Thursday, February 18, 2010

انا جيت


انا جيت ايووووووووون جيت نورت طبعا اى نو
حبة جد بقى المهم انا كنت راجعة بعد غيبة شهر ونص التدوين واحشنى وكنت راجعة متحمسة جدا ومزاجى فى السما قوم ايه بقى الاقى ماما امولة قافلة مدونتها وفى حد ضايقيها - الله يحرقه اى ان كان انا اصلا معرفش مين بس اى حد يضايق انسانة زى ماما امولة يستاهل الحرق طبعا -وطبعا من قبلها بفترة المدونة الجميلة واللى بحبها جدا داليا قوس قزح لاقيتها هى كمان منزلة بوست انها هتبطل تدوين عشان العك اللى بيحصل والناس اللى بتتكلم على بعضها
وقبلهم ناس كتير مشيت وقفلت مدونتها ومن الواضح ان لسه فى ناس هتمشى ومش هيفضل غير الناس اللى عماله تقل ادبها على خلق الله من غير سبب غير انهم مرضى ومعقدين وعندهم نقص ومش عارفين يعالجوا ده فى واقعهم بشكل صحى فجايين هنا من ورا الشاشات يطلعوا عقدهم لانهم اجبن من انهم يحلوا مشاكلهم النفسية فى الواقع
طيب لما الناس الحلوة واللى انا بحبها تمشى الواحد يرجع ليييييييييييييييييه ؟ ولا يجيله نفس يكتب ازاى ولا لما كل شوية حد جميل جدا يتحرق دمه بسبب ناس مش تستاهل ويغلبه ضيقه ويمشى ويسيبنا
يا جماعة اى مدون او مدونة حد ضايقهم وفضل انه يمشى انا مقدره جدا ضيقتهم وغضبهم وليكو حق تعملوا كده
بس افتكرو ان مش كل الناس اللى هنا وحشة ومرضى نفسيين
فى ناس بتحبكوا بجد ووجودكم بيفرق معاهم بجد
انا رغم انى مش متابعة زى الاول وغايبة بقالى فترة وحتى لو تابعت نادرا لو بعلق الا ان بجد فى ناس انا حبيتها جدا خصوصا الناس اللى انا قابلتها وعرفتها وحسيت قد ايه هما ناس صادقة ودافية وصحبتهم جميلة جدا حتى لو بنتقابل كل كام شهر وبستنى حقيقى اى فرصة عشان اقابلهم
ماما امولة من الناس اللى بحبها جدا وبحترمها وبعزها موووت وبجد اتصدمت لما رجعت لاقيتها قفلت مدونتها
عايزه اقولك بجد انك اكبر من اى حد حاول يضايقك واكبر من اى كلام واتمنى انك تفضلى منورانا بجد دايما
وماليش دعوه بقى انا عايزه احضر لقاء فى بورسعيد انتو كلكم واحشنى جدا اتصرفووووا :)) انا بقالى كتير عايزه اجى بورسعيد ومكسلة فعلا الحاجة الوحيدة اللى هتخلينى اجى انكم تعملوا لقاء عشان اقابلكم واشوفكم
وبعدين ده على رأى خالد همس الاحباب بيقول انى محسوبة على مدونين بورسعيد اكتر من مدونين الدقهلية ومن هذا المنطلق شايفه انى ليا الحق كمدونة واخده الجنسية البورسعيدية انى اطالب بعمل لقاء بورسعيدى
:))

18 comments:

حنان سعيد said...

اده هو انا ممكن اكون اول تعليق ولا ايه
ده انا ممكن يحصلي حاجه من الفرحه
:)
وحشتيني اوووووووووووووووووووووووووي بجد يا حببتي
وبجد وحشني اووووي وجودك وكلامك الجميل
.........
وطبعا عندك حق في كل الكلام الي بتقوليه

ان في ناس كتير اكيد سيئين بس الانسحاب من عالم التدوين ده مش حل
بالعكس ده فرصه ليهم اكتر
وبتخلي الناس الكويسه تفقد الامل وتحس انهم قليلين
ياريت ماحدش ينق ابداااا
.........
بس انا ماليش دعوه عايزه اشوفك
وكمان انا بحب بورسعيد اوووي(اصل خطيبي من هناك)
ونفسي اروحها
وياسلام لما اروحها واشوفك كمان
:)
وحشتيني بجد
وماتبعديش كده تاني

رحــــيـل said...

حنان

ياهلا ياهلا
منوره يابنتى والله هنا وع الفيس بوك
بتبسط لما بشوف تعليق ليكى
:))
وبعدين اول مره تروحى فيها بورسعيد عرفينى بجد لو لو حصل لقاء هناك وعرفتى تيجى تعالى لو ينفع بجد هتبقى فرصه جميله جدا
هى اصلا بورسعيد بلد حلوه جدا وهتعجبك وطالما خطيبك منها يبقى انتى كده خدتى الجنسية البورسعيديه

انتى من الناس اللى ببجد لما اشوفها هبقى سعيده انى قابلتها جدااااا

شفـقــة و إحســــان said...

