Thursday, May 6, 2010

زرت نفسك النهاردة؟



دور جواك هتلاقيه فى حتة ضلمة محدش معاه مفتاحه غيرك ومحدش اصلا عارف انه موجود غيرك اوقات حتي مش بناخد بالنا انه موجود صندوق ذكرياتك اللى اتنسى وسط زحمة حياتنا وسط الاحداث الكتير اللى مرت علينا وماكناش مخططين ليها فتحس انك طول الوقت عايش متفاجأ ومنفجل عنيك وبتسأل نفسك ايه اللى بيحصل ده؟ ده اللى احنا مش عاملين حسابه ، وبنكتشف فجأة ان السنين بتجري بسرعة والعمر بيعدي بينا
تحس انك فى سبق بس انت مش عارف انت بتسابق مين ولا اذا كان جريك فى الدنيا ده هروب من حاجة بتجرى وراك ولا استعجال على اللى جاى وتنسى ان الاهم من الجري انك تقف لحظة مع نفسك تشوف فيها انت وصلت لايه وبتجرى ليه ؟ وعايز توصل لفين 

وانت قاعد مع نفسك اللى هتفرح بيك لانك اخيرا زورتها ومعاك هديتك بعد غيبة صندوق ذكرياتك اللى انت طلعته من الحتة المدارية فى روحك ، هى كانت مشتاقة لذكرياتكم سوا وانت الدنيا كانت واخداك منها بعيد عمال بتجرى وخلاص . هتلاقى تفاصيل كتير عدت عليكو انت كنت نسيها ،فرحتك وانت صغير بلعبة كان نفسك فيها واحلامك بريئة ، ولحظات حب ولمة حلوة مع اصحابك وضحكة صافية من قلبك مع ناس كانت هنا وتاهت وسط الزحمة وناس لسه هنا وبرضه الزحمة متوهاهم بس الاكيد ان هما كمان لما يفتحوا صندوق ذكرياتهم بيفتكروا اللحظات اللى كانت بينكم
لما تفتح صندوق ذكرياتك هتعرف انت كنت ناوي على ايه قبل كده وشوف انت الوقتى فين من اللى كنت عاوز تعمله و ووقتها هتقرر انت هتكمل جري ليه ؟ وعلى فين ؟

لم تفاصيلك ومشاعرك اللى اتبعترت ولحظاتك اللى هربت والملامح اللى اتمردت على قفلة الصندوق عليها دخلهم تاني واقفل عليهم ورجع صندوق ذكرياتك للحتة المدارية فى روحك وكمل جري من تاني

                                                               التدوينة رقم 6

3 comments:

ندى الياسمين said...

بصي انا عاجبنى اصلا فكره الثلاثين تدوينه دي
بس يعنى مش عارفين تستنوا بعد الامتحانات

مش عارفين انى فى رابعه ابتدائي دلوقتي واولى فى نفس ذات الوقت


ام هند البوست بتاعك جميل اوي
وفعلا الوقفات مع النفس دي مهمه اوي

زي ما انتى قلتي على الاقل نعرف كنا عايزين ايه ووصلنا لايه وهانعمل ايه بعد كده

بوست جميل يا جميل

وانا هازود تدويناتي
بس مش يوميا اصل اموت كده منكم بقى

هبة الحياة said...

لما تفتح صندوق ذكرياتك هتعرف انت كنت ناوي على ايه قبل كده وشوف انت الوقتى فين من اللى كنت عاوز تعمله و ووقتها هتقرر انت هتكمل جري ليه ؟ وعلى فين ؟

سؤال مهم جدا
وكنت بقوله لنفسي امبارح
انا كنت فين وبقيت فين؟ وعايزه ايه؟

رحــــيـل said...

ندى الياسمين

منوووووووره يا شيمو بجد والله
ايه الهنا ده

وبعدين انا مش اخر مره كلمتك فيها كان عندك 18 سنة

يالهوووى بتصغرى بس ازاى قوليلى وسرك فى بير
:))



هبةالحياة

شكرا جدا على مرورك يا هبة
المهم تكونى وصلتى لاجابة قبل ما تكملى جري
نورتي