Friday, October 1, 2010

اللى مش قد الخلفه ما يخلفش



فى الغالب الناس قبل ما تجوز تسألها ايه اقصى طموحك فيردوا من غير تردد اتجوز واخلف ويبقالي بيت ومش عارف ايه
طيب اساسا بغض النظر عن معظم الناس بيتجوزا وهما مش فاهمين اصلا يعنى ايه مؤسسة جواز ومسئولية مشتركة وحياه كاملة لأن فى الغالب بيكون جواز لمجرد الجواز وخلاص يعنى بما ان الجواز سنة الحياة والناس كلها المفروض تتجوز فبيتجوزوا بسبب المجمتع الفاضى اللى احنا بننتمى ليه اللى عاوزنا نبقى نسخ منه مكرره وخلاص وكمان غياب الحلم والهدف من حياة اللى بيفكروا يتجوزا لمجرد فكرة الجواز والعيال والبيت والكلام ده

طيب اللى عايز يتجوز يتجوز سواء بقى هو مؤهل لده او غير مؤهل طالما هو والطرف التاني بس اللى هيدفعوا تمن تجربتهم سواء فشلت ولا نجحت الاهم من ده انه ميبقاش زى الطور اللى بيلف فى الساقية ويشغل مخه شويه يعنى يتعامل مع فكرة الانجاب بشئ من الاهتمام والادارك والوعى مش بما انه اتجوز يقوم مخلف من غير ما يكون مؤهل انه يكون اب او انها تكون ام ويخلفوا ويرموا ولادهم للدنيا وهى تعلمهم ويطلعوا عقدهم عليهم ويبقى كل دورهم فى الحياه يأكلوهم ويشربوهم ويعلموهم ده حتى الحاجات الاساسية دى بتبقى غايبة عنهم فى تخطيطهم لاستقبال اطفالهم وبعد كده يبدأو يحسوا ان ولادهم عبء عليهم ومسئولية مش قدها وحظهم الاسود فى الدنيا وحمل مجبريين انهم يشيلوه وبعدين يعيشوا بقى دور الضحية اللى افنى حياته كلها فى سبيل تربية اولاده
والله اللى مش قد الخلفة ما يخلفش واللى مش قد المسئولية ما يشلهاش من الاول ويشوف حدود امكانياته وقدراته ويتعامل فى الحياه على اساسها لانه كده مش بيظلم نفسه اللى هيفضل يجى عليها طول حياته عشان خاطر ولاده لاء هو كده بيظلم ولاده اللى اصلا ذنبهم الوحيد انهم اتوجدوا فى الدنيا بسبب اتنين معندهمش اى احساس بالمسئولية على الاقل كمان عشان ولادهم ميحسوش ان فرض البر بيهم تقيل على قلبهم وانهم اصلا مش قادرين عليه

اللى مش قد الخلفة ما يخلفش عادى يعنى حتى هتبقى حياته مريحة اكتر ومافيهاش مسئوليات ولو هو من الناس اللى غاويين عكننه وعايز يخلف بس عشان يجيب حد يعكنن عليه فده بقى يروح يتعالج احسن ولا ينتحر المهم انه يطلع عقده بعيد عن انه يبقى اب او انها تبقى ام