اولا انتى وحشتينا موووووووت
ثانيا زى ما انتى قلتى دول ناس مرضى نفسيين ولو كل واحد سمع حاجة اتقالت عنه وقفل مدونته يبقى معنى كده انهم نجحوا فى اللى بيعملوه هما ناس غيارة ونفسهم انهم يفرقونا
يعنى بمعنى اصح يخربوها ويقعدوا على تلها
وانا من عندك اهو بقول لماما امولة وقوس قزح واى حد حصلوا مشاكل انه يرجع ويغيظ الناس دى ومايسيبش التدوين ابدا

رحــــيـل said...

شفقة

انتى كماااااان والله يامنى وحشانى
وزعلت لان المره اللى اتفقت معاكى فيها انى انزلكم بورسعيد فعلا كان عندى ظروف ومعرفتش اجى

وبعدين اان بضم صوتى لصووتك انهم يرجعو وينور مكانهم عشان الناس النفسيه دى كده بقى نجحوا فعلا فى انهم يطفشوا الناس الكويسه

يارب تبقى بخير انتى واحسان
:))

رحله البحث said...

العود احمد يا ساره
ايه يا بنتى انتى فين
انا قلت انتى كمان هتبطلى
صراحه انا قررت ابطل اكتر من مره بس مش عشان حد قل ادبه عليا صراحه بس اوقات باحس ان التدوين نفسه اتغير عن زمان
يعنى انا افتكر انى قعدت سنه كامله باتباع مدونيين قبل ما اعمل مدونتى طبعا معظمهم دلوقتى بطل او مش معروف اوى
للاسف اخر سنه تحول التدوين الى حاجه كده زى الفيس بووك او زى الايميل
يعنى ازاى معندكش ايميل لازم يكون عندك نفس الفكره معظم الشباب بقى بيدون
بيدون ايه مش مهم بيقرأ للناس بيفهم مش مهم
بيقل ادبه عادى لان دا بالنسبه له زى الشات رووم داخل يتراخم ويضيع وقت وخلاص
انا التدوين بالنسبه لى وبالنسبه لمعظمنا متعب مريح
مريح لانه بيخرج اللى جواك متعب لان مدونتك مسئوليه مينفعش تكتب فيها لفظ الا لما تقدره كويس فكره الا لما تديها حقها من التفكير
حتى اللقاءات اصبحت باخاف منها حضرت لقاء واحد وكننت سعيد جدا دلوقتى اخاف احضر اى لقاء اتشتم بعدها على المدونات بدون سبب
انا حاسس احساس اى حد فكر يقفل مدونته لكن هاقولهم حاجه صغيره
لو كل مدون كويس انسحب مش هيفضل غير الوحشيين وبعدها بشويه هيتنسى الموضوع دا وهيختفى التدوين
ففعلا لو كنتم حبيتم التدوين فى يوم يبقى يستاهل اننا نتحمل شويه
لانه مش مجرد هوايه لكنه حياه
تحياتى ساره وحمدا لله على السلامه
والعشره متهونش فخليكى فاكرانا وابقى طمنينا عليكى

kafrawy said...

تروحى وترجعى بالسلامه دة اولا

ثانيا و الى اتخنق من التدوين يبقى ايه ؟

صوت من مصر said...

مع انى مع قرارك لكن كنت قفل المدونه فعلا بسبب العبط والهبل
تابعى وانتى تعرفى

sabry abo-omar said...

عزيزتى: اسمحى لى أن اقتحم مدونتك ويكون لى تعليق على حديثك.. لاحظت فعلا بداية اختفاء بعض الشخصيات القيمة والتى كان للتدوين على يديها طعم ومزاق مختلف كما انهم كانوا من اوائل المدونين والمبدعين هنا.. كان التفسير دائما بعض التجاوزات من الاخرين.. اولا وبهذا البعد نكون قد ساهمنا فى تعظيم دور الفاشلين والحاقدين ، وثانيا وبهذا الاختفاء قد تركنا لهم الساحة لفرض رأيهم ووجهة نظرهم ولكنى أرى ان يراجع كل نفسه وهل ماحدث كان نتيجة بعض الثقة الزائدة فى الاشخاص ام هو استخدام مغالى فيه للمدونى ونحتاج لعض الحدود من جديد .. تحياتى وشكرا على اثارتك هذا الموضوع

نهر الحب said...

ازيك يا قمر وحشانى جدا
اه
جيتى على الوتر الحساس والله يا سارة
شفتى اللى بيحصل
قلة ادب وكلام فارغ
ومش عارفة الناس دى اية
مش بتعرف ربنا ولا معندهمش ضمير

Timo.. said...

جميل انه الانسان يبحث عن الناس اللي بيحبهم ويحاول يحافظ على وجودهم في حياته
والاجمل انه يحاول يوصل لهم ده وبصوت عالي لان ده حقهم عليه.

Tamer Nabil said...

