Monday, November 15, 2010

عن النقاب..


كتبت البوست ده بسبب موقفين ورا بعض حصلوا معايا
1
كنت في ميكروباص راجعة من الشغل طلعت واحدة منتقبه من الطريق ركبت جمبي و كان لسه فى مكان لحد تالت طلع راجل كبير  البنت طلبت منى انى اقرب ناحيتها عشان الراجل مايركبش جمبها فرفضت لانه كده كده فى الحالتين هبقى انا جمبه سواء اتحركت من مكاني عشان خاطرها او ما اتحركتش زي ما عملت - لانى كنت مرتاحة اساسا فى مكاني - مع انى فى الغالب مش برخم فى الموصلات على حد وبكون متعاونة بس موقف البنت ضايقنى ... البنت المنتقبة بتتعامل مع نفسها على انها اعلى درجات من البنت العادية وطبعا هى لايجوز ليها ان راجل يقعد جمبها فى المواصلات بينما يجوز لاى بنت تانية طالما هى اختارت انها ما تكونش منتقبة مع ان طبعا لو الوضع مش مريح مافيش اى بنت ترضي بيه
2
اتقابلنا قريب فى مهرجان كان للاطفال وكان اطفالها موجودين كان بقالنا فترة متقابلناش سلمنا ووقفنا نتكلم سلامات واخبارك وبعدين لاقيتها بتقولي وانتى عاملة ايه فى الدنيا ؟ ولا واخداكي ومش بتفكري ؟ ففهمت طبعا اللى ورا السؤال ولانى ماعنديش استعداد للدخول فى مناقشة كانت هتحصل اكتفيت بابتسامة وكلام فى العموم لكن هى صممت وسألتنى بشكل مباشر : انتى مش ندمانة ؟ فقولت مابدهاش بقى : على ايه ؟ تقصدي النقاب يعنى ؟  ... قالتلى اه قولتلها : لاء  .. فاستغربت جدامن سرعة ردي قالتلى ليه ؟  .. قولتلها عشان انا الوقتى حاسة انى من جوا شبه بره انا عمرى ما هفكر البس النقاب تانى
ففضلت بقى طول ما احنا واقفين تدعيلي ان ربنا يهديني
3
من زمان من يجي تلات سنين كده وانا عايزه اتكلم عن النقاب كتجربة شخصية مش كرمز ديني ولا فرض ولا سنة لان لا المدونة ولا البوست ده المكان اللى ممكن يتناقش فيه الموضوع ده ولان بصراحة كان يهمنى زمان لما كنت باخد قراري بلبسه انى اناقش واعرف وسمعت وقتها اللى يرضيني عشان البسه لكن حاليا الموضوع اصبح مجرد تجربة انا مريت بيها وانتهت فكلامي عنه هيكون من منظور شخصي جدا
---------------------
فى وقفة العيد الكبير سنة 2007 خلعت النقاب بعد تلات سنين من ارتدائه... كان تجربة دخلتها بكامل ارادتي بالرغم من رفض الجميع واستغرابهم لقراري..  وخرجت منها برضة بإرادتي وان كان فى ظاهر الامر انه حصل بعد مناقشة طويلة مع بعض اقاربي لاقناعي بالتخلي عنه ...  وقتها كنت بدأت أحس بفجوة مابين اللى جوايا واللى ظاهر للناس خصوصا اللى مش عارفنى حسيت انى حطيت نفسي فى قالب مش على مقاسي وان الناس شايفة واحدة غيري 
وان مواقفي اللى الناس بتشوفها كويسة بتحسب لنقابي مش لان دى انا 
وان لما اتصرف تصرف مجنون شويه او يشبهنى الناس بتستغربه مني لان المفروض مايصدرش من بنت منتقبة
حسيت انى اتنين فى بعض منتهى التناقض واللخبطة والتوهه .... والاحلام اللى مبقتش عارفة اظبطها على مقاس انهى واحده من اللى انا عايشاهم
تلات سنين عشتهم مش انا فعلا ... جايز اللى فادني التلات سنين دول انشغالي فى العمل التطوعي لان كان هو نافذتي على العالم بس كنت دايما مش راضيه وحاسه ان مش ده اخري وجوايا طاقات لحاجات تانية ماكنتش عارفه هي ايه
لما بدأت ادون .. التدوين فتح افاق جديدة ليا وعالم تاني كان للاسف غايب عني بحكم ان فى مدينة صغيرة والمجمتع اللى انا في محدود والدايرة اللى كنت بلف فيها كانت عمالة بتضيق لحد ما خنقتني على شوية احباطات ما بعد التخرج
التدوين كانت بداية خروجي من الدايرة وبداية لانى ارجع لنفسي بعد ماحسيت بحجم الفجوة اللى انا صنعتها طول تلات سنين كنت فيهم منتقبة
بالرغم من انى طبعا فى البداية كنت مقتنعة جدا و مسلمة جدا للفكرة دي وضربت بكلام كل الناس عرض الحائط ونفذت اللي في دماغى- كالعادة طبعا -بس المهم ان فضلت بتعامل بأخلاقيات سارة ومن دافع شخصيتي انا ماكنتش بتعامل بشكل عدواني مع حد وكنت محتفظة بكل صداقاتي القديمة سواء كانت على نفس الدرب او الدرب المضاد تماما ليه  .. واللى ماكنتش برضاه لنفسي ماكنتش برضاه لأي بنت تانية حتى لو معرفهاش
مع احترمي لكل المنتقبات صاحباتي منهم او اللى مش عارفاهم
بس ليه تفتكروا الفكرة السائدة عن المنتقبات ؟
المشكلة ان نسبة كبيرة منهم بيكونوا حافظين مش فاهمين- حاجة كده زى دور نجيبة فى فيلم الثلاثة يشتغلونها - الفيلم ده ناقش فكرة التطبيق بدون وعي مش للدين وبس وللسياسة كمان والانفتاح بصفة عامة
المهم يعنى انهم فى الاخر بيعكسوا مدى جهلهم للاسف مش بيعكسوا مدى تدينهم وده بيعود على صورة النقاب والمنتقبات
قليلين منهم اللى بيكونوا قدوة فعلا وفاهمين ان اهم من النقاب وان احنا نبص على نفسنا فى المراية مايكونش في حاجه بينا مننا اننا نبص على نفسنا من جوا لان ده المهم ان الناس تعرفه وتشوفه وتتعامل معانا من خلاله وعلى اساسه مش على اساس مظهرنا وشكلنا ... ولكل واحد حرية اختيارالشكل اللى بيظهر بيه المهم انه لا يتعدى على حدود غيره وانه يحترم شكل الاخر ووجوده
-------------------------
عيد سعيد عليكم جميعاً

32 comments:

BNT ELISLAM said...

