Sunday, July 11, 2010

ماكان بين البحر والـ سما


بداية الف مبرووك جدا خالص لاختي الصغيرة جوجو صاحبة مدونة امي ثم أمي نتجيتها ظهرت وجابت.5 88% كل دراجتها كويسة خالص ماعدا الرياضة للأسف ... المهم يعنى الف مبروك اخر حاجة


امبارح كان يوم دمه خفيف جدا بصراحة كنا فى رأس البر بدعوة من الجميلة ليساندرا قابلت سما الصبح في دمياط وركبنا عشان نروح رأس البر وكان محمد الغرباوي وايمان اخته وابراهيم العدوي وصلوا هناك قبلنا  وضياء المناضل القاهري جاى من 6 اكتوبر لوحده كان يدوب لسه واصل المنصورة وقدامه شوية عما يوصلنا 
وصلنا بسلام لأرض رأس البر واتجهنا كما هو متفق الى شاطئ الخليج :)) هناك معجبناش مستوى الخدمة خالص والشاطئ مش نضيف وكله اطفال معاهم عوامات فأحنا طبعا عشان سلامة الاطفال من حقدنا عليهم قررنا نسيبلهم المكان ونشوف مكان تانى
اتمشينا شويه لحد اول اللسان وهناك كان في كافتريا  على البحر حلوة قعدنا هناك فترة وضياء جالنا هناك وفضلنا بقى نرغى ونحكى ونجيب فى سيرة كل الناس اللى مجتش :)) بالخير طبعا

 نسيت اقولكم على حاجة مهمة جدا ان المينو كان فيها كل انواع العصائر حاجات والله انا اصلا اول مرة اعرف انها بتتعصر وكان اهمها انهم بيقدموا عصير جرجير ولما الشباب طلبوا قهوة اللى موجودة فى كل حته فيكى يامصر طلعت للاسف مش موجودة عندهم

قررنا نتقوم نتمشى فى اللسان رغم الحر بس كان وقت كويس جدا ومحافظ دمياط جه بنفسه يرحب بينا طبعا اذ فجأة تلات عربيات سود من بتوع افلام الاكشن ظهروا والميكرفونات اللى بتحكى عن اللسان اشتغلت وطبعا اول لما لف ورجعوا سكت الصوت اللى بيحكي و كمان كان في عربية جت لمت الزرع اللى كان موجود كده وكده


روحنا صلينا وقررنا نروح نركب مركب وفى الطريق ضياء اعلن انه مش عايز يتأخر عشان قدامه 6 ساعات سفر فقولنا نركب ونطلع على دمياط وطبعا قبل ما نمشى قررنا ان احنا ناخد جولة اختيارية طبعا- ماكنتش اجبارية خااااااااااااااالص- فى رأس البر وانا اصلا اعلنتها لليسا من اول ما وصلنا بما انها دمياطية ومرشدنا السياحي : احنا من ايديك دي لايدك دي وفين ماتودينا معاكي
وودتنا بصراحة سما ماحرمتنااااش من حاجة
:D 
رجعنا دمياط فى صاروخ ارض جو روحنا اتغدينا عند المتبولي اللى عرفنا انه فاتح بقاله 90سنة ورغم كده كوباياته مش نضيفة وكان شوية وهيطردنا لانه كل شوية يغيرها ويغسلها واحنا برضه مش عاجبنا بس الجمبرى بتاعه كان حلو جدا

ونزلنا بقى قعدنا ع الكورنيش نقرر مين هيروح فين واحلى حاجة بقى لما ضياء قرر انه يروح ومحمد راح يوصله لانه ماكنش عارف الموقف وبعد ما رجعلنا واتفقنا على ان محمد وايمان وحتى ابراهيم هيركبوا معايا المنزلة ويرجعوا يركبوا للمنصورة  اتمشينا لحد الموقف واذ فجأة اكتشف محمد انه نفس الموقف اللى وصل ضياء ليه من شوية
ووقفنا قدام الموقف شوية نكتب لليسا كلمات عن اليوم ونخبى من بعض وانا كنت مصممة اعرف كلهم كتبوا ايه
وبعدين سما مشيت وركبنا المنزلة وكملنا رغي فى المواصلات

