Wednesday, June 30, 2010

كلمتين لمصر

 تحديــــــــث 
تفاصيل لقاء مدوني دمياط على مدونة 
ع الهامش  .. ليساندرا

كلمات : احمد فؤاد نجم .... غناء فريق بساطة



كل عين تعشق حليوة
و إنتي حلوة في كل عين
يا حبيبتي قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
..........................
شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
.....................
قصرك المسحور غيلانو
أغبى من دود  الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجوعه ملو جوفه
مات بخوفه من الغيلان
روح الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين
....................
أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظالمة
كنت خايف يلمحوها
يقتلوها في سكة ضلمة
شقشقت م النور بشاير بشاير
زهرة الصبار يا سلمى
يا نسيم الشوق يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى شايف يمشي فين

Monday, June 28, 2010

فوضى الهوى



بعد رحيلك
تبقى مشاعرنا مبعثرة فى المكان ........ تطاردني فوضانا المحببة التي نخلفها بعد كل لقاء ..... اتركها كما هي أأتنس بها فهي عزائي الوحيد فى الغياب

هنا أحلام صبانا المنقوشة فى مخيلتنا منذ بداية الزمان ..... تلك التي رافقتنا منذ الصغر ...... والتي كلما صعدنا درجة على سلم العمر الجميل بوجودنا معا تلونت بفرحة الاقتراب من واقعنا المنتظر

 وهنا فرحتنا بلقاء الهوي بعد وجع الغياب الذي يحسبه الأخرون أيام .......  أما أنا وأنت ... فأوقاتنا فى البعد سنوات  ..... تنقضى بدعوات منا : يا الله هون علينا أيامنا و لتجعلها لنا كما هي عند  الأخرين ...... أيام

و يبقى الحنين هنا حزين كان يأمل أن يرتوي ........ فلا فى القرب ارتوى ولا فى البعد اهتدى ....... فعجباً لهذا الحنين الذي يظل رغم كل اللقاءات بيينا كما هو ظمآن
وحديث بيننا لا ينضب ........ يحول صحراء البعد بساتين........ نستظل بأشجارها ...... نتهامس تحتها ...... فيطرح عشقنا وردا

وفي الصمت نسائم هوانا تحمل عطرا لا ينتهى اثره حتى فى الغياب

وفي الوادع يرافقنا شوق ..... كان منذ قليل فرحا مبتهجا باللقاء..... ناسيا انه حين تمتد ايدينا بالسلام سيعتصر الما بينها ...... فيفوق من غيبوبة العشق فزعاً على غربة الفراق

هكذا هي الاشياء بعد رحيلك  ..... لا تعي لأي الأسباب ترحل ..... فتظل تطاردني حتى نلتقي من جديد  تتطالبنى بالقصاص لأننا حرمناها متعة اللقاء ........ فترحل أنت وتتركني لها ...... وبرغم الحزن الذي يكتسي المكان لغيابك إلا أنني أبقي على التفاصيل التي كانت بيينا .... وعلى عطر الهوى......... واحلام الصبا....... والحنين ....وعلى اصداء الاحاديث يبننا ........ و ذكرى الصمت وكلام العيون ....... أبقى على فرحتي بك و على هذا الشوق  الذى يصاحب وداعنا الحزين
فرفقاً بي وبذاكرنا المبعثرة فى المكان

Friday, June 25, 2010

Thursday, June 24, 2010

لأ بجد كده كتير

 الصورة دى وجعتني جدا وبكتني من اسبوعين اول لما الموضوع بدأ ينتشر ع النت
بصراحة قبل كده كنت مكبرة دماغى تماما من اي اخبار ممكن توجعني او تضايقني من باب انى طالما مش هقدر اعمل حاجة وكل اللى هيحصلي لما اقرأ خبر مؤلم انى اتوجع ومزاجي يبوظ يبقى خلاص قلة قراية الأخبار احسن
اصل مش انا اللى هصلح القرف اللى احنا عايشين فيه يعني
صورة خالد بعد التعذيب وتفاصيل واقعة التعذيب نفسها غير انها وجعتني لكن كمان خلتني اهتم مش بقضية خالد وبس اللى بقالى اسبوعين متابعة كل اللى اكتب فيها وكل اللى البرامج اللى اتكلمت عنها سواء كانت حقيقة او كدب 
بدأ يظهر قدامي حوادث تعذيب كتير حصلت قبل كده وماكنتش اعرف عنها حاجة حسيت انى بجد مكسوفة من نفسي بقى كل ده يبحصل وانا ولا فى دماغى ولا حتى كنت بهتم انى اتابع اللى بيحصل للناس اللى عايشة فى نفس البلد الناس اللى عايشة جمب الحيط زينا ومع ذلك ماسلموش من انهم يتعذبوا لان ده العادى فى بلدنا ولاننا مالناش اى قيمة ولاننا ارخص من تراب البلد اللى احنا ماشين على ارضها ياه قد كده فى ناس اتعذبت واتوجعت وأسر بتعاني من اللى بيحصل فى اقسام الشرطة وانا ما كلفتش نفسي حتى عناء القراية والمتابعة لقضايهم وصلت لفين وعملوا ايه وعاشوا حياتهم ازاى بعد كده؟