موضوع جميل اوى
ومع احترامى لاى انسانه محجبه
ومنتقبه
اى انسانه
عشان تاخد قرار لازم تكونى اده
لازم تتحملى بكل
الى موجود فيه
ومعنى تكونى اده انك متونيش مثل سىء له وزى ماقلتى حافظه ومش فاهمه
لا المفروض العكس فاهمه ومش حافظه على الاقل عشان تمثل النقاب كويس وتكونى قدوه لى
زى الى لابسه حجاب بس اخلاقها مش حلوه او كلمه بتتقال عليها
وهى محجبه
لا فعلا التزمى بصفات كانسانه
وبعدان بمبادىء القرار الى اتخذتيه كويس اوى ومتحمله كل نتيجه
كل سنه ونتى طيبه ياقمر وربنا يهديكى ويهدينا يارب

رحــــيـل said...

بنت الاسلام


اهلا بيكي ياجميلة وكل سنة وانتي طيبة وبخير
متفقة معاكي ان كل واحد المفروض يلتزم الاول بصفاته الانسانية ده مهم جدا واللى بيتبني عليه اصلا كل اللى الانسان بيختاره بعد كده
---
بالنسبة لاتخاذ القرار
بالتأكيد طبعا كل واخد بياخد قرار لازم يكون قده بس برضه لو فى نص المشوار حس انه مش هيقدر يكمل احسن ليه انه يعلن عدم قدرته من انه يخدع نفسه واللى حواليه او يوهم الناس بحاجة وهو حاجة تانيه
اعتقد ان دى شجاعة هتمنع الازدواجية والتناقض اللى بقوا مالين المجمتع
--------
شكرا جدا ليكى تعليقك ومرورك
وعيد سعيد :)

علاء سالم said...

السلام عليكم

موضوع جميل بجد يا سارة وأنا معاكي في فكرة إن الإنسان لازم يكون نفسه ومش يعيش بشخصية غير شخصيته
وكمان انتي أشرتي لنقطه مهمة فعلا ودا خطأ سائد في مجتمعنا وهو إننا مش بنتعامل مع المنتقبه على إنها إنسانه عاديه زي كل الناس فيها المزايا والعيوب وممكن تصيب وتخطئ زي كل الناس

كل سنه وانتي طيبه وبخير وعيد أضحى سعيد علينا وعليكم
:)

رحــــيـل said...

علاء

وعليكم السلام
اهلا اهلا :)
فعلا المجتمع بيفرض علينا اوضاع كتير غلط
وبيكون مطلوب مننا التسليم بيها كأمر واقع
محتاجين بس شوية شجاعة

كل سنة وانت طيب وعيد سعيد

الازهرى said...

المهم انه لا يتعدى على حدود غيره


والأهم إننا نفهم الجملة دى كويس ونطبقها كليا وليس جزئيا

تحياتى وكل سنة وانت طيبة

مجداوية said...

السلام عليكم

بداية كل عام وأنت وكل أحبائك بألف خير
وكل أمة محمد صلى الله عليه وسلم


فيه اعتقاد خاطىء عند الكل في مصر بالتحديد عن النقاب وهو إنه أعلى درجات التقرب إلى الله وهو طاعة لله لكن ليس لكونه نقاب ولكن لأنه الحجاب من وجهة نظر فقهية فمن ترتديه على إنه فرض مثل تماما المحجبة الكاشفة لوجهها فمن تحجبت بالحجاب العادي تنتنهج مذهب أن هذا هو الفرض

وكما أن في المحجبات من ترتدي الحجاب ولها أفكار وسلوك وتعاملات قد تتعارض مع الحجاب لاختلاف البشر وتفكيرهم فالنقاب كذلك لا يمنع أن تكون لكل واحدة ترتديه شخصية مختلفة فهو ليس قالب له شروط معينه إن لم تتوافر كلها فلا يجب أن ترتديه المرأة بل هو مجرد زى ترتديه المرأة المسلمة وما يجب أن تكون عليه المرأة المسلمة سواء كانت محجبة أو سافرة أو منتقبة
لكن لأن جرى العرف في مصر بالذات أن النقاب هو كالقربان يفعل من أجل مرضاة الله والزهد في الدنيا وأيضا كعملية انتحارية تواجه بها غضب الجميع واستنكارهم
وهو مجرد زي فرض على المرأة المسلمة من وجهة نظر فقهية اختلف عليها وهناك من ترتديه اسوة بأمهات المؤمنين ورغبة في نيل أقصى درجات رضا الله من وجهة نظرها
وهذا لأن النقاب في مصر يحارب وغير مقبول وغير مستساغ ولكنه حجاب المرأة المسلمة في أماكن عديدة وتجدي العديد ممن دخل إلى الإسلام حديثا ويطبق الدين كما كان أيام الرسول ترتدي زوجته النقاب كزي مفروض على المرأة المسلمة كما قرأ وفهم عن هذا الأمر

