Sunday, March 13, 2011

مغامرات فرخة في صنية بطاطس


مش عارفة فعلا ابتدي منين من تاريخ اخر تدوينة للنهاردة اكيد حصلت احداث كتير كانت تستاهل انى اقف عندها واكتب عنها .. مثلا تنحي مبارك .. تولي شفيق ... رحيل شفيق .. كم ملفات الفساد  .. احداث الثورة .. فتن طائفية .. احداث ليبيا ... هبل القذافي .. طولة لسان ابنه .. توالي فضائح الداخلية وامن الدولة ... يوووووو رغي السنين فعلا

بس طبعا الاهم من ده كله والحدث الاعظم فى تاريخ البشرية كلها انى اتجوزت يوم الخميس الموافق 3-3 ... وبرضة الأسبوع اللي قبل الفرح  كان يستاهل يكتب عنه سبع تدوينات لوحده اما بقى بقى احداث يوم الفرح نفسه كوم تاني خالص ... كم مفارقات مش عادي انه يتجمع ويحصل وده طبعا كان نتيجة أحداث الاسبوع الي قبل الفرح

ما اطولش عليكم بقى وادخل فى الاهم من ده كله
مقدمة لابد منها
قبل الجواز قضيت 26 سنة معرفش طريق المطبخ ولا ليه دعوة بشغل البيت اه والله انا اقر واعترف انى كنت مدلعة اخر دلع من الشغل للنت ومن النت للشغل ... النت ياااه فين ايام النت والنتيتة والفيس بوك والتدوين والياهو ؟ فين ايام الفضاااااااااااااااا؟
الفضا الفضا انا  بيتهيألي سمعت الكلمة دى قبل كده  .. حاسة انى مش هعرف اتهنى بمعنى الكلمة دى تاني ابدااااااااااااا
المهم بقى انى من تاني يوم الفرح وانا فى المطبخ تقريبا بقضى طول اليوم في ذلك المكان
قضيت تقريبا خمس ايام بعيد تنظيم المطبخ كل يوم واشيل منها احط هنا والكرسي فى نص المطبخ وانا طول اليوم واقفه عليه ومفتحة المطبخ كله لحد ما الحمد لله استقريت 
كان عندى مشكلة فى الحلل ماكنتش عارفه اصلا هو انا المفروض اطبخ ايه فى انهى نوع .. على اساس طبعا انى بعرف اطبخ
المشكلة الاكبر بقى ان كل ما ناكل حاجة الاطباق تتعك وكل ما نشربب حاجة الكوبايات تتحط ع الحوض وكل ما اسخن اكل الحلل تتوسخ من الاخر كده كل شوية الحوض يتملى مواعين مش عارفه ليه ؟. .. مش عارفه ليه بدل ما الناس تجيب اطباق صيني وما شبه ما تجيب أطباق من بتاعة المطاعم ولما ناكل تترمي وكوبايات برضه كده لما نشرب تترمي مش لازم نغسل يعني حتى الواحد يبقى عنده  طاقه ووقت يقعد ع النت ويتفرج ع التى في اللى طول النهار بيكلم نفسه 
وطبعا انا اصلى وابتهل الى الله مش عشان يحفظ مصر من الفتن الطائفية -  انا تقريبا فقدت وطنيتي فى اسبوع جواز اومال كمان شهر هعمل ايه ؟ - المهم انى بصلي عشان غسالة الأطباق تشتغل بقى عشان كده كتيييييييييييييييييييييييير  وانا اللى قبل الفرح كنت بقول - لازمتها ايه غسالة الاطباق ولا ليها لازمة بس طبعا عشان ماما عارفة اللى فيها جابتها انا ايدي ورمت فعلا
و باظت اساسا بقى كلها اصابات وكدمات وتعويرات صغيرات ومن هنا ومن عش الزوجية لأول مرة الاقينى بغنى الاغنية العبقرية اللى بتقول انا مش عارفنى 
من يومين كده بقى قررت اخوض تجربة الطبيخ للمرة الاول - كنت مقضياها تسخين اكل قبل كده- ومن كتر ما ماما قالتلى انى مش هعرف الفراخ من البط اللى فى الفريزر كنت متلخبطة فعلا بس الحمد لله خدتهم بالشبه يعنى
وطلعت فرخة ونقعتها فى ميه دافية ونسيتها ما افتكرتهاش تانى غير المغرب كده قولت بقى لا مفر طالما مافيش عندي دباديب بتتحول لفلبنيات والفرخة زى ما سبتها يبقى محدش هينقذها من الغرق غيري .. واتجهت للفرخة عشان اجهزها للطبيخ ودي كانت أول مره تقريبا ...  وكات يع فيها دم ويع فيها بواقي حاجات مقرفة وانا قررت احميها بالملح عشان تنضف وتبقى فرخة بنت ناس 
امجد يروح ويجي يلاقينى لسه بنضف فيها -هى تقريبا اخدت وقت تنضيف اكتر من الطبيخ نفسه لانى كنت قرفانه جدا ومش عارفة اساسا هو انا المفروض اشيل ايه واسيب ايه مع انها اصلا كانت متنضفة - امجد لاقاني مطيرة ربع الفرخة قولتله دى فيها دم رد عليا  وقالى اومال كنتى فاكرها ماشية بالبنزين ؟ وقف معايا وساعدنى لحد ما اقطعناها - ربنا يصبره بجد بس انا من اول يوم وانا عرفته انى مش بعرف اطبخ اساسا وانى مقررة اتعلم فى بيتي والصراحة هو صابر ومتعاون ومتفهم ... وبيشتغلني طول اليوم :)  
وجهزت الصنية وقطعت البطاطس وولعت عليها وشوية شميت ريحة حريييييق ببص عليها لاقيت ارضيتها اسودت احبطت بصراحة قولت انقذ ما يمكن انقاذه قبل ما أمجد يجي وشلت اللى اتحرق منها و داريت اثار الشياط وكان المفروض تتدخل الفرن شغلته وبعدين خفت ينفجر فيا فطفيته واتصلت بأمجد واعترفتله ان الصنية اتحرقت وانه لازم يجى عشان خايفة اولع فرن البوتجاز فطلع ودخلناها الفرن شوية وخرجناها وكانت ريحتها جامدة جدا وطعمها كمان
مش رأي ده رأي أمجد يا جماعة بالرغم انه اتغدي يومها بعد العشا
المهم ان أول أسبوع جواز عدى بخساير قليلة الفلفل الاسود ادلق .. ترنج أمجد بهت عليه لون فى الغسالة ... براد الشاى باظ ... اصابات وتعويرات متعددة فى ايديا - هجيب جوانتى ان شاء الله اكيد - واحتمال اعتصم قدام باب الشقة لحد ما أمجد يجيبلى فليبينية
ومن موقعي هذا أحب أهدي لكل البنات أغنية ماتحسبوش يا بنات ان الجواز راحة .. ومهما نتعب نقول تعب الحبيب راحة
:)
 

