Sunday, July 25, 2010

عن لقاء يوم الجمعة



كتبت ومسحت وفتحت الصفحة من يوم الجمعة لحد الوقتي كذا مره حسيت انى هرغي رغي السنين فقولت بقى اقول رسايل صغيرة كده ومحددة عن لقاء يوم الجمعة في المنصورة اصل لو فتحت فى الكلام مش هخلص خصوصا فى التدوينات الخاصة باللقاءات

    بداية كنت سعيدة جدا بوجود أمجد معايا يومها وان شاء الله كل اللقاءات الجاية نكون سوا ، كمان دعوته لهيثم محفوظ حقيقى وجودهم فرق كتير سواء لإلقاء امجد لبعض قصايده او غنا هيثم والحانه 
  1. بشكر جدا هيثم محفوظ على تلبيته دعوة امجد وحضوره حقيقى استمتعنا كتير بصوته وألحانه على العود والكلام اللى مليان اللى غناه
  2. ايناس نهر الحب ونسمة كانوا حقيقى واحشنى كتير كل لما بشوفهم بكون سعيدة ومبسوطة بالود اللى بينا ربنا يديمه 
  3. داليا و باشهندس شرين الكردى وجودكم كان شئ جميل جدا وأضفى روح حلوة على اللقاء سعيدة انى قابلتكم للمرة التانية كنتوا منورييين مش تهريج يعنى لاء جد جد
  4. ندي الياسمين وبنوتتها العسولة ودعاء مجرد حلم والاء مازال البحث جارى - مش عارفة ايه موضوع الدقهلاوية فى البحث - بلدياااااااااااااااااتي يا جدعان ناس كده تحسها قريبة منك ومافيش اى حواجز وكأننا عارفين بعض بقالنا سنين .. بحبهم بغض النظر عن كيك ندي الرااااااائع
  5. اسماء مدونة حفلة تنكرية اصغر مدونة 14 سنة كان اصرارها ع الحضور شئ مبشر ان الجيل الجاى فى أمل بجد دماغها حلوة كبيرة مش صغيرة خالص
  6. الجميلة ليساندرا البنوووته دى بقى مش عارفه اقول كلام عنها بس حقيقى بحسها شبهى من جوا جدا يمكن عشان كده بحب وجودها الهادي الجميل
  7. ابراهيم العدوي كاتب مصرى بيكون مش عايز اللقاءات تخلص :) وأحسن حد بيكتب تدوينات لوصف اللقاءات
  8. محمد الغرباوي حضر اللقاء  بالرغم من انه كان راجع السعودية فجر السبت ويارب يكون وصل بالسلامه ويهون غربته
ده كان بالنسبة للقاء على المستوى الانساني كان فعلا يوم رائع وصحبة طيبة 
على مستوى التبرع بالدم من الواضح انى اتسرعت فى تنفيذ الفكرة من غير ما اعرف ظروف الناس اللى جاية لان كان فى تبرع قريب فى القاهرة ..... واللى يشوفنا واحنا بنتكلم مع الامن اللى كان رافض اننا ندخل كلنا بنك الدم وعايز بس الناس اللى هتتبرع واحنا بلطجنا ودخلنا وندي الياسمين وهى بتتفق معاهم وبتقولهم اننا المره اللى فاتت كنا 30 :)) مايشوفناااااش المره دي واحنا ما اتبرعش حد فينا غير أمجد....بس ان شاء الله متعوضة
شكرا للناس اللى اتصلت يومها 
ماما امولة ..... كنت اتمنى حضورك يارب تكوني بخير دايما والمره الجاية عندكم ان شاء الله
انا الريس ..... بسام ...  كويس كويس ان الواحد يبقى عارف اسم الريس الجديد بتاعه :) يارب تكون بقيت احسن وبعدين بقى ده اسمه كلام ياراجل فى رئيس دولة يجيله برد احنا معندناش رؤساء يتعبوا ده خارج قوانين بلدنا
تدوينات عن اللقاء
ابراهيم العدوى دخلنى التاريخ وكتب 23 طوبار 
اسماء فى حفلتها التنكرية كتبت عننا لما اتقابلنا من غير اقنعة
ندي الياسمين كتبت بتحكى ملخص اللى حصل :)  
وحكت بالتفصيل ما حدث وكان فى ملخص لقاء المنصورة
وع الهامش بعدسة ليساندرا لقاء المنصورة
---------
الصورة من مدونة حفلة تنكرية مش لاقيه ليساندرا اخد منها الصور ... كل الصور اللى موجوده حاليا صور ابراهيم وهو بياكل  ......  الصورة دي فى ادغال شجرة الدر على الحان هيثم ومراقبة النمل اللى كان فى المكان والتفاف الاطفال الصغار خصوصا جنة
انا قعدتهم ع الارض وبالرغم انى اقترحت قبل اللقاء نجيب ملاية نفرشها ع الارض ونتغدى من عند البغل ونجيب كولمن ميه ساقعه بس برضه ما حدش حس بقيمة اقتراحي غير بعد ما لفينا شجرة الدر ومش لاقينا اى مكان نقعد فيه غير جمب النمل 
بس برضه كان يوم حلو:))) 

7 comments:

MR.PRESIDENT said...