الخلاصة أننا نتعامل مع النقاب بمفهوم خاطىء لأن النقاب مثل الحجاب تماما هو طاعة لله على أنه هو الفرض
وهناك قاعدة فقهية أنه ينكر المتفق عليه ولا ينكر المختلف عليه بمعنى أن النقاب اختلف عليه في فرضيته فلا يجوز لأحد أن ينكره ويقول أنه مغالاة أو أنه ليس من الدين أو أنه تطرف أو عادة جاهلية كما يزعمون
هو زي المرأة المسلمة إرتديته أنا مثلا ً لاقتناعي أنه هو الفرض وليس الحجاب

وما يسري على المحجبة من ضرورة إلتزام الأخلاق والمعايير الواجبة للمرأة المسلمة يسري على النقاب وما يجب أن تنتهي عنه المحجبة هو نفسه الذي يجب أن تنتهي عنه المنتقبة
فالنقاب ليس عادة خليجية أو بدوية أو يهودية , النقاب هو حجاب المرأة المسلمة برأى فقهي معتبر فهكذا يجب أن نتعامل معه ولا نهيل عليه كل هذه القدسية وكل هذا العبأ النفسي وكأن من ترتديه راحت في الوبا أو أصبحت من المجاهدات أو أصبحت رابعة العدوية في النصف الثاني من حياتها أو كأنها إليان هبطت من كوكب آخر
ولو ذهبت منتقبة مصرية إلى السعودية مثلا فستجد أن الحياة هناك تسير بشكل عادي جدا لأن الغالبية العظمى من النساء يرتدينه
بل لو رجع الزمن إلى الوراء وفي مصر نفسها إلى أيام ثورة 19 ستجدي المنتقبة المصرية لا تناقش مسألة النقاب من عدمه لأنه وقتها كان هو السائد

أتمنى أن نتعامل جميعنا ( منتقبات ومحجبات وسافرات ) مع النقاب بنفس مفهوم الحجاب ووقتها ستكون حياتنا أسهل بكثير وستعرف المحجبة أنها لا يجب أن تجلس بجوار رجل ليس من محارمها وستتوقف المنتقبة عن الدعوة بهذه الفوقية الغير مبررة إلى النقاب لأنه مجرد زي

أعتذر للإطالة ولكني حقيقة أنا في أشد الحزن لحالة التعامل مع النقاب في مصر سواء من الأهل أو نظام الدولة أو العامة من الناس أو بين المنتقبات وغيرهن من المحجبات أو السافرات

صوت من مصر said...

كلامك صح وبيحصل خاصة فى المواصلات بيحصل كده مع انى ولد بس بفهم وبحس بده

كلمات من نور said...

اهم من النقاب وان احنا نبص على نفسنا فى المراية مايكونش في حاجه بينا مننا اننا نبص على نفسنا من جوا لان ده المهم ان الناس تعرفه وتشوفه وتتعامل معانا من خلاله وعلى اساسه مش على اساس مظهرنا وشكلنا ... ولكل واحد حرية اختيارالشكل اللى بيظهر بيه المهم انه لا يتعدى على حدود غيره وانه يحترم شكل الاخر ووجوده

============================

كلام حقيقي جدا وفي الصميم يا رحيل

يارب يكون اللي جوه أحلى و أنقى كتير من مجرد مظهر خارجي
عيدك مبارك

جايدا العزيزي said...

موضوع مهم وجميل

جزاك الله كل الخير

وجعله فى ميزان حسناتك

كل عام وانت بخير

كل عام وانت الى الله اقرب

وعلى طاعته ادوم

عيد اضحى مبارك

اعاده الله عليك وعلى امة نبينا محمد

بالخير واليمن والبركات

عيد سعيد

تحياتى

قلم رصاص said...

بصرف النظر عن اي حاجة

كل سنه وانتي طيبه
وعيد سعييد عليكم يارب

^_^

رحــــيـل said...

الازهري

اهلا بيك
بالظبط طبعا كده
:)
شكرا لمرورك وتعليقك
وعيد سعيد عليك
----------------------------------
ا.مجداوية

اهلا بحضرتك
ربنا يجعله عيد سعيد عليك وعلى اسرتك الكريمة
اتفق مع حضرتك تماما حول الاعتقاد الخاطئ تجاه النقاب والمنتقبات سواء من المجتمع او منهن شخصيا
واعتقد ان هذا سيحتاج لكثير من الوقت ليتغير
لكن مازلت على رأى ان اهم من ان ندعو لفرضية النقاب ان ندعو لتقويم السلوك الانساني

خالص تحياتي واحترامي لحضرتك
-----------------------------------
صوت من مصر

يا هلا ياهلا
عيدك يارب يكون سعيد

طالما البنت اختارت انها تخرج بره البيت اكيد ده هيحصل بس المهم انها تعرف برضه تحافظ على الحدود والمسافات بينها وبين الاخرين
وكمان للاسف فى رجالة بيتصرفوا بقلة زوق ومن غير قصد
لو كل راجل تخيل ان البنت دى ممكن تكون اخته او امه هعيرف يتصرف ازاى مع اى بنت فى المواصلات

شكرا ليك جدا مرورك
----------------------------------
كلمات من نور

يادي النور
:)
اشكر حضرتك جدا على كلامك ومرورك
وندعو الله جميعا ان يجعلنا متسقين مع انفسنا
كل سنة وحضرتك طيبة وبخير
عيد سعيد
----------------------------------
جايدا

اهلا اهلا
شكرا ليكى جدا
وكل سنة وانتى اسرتك بخير وسعادة
عيد سعيد ياافندم
:)
-----------------------------------
قلم رصاص
:)
وبصرف النظر برضه عن اى حاجة
وانت طيب وبخير دايما
ربنا يجعل عيدك سعيد
شكرا جدا يا سيد

مجرد حلم صغنتوت said...