قضية خالد صحت ناس كتير ناس اتجمعت ع الفيس بوك و ووضحوا للناس الحقيقة ونزلوا مظاهرات ووقفات صامتة جوا مصر وبراها ناس كتير متضامنة مع القضية
انا منزلتش لا مظاهرات ولا وقفات صامتة بس اضعف الايمان ان انا انشر القضية عشان كل الناس تعرف اللى حصل لخالد ولغيره اضعف الايمان انى اتابع واعرف  الدنيا ماشية ازاى حواليا انى انفعل واغضب واحزن واعلن رفضي للي بيحصل
-----------
خلال الفترة اللى فاتت اثناء متابعتي لقضية خالد قريت تعليقات فى منتهى السخافة واراء فى منتهى السطحية كان منها على سبيل المثال تعليق على مقالة فى جريدة اليوم السابع غالبا - انا لا اذكر نص التعليق بالظبط-لكن فيما معناه

ان ازاى كل الناس دى تخرج فى مظاهرات لشاب كان بيسمع ويهتم بالموسيقى فى حين ان قناة الرحمة لم يخرج ربع هؤلاء حين تعرضت لازمتها الاخيرة وطبعا منساش انه يأكد علينا ان المظاهرات حرام شرعا!!!!!!!!!!!!!!!!!!!د
هى قناة الرحمة اي ان كانت ما تقدمه اهم  من  القتل والتعذيب والبلطجة والقهر واهدار روح انسان وكرامة وطن؟ بقى هي كل المشكلة ان اللى مات ده كان مهتم بالمزيكا ومش مهم اللى حصله
رحمتك يارب
واخر كان رأيه

ان الوقفات الصامتة بدعة!!!! لأنها لم تكن تحدث ايام الرسول علية الصلاة والسلام 
الوقفات الصامتة مش حداد على روح خالد دى حداد على كرامتنا اللى راحت وعلى كل واحد بيموت فى اقسام الشرطة من التعذيب الوقفات الصامتة دى اعلان للغضب ورفض للبلطجة اللى حاصلة فى بلدنا
انا مرارتي بصراحة بتتفقع من التعليقات دي

ده غير بقى اللى بيتكلموا عن ان المظاهرات دي ضد استقرار الوطن !!!!!!! هو احنا عندنا اصلا وطن عشان يبقاله استقرار

ولا بقى اللى بيقولوا ان اللى بيحصل ده والناس اللى مش مصدقه وبتكدب الحكومة احنا كده بنسئ لسمعة مصر فى الخارج !!!!!!! يافرحتي يا جماعة سمعة مصر مش محتاجة اللى الشباب بيقولوه وبيعملوه عشان تبوظ...... الحكومة بتاعتنا قايمة بالواجب جدا فى الموضوع ده بايظة بايظة يعني مش اى كلام ده كفاية بس اللى بيحصل لشبابنا برة من غير ما حد يتكلم حفاظا طبعا على العلاقات الدولية اللى اهم ميت مره من الشعب اللى ميسواش

ده غير بقى بيان الداخلية اللى كان كدب فى كدب عن خالد وسمعته والكلام اللى قالوه على لسان والدته وكان كله كدب وتقرير الطب الشرعى الاول والشهود الزور والتحقيقات المتفبركة وووووو ده احنا عايشين فى بلد .........تييييييييييت

بس الجميل بعد كل اللى البلاوي اللى بتحصل الصحوة اللى حصلت الفترة اللى فاتت والناس اللى صوتها علي والمصرين المغتربين اللى خرجو فى مظاهرات ووقفات

وتحقيق النيابة كان بدأ ياخد مجرى غير اللي فات وظهرت حقايق كتير غيرت الموضوع وكل اللى شاف خالد وهو بيتعذب شهد رغم تهديدات الشرطة ليهم وكنا كلنا مستنيين نتيجة تقرير الطب الشرعى للجنة الثلاثية اللى تنفي نتيجة التقرير الاول اللى بيقول ان خالد مات مخنوق بسبب لفافة البانجو اللى بلعها وتأكد شهادة الشهود انه مات بسبب التعذيب

