Wednesday, May 5, 2010

وعلى المتضررين اللجوء للإنفجار



مش عارفة ابدأ منين من حال التلاميذ اللى لا يسر عدو ولا حبيب، بيوصلوا للصف السادس الابتدائي ومش بيعرفوا يكتبوا اسمائهم ، وطبيعى يعنى بينجحوا بالغش طول السنين، وتلاقى مبررات جاهزة دايما انهم  يغشوا ، منها شكل المؤسسة التعليمية  ، المدرسين كمان بيريحوا دماغهم من العيال فينجحوهم وخلاص واقلب وهات غيرهم واهى ساقية وعمالة بتدور ، واللى يقولك اهاليهم طالع عينهم عشان يربوهم – مشوها يربوا لانى اساسا مقتنعة تماما ان احنا  معندناش ما يسمى بثقافة التربية احنا شعب ربته الايام والليالي – المهم يعنى معظم التلاميذ –مش كلهم برضه – تحسهم كده عندهم عته ومش عارفين هما جايين منين ولا بيعملوا ايه ولا راحين على فين ممممممم طيب فين المشكلة؟؟
من اللى شوفته يعنى طول خمس سنين فاتو- مدة شغلى فى معهد ابتدائى ازهرى- ان المشكلة كالتالي
الاهالى متخيلين المدرسة صندوق سحري المفروض ولادهم يطلعوا عباقرة منها على اساس طبعا ان نظام التعليم عندنا حاجة مافيش بعد كدة ، ويتعاملوا مع المدرسين على ان ولائهم الاول والاخير لرسالته اللى هى التدريس لان المعلم كاد ان يكون رسولا وان التلاميذ هما شغلهم الشاغل كأن مالهمش حياة غير المدرسة ولا ليهم طلبات وبيوت وولاد ومشاكل ، هما مالهمش دعوه بكل ده كل اللى يهمهم انه ولادهم مسؤولين منهم مسئولية كاملة يجبوهم الصبح يرموهم فى المدرسة واخر اليوم يعدو يخدوهم لا في متابعة فى البيت ولا اهتمام بشكل خاص بدراستهم – الا من رحم ربي- وفعلا واعي انه عنده بني ادمين بتتشكل فى البيت
اما المدرسين فدول بقى حاليا انقسموا فريقين وكل فريق وله دماغه اللى شغال بيها غافل تماما عن كونه معلم صاحب رسالة وانه مربي وقدوة والكلام ده اللى انقرض من زمان الوضع الوقتى غير كده خالص
المدرسين بيتعاموا مع الطلبة على انهم ند ليهم وجودهم فى المدرسة غير مرحب بيه ،يعنى ياريت يريحوا نفسهم ويجوا على الامتحانات هما عندهم استعداد يتعبوا بس فى انهم يساعدوهم على الغش وينجحوهم على انهم يدرسوا ويتعبوا قلبهم فى الشرح
الفريق الاول المدرسين الاساسين دول اللى بقالهم سنين شغالين وطالع عينهم وعندهم تراكمات من الشغل تخليه يكره التدريس والطلبة وحياته كلها ، طبعا هو عنده مشاكله الشخصية وهمومه ومتطلباته مش طالبة يعنى العيال كمان ودوشتهم وغبائهم واهاليهم وشكواهم ورؤساؤوا فى العمل وتحكماتهم  وزمايلوا اللى بيتكلموا عليه من ورا  والقيل والقال ووووووو كفاية بقى كل السنين اللى فاتت من عمره وهو مش عارف ضاعت ازاى وفى ايه؟
هما دلوقتى شايفين انهم المفروض يرتاحوا طالما تم التعاقد مع مجموعة شباب لسه متخرجين واللى الشغل بالنسبة ليهم فرصة ، يعنى يشتغلوا بقى ويطلع عينهم هما شاوفوا ايه من اللى هما شافوا طول فترة شغلهم
وهنا يبدأ الصراع مابين القديم والجديد
لان المتعاقدين شايفين انهم موظفين زى بعض الاتنين بيقبضوا وبياخدوا حصص المفروض محدش يرتاح على حساب حد لان مش ذنبهم انهم شغالين بقالهم سنين
المتعاقدين الوقتى بقى بصراحة طالع عينهم برضه قال ايه عايزينهم يعملوا تربوى عشان الكادر وكمان دورات icdl –  دى اوقات بتكون متفبركة – المهم يعنى ان الشروط دى المفروض انها مطلوبة  لتنمية قدراتهم فى العمل والتواصل مع التلاميذ بحيث انهم يستحقوا فلوس الكادر بس اللى بيحصل غير كده
اللى بيحصل انهم بيقدموا فى كليات تربية وهما متضررين جدا من فكرة انهم هيذاكروا من تانى ويحضروا محاضرات ويمتحنوا وووووو اذا كان اصلا احنا طول فترات تعليمنا فى كل المراحل التعليم بالنسبة لينا ماهو الا تحصيل حاصل واحنا ما بنصدق نخلص دراسة من هنا وننسى اصلا ايه اللى كان فى الكتب ، بالرغم ان ده كان اصلا  دورنا فى الحياة وقتها ومافيش ورانا ولا قدامنا غيره
انما الوقتى ؟؟؟ الوضع اختلف كتير لان الدراسة مبقتش المحور الاساسى لحياتنا الشغل والحياة العملية دلوقتى اهم وخصوصا بقى المدرسات الشابات اللى متجوزين بقالهم سنتين تلاته وعندهم اطفال صغيرين دول بقى المفروض يجوا يشرحوا حصصهم ويسافروا يحضروا محاضراتهم ويرجعوا بيوتهم يطبخوا لازواجهم ويهتموا بولادهم  ويذاكروا محاضرتهم ويحضروا الدرس اللى هيتشرح تانى يوم ويفضلوا فى الدوامة دى كام شهر
طيب دول يجيبوا تركيز منين عشان يشرحوا للتلاميذ خصوصا ان العيال اشقية مووت ،هيجيبوا طاقة منين لكل ده ؟ ماهى لازم تقصر فى حاجة اكيد هتيجى على شغلها وهتقلب حصصها ومش هتشرح تدخل تكتب كلمتين ع السبوره وخلاص عشان تجرى تسافر تحضر محاضراتها او ترجع بيتها
ومافيش محصلة غير شهادة تتاخد عشان يتاخد بدلها فلوس ، العلم نفسه والدراسة وتنمية قدراتهم لا بتزيد ولا بتتنيل بالعكس بيضغطوا اكتر وتراكماتهم السلبية تجاه الشغل بتزيد وحياتهم برة الشغل بتتأثر بسبب الضغوط اللى جوا الشغل يعنى اصلا موضوع التربوي ده فى الفاااااااااضي ونظام فاشل جدا ومافيش منه اى استفادة لا على المدرسين ولا الطلبة - الا لو كان اختيارى مش مفروض - طيب ما يدولهم الكادر بطيب خاطر ونية صافية بدل الحوارت والحركات دى وبدل الفلوس اللى عمالين يصرفوها عليه ولا احنا ماشين بمبدأ اللى الحكومة بتديه باليمين تاخده بالشمال
مش عارفة جيت افكر فى مين اللى غلطان فى الحوار ده كله ،الولاد عشان مش بتذاكر ومش بتفهم ،ولا اهاليهم عشان لسه بيتعاملو مع المؤسسات التعليمية على انها فعلا تربية وتعليم ومش فاهمين الكارثة اللى ولادهم بيعانوا منها ، ولا المدرسين اللى مقصرين فى شغلهم وليهم الف عذر بسبب ان اصلا النظام كله فاشل ايون هو النظام اللى غلطان ومن هنا لحد ما النظام يعترف بغلطته كان الله فى عون الجميع وعلى المتضررين اللجوء للإنفجار- فى نفسهم طبعا- 

