخده بالك ولا ايه ؟

قولته لا انا واخده من زمان اوي لحد مازهقت
اهئ اهئ

عاشقه وغلبانه said...

ردي ورد شيما مع بوستك ياساره محسسني ان اي حد هايدخل هايقول ايه قاعده العوانس دي
او بالادق ممكن يقول ده قصر دي يا ....
ههههههههههههههههههههههه

عموما بحب انا القعدات دي
بحس اننا بنخطط لانقلاب
هههههههههههههههههه

مسدس صغير said...

كل سنة وانتى طيبة وبخير
وسعادة
ورضا
عيد سعيد عليكى وعلى الاسرة الكريمة

اقصوصه said...

كل عام وانتم بخير :)

dr.gesho said...

اولا حمدالله على السلامه اكيد المدونه كانت مفتقداكى
ثانيا مبروك النيولوك بتاع المدونه دا لبس العيد ده واللا ايه
ثالثا بقى انا مش معاكى فى موضوع الغرب ده شوفى التفكك الاسرى و الانحلال اللى هناك عامل ازاى
استقلى زى ما انتى عايزه بس فى محيط الاسره مش مع نفسك كده
اما بالنسبه للجواز بقى فاكلهم بيقولوا كده فى الاول بس لما النصيب بيشرف تنسى يا عمر
تحياتى
اه كنت هانسى وانتى طيبه يا فندم

أميرة علي كوكب مهجور said...

هو المجتمع ده كده ظالم وبوشين وقال ايه اخدنا حقوقنا حقوق ايه اللي خدنها احنا بناخد ع قفنا بس :(


كل سنه وانتي طيبه وبخير

wessam kabil said...

انا معااااااااااكي ياسمسم

وبقترح نعمل جمعيه نسميها حقي في الحياة او بنات وشكرا


والجمعية دي نضمهنا تحت جمعية حقوق المرأة ويبقلها تمويل يوفر اماكن اقامة للبنات المقهورات اللي واقعين تحت ضغط التقاليد المربكة


بتكلم جد لازم واقفة


كل سنة وانتي طيبه برده :-*

zOzO said...

اولا قبل كم الكأبه اللي انتي عملاها قبل العيد دي
كل سنه وانتي طيبه


مهو لو مفيش كابه متبقيش ساره
هههههههههههههههه
وحشاااااااااااااااني جدا


عندك حق والله
بس اكيد هما شايفين احسن مننا ف حاجات
ماما دايما تقولي اكبر منك يوم يعرف عنك بسنه
وطبعا لان كل ما تعيش اكتر تتعلمي
دا بالنسبه للقرارات وكدا

اما العادات دي بقي
اها منها
هههههههههههههههه
حاجه خنقه جدا جداا جدااا
ولازم نخاف عشان كلام الناس وانتي عارفه الباقي بقي
وش بيعمز
ههههههههههههههههه


كل سنه وانتي طيبه يا ساره
وعقبال السنه الجايه يارب تكوني ع عرفات باذن الله

في رعايه الله

رحــــيـل said...

عاشقة وغلبانة

يالهوى يالهوى
كل ده فى نفسيتكو يابنات حوا لالالالا لازما حل حاسم وقاطع
احنا لازم نتقابل اتصرفوا بقى
ادينى جيبت خيبتى على خيبتك على خيبتنا كلنا يا اوختى
ايوه يابنتى واخده انا بالى ياسالى من قايمه الممنوعات دى
حافظاها عن ظهر قلب
بالنسبة للجواز نظرة المجتمع للبنت فيها مش هتغير
بيتعاملو على اننا كيان ناقص محتاج اللى يكمله وعشان كده
البنت من غير جواز فى نظرهم ناقصة هههههههههه ناقصة خيبة