موضوع جميل يا سارة
واحلى حاجة انك كان عندك الشجاعة قدام نفسك انك تقولي ان القرار ده مكنش مناسب ليكي في الوقت ده.. ناس كتير مش بتعرف تعمل كده

كل سنة وانتي طيبة وعيد سعيد عليكي يا رب :)

MR.PRESIDENT said...

كل سنة وانتو طيبين وربنا يعوده عليكم بالخير واليمن والبركات قادر يا كريم

كل سنة وانتي طيبة يا رحيل
كل سنة وانت طيب يا أمجد

بلغية تحياتي الرئاسية :)

رحــــيـل said...

مجرد حلم

كل سنة وانتي طيبة يا دودو وبخييييييييير
ايون هى الشجاعة دى اللى بتظبط امور كتير فى حياتنا اوقات بس بناخد وقت عما نقدر ناخد قرار
تسلمى يا دعاء
-------------------------------
بسام

وانت طيب وبخير دايما يا ريسنا
عيد سعيد عليك وعلى اسرتك كلها

واكيد التهنئة هتوصل
شكرا ليك :)

rack-yourminds said...

النقاب ليس من الاسلام

وهذا راي كبار العلماء
_____________

في امان الله

Anonymous said...

السلام عليكم، وكل عام وأنتم بخير
شكرا للكاتبة الكريمة تطرقها للموضوع ببساطة وشفافية وقدر من الحيادية يمكن الإحساس بها على الرغم من انتقالها من أحد المعسكرين للآخر ومحاولتها كبح جماح التحامل الطبيعى الذى تحمله والذى نتج عنه الانتقال. كذلك أشكر لصديقتك نصحك بما تعتقد فيه النفع. وهذا فى حد ذاته سلوك جميل أتمنى أن ننهجه جميعا فى خلافنا، فلا المختلف عن أمر هدم المعبد على أهله، ولا أهل المعبد كالوا له اللعنات، وإنما الأمر مر الهوينا من الجانبين، ما بين عتاب، ونداء، وتأمل ثم نقاش على الملأ مع الأصدقاء والمعارف بالحسنى.

ولا أدرى البساطة والانسيابية التى استدرجتنا بها رحيل من سيارة الأجرة إلى موضوع معقد ومتداخل وذو أبعاد واسعة. ولاأجد نفسى استطيع أن أترك بعضا مما عرضته رحيل ببساطتها وصدقها دون تعليق علق فى نفسى ويأبى إلا الظهور. فاستسمح كاتبتى، وقراءها الكرام فى أن عرض تعقيبى كما يلى:

1
المسألة الشخصية طرحتها الكاتبة فى مقالها بما يعنى استعدادها للمناقشة بخصوصها. ونظرا لأنى لا أعرف الكاتبة سوى النذر اليسير، ولم أكن أعرف أنها إتخذت النقاب فترة فى حياتها ثم زهدت فيه.. نظرا لهذا فأرى أن بحث الكاتبة عن ذاتها هو مشكلتها منذ تخرجها أو ما قبله، وقد يكون مستمرا إلى الآن. فهى لم تعرف ماذا تريد من نقابها، ولا ماذا تريد عموما، وهذا إنعكس بجلاء فى اسم مدونتها "محاولات للبحث عنى" واسمها الذى انتقته "رحيل". وقد يكون هذا السبب هو أحد دوافع ترك النقاب، بمعنى أن عدم معرفتها ماذا تريد دفعها للتخلص من بعض الأشياء التى قد ظنتها سببا فى تخفى شخصيتها، وليس أنها عرفت ماذا تريد ووجدت شخصيتها بالفعل وعرفت أن ما تريده بعد ذلك هو عدم الإنتقاب.
2
أتفق مع الكاتبة فى أن المنتقبات (ومثلهن بدرجة أقل الرجال الملتحين) يرون أنهم أعلى من الباقين، ويستخدمون تعبير "نحن" على أنفسهم و"هم" على باقى المسلمين. لكن أحيانا ألتمس لهم العذر فالعامة تتوقع منهم مثالا فى الدين وكأنهم أنبياء، وهم مثل العامة ولكنهم يحاولون الوصول للأفضل، وبالفعل الفتن التى يتعرضون لها أكثر مما نتعرض له، وفى النهاية هم بشر، فلو أصيبوا بمرض العجب فإدعوا لهم بالبرأ منه، والله يثبتنا ويثبتهم على الحق.

الشىء الذى لا جدال فيه هو أن الفاهم أفضل بمراحل من الحافظ، كما هو معروف أن العالم أشد على الشيطان من ألف عابد. لكن هذا حالنا اليوم جميعا، وهم وهن أمثالنا، مع الفارق هو وصول شىء من العلم فى موضوع معين إليهم -أو لنا أيضا- وعزمهم – بخلافنا - على تطبيقه. خلاصة القول أن أغلب المصريين لديهم جزء يسير من العلم، وبتغييب العلماء العاملين الذين يحظون باحترام الناس ضاع الناس بلا مرشد أو دليل فى بحر مظلم من الأراء والطعون والشبهات وكل يحاول بطريقته الوصول لبر الأمان. والله المستعان.

3
وصلنا الآن مع كاتبتنا إلى لب المعركة.. نعم أراها معركة، وقبل أن ننقسم لفريقين أدعوكى رحيل إلى تصور نفسك فى بلد أجنبى لا يعرف الإسلام، وأنت ترتدين حجابك المميز لك كإمرأة مسلمة، وكل تصرفاتك محسوبة عليكى كأنك الإسلام يمشى على الأرض، وأنت مسلمة من العامة، ولن تستطيعى أن تكونى المثال المطلوب، أنت تحاولين لكنك ذات قدرات محدودة. أنت تعرفين إمكاناتك، وترين أن الناس تعاملك بما ليس هو أنت. ستبدأين تضجرين من هذا الوضع، وتحسين بإنفصال الشخصية وإزدواجيتها. هل فى نهاية المطاف ستخلعين عنك حجابك؟ أظن الجواب القاطع هو النفى.

