Thursday, May 20, 2010

شر اوقات لابد منه



بنحتاج اوقات نبقى اشرار اصلا احنا مش طيبين على طول ولا الاشرار اشرار على طول

انك يبقى عندك القدرة اللى تخليك تضايق غيرك عن قصد دي اكيد حاجة مش كويسة بس اوقات غيرنا هو اللي بيستفزنا اننا نعمل كده لانه مش بيسيب لينا خيارات تانية لتصرفاته معانا
ومش بيقولوا ان لكل فعل رد فعل مساوي له فى المقدار ومضاد له فى الاتجاه

لو حقك متقدرش تاخده غير وانت شرير خليك شرير لان اللى هيوصلك انك تتعامل معاه بشر اكيد يستاهل المعاملة دى لانه اكيد هو اللى دفعك لتفكيرك ده ولحالتك اللي مش عارف تطلع منها غير لما تاخد حقك او تطق تموت او تعمل ملاك وتفضل تاخد فوق دماغك
منتهى السذاجة انك تفضل طيب طول الوقت
ومتقلقش لو انت حاسس انك طيب الوقتي ومش عارف تتصرف مع الوقت هتتعلم تبقى شرير مع الاشرار اللي بيضايقوك المهم يكون عندك النية انك تتغير وتتحرك من النقطة اللى انت واقف عندها 
ويوم ما الكورة تبقى فى ملعبك خلص حقك
بس متنساش تدي لضميرك اجازة وتحط منوم  لقلبك فى حدوتة قبل اللى نوم
وكمان متحضرش حاجة فى ذهنك الا القسوة والضيق وكل المواقف اللي ضايقتك
عشان تعرف تمثل دور الشر صح

        التدوينة رقم 20 

5 comments:

MR.PRESIDENT said...

طب ما نتحسبن وخلاص ..
مش لازم نبقي أشرار الا في حالة واحدة بس
الكرامة
لما الكرامة تتداس ابويا قلها لي يبقي يا روح ما بعدك روح .. وأنا وانت وربك يسهل بينا .

Cognition Sense said...

اسمحيلي إني أعارضك... أنا شايفة إن مادام إحنا كارهين الشرير دا فازاي هنبقى راضيين عن نفسنا لو بقينا زيّه؟ حتى لو معاه بس عشان هو شرير... دا مش مبرّر

و الأكيد إنك مش هتكوني ملاك مع حد مش كويس و بيإذيكي.. إنما اللي تقدري تعمليه إنك تخليه يعرف إنه شرير... إنك تواجهيه بشرّه

لو مافهمش يبقى خلاص الإنسن دا مايستاهلش إنه يفضل في حياتك

تقبلي تعليقي
تحياتي

زهرة المطر said...

بوست جاى فى وقته يا سارة :))

على كده انا طلعت شريرة خالص :D :D

dandana said...

الغاية تبرر الوسيلة يعنى


اومال الثقة فى العدالة الإلهية راحت فين بقى

وأديكى قولتيها فى الآخر
هاتموت اهم حاجة فيك..ضميرك

dandana said...

اه
على فكرة
حتة انك مش هاتبقى شريرة غير مع الشخص اللى دفعك لدا ولأنك لازم تبقى شريرة عشان توصلى لحقك...الحتة دى فيها خلط كبير مابين انك تتحولى لشخص سئ وتموتى ضميرك وإنك تدافعى عن حقك وحقك فى انك تدافعى عن حقك


فى فترة من الفترات كنت مصدقة فى قانون نيوتن...بس بعد كدا...اكتشفت حقيقة كبيرة

تعالى عندى عشان تشوفيها..بما انك مٌلهمتى دلوقتى
:)