لما تبقي تتجوزي ابقي اعملي اللي انتي عايزاه
انا بسمع الكلمة دى كتير جدا العادى يعنى عايزه تسافرى لما تتجوزى
عايزه تقابلى اصحابك لما تتجوزى
المشكله ان فى حاجات كتير وقتنا بيسمح بيها الوقتى عن بعد ما نتجوز ومش هيكون فى مساحه ليها بعد الجواز
طيب هنعملها ازاى بعد ما نتجوز؟؟؟؟
بس بصراحة انا الكلمه باخدها عادى جدا اصلى بادره جدا
لما بجيب اخرى بزعق واعلى صوتى ويسكتوا ونعيد الكره تانى يوم ههههههههههههه
وبعد ماتخلفي ... وتربي وتكبري
ها
هاتموتي امتي وتخلصينا
هههههههههههههه ضحكتينى موت بجد
احنا فعلا شعب فضولى لاقصى درجه مش بيعمل حاجه غير انه يتتبع اخبار غيره
ربنا معاكى ومع بنات حوا كلهم
صبرنا يارب

رحــــيـل said...

الشعب لابد له من حكومة تشكمه

اهلا شيما
لاعاش ولا كان اللى يقفل فى وشك
كنت بس بعملها نيو لوك يا اوختى عيد بقى وكده

ارغى ارغى براحتك طلعى اللى فى نفسك يابنتى
بس تصدقى موضوع انك بنت وسط تلات ولاد ده مشكله فعلا
خنقه خنقه يعنى

تعرفى الحلو بجد انك اتغيرتى لما سافرتى تدرسى وشم قابلتك مشاكل بسبب الخوف الزايد ده
المهم كل ماما تقولك بنتى فين هاتلها صورك وانتى صغيرة وقليلها
هكذا كنت وها انا ذا اصبحت
ههههههههههههههه تقوم تطلبلك على طول السريا الصفرا وتستقلى هناك
كل سنة وانتى طيبة يا شيما
على معادنا بقى عشان نعمل انقلاب انثوي

رحــــيـل said...

انا كمان شوفت تعليقاتكم موت من الضحك قولت يا خبر
دى كل البنات مكبووووته يا جدعان
انا موافقة ننضم للجمعيه دى حتى لما نبقى متوحشين محدش هيقدر يقرب لينا
ويتخاف مننا بدل ما يخاوفوا علينا

على فكرة فى رجالة بتاعنى من نفس مشكلة التدخل فى الخصوصيات وان الاهالى بيكونوا عايزنهم يكونوا نسخه بالكربون منهم من غير اى اختلاف
وبيتخنقوا برضه وما بيصدقوا يسيلوا بيت اهاليهم بحثا عن الاستقلال النفسى كمان

رحــــيـل said...

خواطر شابة

اهلا اهلا بيكى مرورك الاول
ياكسوفى تلاقى وصلة الردح دى فى اول مرة
بمناسبة العيد انا دايما احب انزل بوست كده يقلب المواجع
اصلى غاوية عكننه باين

اها انا كمان كلمة راجل لا يعيبة شئ بتفرسنى ما الغلط غلط يا جدعان ولا هو حلال ليهم حرام علينا
وحسابنا واحد المشكله ان لو حتى حاجه مش غلط ولا حرام يقوللك لاء الرجاله حاجه والبنات حاجة تانية
يا اخوااااتى مجمتع عسل عسل عايزه الحرق بصراحة
الاعمال المنزلية اصلا مش فرض على المرأة وبعدين دى حتة زوق لا مؤخذاه من الرجالة وفى رجاله مش عندها ريحة الزوق ولا عندها استعداد تناول نفسها كوباية ميه وتلاقيهم اخر جليطه دول برضه عايزين الحرق مع المجمتع
اصبرى شويه وانا اصفيلك المجمتع على الاخر ولا ابقى غيرنا فيه
ايووون يا نتى انتى هتقوليلى ناس حشرية مووت واللى مش بيكلم قدامك بيتكلم من وراكى
دول كمان فئة عايزه الحرق مع المجمتع والرجالة معدومي الزوق
وهكذا خلصنا من كل الناس اللى قرفينا فى حياتنا

كل سنه وانتى طيبه واسفى انى قلبت المواجع

رحــــيـل said...

