Sunday, February 28, 2010

كذبة يومية



في المرة القادمة قبل أن ترحل 
قم بمصالحتي على عقارب الساعة
كي لا تتآمر علي في غيابك
إنها تصر على معاندتي كلما ذهبت 
تعلن العصيان على الوقت و تقف ساكنة
هي الأخرى ترفض رحيلك وتحزن لفراقك
وتقابل جنوني إليك بصمت
فيزيد اشتياقي إليك
أه من هذا الوقت الذي في غيابك لا يمر
وتباً لتلك الساعات
التي تصر على مشاركتي حنيني إليك
بسكونها وصمتها
في المرة القادمة 
عليك أن تقنعها بأن كلانا تفتقدك
أنا الأخرى افتقدك
ولن أعلن غيرتي المستترة 
من تلك الساعة الحمقاء وعقاربها
فقط سألتمس لها العذر بل ألف عذر 
لأنها مثلي تموت اشتياقا إليك
لنعقد اتفاق بيننا
فلتسرع هي بعقاربها في غيابك 
ليمر علينا الوقت سريعا
و أنا سأحكى لها عنك
و سألقى عليها قصائدك
وسأملأ الجدران بصورك
حتى الأغنيات التي تحبها 
سأسمعها إياها كي أقنعها انك لازالت هنا
ترى ستجدي معها خدعتي في استحضار تفاصيلك
بيننا بينما أنت غائب عنا ؟
يا لوعتي
أنها أنا من ستقع فريسة
لحيلة استحضار تفاصيلك التي ستملأ المكان
أنها أنا من ستطرق كل غرف البيت املأً ان تفتح لي إحداها
وسأذهب إلي شرفة البيت لأبحث عنك فلا أجدك
وأبحث عن أعقاب سجائرك فلا أجد لها أثرا
فأجرى لأنظر من النافذة لعلك كنت هنا حقا ورحلت فلا أجدك
فإذا بي أتيقن من حقيقة غيابك التي لم تزل واقعا
و أنني قد وقعت في فخ قد صنعته لعقارب الساعة لأقنعها بوجودك
فإذا بي اصدق كذبتي التي صارت لي عادة يومية في غيابك

29 comments:

حنان سعيد said...

انا ححجزلي كده من 10 ل100 تعليق قدام
:)
مش عارفه اقولك ايه بجد
تحفه تحفه تحفه
تسلم ايديك يا قمر بجد
احساسها رائع
وكلمها بجد اثر فيا جدااااااااااااا
تسلم ايدك واحساك لينا يارب
:)

كيكى عوووووو said...

يا لوعتي أنها أنا من ستقع فريسة لحيلة استحضار تفاصيلك التي ستملأ المكان!!!
يالها من كذبة مليئة بعذاب وشوق للحبيب الغائب
دة انتى عايزة بوسة على البوست دة

ادم المصرى said...

انا معجب جدا بكلامك الجميل ياريت والله بجد يكون احساس اى بنت يكون صدق فى مشاعرها لأن دلوقتى الحال اختلف بقت المشاعر شيئ والفعل شيئ تانى غرريبه صح بس دا الى شفتو كتير

أمل حمدي said...

رائعة رائعة

وحشاني يا حبيبة قلبي

نهر الحب said...

اية كل دا ياسارة
اية الجمال والتعبير الرائع بجد الظاهر انك متجرعه لالم شديد

حبيبتى شكرا على ردك الجميل فى مدونتى
وشكرا لاخلاصك
وشكرا لك بجد ياسارة
دمتى بود وخير وحب يارب العالمين


بصى اللقاء يوم 3/12 ان شاء الله
هيكون جمعه وعايزة اشوفك اول وحدة

Anonymous said...

تسلم ايديك يا رحيل جميلة جداااااا...

بيسو..:-*

رحــــيـل said...

حنان

:))
ربنا يخليكى يانونا ومايحرمنى منك ولا من وجودك وتعليقك دايما

تسلميلى
-------------------------------------
كيكي عوووو

اهلا بيكى

ليه عووووو بس
ده انتي شكلك كتكوته خلاص
:))

شكرا ليكى
--------------------------------
ادم المصري

والله يا ادم مش فكرة بنت وبس لاء كمان الراجل عليه عامل كبير فى انه يقدر يحافظ فى على مشاعر حبيبته

شكرا على مرورك وتعليقك
----------------------------------
ماما اموله

تسلميلى يارب دايما

:)
ان شاء الله اشوفك قريب على خير
وحشانى بجد
------------------------------------
نهر الحب

اهلا يانوووسه

مش الم وحش يعنى
دول حبة شوق بس
هههههههههه
ربنا يخليكى يا ايناس يارب

ايووون كده ان الدعوه تخرج من عندك انتى وماما امولة الواحد يحس انه رايح بلده بجد

ان شاء الله جايه انتو كلكو وحشنى موووت
----------------------------------
بيسوووو

احلى سلام لاجدع بنات فى الوطن العربى
:))

يابنتى انتى تعليقك منور مصر كلها
هو النور مش واصلكم ولا ايه
:))
ربنا يخليكى

صوت من مصر said...