ليساندرا .... شكرا بجد على اليوم الجميل جدا ده رغم انى لا انكر انى كمان احبطت شوية لما عرفت ان مدوني بورسعيد مش جايين بس حقيقى كان اكثر من رائع
ايمان اخت محمد ...... طبعا احنا المفروض نشكر محمد انه عرفنا عليكى ومستنين نشوفك دايما فى كل اللقاءات
محمد الغرباوي وابراهيم العدوي وضياء ...... مش عارفه اقول ايه بجد اكتر من انهم اخواتنا حقيقى اليوم كان جميل بيكم فعلا
--------------
ناس فعلا افتقدتهم وكنت اتمنى اشوفها
مدوني بورسعيد 
ماما امولة - ايناس نهر الحب - نسمة - اسراء
وكمان داليا قوس قزح
-----------------
الناس بقى اللى قالت بالتفصيل اهو مع انه مش تفصيل قوى يعنى
استحملوا بقى وعشان بعد كده تيجوا ومش تطلبوا اننا نحكي
الصور كلها بعدسة ليسا وهنا باقى الصور
 بعدسة ليسا :))
-----------------
ابراهيم كتب على كأني اتكلم ..... ليساندرا داي
محمد الغرباوي كتب ......يوم على جناح فراشة
ليساندرا كتبت .......رأس البر10-7-2010

16 comments:

lyssa said...

فين الجمبري
مركزة مع الكوبايات ليه
ماحنا كان معانا زجاجات مياه معدنيه
ههههههههههههه

بس اما اشوفك
هههههههه ماشي يا سااااااارة

lyssa

رحــــيـل said...

ليسا

طبعا يابنتى الجمبرى كان جامد جدا وطبق الكاتشب كمان
:))
انا بهرج والله اصل كل ما يجيب كوبايه حد فينا يمسكها يقلبها يمين وشمال ههههههه

اها ماهو اخر مازهق جابلنا ميه معدنية
:))

ماما أمولة said...

ولا تزعلي ابدا يا حبيبة قلبي
ان شاء الله نتجمع
يوم تاني
ربنا يصلح حالك ويسعد قلبك يارب يا سارة

MR.PRESIDENT said...

انا كنت عايز اجي عشان اكل اكل بحري
مليش دعواااااااا
والعيال بتوع الشط بتوع العومات السودا انا كنت واحد منهم في يوم ما .
ربنا يكرمك
وتكونوا سعداء قادر يا كريم . :)))

رحــــيـل said...

ماما امولة

يارب ان شاء الله اشوفك على خير قريب
ربنا يخليكى يارب
والف مبروك لايمان
---------------------
الريس

وماجتش ليه؟
كان يوم حلو فعلا
:)
اللقاء الجاى ان شاء الله تكون موجود

rack-yourminds said...

الاخت الغاليه رحيل

اولا :الف الف مبروووك لجوجو
ثانيا:كنت اتمني اجي معاكم بس معلهش مره تانيه ....المهم اتمني تكونوا قضيتوا وقت جميل ووممتع

-------
في امان الله

مجرد حلم صغنتوت said...

:(
يا ريتني كنت معاكم
اهئ اهئ اهئ

كان نفسي آجي والله بس المشكلة اني مسافرة مرتين قريب اوي.. غصب عني بجد
مستنية اليوم يتكرر علشان اعرف ابقى معاكم
الحمد لله ان اليوم كان حلو واتبسطو كده.. يا رب دايماً

كاتب مصري said...

كان يوم لطيف ورائع ولذيذ .. مش مهم التفصيل في الحكاوي عشان الي مجاش يتغاظ المفروض نعمل الموضوع مبهم عشان محدش يعرف حاجة في حاجة هههههههههههههههه
ربنا يكرمك انا كمان اتبسطت قوي امبارح ومكانش عندي باه احباط من قلة العدد خالص بالعكس كنت مبسوط ان قلة العدد ادتنا مساحة للقرب من بعض اكتر

كان يوم لطيف وظريف ودمه خفيف
عقبال كل مرة بأمر الله

ايمان @@ بنت الحرية said...