موناليزا

اولا كل سنة وانتى طيبة وبخير دايما
لاء تفهمى من كده ان محصلش نصيب اساسا
لا هتطول ولا هتقصر

====
دايما كده منكدة عليكم فى المناسبات والاعياد
جنان بقى تقولى ايه
ربنا يكرمك يارب ويفرجك دايما
وعيد سعيد عليك يارب
----------------------------------------------------------------
ليدي

وانتى كمان بجد نفسى نتقابل تانى قريب ان شاء الله
تسلمى يارب ويسلم سؤالك
معلش اصل الدنيا كانت برد اليومين اللى فاتو فخفت تاخد برد
ويقلب بانفلونزا خنازير واحنا مش ناقصين هههههههه

وانتى طيبة دايما وبخير يارب

رحــــيـل said...

عاشقة وغلبانة

يابنتى كنت لمى صاحباتك النبات واستخبولوا فى الدرة وهو مروح
وعيشوا فيلم رعب
متخليش حد يقهرك من غير ما اتخدى حقك منه ههههههه مش اتقنفا ننضم لجمعية المرأه المتوحشة

وبعدين اللى يقول يقول
مش عارفه مين كانت كاتبة موضوع بعنوان
سنجل وافتخر ههههههههههه
انا كمان بحب القعدات دى يالا فرصتنا اللقاء الجاى هيبقى حريمى فقط
نخطط لثورة على المجتمع العقيم ده
---------------------------------------------------
مسدس صغير

وانت طيب وبخير ياصلاح
عيد سعيد عليك يارب
وامانة لو قابلت سعيد قوله رحيل على باب مدونتها مستنياك
ههههههههههههههههههههه
---------------------------------------------
اقصوصة

وانتى كمان بخير

رحــــيـل said...

ويسا حبيبتى

تصدقى فكرة ونعمل جروب نسميه انا مش وصمة عار
اصل انا حاسه ان شويه شويه هيتم ؤدنا زى زمان عشان يرتاحو مننا لاننا فى نظرهم كارثة ازلية
شوفى احنا هنعمل لقاؤء قريب حريمى فقط هبلغك بالميعاد اكيد
ونشوف حل بجد
عيد سعيد عليكى يارب دايما
------------------------------------------------
دكتور جيشو

الله يسلمك
اخيرا حد قالى مبروك النيو لوك ههههههههه
تسلم يا احمد رافع معنوياتى دايما
هما عندهم انحلال لان مافيش دين
انا مش معنى انى بقول استقلال ان دى دعوه للانحلال لاء طبعا
بس نشم نفسنا نتمتع بخصوصيتنا
ههههههههه احنا هنعمل اجتماع بناتى ونحط مطالبنا يا ماا كده يا ما هنعمل اضراب واعتصام

كل سنة وانت طيب دايما

the others said...

كل سنة وانت طيبة يارحيل
كونك بنت ده قدر تعاملي معاه كباقي الأقدار مش هقول سيئة بس بتحتاج طريقة في التعامل

فكراني؟؟
انا شيماء
myfingerprint

رحــــيـل said...

اميرة على كوكب مهجور

اهلا ميرو ازيك كل سنة وانتى طيبه يا جميلة
فعلا مجتمع بوشين
يابنتى حقوق ايه
الحقوق دى بيدهولنا كلام وبس انما تنفيذ تبقى قلة ادب وانحراف
ربنا يهونها علينا
شكرا يا جميلة
------------------------------------------
زوزو

وحشاااااااااااااااانى ازيك يابنتى
كل سنة وانتى طيبة

ايون يا زوزو مانتى عارفه اللى فيها ومتباعه الليله من زمان
هههههههههه

شوفى يازوزو حتة انهم شايفين احسن مننا فدى انا ليا اعتراض عليها
الزمن اختلف وكل حاجه حوالينا اتغيرت احنا عشان مطوحنين فى العصرية اكتر وعارفين مستحدثتها
فانا شايفه ان ده كفيل ان احنا نكون عارفين اكتر المسأله مش خبرة وتجارب وبس لان مش كل الناس بتقدر تخرج من تجاربها بخبره كافية تخليها تقدر تحكم على حياة اشخاص تانيه غيرها

