Friday, May 7, 2010

UP اوعى يفوتك


فيلم كرتون UP رائع جدا بداية الفيلم مدهشة هتعيشك حالة جامدة من اول 10 دقايق فى الفيلم ، اول مرة اشوف فيلم بدايته لوحدها حدوتة تشدك جدا انك تكمل باقي الفيلم مع ان باقى الاحداث هتاخدك لمنطقة تانية خالص بس هتفضل مسيطرة عليك الحالة اللي انت عشتها من الاول
قصة حب فى منتهى الرومانسية بين البطل والبطلة اللى بيحبوا بعض من وهما اطفال وازاي قضوا عمرهم كله سوا في رحلة حب
إيلي البطلة عسولة جدا رغم ان دورها قصير الا انه اتعمل حلو قوي بالشكل اللي يخليها حاضرة طول الاحداث ولان هى المحرك الاساسي لاحداث الفيلم ركزوا على دورها جدا فى اول 10 دقايق ومع ذلك هتكمل الفيلم وهيخلص وتلاقي نفسك مشغول جدا بيها كأنها ماغبتش ولا ثانية من ع الشاشة طول مدة الفيلم
الاحداث مترابطة مع بعض بشكل جميل من اول لقطة لاخر لقطة وكمان الشخصيات دمها خفيف
البطل الزوج العجوز اللي بيحاول انه بعد سنين يحقق لزوجته وعده ليها وهما اطفال وبيبتدي حياة المغامرة مع طفل صغير بيظهر فى حياته عن طريق الخطأ وبيكمل معاه باقي الاحداث 
الفيلم حقيقي ممتع جدا وفي معاني كتير حلوة سواء بين الزوجين او بين البطل والولد الصغير وبين باقي ابطال الفيلم 
الاطفال الصغيرين هيستمتعوا جدا بجو المغامرة اللى فى الفيلم وخفة دم الحوار بين الابطال 
اما احنا بقى ياكبار شوية - شوية مش كتير يعنى :)- فأعتقد انكم زي حالاتي هتستمعوا جدا بالحدوتة الحلوة اللى بين الزوجين 
اسيبكم تحملوا الفيلم بقى       

الرابط الأول
http://download687.mediafire.com/m0tyyjyuxETg/entgnmynagy/M7La.NeT.Up.2009.DVDRip.Arabic.By.Warm+Heart.rar
الرابط التاني

http://download295.mediafire.com/vfgy49jxzYzg/ed5zzn13unz/M7La.NeT.UP.2009.By.Warm+Heart.rar

                                 التدوينة رقم 7

3 comments:

MR.PRESIDENT said...

مش عارف انا مستمعتش بيه ليه ـ ومعلش لو كان أول راي معارض .. بس كويس انه عجبك
لولا اختلاف الازواق لبارت السلعه

رحــــيـل said...

MR.PRESIDENT

:)
لا عادي ولا يهمك
وزي ما قولت اختلاف ازواق

شكرا ليك

Omaima said...

حلو أوي أوي أوي ، أنا بعتبر نفسي كييفة سينما بشكل عام وأفلام كارتون بشكل خاص ، و"أب" من أكتر أفلام الكارتون اللي بحبها ، حتى هتلاقيه في مفضلاتي بتاعة البروفايل

زي ما انتي قلتي ، أجمل جزء وأكتر جزء بحبه هو بتاع إلي وكارل اللي في الأول ، المشهد الصامت الطويل اللي بيعرض حياتهم .. يالهوي على جماله ، أول مرة شفت الفيلم قلت لصاحبتي اللي شافته معايا إن نفسي أعيش حياة بسيطة وحلوة كده

اختيار موفق جداً
:)