حمد الله على السلامة سارة

اخبارك اية

انا معاكى فى ناس غير محترمة وبتقول كلام غير محترم

بس لو كل واحد فينا قفل مدونتة عشانهم يبقى بنهرب ومن اية من بعض الغير عقلاء

كلامهم لاهيودى ولاهيجيب

مع خالص تحياتى

رحــــيـل said...

رحلة البحث

انا اهووووووووو امتحانات نص سنة وبعدين الخطوبة وبعدين النت فصل واخيرا جيت
ها انا ذا
انا يا محمد اغيب اغيب وارجع تانى ممكن اقفل المدونة شويه بس ما اعتقدش انى هبطل
او الله اعلم

فعلا التدوين اتغير وناس كتير جميله اختفت والمدونات بقت ظاهرة ومبقاش عالم مريح زى الاول
بس ادينا بنحاول

الله يسلمك وبعدين هو انا لو غبت شويه ومسالتش انت متسألش؟؟؟؟
شكرا لمرورك
----------------------------------------
كفرواى

ايوون انت من الناس اللى من زماااااااان مع ان انت كمان بقيت مش بتدون زى الاول
اللى اتخنق من التدوين ياخد اجازه ويرجع تانى

نورت
-----------------------------------
-----------
صوت من مصر

المهم انك لسه موجود يعنى ياكيمو ومش قفلتها هتابع ان شاء الله
تحياتى
-----------------------------------------------
صبرى ابو عمر

اهلا بحضرتك يا افندم

انا متفقة معاك جدا
هو سبب اللى حصل ان زى ما محمد قال فى تعليقه
ناس كتير دخلت التدوين على انها ظاهره من غير ما يكون ليها هدف
فداخله تعك وتقرف فى خلق الله وخلاص

تحياتى لك
-------------------------------------------------
نهر الحب

اهلا نوسه انتى كمان وحشانى جدااااا والله
فعلا يا ايناس قلة ادب وناس فاضية وتافهه ومش وراها حاجة غير اذية الناس
ربنا يهديهم

---------------------------------------------
تيمو

اهلا بيك
بالظبط كلامك خصوصا لما نكون عارفين هما قد ايه ناس فعلا كويسة وجميلة
وان فى ناس بتحاول تشوه اى شئ جميل

شكرا لمرورك
----------------------------------------------
تامر نبيل

يا اهلا يا هلا
الله يسلمك تامر
انا الحمد لله تمام شكرا

هو كلامهم فى الواقع لا بيودى ولا بيجيب بس بيحرق الدم
ربنا ينتقم منهم

تحياتى واحترامى

أم .. بوبه said...

حمدا لله على السلامة

نورتى من تانى يا جميل

حلم بيعافر said...

لاااااااء
انا ليا راى مختلف تماما
اللى يمشى مع السلامة وهو حر
هو الخسران
بس من الذوق ان لما حد يجى يقفل مدونته يقول انا هقفلها وهقفلها ليه
تحياتى

نهر الحب said...

ياسارة
انتى مش بس مننا دانتى قمرنا وكلنا بنحبك جدا لانك اهل للحب والثقة والاحترام ونفسى موت موت اشوفك
شكرا على الكلام الجميل لماما امولة هى تستحقة فعلا
وانتى اهل لان تقولية

أمل حمدي said...

ابنتي حبيبتي ونور عيني والله أعلم كم أحبك
أيتها الزهرة الندية التي تحمل في القلب
كل الخير لمن حولها
رجعت حبيبتي لكِ ولمن هم من أمثالك أصحاب القلوب الجميلة
شكرا يا سارة على كل كلمة كتبتيها وفعلا انت من بورسعيد قلبا وقالبا
ربنا يصلح حالك اللهم أمين
وإن شاء الله هانعمل لقاء لكم قريبا بس لما نوسة تحدد تقول على الميعاد وأكون اتحسنت شوية من التعب اللي عندي
دمت بكل الحب والوفا

SAYED SAAD said...

لكل شئ مزاياه وعيوبة وليس اي طرف منهم مطلق واطاغي على الاخر
تحياتي

رحــــيـل said...

ام بوبه

الله يسلمك
شكرا ليكى جدا
------------------------------------
حلم بيعافر


اهلا بيك
بس انا مش معاك خصوصا مع الناس اللى بنحبها بجد واللى عارفين قد ايه هما ناس كويسين يبقى لازم نسعى ان احنا نحافظ عليهم بينا

شكرا لمرورك
------------------------------------------
نهر الحب

ربنا يخليكى يا ايناااااااااس يارب
ومايحرمنيش منك ابدا ولا من صحبتكم الحلوه
-------------------------------------------
ماما امولة

الف حمد الله على سلامتك نورتى بجد التدوين وفرحتى الناس اللى بتحبك برجوعك

يارب تفضلى منوره دايما
-----------------------------------------------
سيد سعد

اهلا بيك

بالظبط كده لكل شئ ميزاته وعيوبه واحنا نحدد هنستخدمه ازاى

تحياتى لك