اما بقى كلام الناس فانا شخصيا اخر حاجه بفكر فيها كلامهم لانهم فى كل الاحوال مش هيبطلوا كلام
عشان كده انا بعمل اللى انا عايزاه طالما مش غلط حتة بقى عيب والناس يقولوا ايه
سورى يعنى يتحرقوا الناس

وانتى طيبه دايما
يارب نكون سوا هناك

رحــــيـل said...

شيماء

طبعا طبعا فاكراكى
:))
فعلا قدر
ربنا يصبرنا يابنتى
كل سنة وانتى طيبة وعيدك سعيد
تسلمى دايما

خواطر شابة said...

والله ردك عليا موتني ضحك عوضتي كأبة امبارح كده يبقى صافية لبن
تحياتي واتمنى ان يدوم التواصل ان شاء الله
سعيدة اني تعرفت على مدونتك واكيد مروري ولو انه الاول لكن تأكدي لن يكون الاخير ان شاء الله
تحياتي

قهوة بالفانيليا - شيماء علي said...

هاقولك ايه بس
:)
معاكي حق ..
مش هقدر اقولك اكتر من كدة
و مش هقدر اعبر عن كمية الغضب اللي جوايا النهاردة
بسبب اكتر من حاجة
ربنا يعدي العيد دة على خير من غير مادبح حد

مدحت محمد said...

كانت دايما اكتر حاجة بتعجبنى فى الغرب استقلال الابناء فى مرحلة عمرية معينة عن اهلهم كانت بجد امنية حياتي انى استقل بنفسى واعيش بعيد عن البيت

ياعم محدش بيعرف يعيش لوحده وكمان اللى مالوش خير فى اهله

انا فاهم قصدك الحرية المنشودة والاعتماد على الذات

اللى يحسسك بكيانك وذاتك وده حقك

اما بقى موضوع الجواز ده بقى اصلا نصيب

وانا بعتبره شر لابد منه

وانا واحد من الناس
والله نفسى ماتجوزش

ومش هدف عندى

لحد دلوقتى

انى اتجوز يمكن ملاقتش اللى اقول دى تبقى شريكة حباتى بمكن ده السبب ممكن الله اعلم


بالنسبة للبنت

فى اسر بتقول انا عندى بنتى تتجوز وتتطلق افضل ماتبقى فى يوم من الايام عانس

واحنا مجتمع فى النهاية شرقى وشرف البنت زى عود الكبريت

وغلطتها زى مابيقولو بفورة

وان لما البنت تتجوز يقولو احنا انزاح من قلبنا هم

لان ده مفهوم وعقيدة فى مجتمعاتنا الشرقية

معتقدش انه ممكن يتغير بسهولة

لااننا عرقنا

عربى

وكل سنة وانتى طيبة يارحيل

sookra said...

ياغلبى ساعه بحاول اعمل كومنت هنا فى البلد دى
عموما حلو النيوبوك دا
ههههههه
وربنا وربنا غيرت بس من واقع انى عاوزه اغير بس
موش عشان امل وتفاؤل والرغى اللى مالوش لازمه دا
وبعدين ايه احنا موش اتفقنا نعمل سالى دكتور نفساوى ونروحلها انا وانتى
وهنلم باقى البنات المشبوحات بسبب الحاجات الكتير دى
وناخد شيما بقى
يالهوى يالهوى دى سالى كمان عاوزه دكتور نفساوى
خلاص هى تبقى نفساوى علينا واحنا نبقى نفساويين عليها وكا بقى لاندفع فيزيتا ولانيله
ههههههههههههه
انا بقى يابنتى معاكى على طول الطريق
تعالى نغنى على حالنا
هههههههههه
على فكره انا وخداها بلطجه كدا بقى
يخرب بيت اللى يزعلنا يلا بقى
هه

الأحــــــ إيناس ــــــزان said...

