Monday, May 3, 2010

ميلاد من قلب الوجع



هتحس وانت بتقرا رواية نون لسحر الموجي بحاجة بتتغير جواك ، هتاخد قررات ماكنتش عارف تاخدها قبل كده ،و هتلاقى الشجاعة انك تواجه وجعك عينك فى عينه من غير ما تهرب او تخاف منه ، هتنزل ستارة النهاية على اللى فات من حياتك ، وهتبدأ فصل جديد كأنك بتتولد من تانى مع كل بطل بيتصالح مع نفسه ، بس المهم تكون بتحب نفسك ومشفق عليها وعاوز فعلا تساعدها  

هنعرف ازاى نتعامل مع الالم فى حياتنا وازاى نبص على وجعنا من بره عشان تقدر نتعامل معاه بشكل ايجابيى
نعرف مكان الألم فين وندوايه، او على الاقل هنبقى عرفنا ايه بيوجعنا عشان لما نحس بخطر مشابه نقدر نواجهه قبل مايرمى شباك الالم حوالينا

احترم حزنك واديله حقه ووقته لكن ماتخليهوش البطل فى حياتك روحك هى البطل ، والحزن والالم والوجع بيعدو علينا عشان نحس اننا موجودين و عايشين، بنحسهم عشان نتاكد اننا حقيقين

كل الالم مع الوقت بيصبح ذكرى زيه زي الفرح زي كل المشاعر لما بيعدي عليها وقت مش بيفضل منها  على مر السنين غير اللى اتحفر جوانا منها  كانها طيف بيعدي فى خيالنا لثوانى وبننشغل عنها مع الوقت بتفاصيلنا الجديدة اللى بتتفرض علينا او بنختارها المهم ان احنا مع الوقت بنتعلم ان الدنيا مش بتقف على حد ولا على شئ ، ولما تتألم متزعلش بالعكس افرح لانك وقتها هتتأكد انك لسه انسان

ولأننا اتعودنا على الحزن فوقت ما نتصالح مع روحنا بنخاف من فرحتنا او مش بنصدقها او يمكن بنستكترها على نفسنا ، وبدل ما نستمتع بحالة الصفا اللى وصلنا ليها يبقى خوفنا على فرحتنا ملازمنا و بدل ما نركز فى الحاجات الحلوه اللى بقت عندنا نعيش مخاوفنا ونخليها هى البطل
عشان كده وانت بتتحرر من حزنك محتاج انك تتحرر من خوفك انك ترجع تانى لنفس النقطة اللى كنت فيها، سيب نفسك  لروحك صالحهم على بعض وسيبهم هما اكيد بيحبوا بعض ، سكت قلقك واسمع قلبك هيطمنك
مهم ان احنا منستسلمش لحالة الحزن ونحس ان احنا مستمتعين بيها ومتعايشين معها لان لما بيجى وجع جديد ولسه القديم واجعنا بننكسر اكتر من الاول عشان كده لازم نحط نهاية لكل وجع لوحده ومانخفش ان احنا نعيش من غير وجع فى حاجات كتير فى الدنيا ممكن نعملها غير ان احنا نحزن ونتألم ،احنا مش فى جنة الدنيا فيها الفرح والحزن بس الاكيد ان ربنا مخلقناش بس عشان يوجعنا ويألمنا
لما نحس ان الحزن قدر واتكتب علينا ومنشوفش غير طريق واحد اخره سراب او نشوف ان الحل الوحيد الموت لانه الحاجة الوحيدة اللى هتخلصنا من الشعور بالالم خصوصا ان الحزن بيخلينا نفقد قدرتنا على الحلم والحب وقتها مش بنقدر نشوف اى نور فى طريقنا الضلمة حتى لو كان موجود بس محتاج مننا ان احنا ننفض عنه شوية تراب
 
ولما تتصالح مع روحك وتقرر انك تخرج من "علبة السردين" هتتشوف الدنيا بعيون تانية وتحس انك مش لوحدك اللى بتتألم لان طول ما احنا فى قلب الوجع مش بنشوف غير تحت رجلينا ولما تحس ألم غيرك هيبقى كل همك  تعدي بيه من النقطة دى لان انت كمان كنت جواها جايز بس هو محتاج يلاقى دافع عشان يخرج ومن هنا لحد مايلاقى الدافع اللى يخرجه خليك انت النور اللى فى طريقه الضلمة
---------------------------------------------------------------------------------
ملحوظة : التدوينة دى مش اجزاء من رواية" نون" لكن ده بوست انا كتبته من احساسى بالرواية
                                                 التدوينة رقم 3

9 comments:

رحله البحث said...

بتشوقينا للروايه كل يوم يا ساره
طيب لو عندك سلفيها ليا لانى للاسف هاسافر بدرى 10 ايام وكل حاجه ملخبطه
الجزء الاخير فاهمه اوى
وحاسس انه اثر فيكى فعلا وفى حياتك
تحياتى

رحــــيـل said...

