Thursday, June 24, 2010

لأ بجد كده كتير

 الصورة دى وجعتني جدا وبكتني من اسبوعين اول لما الموضوع بدأ ينتشر ع النت
بصراحة قبل كده كنت مكبرة دماغى تماما من اي اخبار ممكن توجعني او تضايقني من باب انى طالما مش هقدر اعمل حاجة وكل اللى هيحصلي لما اقرأ خبر مؤلم انى اتوجع ومزاجي يبوظ يبقى خلاص قلة قراية الأخبار احسن
اصل مش انا اللى هصلح القرف اللى احنا عايشين فيه يعني
صورة خالد بعد التعذيب وتفاصيل واقعة التعذيب نفسها غير انها وجعتني لكن كمان خلتني اهتم مش بقضية خالد وبس اللى بقالى اسبوعين متابعة كل اللى اكتب فيها وكل اللى البرامج اللى اتكلمت عنها سواء كانت حقيقة او كدب 
بدأ يظهر قدامي حوادث تعذيب كتير حصلت قبل كده وماكنتش اعرف عنها حاجة حسيت انى بجد مكسوفة من نفسي بقى كل ده يبحصل وانا ولا فى دماغى ولا حتى كنت بهتم انى اتابع اللى بيحصل للناس اللى عايشة فى نفس البلد الناس اللى عايشة جمب الحيط زينا ومع ذلك ماسلموش من انهم يتعذبوا لان ده العادى فى بلدنا ولاننا مالناش اى قيمة ولاننا ارخص من تراب البلد اللى احنا ماشين على ارضها ياه قد كده فى ناس اتعذبت واتوجعت وأسر بتعاني من اللى بيحصل فى اقسام الشرطة وانا ما كلفتش نفسي حتى عناء القراية والمتابعة لقضايهم وصلت لفين وعملوا ايه وعاشوا حياتهم ازاى بعد كده؟

قضية خالد صحت ناس كتير ناس اتجمعت ع الفيس بوك و ووضحوا للناس الحقيقة ونزلوا مظاهرات ووقفات صامتة جوا مصر وبراها ناس كتير متضامنة مع القضية
انا منزلتش لا مظاهرات ولا وقفات صامتة بس اضعف الايمان ان انا انشر القضية عشان كل الناس تعرف اللى حصل لخالد ولغيره اضعف الايمان انى اتابع واعرف  الدنيا ماشية ازاى حواليا انى انفعل واغضب واحزن واعلن رفضي للي بيحصل
-----------
خلال الفترة اللى فاتت اثناء متابعتي لقضية خالد قريت تعليقات فى منتهى السخافة واراء فى منتهى السطحية كان منها على سبيل المثال تعليق على مقالة فى جريدة اليوم السابع غالبا - انا لا اذكر نص التعليق بالظبط-لكن فيما معناه

ان ازاى كل الناس دى تخرج فى مظاهرات لشاب كان بيسمع ويهتم بالموسيقى فى حين ان قناة الرحمة لم يخرج ربع هؤلاء حين تعرضت لازمتها الاخيرة وطبعا منساش انه يأكد علينا ان المظاهرات حرام شرعا!!!!!!!!!!!!!!!!!!!د
هى قناة الرحمة اي ان كانت ما تقدمه اهم  من  القتل والتعذيب والبلطجة والقهر واهدار روح انسان وكرامة وطن؟ بقى هي كل المشكلة ان اللى مات ده كان مهتم بالمزيكا ومش مهم اللى حصله
رحمتك يارب
واخر كان رأيه

ان الوقفات الصامتة بدعة!!!! لأنها لم تكن تحدث ايام الرسول علية الصلاة والسلام 
الوقفات الصامتة مش حداد على روح خالد دى حداد على كرامتنا اللى راحت وعلى كل واحد بيموت فى اقسام الشرطة من التعذيب الوقفات الصامتة دى اعلان للغضب ورفض للبلطجة اللى حاصلة فى بلدنا
انا مرارتي بصراحة بتتفقع من التعليقات دي

ده غير بقى اللى بيتكلموا عن ان المظاهرات دي ضد استقرار الوطن !!!!!!! هو احنا عندنا اصلا وطن عشان يبقاله استقرار