كل سنة وانتى طيبه ياقلبى عيد سعيد عليكى يارب

وربنا يسعدك ويروق بالك حبيبتى

ابقى طمنينى عليكى

مروة بتسلم عليكى كتير
سلام

Anonymous said...

اسلوبك ناضج وافكارك رائعه اسجل تقديري

عبد الجليل

صوت من مصر said...

انا موافق
كل عام وانتى بخير وسلام

علاء سالم said...

السلام عليكم

طبعاً أقولك الأول كل سنه وانتي طيبه ويارب السنه الجايه تكون أحسن وأسعد وأجمل

أما عن الموضوع اللي كتبتيه فأنا متفق معاكي بجد في كلامك وغضبك ورأيك

للأسف فعلا إحنا عندنا كم هائل من العادات والتقاليد اللي تجيب شلل وضغط وسكر
وخصوصاً بالنسبه للمرأه

بس على فكرة الراجل كمان فيه عادات وتقاليد و ظروف وأشياء كتير بتقيده يعني مش حر زي ما المرأه بتعتقد بس انا معاكي في إن حرية المرأه أقل

خالص تحياتي ليكي يا سارة وعيد سعيد إن شاء الله

amirelhob said...

عاجبنى البوست جدا وعاجبنى تجسيد للحاله بس زعلان منك لانك زعلانه والعيد جاى وبدعى ان ربنا يجعلك كل ايامك عيد وكمان مش حابب اوى موضوع اننا شعب حشرى انا بشوف ان دى طيبه الناس مبتقدرش تسكت بتحب داسما تتطمن على بعضيها وتعرف ادق الاخبار واالتفاصيل وعشان كدا اول ما تلقى ازمه تلقينى ايد واحده ودا اللى بيمزينا عن اى شعب تانى انا شايف ان التعبير خانك شويه لكن البوست جميل جدا ويا ربتتقلبى مرورى ومن قلبى بتمنلك كل خير وسعاده وصحه ونتوفيق وفرح وابتسامه تدوم يا رب طول العمر

Anonymous said...

يا خبر يا سوسو ؟
انتي زي ما يكون بتتكلمي عن مشكلتي
واكيد مشكلة الملايين من البنات
فعلا بيعاملونا علي إننا غلطة في هذه الدنيا وكإن احنا اللي أوجدنا نفسنا
وكإن الأمهات دول ماكانوش بنات في يوم من الأيام
تصدقي والله اني باحلم من زمان بالخيمة بتاعتك دي ؟! ياريت تاخدوني معاكم
بس بدل الصحراء بقي نروح غابة جميلة كلها شجر وشلالات وان شالله حتي يكون فيها وحوش..ماهم مش هايبقوا أسوأ من الوحوش اللي بنقابلهم في الدنيا
الواحد من غلبه كان نفسه يطلع ولد علشان ينتقم من كل الناس الرخمة..بس الحمد لله علي كل حال
وكل سنة وانتي طيبة يا جميل

Anonymous said...

تعرفى ياساره انا من سنتين تقريبا كنت بفكر زيك بالظبط
ودا كان نتيجه لموقف حصل
مع ان بصراحه عمرى ماحسيت انى مش حره
بالعكس انا واخده حريه كبيره جدا ومبنيه عن ثقه
لدجه انى احيانا كنت بلوم اهلى بينى وبين نفسى على
لانى مكنتش حاسه بالاهتمام اللى كنت اتمنى احسه منهم