بلاش يا جماعة يبقى كل هدفنا فى الحياة الاطفال وتربيتهم ونصب كل تركيزنا عليهم عشان مانجيش فى وقت ونحس اننا ضيعنا عمرنا وحياتنا عليهم لازم يكون لينا حلم بتاعنا شخصي جدا بعيد عنهم عشان ده هيخنقهم وكمان لان بعد سنين هنحس بعمرنا اللى ضاع لان كل واحد هيبقاله حياته الخاصة وحلمه بعيد عننا وبعدين نيجى احنا نعيش دور الضحية اللى ضحى بعمره وشبابه عشان خاطر يربى ولاده مع ان مش هما اللى اختاروا انهم يجوا للدنيا اساسا لاء ده بيكون اختيار الازواج فيا يتحملوا  المسئولية من غير ما يحسسوا ولادهم انهم بيمنوا عليهم بتربيتهم ليهم وبالعمر اللى ضاع يا اما اصلا ما يخلفوش من البداية ولا يقرفوا فى حد ولا حد يقرف فيهم
عشان كده حياتك اهم من حياة ولادك لان طول ما انت بتضحى عشانهم بعمرك وشبابك والحاجات اللى بتحبها هتحملهم سبب ده وهما اصلا مالهمش ذنب فى انك اخترت تضيع عمرك انت اصلا بتعمل ده بمزاجك و بتكسل تعيش حياتك زى ما انت عايز او مش بتعرف فتقوم معلق شبابك اللى ضاع وعمرك على شماعتهم 
ووقت ما تحس انك ضحيت اعرف ساعتها انك ما عملتش ده حب فيهم لان لو حب عمرك ما هتحس انك بتضحى او هتفكر فى ده لكن لان انت حاسسهم مسئولية وعبء انت اللى جيبته لنفسك وانت اللى لازم تتحمله 

13 comments:

MR.PRESIDENT said...

بعد السلام والتحية
أما بعد
من رئيس الجمهورية

علي رأيك يا رحيل
كنت فتحت كتاب في التربية
فكرته بتقول يعني
اننا لما نشتري مثلا غسالة اوتماتيك بنجيب الكتالوج وندرسه حته حته عشان متبوظش ، اما ساعة لما نخلف عيل منفكرش نفتح كتاب في التربية .

ونبدأ نتعلم في الطفل الأول إلي أن نأخذ خبره في الطفل الرابع مثلا وبذلك نكون ضيعنا 3 عيال وعملنا عندهم خلل اما جسدي أو نفسي .

انا اقول اللي مش قد الخلفة يخلف بس يقرأ ويتعلم وهيبقي ادها لأن الحيوان الأبكم ربنا اداله امكانية الخلفة مع مراعاة مولوده .

فالأولي بالإنسان انه يربي وينشأ واحد سليم خلقيا .

سلمتي من الردي .

موناليزا said...

الله ينور عليكِ
بس فى الغالب الناس بتخلف عشان ماتبقاش معيوبة قدام حد مش حباً فى الانجاب نفسه وممكن تلاقى حالات طلاق بسبب عدم الانجاب من احد الطرفين رغم ان الطرف السليم بيكون - فى الغالب- لا يصلح لهذه المسئولية

Anonymous said...

السلام عليكم
الاول ازيك يارب تكونى بخير
شدنى موضوعك من الفيس وخصوصا انى بجد عايزة اتجوز
مش لمجرد ان الانسان عايز يتجوز علشان يغير ن الروتين والملل اللى هو عايش فية لا
بهدف الاستقرار والمسؤلية والاسرة الكاملة اللى اساسها الاطفال
جايز يكون انتى عندك حق بس المفروض يكون النطق الصحيح اللى مش قد الجواز مايتجوزش لان اساس الجواز هو التكوينى الاسرى والاطفال اللى هما اصلا زينة الحياه الدنيا زي ماربنا بيقول بس هيا المشكلة ان مش قد الجواز من البداية يبقى بلاش منه
لان الاطفال مش العائق الجواز نفسة وفى الزمن دة بقى فى حد ذاتة هو العائق
تحياتى ...
Afraa

حنان سعيد said...

والله تسلم ايدك بجد
تعرفي اني كنت بفكر في الموضوع نفسه النهارده بالضبط
بعد ما اتفرجت النهارده على برنامج واحد من الناس
ياحرام جايبين اطفال بتشتغل من وهما صغيرين الي ساب مدرسته عشان يصرف على نفسه واهله
والي بالعافيه بيتعلم جنب شغله
انا اكتر حاجه علقت عليها ساعتها
اهلهم
كل واحد بيقول في عدد اخوات ليه غريب
ازاي الناس دي بتفكر
ازاي يجيب 5 و8 اطفال وهو يادوب بيلاقي ياكل
المفروض كل واحد هو اكتر واحد عارف بمقدرته
ليه يجيبو اطفال ويشردوهم
ذنبهم ايه الاطفال دي ماتعش حيتها
اول سبب في ضاياعهم اهلمهم
مش الفقر

تحياتي حبيبتي

انترنتاوي said...