واذ فجأة يطلع التقرير يأكد موضوع الخنق؟؟؟؟؟؟؟ قال يعنى الناس هتصدق الكلام الفاضي ده وتكدب صورة خالد بعد التعذيب وتكدب شهادة الشهود وتكدب التلاعب اللى حصل التحقيق والنيابة كشفته من الاخر كده الحكومة بتقولنا اخبطوا راسكم فى الحيط وبتطلع لينا لسانها
رئيس الطب الشرعى الاسبق قال ان تقرير الطب الشرعى بأن خالد مات مخنوق استخفاف بالعقول هنا المقال  ولسه عندهم البجاحة انهم يطلعوا علينا بتقرير يعيده فيه الكلام الخايب ده
قمة الاستهبال تقرير الطب الشرعي الوارد من اللجنة الثلاثية في قضية خالد سعيد المقال هنا فى اليوم السابع
------------------------------------
اسفة ع الصورة كنت حريصة فعلا انها ماتكونش قدامي فى المدونة بس بصراحة لازم تبقى قدامنا دايما عشان مننساش خالد واللى جراله هو و ناس كتير زيه
وزي ما قولت اضعف الايمان اننا نتابع وننشر الحقيقة 
وهنا جروب كلنا خالد سعيد

كمان يوم الجمعة غير الوقفات الصامتة اللى فى كل المحافظات وكمان بره مصر هنا  لينك الايفنت بتاع كل محافظة .... كمان هنعمل يوم الجمعة تدوينة حداد على خالد ده الايفينت بتاعها هنا

واخيرا انا اهتمامي بموضوع خالد مش اهتمام سياسي لكن اهتمام انساني بس للاسف احنا اللى بيحكمونا لا يمسوا للانسانية بصلة .... معلش لو كنت طولت بس انا دمي بجد محروق ع الاخر من التقرير بتاع اللجنة الثلاثية ..... ربنا يحرقهم دنيا واخره اللهم امييييييين

Sunday, June 13, 2010

كتبنا الكتاب


الجمعة الموافق 11-6-2010 كان كتب كتابي انا وامجد
شكرا جدا لكل الناس اللى هنتني ع الفيس بوك او اتصلوا بيا او بعتوا رسايل
وشكرا لأقاربي اللى كانو موجودين معايا يومها
شكرا لكل الناس اللي حسيت منها ان فرحانة ليه ....فرحتكم وتهانيكم فرحوني بجد
ربنا يسعدكم ويهنيكم ويفرح قلبكم دايما وعقبالكم جميعا -ماعدا طبعا المتزوجين منكم عملا بمبدأ امرأة واحدة تكفي طبعا -د
و طبعا لازم اشكر البرنسيسة جوجو اختي الصغيرة لان كان تاني يوم السبت اول يوم فى امتحانات الثانوية العامة بس حصل خير الحمد لله ورجعت النهاردة مبسوطة من امتحان العربي

Friday, June 11, 2010

ربنا ينتقم من الظالم



خالد محمد سعيد
شاب مصري عنده 28 سنه من منطقة كليوباترا بالاسكندريه
و صاحب مكتب استيراد و تصدير
كان قاعد في سايبر في وقت متاخر بالليل
و دخل بتوع المباحث بيفتشو كل اللي قاعدين باستخدام قانون الطوارئ
خالد اعترض و قال احنا بنتفتش ليه
كان تمن السؤال البرئ ده ان اتنين مخبرين مسكوه و نزلو في ضرب في المحل و في الشارع و في مدخل عماره جنب السايبر قعدو يرزعو وشه في الرخام بتاع السلم و في مدخل العماره الحديد
و خدو جثته و حطوها في البوكس و بعد 15 دقيقه رجعو رموها ف الشارع و مشيو
كل واحد فينا ممكن يكون خالد
حنسكت ؟ ...... منقول من الجروب

وفي رواية اخرى هنا

المهم انه اتضرب واتعذب لحد ما مات
ومش اي تعذيب دول لو كفرة مش هيعملوا كده 
---------------------------------------------
انا من ساعة ماشفت صورته بعد التعذيب وقريت اللى حصله
وانا قلبي بيوجعني ومزاجي زي الزفت
حسبي الله ونعم الوكيل فى اللى عمل فيه كده
مش معقول يكونوا بني ادمين منهم لله ربنا ينتقم منهم
ربنا يرحم خالد ويصبر اهله
-----------------------------------
ياريت اى حد ادمن علي اى جروب ع الفيس بوك 
يبعت رسايل بـ لينك جروب
خالد -الله يرحمه- لكل الاعضاء