الفكرة ليست الحجاب أم النقاب.. الفكرة أن الدعوات المناهضة للنقاب علا صوتها مؤخرا، وغدرا تلقى النقاب الطعن حتى من رجال الدين، فأضحت التضحية به غير مؤنبة، وقبولها له فتاوى بالمباركة. يعنى لو رسخ الاعتقاد بفرضية النقاب، فالحالة ستكون هى ذاتها المثال المضروب وما كان النقاب ليكون أحد ضحايا محاولات البحث عن الذات.

4
أخيرا.. هناك معركة مع الرموز الاسلامية تحاول هدم كل ما أصله إسلامى، والمعركة الآن مركزة على النقاب، وبقدر تقديرى لعدم تحامل رحيل على النقاب، بقدر ما أتصور أن هذا منشأه تفكير عاقل متزن الذى آمل أن يتعمق أكثر وأكثر فيدرك أن الهجوم على النقاب يجب أن نقف جميعا ضده ولانساعد عليه بالموافقة على بعض مايتعرض له من لمز وتجريح.

قد يكون تشبيها متجنيا على أحد طرفى التشبيه ألا وهو أن محاولى الالتزام بالدين يشابهون طالبان يعنى طلبة العلم. فتعالى نرى الدنيا قامت ولم تقعد بما فيها المسلمين الذين هاجموا ضعف علم هؤلاء وبدلا من أن يعينوهم على استكمال العلم عظموا أخطاءهم ليوفروا الغطاء اللازم لقتلهم، وباء كل من ركب الموجة بإثم القتلى والجرحى والذين تمت فتنتهم عن دينهم.

عفوا للإطالة، ولكنى خشيت أن يصل جزء من تعقيبى غير متكامل فلا يكون مفهوما
وشكرا مرة أخرى للكاتبة على ساحتها المفتوحة للقراء. وفقك الله

مدحت محمد said...

ياستى كل سنة وانتى طيبة

رحــــيـل said...

وحيد

اهلا بيك وكل سنة وانت طيب
تدور حول النقاب اراء كثيرة لمختلف العلماء ما بين مؤيد ومعارض ومحايد
فى نهاية الامر ارى انه قرار شخصي جدا ولكل فرد حرية الاختيار

شكرا كثيرا لمرورك
-------------------------------------------------------------------------------------
غير معرف

نظرا لان حضرتك لم توقع باسمك
فدعنى اتوقع انا -اصل انا زوراي من الهند مش كتير
:)
عموخالد

بداية اسعدنى تواجدك وتفاعلك وتعليقك
شكرا كثيرا لك

ردا على ماذكرته
1
تحليل منطقي جدا لا انكره ابدا ولعلي لم التفت لهذا الا بعد مرور بعض من السنوات واكتساب خبرات اكثر من ذى قبل
اعتقد ان محاولات للبحث عني ستظل قائمة مدى الحياة لانى ادركت انه طالما نحيي يبقى هناك الكثير لنكتشفه فى انفسنا ومن حولنا

2
اتفق معك انها مشكلة فهم ووعي اجتماعي للنقاب والخلط مابين كونه زى و انه رمز دينى
فللاسف تعودنا الحكم على الاشخاص من مظهرهم الخارجي
والبعض منهم كما قلت يعتبرون انهم - غير-

3 ،4
اتفق معك انها معركة على الاسلام ومنه على النقاب كرمز ديني شائع منذ عدة سنوات
عني ... النقاب كان تجربة كما قلت مسبقا لم يكن قرار التخلي عنه بداية تحامل تجاهه او حرب قررت ان اخوضها تجاهه فأنا اؤمن تماما انه حرية شخصية وقد تعلمت مع الوقت عدم اصدار احكام مسبقة على الاشخاص من مظهرهم الخارجي
لست مع او ضد لكنى بالتأكيد سأحترم اختيارات الاخرين طالما انهم يتعاملون من خلال كونهم -هم- لا من كونهم منتقبات او ملتحين


اسعدنى تواجدك بحق
فشكرا كثيرا
-----------------------------------------------
مدحت

كل سنة وانت طيب وبخير
فينك من زمان :)
عيد سعيد عليك

Anonymous said...

والله كونها طلبت انها تقعد جنبك عشان تقعد ماتقعدش جن الراجل..ده مايعنيش ان المنتقبة دايما بتكون شايفة نفسها اعلى من غيرها..اللي اقدر اقوله انها فتاة حيية...على خلاف معظم الفتيات الايام دي..كتير اوي مش الكل يعني مابتشوفش اي حاجة في انها تقعد جنب اي راجل في المواصلات بتبقى عادي هما شايفينهاكده..
فالموقف يعيني لهوش علاقة بكونها منتقبة ولاحاجة دي بس فتاة حيية ...

ولو حصل كده بتكون اخطاء فردية ليس الا...

ياريت حضرتك تطلعي عالبوست ده...
http://fornkahraba.blogspot.com/2010_08_01_archive.html

رحــــيـل said...

غير معرف


طالما هى حييه ومش هتعرف تتصرف فى اى موقف ممكن تواجهه بره بيتها ومش واثقه فى نفسها وفى قدراتها ع التصرف يبقى احسنلها تخليها فى البيت ما تخرجش منه غير مع محرم ليها

انما طالما البنت قررت انها تخرج من بيتها لاى سبب لازم تكون عارفه ايه اللى ممكن تتعرض لاى وايه الحدود اللى المفروض تحطها

اعتقد ان حضرتك فاهم / ـه معنى الحياء غلط
شكرا على مرورك وتعليقك

رحــــيـل said...

شكرا على اللينك اطلعت عليه
وعارفه ان ده حال البعض منهم
انا ليا صديقات منتقبات كتير
بس للاسف الاغلبية العظمى مش كده
وفى الاخر نرجع لان المعظم فاهم النقاب غلط سواء اللى لابسينه او المجمتع
محتاجين نتعامل من جوا مش مع المظهر وبس
----
شكرا مرة تانيه

مجداوية said...