لكن مع الوقت بدات اغير افكارى اللى كانت تماما هى افكارك اللى قريتها من شويه

ياريت نكون واقعيين ونعيش الواقع ياساره
اى بنت فى حاجه انها تحس بالاهتمام
بان فيه على الاقل شخص يهمه امرها
حد يسال عنها
حد يفهمها ويحس بيها
اعتقد ان الحياه زى ماكنت بفكر وزى ماقريت فى موضوعك تبقى حياه ممله من غير هدف
لانك بعد فتره هتملى وتحسى ان نتيجه الحريه اللى انتى عايزاها هى وحده وفراغ
تعرفى احيانا بفكر بينى وبين نفسى
ياترى
بعد كام سنه لو فضلت وحيده
ايه ممكن يحصل وازاى هقدر اعيش لوحدى وكل شخص من اللى حواليا ليه حياته
وبدات افهم وجهه نظر الكبار وسر كلامهم لينا
الكلام اللى احيانا بيستفزنا ويغضبنا
ويخلينا نفكر زى ماقر يت
اتمنى تتقبلى ر ايى

وعلى فكر ه انا قر يت اللى كتبتيه
فى مجله
ر ؤيا

وكتبت تعليق طويل شويه على موضوعك

كل سنة وانتى طيبة

the moonlight

رحــــيـل said...

السلام عليكم

الناس اللى انا مش رديت على تعليقاتهم اسفه جدااا
ان شاء الله بكره ارد عليكم شكرررررررررررا ليكم جميعا

Soul.o0o.Whisper said...

سارة يا جميلة

كل سنة و انتى طيبة

و فعلا كبرى و مشيها بلطجة
نصيحة من أختك حبيبتك :)


فعلا الاهل بيعملوا من منطلق خوفهم علينا
بس للأسف الاسلوب كتير بيكون مستفز و تلاقيكى اتنرفزتى
و بتسوء العلاقات معاهم



المهم ....
حاولى اسمعى و اعملى انك موافقة تماما على اللى بيقولوه
و بعدين اعملى اللى انتى عاوزاه
بس بالاسلوب اللى يحبوه :)

شفتى النصاحة
ههههههههههههههههه



ياللا يا جميل
كمان كل سنة و انتى طيبة


اظن زهقتى
ياللا مش مشكلة

blue-wave said...

مش هاقولك انى معترض على كلامك
بس احنا فى مجتمع عايش ب قيمه وتقاليدة
لو تمردنا عليهم نموت
تحياتى

رحــــيـل said...

خواطر شابة

 كويس انى ضحكتك عشاان المره اللى فاتت قلبت عليكى المواجع
وان شاء الله يكون فى تواصل
شكرا ليكى متابعتك ومرورك
------------------------------------------------------
مدحت محمد

كل سنه وانت طيب
يا اهلا مدحت
محدش بيقدر يعيش لوحده وبرضه اللى بيعيش حوالين ناس مش فاهمينه مش عايش

وبعدين تتجوز وتتطلق ليه وترجع بولادها مثلا
اان شايفه ان العانس افضل من المطلقة طالما كده كده هتبقى لوحدها ايه يخليها تخوض تجربه هى عارفه انها ممكن تنتهى بالفشل
هو فعلا مش هيتغير بس احنا لازم نحاول نخرج من الدايرة دى عشان نحس اننا عايشين بجد
-------------------------------------------------------
شيماء

اخباراتك
اتمنى انك تكوني بخير
قدامك حالين للغضب ياتنفجرى ياتصبرى لحد ما تنفجرى فى اى مضايقك برضه

ربنا يعدى كل ايامك على خير يارب

رحــــيـل said...

سكره السكره

منوره منوره
ههههههههههه
كويس انك خدتى بالك على النيو لوك ولبس العيد
شوفى بغض النظر عن سبب التغير التغير مطلوب عشان كل لما تيجى تفتحى المدونة مش تزهقي
وبعدين تقريبا تقريبا يا ينتى طلعنا كلنا محتاجين دكاتره نفسيين
ههههههههههههههههههههههه
اقولك احنا عايزين مستشفى نستقل فيها براحتنا لوحدينا
اهى هتبقى اريح
---------------------------------------------------
ايناس

وانتى طيبه يا نوسه وبخير

ربنا يخليكى يارب
وسلامي لمروه كتير
----------------------------------------------------
استاذ عبد الجليل

شكرا ليك يا افندم مرورك وتعليقك
تحياتى لك
--------------------------------------------------
صوت من مصر

وانا كمان موافقه
كل سنه وانت بخير دايما يا محمد

تحياتى

رحــــيـل said...

