Wednesday, May 12, 2010

تدوينة حرة


مش مصدقة انى كملت 11 تدوينة دى معجزة  !
عمرها ما حصلت انى اكتب 11 يوم ورا بعض . ده انا فى عز ما كنت موجودة فى التدوين عمري ما قدرت اعمل ده ، بقيت حاسة انى فى امتحان  .. وكل شوية ابص على الوقت واشوف انا كتبت ايه ولسه فاضل قدامى قد ايه .. زي اللى بيجرى فى سبق مع نفسه

بس هو انا باين النهاردة عندي حالة ملل .

مش عارفة هى فكرة الكتابة نفسها كل يوم هي السبب ولا عشان انا مش بحب التزم بحاجة ومواعيد بقى وكده ؟ ، حاسه النهاردة انى مش عايزه اكتب عن حاجة معينة محتاجة اقف اخد نفس عميق جدا وبس ، فكرت انزل من حاجات انا كاتباها من زمان فتحت وقلبت ودورت حسيت برضه انى مش عايزة انزل حاجة بعينها ، وكمان حبيت ان الشهر ده يبقى تاريخ للفترة دي عشان كده اعتقد انى هاحاول اخلي كل تدويناته طازة ، قررت اخليها النهاردة تدوينة حرة

نرجع للملل .. ممكن واحتمال اكيد انه يكون بسبب الشغل . الشهر ده طحن جدا وكل ما اخلص شغل يطلعوا فى موال جديد والصبح فى الكنترول وبعد ما ارجع البيت بخلص شغلي الاساسي

وبضطر اصحى بدرى وانا اصلا بقيت بنام متأخر ومش بلحق انام ومابقتش اصلا بحب انام

اه انا بقيت استخسر انام مع ان قبل كده انا كنت بقضيها نوم كتييير غالبا كان هروب.. بس انا حاليا فعلا بحس ان الوقت اللى بنامه بيضيع من عمري . نفسي افضل صاحية كل لحظة بقى عندي حاجات كتير اعملها عايزه اقرا واكتب وارجع اتابع مدونات تاني واسأل ع الناس اللى انا مقصره معاها ، انا نفسي مفتوحة لكل حاجة الا الشغل بصراحة عشان كده نفسي اغمض عيني وافتحها الاقي الشهر ده خلص ررررررخم موووت من اوله لاخره وزحمة و صحيان بدرى والتزام كل يوم ... هيخلص هيخلص اكيد ، يارب هونها

ال 11 تدوينة اللى فاتو فى كل واحده فيهم ببقى مش عارفة انا هكمل ازاى وبحس انها اخر تدوينة هكتبها اوقات كتير كنت بفتح صفحة وورد وانا مش عارفة هكتب ايه ، الكتابة والكلام مش هيخلصوا.. لان لا المشاعر بنتهي ولا الافكار . بس جايز الفكرة فى ان ازاى نرسم اللى جوانا ع الورق و ازاى نلونه ونعمل منه لوحة حلوة تتحس قبل ما تتفهم

كنت اتمنى ان الحملة تكون فى شهر غير ده عشان يبقى بالي رايق ومركزه اكتر من كده وفاضية تماما ومش ورايا التزامات شغل

بس اعتقد ان الحملة كانت مهمة جدا عشان افتكر اصلا انى لسه بعرف اكتب وان كل مشكلتي انى بكسل اكتب ،ان شاء الله هكمل ربنا يقدرنى
                                                    التدوينة رقم 12

3 comments:

Lyssandra said...

صباح الفل :)

فعلاً التوقيت ده صعب جداً للتركيز أو الكتابة
أنا كان نفسي أقدر أركز بس بصراحه انا مابعرفش التزم بالفروض دي :)
لازم أكتب 30 يوم
لأ ماعرفش :))


ياللا كويس انك عارفة تواصلي لحد دلوقتي
بس المهم كملي بهمّة

صباحك ورد يا سارة :)

SAYED SAAD said...

اكيد انشاء الله هتقدري تكملي
كل التوفيق


سيد سعد

sabry abo-omar said...

على فكرة سردك للمواضيع هنا فكرنى بطريقة كتابة حاولها أستاذنا زكى نجيب محمود لكتابة كل وأى شئ يخطر على باله فى سرد جميل وفلسفى ليخرج فى نهاية التجربة فى فلسفة ذاته وعلاقته بالحياة..تجربة مثرية أحييكى عليها بشدة وأتمنى لكى التوفيق