السلام عليكم
مرة أخرى تحمليني لأني سأكون مدافعة عن النقاب ما دمت حية
واسمحي لي أرد على من يقول أن النقاب ليس من الإسلام برأى كبار العلماء بشكل أكبر من ردك بأنه مختلف عليه
هو ليس مختلف عليه كونه من الإسلام بل مختلف عليه فقط في فرضيته فهل هو الحجاب الشرعي أم أن الحجاب هو ستر كل البدن ما عدا الوجه والكفين
والحقيقة لو أمعن الناس قليلاً في رأى الفقهاء الذين رأوا أنه فرض لوجدوا كثير من الدلائل تؤيد ذلك وأيضا من المعاصرين وأولهم وسوف تتعجبي لهذا لأن من أقر بفرضيته دون أن يقصد هو شيخ الأزهر السابق سيد طنطاوي ومكتوبا ومحفوظا في كتابه الوسيط وهو يفسر أية الحجاب فكتب يقول :

" وَإِذَا سَأَلْتُمُوهُنَّ مَتَاعًا فَاسْأَلُوهُنَّ مِنْ وَرَاءِ حِجَابٍ ذَلِكُمْ أَطْهَرُ لِقُلُوبِكُمْ وَقُلُوبِهِنَّ "


وقد أخذ العلماء من هذه الآية الكريمة التى تسمى((( بآية الحجاب )))، جملة من الأحكام والآداب منها :

2- حرمة الاختلاط بين الرجال والنساء سواء أكان ذلك فى الطعام أم فى غيره ، فقد أمر - سبحانه - المؤمنين ، إذا سألوا أزواج النبى صلى الله عليه وسلم شيئا أن يسألوهن من وراء حجاب ، وعلل ذلك بأن سؤالهن بهذه الطريقة ، يؤدى إلى طهارة القلوب ، وعفة النفوس ، والبعد عن الريبة وخواطر السوء . .

(((((((( وحكم نساء المؤمنين فى ذلك كحكم أمهات المؤمنين ،))))))

لأن قوله - سبحانه - { ذلكم أَطْهَرُ لِقُلُوبِكُمْ وَقُلُوبِهِنَّ } علة عامة تدل على تعميم الحكم ، إذ جميع الرجال والنساء فى كل زمان ومكان فى حاجة إلى ما هو أطهر للقلوب ، وأعف للنفوس . .
قال بعض العلماء ما ملخصه : وقوله : { ذلكم أَطْهَرُ لِقُلُوبِكُمْ وَقُلُوبِهِنَّ } قرينة واضحة على إرادة تعميم الحكم ،

((((((إذ لم يقل أحد من العقلاء ))))))، إن غير ازواج النبى صلى الله عليه وسلم لا حاجة بهن إلى أطهرية قلوبهن ، وقلوب الرجال من الريبة منهن .

((((((((((((( فالجملة الكريمة فيها الدليل الواضح على أن وجوب الحجاب حكم عام فى جميع النساء . لا خاص بأمهات المؤمنين ، وإن كان أصل اللفظ خاصا بهن ، لأن عموم علته دليل على عموم الحكم فيه . . ))))))))))


3- كذلك أخذ العلماء من هذه الآية أنه لا يجوز للرجل الأجنبى أن يصافح امرأة أجنبية عنه . ولا يجوز له أن يمس شئ من بدنه شيئا من بدنها .
والدليل على ذلك أن النبى صلى الله عليه ولم ثتب عنه أن قال : " إنى لا أصافح النساء " .
والله - تعالى - يقول : { لَّقَدْ كَانَ لَكُمْ فِي رَسُولِ الله أُسْوَةٌ حَسَنَةٌ } فيلزمنا أن لا نصافح النساء الأجنبيات اقتداء به صلى الله عليه وسلم .

***********

ومن هذا يتضح لنا أن أى أمر جاء لأزواج النبي إنما هو بالتبعية أمر لكل نساء المؤمنين
وكونهن لسن كأحد من النساء في الثواب والعقاب لمنزلتهن وقدرهن ولأنهن قدوة لنا نحن النساء وليس في التكليف
وهناك حديث الإفك ترويه السيدة عائشة وتذكر فيه:

"وكان صفوان بن المعطل السلمي ثم الذكواني من وراء الجيش ، فأصبح عند منزلي ، فرأى سواد إنسان نائم فعرفني حين رآني ، وكان رآني قبل الحجاب ، فاستيقظت باسترجاعه حين عرفني ، فخمرت وجهي بجلبابي" ،( إلى نهاية الحديث )


الراوي: عائشة المحدث: البخاري - المصدر: صحيح البخاري - الصفحة أو الرقم: 4141
خلاصة حكم المحدث: [صحيح]

أى أن قبل النقاب كان الحجاب يكشف الوجه والكفين فكان مرحلة قبل النقاب
وكما قال الشيخ سيد طنطاوي لسن أفضل ولا قلوبنا أطهر من نساء النبي !

والخلاف على النقاب جاء في الأصل بين أنه فرض وواجب وبين أنه واجب عند الفتنة فقط ولا يوجد محايد ولا يوجد من أنكره
والمفتي الدكتور على جمعة قال صوتا وصورة على قناة اقرأ ( قبل المنصب بالطبع ) أن تلاثة من الأئمة أفتوا بوجوبه وفرضيته وهم الإمام أبو حنيفة والشافعي وأحمد بن حنبل ومن قال أنه فرض وواجب فقط عند الفتنة هو الإمام مالك
لذا فكل من يهاجمه خالف كل الأراء وجاء برأى خاص به ويتبع أجندات أخرى لا علاقة لها بالدين
وسوف يحاسبون أمام الله على هذه الفتنة والبلبلة وعلى صد الناس عن الحق وعلى أنهم السبب المباشر في إيذاء المنتقبات والتطاول عليهن


وهذا لينك لرأى المفتي عن النقاب والذي غيره بعد المنصب !!!


http://www.youtube.com/watch?v=kvriZGXA0Gk


Tamer Nabil said...