المال و البون زينة الحياة الدنيا

ادم المصرى said...

حصل احصائيه فى مصر من شهر بتقول ان عشر الاف حاله طلاق بسبب عدم الانجاب
و20 الف بسبب خلفه البنت 10 الف بسبب عيب جنسى فى احدهم

وافتكر ان ده جهل وعدم معرفه والوعى بدين الله الحميد وحل كل المشاكل دى هيا عوده الاسلام الى بيوت الامه

بوست هائل

rack-yourminds said...

ثمة اياء في مجتمعاتنا لا يفهمون الف باء اصول لتربيه
______________

اكتر شء بيغيظني انه لما تسال اي شاب عاوز تتجوز ليه؟يرد ويقول عشان يكون عندي اطفال !!يعني مهمته العظمي هيا الخلفه ....طيب هل ظروفك ,امكاناتك تسمح؟هل لديك ادني معلومات عن اصول التربيه ,ولا تجيب اطفال وتطلع عقد الدنيا كلها فيهم!!!
___________

اختي الغاليه....الزواج مؤسسه لها اصولها قواعدها لكن في هذه الايام كلمة الزواج بقت سهله جدا ,تلاقي عيل معندوش 20 سنه واتزوج وده هيخلف برده عيال زيييه هههههه
___________

في امان الله

د. ياسر عمر عبد الفتاح said...

والله مظبوط جداً

لو مش قادر تجيب أولاد ينفعوك وينفعو الناس
متجيبش وريح نفسك وريح الناس

رحــــيـل said...

بسام

اهلا بيك

انا كتبت قبل كده تدوينة عن ثقافة التربية اللى للاسف مش موجوده فى مجتمعنا

اعتقد ان طفلين فى الزحمة اللى احنا فيها كفاية جدا ومن الاول كده الواحد يبقى عامل حسابه فى موضوع التربية ده احنا بناخد الموضوع بالصدفة كده
الواد طلع كويس يبقى خير وبركة طلع معقد ولا بايز يبقى حظنا هو اللى وحش
مافييييييييش مخ اصلا

ربنا يرزقك ببنت الحلال وبالذرية الصالحة
----------------------------------
مناليزا

اهلا يا مني
ايون هو المجمتع ماهو احنا لو سلمنا دماغنا للمجتمع هنتمسخ ونبقى شبهه عشان كده لازم نتحمل ضريبة اختلافنا

دمت بكل الود والخير
----------------------------------
عفراء

اهلا يا روشا
اختلف بس معاكي فى ان الاطفال اساس الحياة
لان فى ناس قضوا حياتهم كلها من غير اطفال وكانو سعدا بوجودهم جمب بعض
الحب والتفاهم هو اساس الحياة الزوجية
الاطفال ممكن بيكمل ده لكن مش اساس
وطبعا الجواز فعلا مسئولية
--------------------------------
حنان

يا هلا يا هلا

شوفي يا حنان الفئة اللى انتى بتكلمى عنها دى للاسف كتير والاغلب اللى بيطلع منهم الفئة الاجرامية لان دول مش مشكلتهم فى ثقافة التربية دول اساسا مشكلتهم انهم معندهمش اى حاجة
ازمة اقتصادية واجتماعية ودينية واخلاقية
بياكلوا ويتجوزا ويخلفوا من غير اى وعى او ادراك لمعنى الحياة وهيموتوا من غير ما يعرفوا هما اتولدوا ليه اصلا
-------------------------------------