محمد

صباح الخير
هبعتهالك بريد بقى وخلاص
لو نزلت المنصوره ممكن تلاقيها فى بوكس اند بينز
:)
بس البوست ده المره دى مش من الرواية
ده كلامي انا يعنى ممكن تقول انه بوست من وحي الرواية

شفـقــة و إحســــان said...

ايه الرواية الجميلة دى يا سوسو على فكرة انتى شوقتينى انى اقرأها
ولا اقولك انتى تفضلى تحكيها كده لحد ما نزهق
وحشتينى يا سوسو

رحــــيـل said...

شفقة

اهلا اهلا يا منمن
ازيييييك وازى احسان
انتى كمان وحشانى

هى الرواية فعلا حلوه بس البوست ده مش منها البوست اللى فات هو اللى كان مقتطفات منها

ممكن تقولى كده البوست ده الرسالة اللى حسيتها من الروايه

نورتى المدونة

عـــفـــراء said...

السلام عليكم
فى الاول كده عارفة ان بقالى كتير مازورتكيش بس المرة دى لمن قريت البوست على الفيس شدنى اوى وحبيت يكون تعليقى نقاش او رد على كلامك
ميتهيئلى صعب جدا انك تبتدى حياة جديدة وانتى موجوعه وعلشان تدواى الوجع اللى محتاج لشجاعة زى ماقولت هتكونى فقدت لذة فى وجود الحياة الجديدة اللى بتتمنيها لان هكون الوجع سايب اثر كبير جواكى
كتير وطول عمرن بنحترم حزننا لان بقى شئ مخزون جوانا ومانقدرش نعيش من غيرة وهو اللى بيحركنا حتى لو كان بمقداف واحد وبالتالى بيكون البطل الاساسى فى حياتك
انا معاكى فى انه بيصبح ذكرى بس مش بتموت يعنى بيفضل عامل زى الصورة المركونة اللى ممكن تطلع فى اى وقت
طبعا لازم اخاف وبشدة من فرحى لانه شئ جديد عليا وان عارفة ان الحياة اللى فاتت كلها الم وحزن فتوقعى بالفرح امتزاج به
واكيد متفهمين ان الاستسلام للحزن فى حد ذاتة الم وحزن من نوع اخر بس من شدتة بيكون الاقوى ودافع لانك تستسلمى وبسهولة
طبعا احنا مش فى جنة احنا فى دنيا وان كانت مريرة باحداثها فليها نهاية وبالتالى بيكون استسلمنا للقدر والواقع مش للحزن
وبرده هتلاقينا جوه علب السردين اللى ممكن تعفن واحنا برده جواها
اعتبرية بوست ههههههه معلش ان طولت بس زي ماتقولى كنت مخنوقة وحبيت اتفك
خالص تقديرىىىىى

رحــــيـل said...

عفراء
يادى النور يا دى النور

انا مقولتش ان احنا نبدأ حياه جديدة وفى وجع بالعكس انا قولت ان لازم نهى كل وجع عشان نبدأ
الفكرة كلها ازاى بنتعامل مع وجعنا واحنا عارفين انه ممكن يكسرنا او نخطيه عشان نقدر نكمل

شوفى انا عارفه انه مش فى يوم وليلة نقرر ان احنا ننهى الحزن فى حياتنا فينتهى لازم اسباب وداوفع وكمان مهم ان اسباب الوجع تزول

هى بتفضل جوانا ذكرى بس لما بيعدى وقت مش بيكون تأثيرها زى ماكان وقت ما حصل بيخف كتير خصوصا لما نكتشف اننا عايشيين لسه رغم ان احنا وقتها كنا متخيلين ان خلاص دى النهاية

علبة السردين مؤقتة طول ما احنا مجبرين عليها لكن اول اول لما نكون احرار بنختار ان احنا نخرج منها

واحنا مش هنتحرر من كل القيود اللى مخلاينا مش عارفين نعيش الا لما نتحرر من الحزن الاول ونكون دايما عارفين انه وقتى وهيعدى

بس بقى وبكرة افكرك بالكلام ده
:))

had-befham said...

انا كمان عجبتنى الروايه دى اوى

عـــفـــراء said...

سيبك انتى انا نفسى فعلا تثبتى ده ويجي اليوم اللى تفكرينى بيه بس يارب وقتها مايكونش فات الاوان وسعتها علب السردين تكون مدة صلاحيتها انتهت
على فكرة انا متفقة معاكى فى كلامك بس تفتكرى هطبقية او طبقتية وياترى لحد امتى ؟؟؟
ياحبيبتى طول ماهو جوانا وعايشين بيه فكل جديد مش هنحس بيه حتى لو كان حلو وبيفرح
واكيد انتى عشتي منه كتير ويلا ابدئى
علشان تكونى دافع ليا عن تجربة
وبس بقى :)

رحــــيـل said...

حد بيفهم

شكرا جدا ليك على مرورك
:)
----------------------------------------------------
عفراء

يابنتى انا خرجت خلاص بره علبة السردين
:))
هو انا مش باين عليا ولا ايه
تفائلي يابنتى ان شاء الله خير
انا عارفه انتى هتخرجي من العلبة امتى
:D