كلامك هايل بجد
بس نفسى افهم تانى

Boky said...

ساااارة البوست دة أكتر من الرائع بجد..أنا بجد غرقانة جواه لحد دلوقتى وقرأته أكتر من مرة
كاتباه باحساس رهيييييب
:))

قهوة بالفانيليا - شيماء علي said...

:)
الاستحضار مؤلم فلا تمارسيه ..
و لا تكذبي على الساعة ..
انها اصدق منا و من كل الآخرين
مستوى النص جميل يا سارة ..
اعلى من حاجات كنتي بتكتبيها قبل كدة
:)
برافو جدا
و صباحك سكر

Cute Kitty **sookra said...

رحيل

ايوه كده ارجعى نور البلوج سبوت كه بكلماتك الرائعه زيك

وحشانى ياجميله

youma said...

ان تأتي متأخرا افضل من ان تنام وتروح عليك نومة وتنسى تعلق عالكلام الجميل ده..معليش اصل الساعة دلوقتي 12:36 بعيد عن الساعة بقى وندخل فالبوست انا شايفة ان ده لون جديد على بوستاتك اجدتيه بعناية فائقة فكرة متماسكة بجد وفكر حواري جميل جدا لأن احساسه صادق برافو يمكن لأني قريته قبل ماتنشريه حاسة بألفة وانا بقراه والاحساس جامد موت فيه صدق وحب ويارب دايما المشاعر الهايلة دي تظهر بلاش النكد برافو يابت ياسكر :-*

Sometimes said...

سارة
حلوة اوى
:)
المشكلة الواحدة مش بتكلم الساعات وبس
انا بسمع دلوقتى شحات الغرام
سارة بجد تسلمى عليها
ربنا يفرح قلبك زى مانتى مفرحانى دلوقتى
وحشتينى

Sometimes said...

فاكرة يا سارة لما قلت لك السنة دى هتكون حلوه وحاساها كده وده كان احساسك انتى كمان
الحمد لله رب العالمين
طلعت سنة حلوة عليكى وعليا
ويارب على كل المسلمين

SAYED SAAD said...

عن تمام غازي تلك الكلمات

سألتني .. ماهويتك ؟ فقلت لها: أنا الذي نام في عينيك بعد تعب شديد.

وأنا الطائر الذي مازال يحلق فوق مستنقعات الدمع.‏‏

علّه يجد من يواسيه من طيور الحبّ والعشق .‏‏

سألتني ماتاريخك ؟ فقلت لها‏‏

أنا الذي شطب خارطة حياته - ومزّق هويته كي ينسى مايعانيه من حرارة الحب ولوعة الفراق .‏‏

اقتربي من طريق قلبي‏‏

وسط زحام الناس في عينيك .‏‏

كيــــــــــــارا said...

الله علي الاحساس اللي بين السطور

لوعة وشوق وحنين هزو كيانى بجد

حمامة said...

لنعقد اتفاق بيننا

فلتسرع هي بعقاربها في غيابك ليمر علينا الوقت سريعا

و أنا سأحكى لها عنك و سألقى عليها قصائدك وسأملأ الجدران بصورك

حتى الأغنيات التي تحبها سأسمعها إياها كي أقنعها انك لازالت هنا

ترى ستجدي معها خدعتي في استحضار تفاصيلك بيننا بينما أنت غائب عنا ؟


حلوة اوى

لسه جميلة زي ما انتى
الحمد لله انك متفيرتيش زيي ف غيابي :)

طمنيني عليكي
فكراني ولا لأ :)

dr.gesho said...

بحب انا البعتات اللى بتبقى فى الاخر دى الواحد يبقى قاعد يقرا و متوقع حاجه و فجاه يلاقى حاجه تانيه خالص زى ما يكون حد كب عليه ميه ساقعه على غفله
بس بجد جامده
تحياتى

عايش... ولكن !!!! said...

راااااااااااااااااااااااائعه بجد
تسلمى ويسلم احساسك

ســـهــــر said...

حلوة أأأأأأوى يا رحيل
ووحشتينى يا ارق بنوتة والله

على فكرة كان نفسى اجى اللقاء الاخير بس تتعوض باذن الله

كلام فى سرك نيفين قالتلى انك زى القمر يا ام عيون جميلة انتى

بحبك فى الله

رشا said...

اذن هو لم يأتى الا ليشعرك بفداحة رحيله

عرفة فاروق عبد الله said...

رحيل

ألم تجدى نفسك بعد
حتى بعد الخطوبة

باركيلى أنا خلصت جيش

ورجعت ليكم تانى

واضح انك بخير يارب دايما

قصة جميلة

أحلام بتعجبنى

Lyssandra said...

