Friday, May 14, 2010

عزف

لسه راجعين من شوية من حفلة فى نادى جزيرة الورد بالمنصورة كانت لمجموعة من فرق مزيكا وغنا كانت جميلة جدا بس للاسف مكملناش للاخر عشان الوقت 
المهم بقى انا ايه اكتر حاجة كانت شغلاني فى الحفلة ومركزة معاها ؟؟؟ 
الا وهي الحالة اللى بين كل عازف والألة اللى بيعزف عليها تحس انه طاير وفى دنيا تانية
كأنه متوحد معاها منفصل تماما عن الواقع
 نفسي حقيقى اجرب الاحساس ده 
اول مره النهاردة اتمنى انى اقدر اتعلم العزف على اى الة عشان اعيش الحالة اللى حسيتها عند العازفين
اعتقد انها بتخلق حالة صفا او كانها بتغسل الروح وبتخرج اى شحنة سلبية 
وبعد ما تخلص تحس انك كنت فى رحلة مع نفسك وان حالتك المزاجية اتغيرت كأنك بتتولد بعد كل مرة خلصت عزف فيها
مش عارفة هو احساس حقيقى ولا انا اللى حسيته كده من خلال حالة التوحد اللى كنت ملاحظاها
اوجايز حاسه انى لو عملت ده هيكون ده احساسى
مش عارفه فعلا
المهم بقى انى كااان نفسي فعلا اكون بعرف اعزف عشان الحالة دى مخصوص
بس فى لحظة جه فى بالى تفكير فى اتجاه تانى ان اكيد اى حد فينا بيعمل حاجة بيحبها فهو بيعيش الاحساس ده يعنى لو رسام هيبقى عايش الحالة وهو بيرسم  لو شاعر او كاتب هيبقى عايش الحالة وهو بيكتب,.انا حالة الصفا دى بحسها اوقات بعد ما اخلص كتابة نصوص او تدوينات معينة
بس حسيت برضه انها مش هتبقى بنفس القوة بتاعة موهبة العزف

التدوينة رقم 14   

6 comments:

Cognition Sense said...

موافقاقي على كل النقاط اللي قولتيها بس مش موافقاكي على إن العزف موهبة، هو يمكن موهبة لما يكون الواحد بيعزف ببراعة مهولة... بس عدا كدا أي حد ممكن يعزف أي آلة... و لو عايزة تتعلمي ماتحطيش في بالك إن الوقت اتأخر عليكي... يعني أنا ابتديت اتعلّم كمنجة من كام شهر قليلين و برغم إني لسة مابعرفش أعزف خالص إلا إني لما أتمرّن على الحاجات اللي أخدتها في الحصة الإحساس اللي اتكلمتي عنه فعلاً بحس بيه... دايماً فيه ترابط شديد جداً بين العازف و آلته

تحياتي على التدوينة الجميلة و الرقيقة دي
:)

EviL Of SaD said...

احساس جميل بحسه لما بكتب ولما بسمع موسيقى هاديه وكل ما اجى اسمع حاجه بحبها بتخيل انى انا الى بلحنها فعلا احساس رقيق قوى تسلمى

Gehad mousa said...

اه فعلا كل واحد ليه احساس بنقله الى عالمه الخاص حيث يكون ملك لنفسه فقط

sabry abo-omar said...

متفق معاكى تماما بس ليا رؤية مختلفة للموضوع .. بأحس إن الإبداع والفن موهبة ذاتية عند الإنسان المتميز بالإحساس العالى والفنون بأشكالها لغة للتعبير ..ممكن واحد يتعلم يعبر بالرسم والتانى يعبر بالكلمة والثالث بالموسيقى ويبقى بينهم جميعا أرضية واحدة فى الإحساس ..يعنى الموسيقى الملهم لو كان تعلم الكتابة كان سيبقى كاتب ملهم ومبدع برضه.. والله أعلم

MR.PRESIDENT said...

احناطلعنا بلديات
يعني
مع اني مليش في الحفلات
بس ربنا يوفقك
ويكرمك
ويهدينا ويهديكي ويطرح البركة فيكي وفينا

Big Code said...

انا معاكي جدا
انا باعزف كمنجة من 3 سنين تقريبا
متتصوريش العلاقة اللي بينا عاملة ازاي , لازم اتكلم معاها كل يوم ده لازم
في الاول كان تمرين ولازم اعمله, دلوقتي عادة جميلة مقدرش ابطلها

شدي حيلك وابتدي اتعلمي الآلة اللي تحبيها وصدقيني مش هتندمي

ولو محتاجة اي مساعدة متتردديش تسأليني