كل سنة وانتى طيبة وبخير


عيد سعيد عليكى وعلى اسرتك الكريمة


مع خالص تحياتى

NaDa said...

موضوع مهم وجميـل أوي
فعلاً والله
الواحد عشان ياخد الخطوة دي
لازم يكون أدها
بكل مافيها من تغيير
ولازم يحسب قبل ماينفذ
هو مش مجرد قرار
ومش سهل
ومش عشان يبقى أسمي منقة وخلاص
أو الست دي شكلها متـدين
لمجرد أنها منقبة
ومش موضوع تدين بس
الموضوع فى كل حاجة بقى
سواء فى تصرفاتها
أسولبها
حركتها

ربنا يهدي الكل يارب
وكل سنة وأنتي طيبة
:)

قهوة بالفانيليا - شيماء علي said...

انا النقاب بالنسبة لي أزمة حقيقية في التعامل مع أي واحدة لابساه
مرة كنت في مسجد الكلية
في الوقت دة كانوا كل اللي بيدخلوه منقبات ..
و كانوا بينظروا لي على اني مش منتقبة يعني كيف أجرؤ و أدخل مسجد المنتقبات !!
أصلاً أنا أول مابشوف نقاب .. باتقفل !!
باتقفل من جوايا اوي .

ostora said...

اختي رحيل

بصراحه انا موش بحب اتعامل مع المنتقبات
كلمه معرفش صح اقولها او لا بس من صغري من اختلاطي
بيهم معرفش ليه بخاف من التعامل معاهم وبحس ان في ورا
نقابهم ده حاجات كتير بيداروها وعدم وضوح وده عن تجربه مع كذا حد عرفته
وموش شوفت فيهم الالتزام قلبا وقالبا كأحترام لزيهم بالعكس بيكون في بنات اقل منهم في الالتزام بالملابس لكن اخلاقيا ودينيا اعلي منهم بكتير
"الا من رحم ربي" بالتأكيد مش كلهم وحشيين بس زي ما بيقولو ان
لكل قاعدة شواذ انا بشوف ان الكويسيين فيهم هما شواذ القاعده
وكتير منهم بشوف انهم بيلبسوه كألتزام خارجي وبس لا تصرفات ولا طباع بتتفق مع احترام الزي اللي قرروا انه يكون عنوانهم عند الناس
وكمان ده غير لما اشوف واحده فيهم او اتكلم معاها بتحسسني اني شيطان
وتفضل تدعيلي بالهدايه والالتزام بالنقاب ويااه يا بنتي لو بس تاخدي الخطوة دي و تعرفي الطريق الصح لربنا علشان يرضا عنك
كتير بسأل نفسي هل علشان اكون ملتزمه وربنا يهديني لازم اكون منتقبه
هل مجرد اني اخبي وشي ولا عنيا هو عنوان الالتزام والتقرب من ربنا يعني لو انا ملتزمه في اخلاقي واحترامي
وتصرفاتي و لبسي وحجابي ابئا محتاجه دعوه بالهدايه والالتزم و لازم اخبي وشي علشان ابئا قريبه من ربنا
وانا موش بتكلم في اعتراضي علي النقاب في انه فرض او سنه او اجتهاد واني معاه او ضدده لكنها وجهة نظري من تعاملي مع بعض المنتقبات

تحياتي ليكي اختى الكريمه في اول
زيااره ليا لمدونتك معلش كتبت كلام كتير بس موضوع جميل وتجربه خوضتيها وميرسي لانك شاركتينا فيها كل سنه وانتي بالف خير

re7ab.sale7 said...

مساء الوروووود المتأخرة كالعادة
معلش بجد كنت تعبانة ولو لاحظتي صفحتي ع الفيس بوك كنت هتلاقيني غايبة من اسبوع
شوفي يا سارة يا عسولة انا من فترة وانا كنت عايزة اكتب عن حاجة زي دي بس كل مرة مش بكون مترددة لكن انا كل مرة اكتب عن حاجة في مدونتي في ناس بتتكلم بطريقة مش حلوة وانا اكره الحوار بالشكل ده ..في حاجةاسمها حوار عاقل وبأسس واقتناع وبرغم اني بكلم اي حد وارد عليه بعقل وفهم وادلة مقنعة ...بس بردو هتلاقي النوع الغبي ...شوفي احنا بقينا للأسف ف مجتمع فقط مظهري ...الدين مظهر ....التقدمية مظهر ...الحداثة مظهر ..الروشنة برضه مظهر والسياسة اكتر شيء فيها المظهر واضح اووي وبدون فهم وغباء ...والدين الاسوء للأسف ...ولازم الانسان يكون فاهم دينه ويكون بينفذ تعاليمه بفهم واقتناع وليس لمجرد التنفيذ وفقط ....يعني مش يصلي ويصوم ويزكي ويحج وهو اصلا بيسرق ويزني ويكذب ويعمل بلاوي ...النقاب والحجاب حاجة حلوة بس نستعملها صح ...وان شاء الله هتلاقيني قريب جدا كتبت موضوع علي مدونتي ف النقاب
دمت بخير عزيزتي

Sherif said...