بعد السلام والتحية ..
أما بعد
من رئيس الجمهورية

هنعمل ايه بقي
تقريبا كانت مؤامرة للانقلاب
بس حصل خير
خدت حباية فيها نسبة مسكن عالية
عشان كدا شكلي ولا اكني واكل افيون
مش هوا الافيون بيتاكل ولا بيتشرب ولا بيتدخن

مش مهم
أنا بجد كنت عايز اتعرف علي مدوني الدقهلية

والمشكل الدوا اللي كنت واخدة مكنش ينفع يخلني اتبرع ودا طبعا كان الترجت الاساسي ثم المقابلة .. ولقيت اني ممكن أضايق الناس بتعبي لو جيت يتخنقوا فقلت لا خليني بكرامتي ولا امسك ابقي اضايقهم براحتي :))

بس متعوضة ، وصراحة برضوا كنت مفلس ومنفض ويمكنش معايا من فلوسي غير 15 جنية مكنش ينفع اجي بيهم عشان كنت عايز اكل اندومي بالليل :) بعيد عنك اصل اكول او طفس .

المهم انتوا استمتعوا بلقاء فكري انساني محترم ، وان برضوا كنتوا هتلاقوني مزمت شوية .. معلش استحمليني بقي .. في أمان الله

رحــــيـل said...

MR.PRESIDENT

الف سلامة عليك يا أفندم
وان شاء الله متعوضة تكون صحتك وميزانيتك احسن
:)
موضوع التبرع طلع زى ما انا حكيت مافيش اى مشكلة ان اى حد يكون عنده موانع للتبرع ده امر وارد جدا وكان حاصل بشدة اللقاء اللى فات وعدت يعنى

والاندومي يكسب اكيد
:D

ربنا يوفقك ان شاء الله

rack-yourminds said...

الاخت الغاليه رحيل

ان شاء الله هحاول اكون مع حضراتكم المره الجايه

----

في امان الله

still-searching said...

:):):)
والله يا رحيل
لو قعدت اقول من هنا لحد بكره اني مبسوطة اوي اني شوفتكو
مع اني لسه معرفتكوش كلكو
مش هبطل :)
بس هقول تاني انا شفتك قبل كده
فييييييييين فييييييييين
مش فاكرة خالص نوهائي
اكيد كان لقاء روحاني من نوع خاص :)
العجيب ان اللقاء الروحانى ده كان موجود فيه اليساندرا اللي حسيت اني بشوفها كل يوم وفي كل حتة تقريبا
وكان فيه كمان محمد الغرباوي " وشه مش غريب عليا خااالص "

ان شاء الله اللقاءات الجاية هحضرها من الاول :)
مش هنقضي كله روحاني بقى :)

كاتب مصري said...

هو فعلا كان يوم جميل قوي
الكل قلتي عنه كلام حلو الا انا والغربواي هق هق هق ههههههههههههه تقريبا احنا رجالة اغراب مينفعش يتقال علينا كلام حلو
وكمان مش عاجبك صوري وانا باكل
الله يكرمها صبرني هي الي نزلتهملي ههههههههههههههههههههههههههههههه
فين سما وصور سما مش عارف
النت عندها تقريبا فاصل ولا ايه
شوفي حلقة النيل الثقافية بتاعتي باه لما انزلها ع المجلة ان شاء الله وهستنى رأيك

رحــــيـل said...

وحيد

:)
فى انتظارك اللقاء الجاى ان شاء الله

تحياتى لك

-------------------------------------
الاء

الباحثة اجديدة
نورتينا يومها ونورتى هنا كمان
وبما انك بتشبهى عليا ولعى ليسا والغرباوي
يبقى اكيد كانت روحك حاضره معانا فى رأس البر :))

اشوفك اللقاء الجاى من اوله ان شاء الله
---------------------------------
ابراهيم

ده ايه اللماضة اللى انت فيها دى؟؟؟؟؟؟
وبعدين الحق عليا يعنى انا قايلة انك احسن حد بيكتب وصف للتدوينات تقوم تقول الكلام ده
انت وقعتك مش باينلها نهاااااااااااااااار
اصبر بس
وبعدين هو الغرباوي اشتكالك؟
الله يمسيه بالخير ويرجعه بالسلامه
ويمسيك بناموووس يخليك ماتعرفش تنام الليل
ماشى ماشى :((
هى الحلقة فين ؟

نهر الحب said...

ازيك يا سارة بجد اللقاء كان تحفة جدا
وانا كنت مبسوطة جدا
بكم وباللقاء الجميل
ربنا يديم الود والحب فية يارب
ونتجمع دايما على خير