31 comments:

wessamkabil@yahoo.com said...

هههههههههههههههههههههههه
ياه على المغامرات وده من أول اسبوع ياسارة
يانهاري ع اللي هنشوفه والله بيوت أهالينا ارحم .. واصعب حاجة فعلا في الجواز غسل الاطباق .. دي الشكوى الكبرى
ثم بقى بعد الانجاب هنكره حياتنا لإننا مش هنعرف ننام ثانية من صريخ النونو

هو انتي لسه شوفتي حاجة داحانا هنريحوكي ياشابة
هههههههههههههههه

rack-yourminds said...

ايه ده يا بنتي موتيني من الضحك ههههههههه

انا عن نفسي دايما بقووووول تحيا العزوبيه تحيا تحيا تحيا

ربنا يصبرك يا استاذ امجد هههههههههههه

__________

ربنا يسعدك تستاهلي كل الخير

candy said...

بجد ميرسى أنك كتبتى الموضوع دا

أنتى كأنك بتتكلمى عنى
أنا ماليش فى المطبخ خاااااااااالص

ومامتى واصحابى دايما بيقولولى أنى مش هاتجوز بسبب الموضوع دا ...
بس أنتى ادتينى أمل

عموما مبروك .... وربنا يخليلك الحبيب اللى دايما يبقى تعبه راحة
;)

رحــــيـل said...

ويسا

يا هلا يا هلا يالا شدي حيلك بقى عشان نفرح قريب بيكى ونقرا مغامراتك :)
وبعدين طمنينى طيب اى منظر كده انا مش ناقصة يابنتى ههههه كفاية عليا لمدة سنة مثلا المطبخ
---------------------
وحيد

شوف يا وحيد كل اللى رافعين شعار تحيا العزوبية بيقعوا وقعة تمااااام فبلاش الثقة دى هههههه اسألني انا :D انا
ربنا يسعدك ويرزقك ببنت الحلال وتكون بتعرف تطبخ
---------------------
كاندي

اطمنى اطمنى
بس يعنى ما تطمنيش قوي :)
هههههههه ع العموم فعلا المهم الحبيب اللى يكون متفاهم ومتعاون وعنده استعداد يسامح ويفوت :) ويتحمل كل الاخطاء اللى بتحصل بحب
ربنا يفرحك ويسعدك ويرزقك بالحبيب اللى يستاهلك

re7ab.sale7 said...