انا مش عارفة بعد التعليق اللى هكتبه دا المفروض تدينى كرت احمر واخرج من المدونة نهائ
بصى هو اعتراف صغير

انا كل يوم افتح مدونتك واقعد اسمع ..
النهاردة قررت اقرأ ....

بس الصراحة استمعت بالاغانى اكتر
وهستنى الموضوع اللى جى عشان مش عايزة اعلق ع الموضوع دا :D:-P

والمرةالجاية لازم يكون عندهم نسكافية او شاى او فيرزو عشان انا مش بشرب حاجة تانى :-P

SAYED SAAD said...

رحيل ازيك
الف مبروك لأختك
يا ريت تبقوا تشرفونا مصر كلكوا وهتلاقوا عندنا القهوة اللي نفسكوا فيها
تحياتي

حـــلـــم كــــان said...

شكلى كده هقر

حنان الشافعي said...

مبروك لنجااااااااااااااح

ومبروك عاليوم
ومش مسامحه ابراهيم العدوي اللي مقالييييييييييش


حبي وتحياتي

قهوة بالفانيليا - شيماء علي said...

:)
قريت اليوم دة عند ليساندرا و عندك ..
و بقول تاني ..
العدد الكبير بيبقى مشكلة ..
:)
العدد الصغير احسن

حنان سعيد said...

اولا الف مبروك لجوجو وربنا يكرمها ويسعدها ديما :)و
......................

طبعا انا وحشه اوووي اني مش جيت معاكم بجد
بس حظي جيه
كده فضلت 3 ايام مشغوله اوووي ومش دخلت اكلمك
وعلا ما فقت كان الخميس الساعه 12
كان عندي امل اشوفك اون لاين واحاول اضغط نفسي واجي
بس ان شاء الله يارب تتعوض

واحشاني كتير
:)

رحــــيـل said...

وحيد

:))
اخيرا يوم اللقاء عرفت اسمك من محمد اصلنا جيبنا فى سيرتك برضه
ان شاء الله اللقاء الجاى تكون معانا
شكرا جدا ليك
----------------------------------
مجرد حلم
دعاء

انا كمان كنت اتمنى تيجى معانا قريب هنتقابل فى المنصورة لقاء على صغير كده لو عرفتى تيجى يبقى كويس

----------------------------------
كاتب مصري

احلى حاجة فعلا انك غيرت مود وخرجت من جو الاكتئاب
فليحيا لقاءات المدونين اشوفك على خير يا ابراهيم
----------------------------------
ايمان

:)
ولا يهمك ممكن تحملى الاغاني على فكرة وتبقى عندك دايما

--------------------------------
حلم كان

:)
يا بنتى احنا لا بينفع معانا قر ولا غيره ههههههه هنستناكى المره الجاية
-------------------------------
حنان الشافعي

الله يبارك فيكى
انا لو منك ما اسكتش لابراهيم
:) انا بهدى النفوس بس

-----------------------------------
سيد سعد

اهلا بيك
الله يبارك فيك يارب
:)
مصر اصلها يعيده عننا شويتين
ده انا نفسي احضر لقاء هناك بقالى يجى تلات سنين ومش عارفة
شكرا لمرورك
----------------------------------
شيماء

انتى مش ناوية تيجى مصر ونعمل لقاء على شرف حضورك :)

معاكي حق العدد كبر بيكون مشلكة فى التنقل فعلا

تسملى يا شيمو
---------------------------------
حنان سعيد

انا الجمعة بليل بعتلك رقمى ع الفيس واستنيت تكلمينى لانك كنتى اختفيفى كام يوم كنت اتمنى وجودك فعلا
بس متعوضه ان شاء الله يا حنان كان نفسي اشوفك جدا
:))

حنان سعيد said...

اده بجد بعتيلي رقمك
انا ماشفتهوش خااااااااااااااااااااااالص والله
ده انا بجد حظي وحش اووووي
:(