إيه ده ؟
انا ماكنتش علقت هنا ؟؟

نصيحه نصيحه نصيحه
إبعدي عن الساعه خالص
ههههههههههههه

ألف فكرة وفكرة بتتولد مع دوران عقاربها وألف مؤامرة بتتدبر مع خطاويها

التدوينة حلوة أوي يا سارة
أنا قرأتها أول ما نزلتيها فوراً

...
ع الهامش :

مبسوطه أوي بيكي يا سارة
يارب دايماً مع بعض في الخير
انتي عارفه غلاوتك عندي فأنا مش هاتكلم كتير :)

سلام :)

رحــــيـل said...

صوت من مصر

اهلا محمد
شكرا ليك .. بس تفهم ايه ؟
-------------------------------------------
بوكي

اهلا بيكى منوووره
شكرا كتير جدا

------------------------------------
شيماء على

يااهلا يا اهلا شيماء
تعليقك بيهمنى كتير
شكرا على تشجيعك
-----------------------------------
سكره

ياهلا ساسو

ربنا يخليكى البلوج سبوت منور بيكى يا عروستنا
ربنا يتمملك بخير

----------------------------------------------------------
يومتى حبيبتى

ايه ده ومين ده اصلا اللى هيخليكى تروح عليكى نووومه
لا ياماما ده اجبااااااارى
وحشانى كتير جدا
وبعدين اينعم انتى اول حد قراه على الميل وخدت رايك اول باول
بس عشان النور والونس وكده
-----------------------------------------------------
منى

سعيده انى فرحتك وانها عجبتك
يارب يفرح قلبك دايما يا منى يارب

انا معاكى هى فعلا انا حاسه انها سنة حلوه ومختلفه
من الواضح ان السنة بتبان من بدايتها
اوعتقد ان بداية السنة دى معايا فعلا مختلفة عن اى سنه فاتت
-------------------------------------------------
سيد سعد

اهلا سيد
شكرا على نقلك لتلك الكلمات
وشكرا لمرورك
-------------------------------------------------
كيارا

اهلا بيكى جدا
ومرسي على تعليقك
------------------------------------------------------
حمامة

نورتينى بجد
وعودا حميدا جدا
وربنا معاكى فى الايام الجايه
ومتنسيش تعزمينا ع الفرح بقى

وطبعاااا جدا فاكراكى
--------------------------------------------------------
دكتور جيشو

انا كده اطمن ان المدونة لسه بخير بما انك من المعمرين فيها وكده من ساعه ميلادها
متغبش ياريت يادكتور
شكرا جدا على تعليقك ومرورك
-------------------------------------------------------
عايش ولكن

شكراااااااااااااااااااااا جدا
منورني
----------------------------------------------------
سهر

اهلا بيكى من تانى بعد غيبة
انتى كمان وحشانى
وان شاء الله هستنى اشوفك قريب فى لقاء تيجى مع نيفين ولارا
وبعدين نيفين تلاقيها كانت بتهزر مش بتكلم جدا يعنى ههههههه
شكرا جدا ليكى وليها
----------------------------------------------------
عرفة فاروق

لاء لاقيتها الحمد لله انا محتفظة بالاسم عشان العشرة وكده
مبرووووك جدا الايام حاساها عدت بسرعه جدا ياعرفة
حمد الله ع السلامة

انا الحمد لله بخير فعلا جدا
يارب اكون انت كمان بخير
--------------------------------------------
ليسااااا

وحشتنينى
وعايزه اجى دمياط بقى عندكم شوفوا هتعملوا لقائكم امتى

يابنتى عارفه من غير ماتكلمى ومن غير مانا كمان اتكلم

ربنا يخليكى ليا ونتقابل دايما دايما على خير
لانى بكون سعيده لما بشوفك بجد

رحــــيـل said...

رشا

:))

حقا انه
شكرا جدا على مرورك

انا مش معاهم said...

حلوه

Mo7amed Mamdou7 said...

مجيتش هنا من زمااااااااان بس والله جميله كلماتك زى ماعودتينا تسلم ايدك

علاء سالم said...

السلام عليكم

دايما متميزه يا سارة في كتاباتك
الفكرة جميله جداً والأسلوب أجمل وأجمل

من أكتر الحاجات اللي قرأتهالك وحسيتها بجد وكمان حسيت بقوتها وعمقها

بجد ما أجمل أن نكتب بإحساسنا ونترك العنان لمشاعرنا لتمسك القلم وتكتب هي ما تشاء

رحــــيـل said...

انا مش معاهم

شكرا ليك

تحياتى
----------------------------
محمد ممدوح

يا هلااااا بيك
ايون فعلا من زمان جدا
انا كمان مقصرة مع الكل

يارب تكون بخير
شكرا جدا
--------------------------------
علاء

اهلا اهلا يا علاء
دايما رافع من معنوياتي جدا
:))
تسلم يا علاء ربنا يخليك