امير الحب

اهلا بيك
لالالا ولا تزعل نفسك يابنى ده العادى جدا
وانا مش زعلانه خالص
بس الطيبه اللى انت بتكلم عنها دى بتقلب خنقه صدقنى
مش بحسن نيه خالص على فكرة
الناس حشريه عشان مش لاقيه حاجه تشغلها غير الناس بيهربو من اللى فيهم وبيتسلوا بسيرة الناس
طيبه ايه بس
ومش من حق انه يعرف ادق تفاصيل فى حاجه اسمها خصوصيات
انت شكلك طيب شويتين صدقنى كلها كام سنة وتغير رايك خلاص
شكرا ليك جدااااااااااااا
ربنا يخليك
-----------------------------------------------------------
غير معروف

اللى شكلها اكيد بنت يعنى طالع عينها
هههههههه
المره الجايه بس عرفينى انتى مين
شكلك حد مننا وعلينا ونعرف بعض
ضرورى عشان لما نعمل خيمه او نروح الغابه ابلغك تيجى معانا
شكرا لمرورك يا جميله
-------------------------------------------------------------
علاء سالم

باشا وعليكم السلام
وكل سنة وانت طيب
اه والله احنا غلابه وبيجيلنا كل الحاجات اللى انت قولت عليها
وكمان سكسكه فى الركب والتهاب فى الحواجب ومغص فى الرموش يابنى
تصور؟؟؟؟
ربنا معاك يا علاء يارب
شكرا ليك كتيييييييييييييييييير
---------------------------------------------------------
the moonlight

اولا شكرا ليكى جدا
تعليقك هنا وعلى رؤية مصرية وفى انها انا – موضوع الثقه هناك اللى كتبته سلوي مش انا –
المهم
كلامك منطقى وواقعى احتمال
ولكن
.
.
.
.
ازاى نقدر نتقبل ده فى مجمتع وفى اسر مش عارفه تتعامل مع البنت على اكتر من انها كارثه
ضيفة فى بيت لحد ما تروح بيت تاني الله اعلم بيه
اعتقد ان كونا بنفكر فى فكرة ان احنا هنبقى لوحدنا باعدين مش دافع انها تخلينا نعمل ونتحمل حاجات مش متقبلنها حاليا لمجرد فقط الخوف من الوحده
عنى انا لا اخشى الوحده اطلاقا قدر خوفى من الفشل
شكراااا ليكي جدا

رحــــيـل said...

سول

وانتى طيبة وبخير يا حبيبتى
ههههههه اها انا واخدها بلطجة فعلا

هههههه شكرا ع النصحيه هحاول اعمل بيها لو انى اعارفه انها مش هتجيب نتيجه
وبعدين مش تقلقى انا زهقش منك ابدا

منوره دايما
---------------------------------------------
Blu- wave

اهلا بيك
لاء لو تمردنا هنعيش
اللى هيموت بس اللى خايف انه يموت لو خرج بره الدايرة

شكرا ليك

Anonymous said...