موضوع شائك بالتأكيد ولو أننا عدنا دون دخول فى تفاصيل لوجدنا المولى تعالى يقول للرسول فيما أحل له فى سورة الاحزاب

"لايحل لك النساء من بعد ، ولا أن تبدل بهن من أزواج ولو أعجبك حسنهن" فكيف يعجبه حسنهن اذا لم يراهن؟

الثانية فى سورة النور يقول المولى " ولا يبدين زينتهن الا ما ظهر منها " وهذا يعنى أن هناك زينة تبديها المرأة بصفة عامة

كذلك فحديث الرسول " ان المرأة اذا بلغت المحيض لم يبد منها سوى هذا وذاك " واشار الى يديه ووجهه

كل هذا ينفى وجوب النقاب بالكلية ولا اعتقد أن يزايد أحد على سيد الخلق اجمعين

أما من الناحية العملية فأننى لاأرى ملثما الا قاطع طريق أو لص يخفى هويته عن الناس .. فالوجه والكفان لا يثيران فتنة غير أن المرأة لن ترى بوضوح .. ولن تستطيع الأكل دون ان تلطخ نفسها .. ولو أن الله يرى أن ذلك واجب لفرضه فى الحج والعمرة فهواحق ان يستحى منه لا الناس

مسألة أن تختار واحدة ماتشاء فهذا شأنها ومايريحها وسط الناس .. أما أن ترجع ذلك للدين فالدين الاسلامى لم يطلب ذلك وكفانا تنطعا على الدين

الحسينى said...

أشكرك على طرحك للموضوع ولو تسمحيلى أقول رأيى فيه
بازعل أوى لما حد يعمم أحكام ويقول أنه شاف كتير منتقبات مش كويسين فكره النقاب أو أنه مش حابب يتعامل معاهم
الفكره دى بالظبط زى واحد أتكلم مع واحده معجبتهوش افكارها او كرهها فقال البنات كلهم أفكارهم وحشه مثلاً
خلينا نقسم الناس كده بنت بدون حجاب بنت محجبه بنت منتقبه
مجموعه بنت بدون حجاب أكيد فيها الكويس قوى والوحش قوى وما بينهم لأنهم بشر
مجموعة بنت محجبة نفس الكلام بالظبط مفيش فرق
مجموعة بنت منتقبة ليه عاوزينهم كلهم ملايكه بجناحات ما هم كمان بشر فيه الكويس اوى والوحش جدا وما بينهم
لو أنا شخص بيقول أن النقاب فرض يبقى من وجهة نظرى كل المسلمات لازم يلبسوا النقاب وكل المسلمات يشمل كل الكويسين قوى وكل الوحشين خالص وما بينهم
يا ريت تكون الفكرة وصلت أن اللى بيلبس النقاب مش بيعبر عن الدين والملتحى مش هو الاسلام يمشى على الأرض لكن هو اختار ينفذ فرض ربنا زى واحد ملتزم بالصلاه مش فيه ناص بتصلى وبتاخد رشوه أو تكدب؟ ده مش هو المفروض يحصل بس احنا بشر
وكل واحد بيعبر عن نفسه وكل أنسان هو حاله خاصة مش قاعدة بنقيس عليها كل الناس وكل واحد فى الأخر حسابه عند ربنا
بس من وجهة نظرى لما واحدة لابسه النقاب تغلط بتغلط لانها بشر مش بتغلط لانها لابسه النقاب ولما بتعمل حاجه كويسه مش بتعملها عشان النقاب النقاب هو مكانى وسط طابور الفروض والأوامر بتاع ربنا اللى مينفعش اختار منها اللى على مزاجى يعنى فى صلاه وصوم وزكاة وصدق وحاجات تانية كتير مينفعش أخد أنا الصوم عشان شهر وهيعدى أو اخد صلاه و صوم وخلى الصدق ده بعدين كلنا نحاول نكون الصورة اللى ربنا عاوزها لينا وممكن نكون بنقصر شويه لأن كلنا أنسان
أسف على الإطاله تقبلى تحياتى

واحد من لناس said...

النقاب ليس فرضا وهي مسالة خلافية لم يتفق فيها الاولون حتى يصل المتأخرون فيها الى نتيجة نهائية لذا فمن الافضل ان تؤمن المنتقبة بحق المحجبة غير ن المنتقبة بان تتبع رأي من تثق بعلمه وتقواه (كلنا تقريبا مقلدون والمقلد عكس المجتهد ومن ظن نفسه من الفاهمين الذين بلغوا مرتبة الاجتهاد وان يفتي نفسه بأن يسأل نفسه كم يحفظ من القران او الحديث حتى يستخرج احكاما منها وما هي معلوماته عن النحو والصرف فقط)وأن تؤمن المحجبة غير المنتقبة بحق المنتقبة في هذا الاختيار الفقهي وتراعي طريقة تفكير المنتقبة في كون ما تفعله واجبا .ولكن نصيحة لكي سيدتي الفاضلة ان تسألي نفسك لماذا ارتدي النقاب من الاصل فان كان عن قناعة بأنه واجب شرعي فلا يجوز شرعا خلعه الا اذا اكتشفتي خطا اختيارك الفقهي وتبين لكي شرعا انه ليس زيا شرعيا اما اذا كان الامر حالة من الفتور والملل او حب التغيير او محاولة اثبات الذات والاتجاه ضد التيار سواء في ارتدائه او خلعه فرجاء مراجعة الذات وسؤالها سؤالا مباشرا هل تريد الله حقا هل تؤمن بالثواب وتحلم به .ان كثيرا من الصدمات تعبث بثوابتنا القلبية والعقلية اليقينية وفي النهاية لا ملجأ من الله الا اليه.

رحــــيـل said...

أصدقائي شكرا لكم جميعا
مرورك وحضوركم ومشاركتكم

لكنى فقط احببت ان انوه اننى لم اكتب تدوينتى تلك من اجل مهاجم النقاب ولا المنتقبات
انا فقط اعرض وجهة نظري فى تجربة شخصية لكنى قطعا لا اصدر احكام او اهاجم
فكما قلت مسبقا هو حرية شخصية ولكل منا كامل حريته فى اختيار السكل الذى يقرر ان يظهر به للاخرين شرطا ان لا يتدخل فى شئون غيره وان يحترم حرية الاخر

تحياتى واحترامي لكم جميعا

rack-yourminds said...

كل سنه وانتي وزوجك واسرتك الكريمه في احسن حال