Tuesday, May 4, 2010

حنين لبكرة



عندي حنين لعمري اللى جاى معاك ، لكل لحظة هنعيشها سوا كأنى عشتها قبل كده
كأنك بيتى اللى غايبة عنه بقالى سنين ووطني اللى متغربه عنه  
بحس انى ملكك وتوهت منك يوم ما اتولدت
او كأن حياتى اللى فاتت كلها كانت معاك وكل ذكرياتي تفاصيلنا سوا
مشتاقة لاحلامنا اللي رسمناها زمان كأننا اتربينا مع بعض
ضحكنا مع موج البحر واحنا ع الشط بنلعب فى الرمل 
ومسكة ايدك لايدى فى شارع زحمة وانت بتجرى عشان تعدي بيا الطريق
حاسة ان وجودى معاك منطقي جدا كأنه قدر متفصل على مقاسنا بالظبط
اول مره ابقى شايفة بكرة واضح قوى كده كأنه قدام عينى
حاسه بكرة جاى من غير احتمالات فشل او خوف وقلق
جاي بيقين اني فعلا اتولدت من جديد وانى ببدأ مرحلة مختلفة تماما فى حياتي
عندنا احلام حقيقة رسمناها على قدنا ، وعمر تاني نحقق فيه احلامنا
وفرحة مستنيانا بنجاحاتنا وانجازتنا ، وذاكرة جديدة مافيهاش وجع 
بنعلي رصيدنا العشقي كل لحظة من غير ما نجرح او نعند او نكدب او نتجمل 
عشان كده صفحتنا دايما هتبقى صفحة بيضا بنلونها بس بألوان هوانا وفرحتنا
مآمنه بيك جدا ومصدقاك عارفة انك كمان مأمن بيا ومصدقني
ومحترم وجودي فى الدنيا بالشكل اللى انا مختاراه 
وبكل هدوء صالحتني على نفسي وعلى الدنيا
خلتني آمن بأن الاجمل من انى اجري ورا احلامي المستحيلة 
انى الاقى حبيب يجمل الواقع حواليا ونرسم سوا احلامنا و نلونها بدفا وونس وصدق وعشرة طيبة
 خلتني اتنازل بطيب خاطر عن ثورة وعند وعصبية كنت بدافع بيهم دايما عن كوني انا 
 معاك مش محتاجة ادافع عن نفسي مطمنة انك انت اللى هتدافع عني وهتحمي وجودي
 شكرا لانك ماغبتش ولا لحظة من يوم ما اتخطبنا
 حتى وانت بعيد دايما حاضر فى كلامي وتفكيري وسكوتي وفرحتي واحلامي
حاضر بأمانك وطيبتك وسؤالك عني حاضرنى بكل تفاصيلك كأنك هنا
بيشوفوك فى عنيه ويسمعوك في نبض قلبي 
وبيستغربوا لحالة الصفا والونس والدفا والفرحة اللى انا عايشها دلوقتي
وكلهم عارفين ان ده بسبب وجودك اللى نور عليا حياتي بعد الضلمة اللى عشت فيها سنين
ربنا مايحرمني منك وتفضل مالي حياتي فرحة وحب وسعادة ومشاعر كتير اول مره احسها وياك
ويقدرني ربنا اوفيك حقك واكون سبب سعادتك دايما 
                                                 
                                                     التدوينة رقم 4

10 comments:

Cognition Sense said...

جمال

حسيت بالجمال و انا بقرا البوست دا
جمال بكل معنى الكلمة

شكراً على الشعور دا وربنا يتمملك بخير

تحياتي

مجرد حلم صغنتوت said...

ربنا يسعدك ويوفقك يا سارة

حلو كلامك اوي وما شاء الله حلو احساسك ده وتواجده في حياتك بالصورة دي
ربنا يخليكم لبعض ويتمملكم على خير يا رب

رحله البحث said...

ربنا يديم السعاد ه عليكم
بوست فى وقته فعلا اعتقد انه يستاهل كل الكلام الحلو دا والتغيير ملحوظ
ربنا يوفقكم ويتم لكم على خير وتعيشوا فى سعاده طول العمر

ماما أمولة said...

ما اجمل الحتواء والاحساس بالأمان

تدوينة رائعة تسلم ايدك يارب

قلم رصاص said...

أحييكِ على هذه التدوينه الرائعه
وربنا يوفقكم ان شاء تعالى

تقبلي مروري وتحيتي

رحــــيـل said...

شكرا ليكم جميعا

ربنا يوفقكم ويروق بالك ويسعد قلبكم
وينور حياتكم زى ما انتو منورين المدونة

تسلموا كتير
:))

youma said...

يااااااااااااااااااااه قد ايه الكلام بسيط خالص وصادق لحد الدموع بجد ربنا يسعدكوا ويتمملكو بخير عندي تعقيب على كلمة متفصل دي هههههههههه فاكرة لما كنا بنقول احنى عايزين حد متفصل علينا وكنا بنشوفه وهم صعب يتحقق اهو ربنا فصلهولك هههههههههه يابخته بيكي ربنا يسعدك
بحبك قوي

رحــــيـل said...

هياااامى

تسلميلى يارب

ايون هو التفصيل اللى كنا بنتكلم عنه دايما
هههههههه
عقبالك يا حبيبة قلبى يارب افرح بيكى واشوفك متهنية وسعيدة
قادر يا كريم

dandana said...

:)

والنبى البنات دى طيبة كدا وعلى نياتها
واقل حاجة بتفرحها

أومال بيقولوا مش فاهمين المرأة ليه وكلام كتير مكلكع كدا


ربنا يهنيكى ويفرح قلبك أكتر يا سوسة

رحــــيـل said...

مي

ايون يا بنتى فعلا
بس مش كل الرجالة ان جيتى للحق
فى رجالة كده تحسيهم فلتة مش بيتكرروا كتير
:))
ربنا يرزقك يارب بواحد منهم
ويسعدك وينهيكى

تسلمى يا ميويا