ولا بقى اللى بيقولوا ان اللى بيحصل ده والناس اللى مش مصدقه وبتكدب الحكومة احنا كده بنسئ لسمعة مصر فى الخارج !!!!!!! يافرحتي يا جماعة سمعة مصر مش محتاجة اللى الشباب بيقولوه وبيعملوه عشان تبوظ...... الحكومة بتاعتنا قايمة بالواجب جدا فى الموضوع ده بايظة بايظة يعني مش اى كلام ده كفاية بس اللى بيحصل لشبابنا برة من غير ما حد يتكلم حفاظا طبعا على العلاقات الدولية اللى اهم ميت مره من الشعب اللى ميسواش

ده غير بقى بيان الداخلية اللى كان كدب فى كدب عن خالد وسمعته والكلام اللى قالوه على لسان والدته وكان كله كدب وتقرير الطب الشرعى الاول والشهود الزور والتحقيقات المتفبركة وووووو ده احنا عايشين فى بلد .........تييييييييييت

بس الجميل بعد كل اللى البلاوي اللى بتحصل الصحوة اللى حصلت الفترة اللى فاتت والناس اللى صوتها علي والمصرين المغتربين اللى خرجو فى مظاهرات ووقفات

وتحقيق النيابة كان بدأ ياخد مجرى غير اللي فات وظهرت حقايق كتير غيرت الموضوع وكل اللى شاف خالد وهو بيتعذب شهد رغم تهديدات الشرطة ليهم وكنا كلنا مستنيين نتيجة تقرير الطب الشرعى للجنة الثلاثية اللى تنفي نتيجة التقرير الاول اللى بيقول ان خالد مات مخنوق بسبب لفافة البانجو اللى بلعها وتأكد شهادة الشهود انه مات بسبب التعذيب

واذ فجأة يطلع التقرير يأكد موضوع الخنق؟؟؟؟؟؟؟ قال يعنى الناس هتصدق الكلام الفاضي ده وتكدب صورة خالد بعد التعذيب وتكدب شهادة الشهود وتكدب التلاعب اللى حصل التحقيق والنيابة كشفته من الاخر كده الحكومة بتقولنا اخبطوا راسكم فى الحيط وبتطلع لينا لسانها
رئيس الطب الشرعى الاسبق قال ان تقرير الطب الشرعى بأن خالد مات مخنوق استخفاف بالعقول هنا المقال  ولسه عندهم البجاحة انهم يطلعوا علينا بتقرير يعيده فيه الكلام الخايب ده
قمة الاستهبال تقرير الطب الشرعي الوارد من اللجنة الثلاثية في قضية خالد سعيد المقال هنا فى اليوم السابع
------------------------------------
اسفة ع الصورة كنت حريصة فعلا انها ماتكونش قدامي فى المدونة بس بصراحة لازم تبقى قدامنا دايما عشان مننساش خالد واللى جراله هو و ناس كتير زيه
وزي ما قولت اضعف الايمان اننا نتابع وننشر الحقيقة 
وهنا جروب كلنا خالد سعيد

كمان يوم الجمعة غير الوقفات الصامتة اللى فى كل المحافظات وكمان بره مصر هنا  لينك الايفنت بتاع كل محافظة .... كمان هنعمل يوم الجمعة تدوينة حداد على خالد ده الايفينت بتاعها هنا

واخيرا انا اهتمامي بموضوع خالد مش اهتمام سياسي لكن اهتمام انساني بس للاسف احنا اللى بيحكمونا لا يمسوا للانسانية بصلة .... معلش لو كنت طولت بس انا دمي بجد محروق ع الاخر من التقرير بتاع اللجنة الثلاثية ..... ربنا يحرقهم دنيا واخره اللهم امييييييين

10 comments:

ماما أمولة said...

يمهل ولا يهمل يا سارة

وحسبي الله ونعم الوكيل

والله لو حتى في كل العبر مايكون بالمنظر دا ابدا
منهم لله

AHMED SAMIR said...

حادثة خالد سعيد قدرت تفرز البرامج من بعضها
و تظهر مين هي القنوات و البرامج المحترمة و ايه هي البرامج اللي بتشتغلنا من زماااااااان

رحــــيـل said...