انترنتاوى

اكيد زينة الحياة بس لما نعرف قيمة وجودهم وندرك مدى مسئولية تربيتهم

تحياتى
-------------------------------------
ادم

اهلا بيك
ده بيكون خلل اصلا فى الاختيار من البداية
الحياة ممكن تستقيم فى كل الاوضاع لو الطرفين اسوياء وفى بينهم حب وتفاهم وثقه لان ده اللى بيحل المشاكل لو مش موجود اى مشكلة هتصعد الامور للطلاق
وتخيل كل الاحصائيات دى
واكتر منهم خايفين يطلقوا لمجرد انهم ما يخضوش تجربة الطلاق امام المجمتع
------------------------------------
وحيد

معاك حق طبعا
الدنيا بقى ايقاعها سريع وزحمة وتفاصيلها كتير
وتلاقى الناس مستعجلة على الجواز والخلفة كأن بس ده دورها فى الحياة بغض النظر هتقوم بالدور ده ازاى

تحياتى واحترامى
-----------------------------------
د/ ياسر


ايووووووووووووون يريح نفسه ويريح الناس
لكن ازاى لازم يعمل زىما الناس بتعمل وخلاص من غير تفكير

شكرا لمرورك

wessam kabil said...

اتفق معاكي جدا جدا جدا
وانتي عارفة ده من زمان

كمان عندك حق ان ماينفعش يعلقوا فشلهم في الحياة على خلفة الابناء لو كان عنده طموح قوي وملح كان زمانه سعى لتحقيقه وكان من الاولويات لكن عشان كتير من الناس نفوسهم فاضية قوي لا طموح لا احلام فبيمشوا زي ما الكتاب بيقول " اللي ماشي على الارض مابيقعش "

معرفش ده نتيجة ايه ! ناس تلاقي كل حاجة في حياتها سهلة فمافيش عندها مكان للحلم وناس عندها كل حاجة صعبة فبقت احلامهم شغلانه تسترهم وبيت اسطمبة يطلع في ولاده كبته وخلاص


بس مافيش حاجة اسمها حد بيعمل حاجة عشان حد اي حد بيعمل حاجة بتكون عشان نفسه في المقام الاول حتى الاب لو شقى وتعب عشان ولاده .. ده بيكون لان سعادته وهو بيعمل كده محرك اساسي لتعبه سعادته وهو بيبسط ابنه .. جاءت سعادته اولا ثم سعادة ابنه

طولت عليكي ياسوسو
سامحيني بس انتي عارفاني حمقية شوية
:-)

Alaa Salim - علاء سالم said...

السلام عليكم

موضوعك جميل فعلاً يا سارة وحيوي بجد
بس أنا عندي رأي
وهو إن الإنسان يقدر يتجوز ويخلف وينجح عادي جداً
الموضوع بس عايز إنسان بينظم وقته صح وعارف هو عايز إيه

فيه مقوله بتعجبني جداً بتقول :
إذا كنت تريد أن تنجح فإبحث عن الوسائل
وإن كنت تريد أن تفشل فإبحث عن الأعذار

هي دي الخلاصة في رأيي

الازهرى said...

المشكلة فى التربية الأساسية داخل أسرنا والتى تدفع بالأبناء نحو الزواج دون أن يتلقوا التعليم والتقيف الكافى عن مسئوليات البيت والأبناء ودون اختيار الوقت المناسب لذلك

تحياتى دوما

eng_semsem said...

انا شايف ان الاعلام لعب في عقل الناس رجال وسيدات واثر عليهم تاثير سلبي بجانب قوانين الاسره الجديده غير الظروف الشيئه اللي كلنا عايشين فيها يعني راجل فاتح بيت فجاه تغلى الطماطم ممكن تبقى بالنسبه لمراته شئ صعب بس عادي وبالنسبه ليه خايف يقصر معاها ويقولوا عليه الناس ايه مش عارق ياكلها حرق اعصاب المواطن احيانا بيتنقل لبيته والحياه مشاركه ما بين اتنين لازم يساعدوا بعض عشان يعيشوا ويكملوا بعض