Monday, November 15, 2010

عن النقاب..


كتبت البوست ده بسبب موقفين ورا بعض حصلوا معايا
1
كنت في ميكروباص راجعة من الشغل طلعت واحدة منتقبه من الطريق ركبت جمبي و كان لسه فى مكان لحد تالت طلع راجل كبير  البنت طلبت منى انى اقرب ناحيتها عشان الراجل مايركبش جمبها فرفضت لانه كده كده فى الحالتين هبقى انا جمبه سواء اتحركت من مكاني عشان خاطرها او ما اتحركتش زي ما عملت - لانى كنت مرتاحة اساسا فى مكاني - مع انى فى الغالب مش برخم فى الموصلات على حد وبكون متعاونة بس موقف البنت ضايقنى ... البنت المنتقبة بتتعامل مع نفسها على انها اعلى درجات من البنت العادية وطبعا هى لايجوز ليها ان راجل يقعد جمبها فى المواصلات بينما يجوز لاى بنت تانية طالما هى اختارت انها ما تكونش منتقبة مع ان طبعا لو الوضع مش مريح مافيش اى بنت ترضي بيه
2
اتقابلنا قريب فى مهرجان كان للاطفال وكان اطفالها موجودين كان بقالنا فترة متقابلناش سلمنا ووقفنا نتكلم سلامات واخبارك وبعدين لاقيتها بتقولي وانتى عاملة ايه فى الدنيا ؟ ولا واخداكي ومش بتفكري ؟ ففهمت طبعا اللى ورا السؤال ولانى ماعنديش استعداد للدخول فى مناقشة كانت هتحصل اكتفيت بابتسامة وكلام فى العموم لكن هى صممت وسألتنى بشكل مباشر : انتى مش ندمانة ؟ فقولت مابدهاش بقى : على ايه ؟ تقصدي النقاب يعنى ؟  ... قالتلى اه قولتلها : لاء  .. فاستغربت جدامن سرعة ردي قالتلى ليه ؟  .. قولتلها عشان انا الوقتى حاسة انى من جوا شبه بره انا عمرى ما هفكر البس النقاب تانى
ففضلت بقى طول ما احنا واقفين تدعيلي ان ربنا يهديني
3
من زمان من يجي تلات سنين كده وانا عايزه اتكلم عن النقاب كتجربة شخصية مش كرمز ديني ولا فرض ولا سنة لان لا المدونة ولا البوست ده المكان اللى ممكن يتناقش فيه الموضوع ده ولان بصراحة كان يهمنى زمان لما كنت باخد قراري بلبسه انى اناقش واعرف وسمعت وقتها اللى يرضيني عشان البسه لكن حاليا الموضوع اصبح مجرد تجربة انا مريت بيها وانتهت فكلامي عنه هيكون من منظور شخصي جدا
---------------------
فى وقفة العيد الكبير سنة 2007 خلعت النقاب بعد تلات سنين من ارتدائه... كان تجربة دخلتها بكامل ارادتي بالرغم من رفض الجميع واستغرابهم لقراري..  وخرجت منها برضة بإرادتي وان كان فى ظاهر الامر انه حصل بعد مناقشة طويلة مع بعض اقاربي لاقناعي بالتخلي عنه ...  وقتها كنت بدأت أحس بفجوة مابين اللى جوايا واللى ظاهر للناس خصوصا اللى مش عارفنى حسيت انى حطيت نفسي فى قالب مش على مقاسي وان الناس شايفة واحدة غيري 
وان مواقفي اللى الناس بتشوفها كويسة بتحسب لنقابي مش لان دى انا 
وان لما اتصرف تصرف مجنون شويه او يشبهنى الناس بتستغربه مني لان المفروض مايصدرش من بنت منتقبة
حسيت انى اتنين فى بعض منتهى التناقض واللخبطة والتوهه .... والاحلام اللى مبقتش عارفة اظبطها على مقاس انهى واحده من اللى انا عايشاهم
تلات سنين عشتهم مش انا فعلا ... جايز اللى فادني التلات سنين دول انشغالي فى العمل التطوعي لان كان هو نافذتي على العالم بس كنت دايما مش راضيه وحاسه ان مش ده اخري وجوايا طاقات لحاجات تانية ماكنتش عارفه هي ايه
لما بدأت ادون .. التدوين فتح افاق جديدة ليا وعالم تاني كان للاسف غايب عني بحكم ان فى مدينة صغيرة والمجمتع اللى انا في محدود والدايرة اللى كنت بلف فيها كانت عمالة بتضيق لحد ما خنقتني على شوية احباطات ما بعد التخرج
التدوين كانت بداية خروجي من الدايرة وبداية لانى ارجع لنفسي بعد ماحسيت بحجم الفجوة اللى انا صنعتها طول تلات سنين كنت فيهم منتقبة
بالرغم من انى طبعا فى البداية كنت مقتنعة جدا و مسلمة جدا للفكرة دي وضربت بكلام كل الناس عرض الحائط ونفذت اللي في دماغى- كالعادة طبعا -بس المهم ان فضلت بتعامل بأخلاقيات سارة ومن دافع شخصيتي انا ماكنتش بتعامل بشكل عدواني مع حد وكنت محتفظة بكل صداقاتي القديمة سواء كانت على نفس الدرب او الدرب المضاد تماما ليه  .. واللى ماكنتش برضاه لنفسي ماكنتش برضاه لأي بنت تانية حتى لو معرفهاش
مع احترمي لكل المنتقبات صاحباتي منهم او اللى مش عارفاهم
بس ليه تفتكروا الفكرة السائدة عن المنتقبات ؟
المشكلة ان نسبة كبيرة منهم بيكونوا حافظين مش فاهمين- حاجة كده زى دور نجيبة فى فيلم الثلاثة يشتغلونها - الفيلم ده ناقش فكرة التطبيق بدون وعي مش للدين وبس وللسياسة كمان والانفتاح بصفة عامة
المهم يعنى انهم فى الاخر بيعكسوا مدى جهلهم للاسف مش بيعكسوا مدى تدينهم وده بيعود على صورة النقاب والمنتقبات
قليلين منهم اللى بيكونوا قدوة فعلا وفاهمين ان اهم من النقاب وان احنا نبص على نفسنا فى المراية مايكونش في حاجه بينا مننا اننا نبص على نفسنا من جوا لان ده المهم ان الناس تعرفه وتشوفه وتتعامل معانا من خلاله وعلى اساسه مش على اساس مظهرنا وشكلنا ... ولكل واحد حرية اختيارالشكل اللى بيظهر بيه المهم انه لا يتعدى على حدود غيره وانه يحترم شكل الاخر ووجوده
-------------------------
عيد سعيد عليكم جميعاً