Friday, May 21, 2010

حدوتة قلبك

قبل النوم

احكي لنفسك حواديت روحك

واقنعها بانك طير .. مش مجروح

رفرف بجناح الحلم الجاي

على وجع اليوم

طير لبعيد

الروح لساها معاك

تيجي و بتروح

تاخدك لهناك

وتحس غناك بيحني الكون

فرح قلبك

بطّل ترمى عليه اللوم

هو كمان زيك مدبوح

وبينزف همك

بتزيد الهم عليه !

طب ليه؟

وانت فى امكانك تداويه

طبطب على جرحه

شد لحاف الصبر عليه

صالحه و دفيه

وساعتها يفضفض ويبوح

بالالم اللي بقاله سنين مداريه

كان خايف ينطق لتوديه

لبلاد منسية فى ركن الروح

..


قبل النوم

وانت بتحكى حكاية لنفسك

تلاقيك مهموم

بتلف فى نفس الحكايات

من غير نهايات

وازاي تلاقيك لو قلبك تايه مش حواليك ؟

طبطب على قلبك

شد لحاف الصبر عليه

صاحبه وهدّيه

تلاقيه مستني يتونس .. بيك

وتنور ضلمته بإديك

فيقيد جواك الفجر جديد
-----------------------
التدوينة رقم 21  

5 comments:

الشـوكة الــنـاعـمـة said...

حلوه اوى حكايه
الحواديت دى
اسلوب متميز وكلمات رائعه ايضا
تحياتى

MR.PRESIDENT said...

تحياتي علي الكلمات ..
بجد تغوص جوا المشاعر ..
وفيها نغم ..
وسرعة ..
وكمان مقطوعة غنائية ..
تسلم الايادي ..
وهانت

قلم رصاص said...

كم كانت هذه المحاوله رائعه

مزيد من الابداع والتميز

تقبلي مروري وتحيتي

زهرة المطر said...

جميلة جدا يا سارة
حلوة بجد :))

sab7al5air said...

انا حبيت الرزم الي في الكلام وكمان الفكره والصوره انا خاتها علي موبايلي
اسعدني مروري من هنا ان شا الله حابقا ارجع تاني
تحياتي
علا