ماما امولة

ونعم بالله
ربنا ينتقم منهم يارب

--------------------------------
احمد سمير

اكيد طبعا
حادثة خالد على قدر بشاعتها لكن فعلا كان رد الفعل ايجابي حتى رد الفعل السلبي وشح حاجات كتير وفضح ناس كتير

MR.PRESIDENT said...

الله يرحمة
والصورة وجعتنا كلنا
وان شاء الله القصاص العادل هيخدوه من الله

وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل
وحسبي الله ونعم الوكيل

HERO said...

هم يبكي وهم يضحك
بس عادي هي الناس كلها كده عمرك ما هتلاقيهم كلهم زي ما انتي عايزة
ونتمنى ان تكون حادثة خالد دي هي البداية وربنا يسهل

تحياتي

قهوة بالفانيليا - شيماء علي said...

آدينا بنتابع القضية يا سارة
و اما نشوف ايه آخرتها

حـــلـــم كــــان said...

حسيى الله ونعم الوكيل

ياترى فى كام واحدزى خالد محدش سمع عنهم حاجه

مصعب صلاح said...

السلام عليكم ورحمة الله وبركاته
حقيقي موضوع الثانوية العامة خلاني متغيب ومش عارف اتابع اللي بيحصل
عموما دا مش اول ماساة ولا الاخيرة طول ما الشعب واقف بس بيتابع

rack-yourminds said...

الاخت الغاليه رحيل ,.طبا موضوعك في منتهي الاهميه ,تعرفي يا رحيل وانا بقرا تعليقات الناس البايخه علي مقتل الشهيد خالد سعيد ,بجد اعصصابي توترت من سخافة هذه التعليقات... اللي بيقول المظاهرات بدعه ولا الوقفات كمان بدعه!!!

هؤلاء الاشخاص الذين يزعمون انهم متدينون هم في الاصل يسئون للاسلام ,هؤلاء لا يهمهم الا المظاهر والشكليات فقط ولا يعلمون ان عماد الاسلام واساس الاسلام قائم علي العدل والممساواة ورفض الظلم ورسول الله صلي الله عليه وسلم يقول لا خير فيكم ان لم تقولوها........انت عارفه يا اخت رحيل دم المسلم اعظم عند الله من المسجد الحرام والاقصي وكافة مساجد المسلمين

الاخت الغاليه رحيل

هؤلاء يريدون ان يختزلوا الاسلام في العبادات فقط ويريدون ان يبعدوه عن مجالات الحياة وهذا ما تريده الحكومه

الاخت رحيل سوف تجدين كثيرين من هؤلاء المتدينين شكليا وهو تدين زائف وضرره علي الاسلام عظيم,,,, فلا تبالي لهم

اما بالنسبه لقضية الشهيد خالد سعيد فهي متكرره كتير ولولا ان قضيته تناولتها الصحافه ووسائل الاعلام لكانت دفنت ,اعلمي ان جرائم التعذيب لا تسقط بالتقادم وزبانية التعذيب سوف ياتي اليوم وينالوا عقابهم


الاخت رحيل لو كان في مصر حياة سياسيه
ما كنا ابتلينا بهذه الجرائم ولكن السياسه ماتت في مصر بموت الاحزاب وموت ومؤسسات المجتمع المدني
وللاسف ابتلينا بنخبه سياسيه منافقه تجري وراء مصالها وليذهب الشعب الي الجحيم

---------

في امان الله

رحــــيـل said...

MR.PRESIDENT
ايون حسبى الله ونعم والكيل
هو قادر ينتقم من اللى قتله خالد دنيا واخره

---------------------
هيرو

انا كمان اتمنى ان تكون قضية خالد هى البداية ويفضل الناس عندها نفس الحماس للقضية

------------------------------
شيمو

يارب تبقى اخرتها نصر وفرج من عندر ربنا قادر على كل شئ
----------------------------
حلم كان

من الواضح ان اللى زى خالد كتير
كان خالد البداية اللى خالت الناس تاخد موقف بالشكل ده عشان حقه وحق كل اللى اتعذبوا

-----------------------------
مصعب

ربنا يهون عليك ايام انتظار النتيجة انت وجوجو اختى

---------------------------------
rack-yourminds

الاخ الفاضل
اتفق معك تماما
واتمنى انه عن قريب تنتهى تلك المهزلة التى نمر بها فى بلدنا منذ سنوات