                                                              التدوينة رقم 5

4 comments:

قلم رصاص said...

حاجة فعلا محزنه وتسد النفس
انا بجد صعبان علي الأجيال الجديدة اللي وصل الحال بيهم لسبب او لأخر لهذا المستوى

تخيلي انه مفيش جامعه مصريه من بين اهم 500 جامعه على مستوى العالم
فمابالك بقى بالتعليم الأساسي والاعدادي والثانوي

مصر حقيقي بتعيش أزمه كبيره اوي في النقطه دي تحديدا لأن التنميه البشريه وعلى رأسها التعليم هي أساس تقدم أي امه

احييكِ أستاذه ساره على الطرح المثمر

واتمنى ان تنصلح الأحوال وتتبدل لما فيه خير لمصر ان شاء الله

تقبلي مروري وتحيتي

رحله البحث said...

ههههههههههه
مشكله ومش عارف مين الغلطان
بس اعتقد انها نتيجه طبيعيه او تطور طبيعى للى بدأ من سنين طويله
يعنى مثلا جده واحد صاحبى كان معاها ابتدائيه قديمه من قبل الثوره ايام الانجليز كانت بتكتب وتقرا انجليزى
دلوقتى طالب الجامعه مش عارف يقرا عربى
منذ بدأنا رحله السقوط للهاويه لم نتوقف للحظه بل نحن نسرع اكثر واكثر وتلك نتيجه طبيعيه
بس ربنا يستر لانى حاسس ان جينات الاجيال اللى جايه هتتحور وهتبقى الحاجات دى فيهم من قبل ما يتولدوا ماهو دا تطور طبيعى برضه

رحــــيـل said...

قلم رصاص

اهلا استاذ سيد

هى فعلا حاجة محزنة انا ماكنتش لامسه ده قبل كده غير لما عشته فعلا وشفت تفاصيل العملية التعليمية عامله ماشية ازاى

حاجة مهزلة فعلا

شكرا جدا ليك
-----------------------------------------
رحلة البحث

اهلا يا محمد
ايون شوفت الفرق فعلا
ده نتيجة ان اصلا مافيش شرح ومافيش مذاكرة لانهم عارفين انهم هينجحوا بالغش
اللى مبقاش مشكلة بالعكس ده بقى العادى
الامتحانات بتتحل على السبورة
والمدرس اللى مش بيغشش بيهاجموا جدا

انا بطلت اصلااراقب فى لجان عشان القرف اللى بيحصل

شكرا يا محمد على متابعتك
:)

همس الاحباب said...

مع الاسف ده واقع وحقيقة نعيشها بكل تفاصيلها واصبح الجميع كانهم فى ساقية او حلقة مفرغة لابداية لهل ولا نهاية
كان الله فى عون الجميع
تحياتى