ازيك ياساره اخبارك ايه

اولا شكرا على ردك عليا

ثانيا احب اوضحلك شىء مهم

انا ضد ان اى انسان ينفذ او يتصرف تصرف مش بارادته

او يختار اختيار هو مش عايزه نتيجه لضغط

وانا واحده من الناس اللى مستحيل تتقبل شىء هى مش مقتنعه بيه

مهما كانت النتايج

لان النتيجه لاختيار مش عايزاه هو الفشل اكيد

انا قلتلك كلامى لسبب واحد بس

وهو طبعا بعيد كل البعد عن انك تخضعى لضغوط او تختارى شىء مش عايزاه

لا بالعكس

انا بس حبيت اوضحلك وجهه نظر اهالينا وتفكيرهم

يمكن نديهم العذر فى تصرفاتهم معانا

لان فعليا تصرفاتهم نتيجه خوفهم علينا من الناس اللى حوالينا والمجتمع وافكاره

اللى مستحيل للاسف اننا نغيره

كمان حبيت اقولك ان صعب ان اى بنت

تعيش لوحدها

حتى لو كانت عايزا دا حاليا

اكيد فى يوم من الايام هيتغير الاحساس

دا

لاحساس بالوحده والفراغ

احساس بالاحتياج لحد يفهمها ويشاركها افكارها

لكن اوعى تفتكرى ان كلامى وراه انك تختارى اختيار مش عايزاه

لمجرد ارضاء اللى حواليكى

بالعكس انا مؤمنه ان لازم ان الانسان يختار هو حياته
بحريه تامه
ويتحمل نتايج افعاله واختياراته وتصرفاته

شكرا ليكى

the moonlight

Anonymous said...

اه على فكره انا اقصد

موضوع الاخرون ليسوا كما نراهم لان دا اللى انا علقت عليه وكان مكتوب بقلم ساره طوبار
دا الموضوع اللى اقصده بكلامى

مش الموضوع اللى كتبته سلوى

the moonlight

رحــــيـل said...

the moonlight

اولا شكرا جدا على متابعتك
ثانيا معلش انا راجعت التعليق على انها انا لاقيته على موضوع ليا حلم امرأة , شكلى كنت مهيسه فافتكرت انه على اخر موضوع لسلوى وخاصة ان خاصيه التحكم فى التعليقات مش بتوضح التعليقات بتكون على انهى بوست

ثالثا
مش هقدر ارد على كلامك الوقتى
لانى حقيقى مش قادرة اقتنع
اصلى لسه مخلصة الخناقة اليومية المعتادة ومصره جدا على رأى حتى لو كان غلط او هيريحنى بشكل مؤقت
لان مافيييييييييش فايدة
:((

حقيقى شكرا جدا ليكى

رحــــيـل said...

قصدى بوست
انثى رغم انف الجميع
ورجل لا تنساه المرأه
مش بقولك مهيسة
:)

mhmdwahab said...

والله لو جربتى الدنيا فيها اية برة البيت وسمعتى عن خبر من امريكا طازة عن القبض عن عصابة تجبر الاطفال والقصر على الدعارة لكن اختيار البيت افضل بكثير من الحرية الزئفة كان لى تجربة مرة وانا صغير تركت البيت لكراهية التعليم بقى وكدة وذاكر ذاكر فهربت انا ونص الفصل المدرسى معى بما انتى كنت الزعيم وبعد السفر الى اسكندرية والمبيت فى الشارع لمدة اسبوع قررت الرجوع وملعون ابو الحرية على فكرة كان عمرى فهذا الوقت تقريبا 10 سنوات لكنى كنت استطيع التفكير واختيار القرار الصح وان البيت مهما كان افضل من السرمحة

angelic devil said...

أول زيارة ليا
بجد الموضوع مثير جدآ
و مينفعش يكون باللغة العربية الفصحي
لأن المعاناة معاناة عامة و شعبية و متأصلة
انا بضم صوتي لصوتك في حق الأستقلال
او علي الأقل حق الثقة
مهو مينفعش حد يحب حد يخنقه لدرجة الأنتحار
و الا يبقي فعلآ حكاية الدب اللي قتل صاحبه حكاية حقيقية مش أسطورة

موضوع رائع و مدونة رائعة
و كل سنة و انتي طيبة

Tamer Nabil said...

اكيد الاستقلال عن الاباء مطلوب

لكن مع النصيحة منهم مطلوبة

واختلاف الثقافة بينا وبينهم كبير

كل سنة وانتى طيبة

مع خالص تحياتى

L.G. said...

اعتقد إن المشكلة إن لا إحنا ولا أهالينا خالص بنفهم دينا صح أو بنسبة كويسة عشان كده بنتحير في الدنيا محناش عارفين نوفق بين ما نريد وما يجب والممكن وغير الممكن