هههههههههههههه
والله عايزة اكلمك بس مكسوفة يا سارة
بجد وحشاني جدا
سيبك م الكلام ده كله
انا مش قلت لك تعالوا يومين ع البحر عندنا ...؟ مجتيش لية ؟؟؟
عموما مستنياك ف اي وقت يا قمر انت وامجد
ثانيا
تقولي بقي اية في اللي مش بتعرف تطبخ ومش كدة وبس لاء
دي اصلا مش بتعرف تاكل كمان
يعني لا بتطبخ ولا بتاكل
يعني حياة فلللي خااااالص
يعني جوزها هيتجنن من اول يوم
دي مين
دي واحدة كدة يعني بيقول ان اسمها رحاب صالح

كلمات من نور said...

ههههههههههههههههههه خدي الهدية دي بقى يا قمرايه

http://mhg1962.ba7r.org/t1499-topic

وحتلاقي وصفات كتير مفيدة إن شاء الله يا قمري

momken said...

الف مبروك انغزالكما فى خيط واحد


بارك الله لكما وبارك عليكما وجمع بينكما فى خير



تحياتى

سلوى said...

هههههههههه
مش بقولك مغامرات ساره في عش الزوجيه

بس خير خير

المهم انكوا انقذتوها في آخر لحظه

بعد كده وبصفتك تجرياه اساسا
فكل طبخه لها دراسه جدوى
يعني ايه وامتى وازاي

واكتبي يا بنتي في اجنده
والف مبرررررررررروك بجد
ربنا يسعدم يارب
ويجعل بينكم السكن والود والرحمه والذريه الصالحه

Noha Saleh said...

اولا الف مليون مبروك
انا كمان كنت زيك كده وغسالة الاطباق دى والله رحمة انا مقدرش استغنى عنها ابدا
وكنت بخرب الدنيا واهم حاجة ان الزوج يتحمل لان بتشجيعه بتقدرى تكونى احسن
ربنا يرزقك كمان بالذرية الصالحة علشان تعرفى المعاناة اللى بجد

мαησηα said...

هههههههههههههههههههههه والله انتى سكر يا سارورة

ربنا يسعدك يا حبيبتى انتى وامجد ويفرح قلوبكم دايما يارب

والف مليوووووون مبروك يا قمرة

ف انتظار الصور ع فكرة

وبعدين ما امجد لازم يصبر هو كده اللى

يريد الحلو يصبر عليه لحد مايتعلم يطبخ

سلامى ليه كتير

still-searching said...

عسل والله يا سارة
الف مبروك عليكو
وربنا يكون في عون امجد :D

ghoneem said...

الف مبروووووووووووك ليكي ولأمجد
جواز مبارك يارب ولا بلاش مبارك
جواز سعيد يارب وذكريات خالدة ان شاء الله

تمشي كدة :)

خير بجد جميل جدا والحمد لله ان الخساير لحد دلوقتي بسيطة الحقي بقي بسرعة اتعلمي أو لو مفيش أمل يبقي أبدأي الاعتصام بدري بدري

رجعت والحمد لله لقيت أخبار حلوة وكدة الواحد يتفائل

تحياتي

وسلامي كتييييير للعريس

بالتوفيق..................

موناليزا said...

:) نفس اقتراحى
ليه مانقضيهاش اطباق فِل وكوبايات بلاستيك طالما انا اللى هغسل

بصى يا سارة انا فضلت فى سنة اولى مطبخ كذا سنة فما تقلقيش مع الوقت هيبقى فيه عِشرة بينك وبين المطبخ:)

انا حالياً مفتقدة الجو ده جداً

ربنا يسعدك ياحبيبتى

Lady E said...

مبروك يا جميله بارك الله لكما وبارك عليكما وجمع بينكما في خير

طول ما انا بقرأ البوست وانا مبتسمة متخيلاكي وانتي في المطبخ وبتقطعي البصل والبطاطس برقة ومشمئزة من الفرخة الغلبانة

فكرتيني بأيام الجامعة كنت بطبخ وكانت ايدي مليانة تعويرات صغيرة برضه والأطباق والحلل والكوبايات بتتكاثر ذاتيا والحوض غالبا مبيفضاش ساعة على بعضها :) ومش عارفه هما ليه لغاية دلوقتي مخترعوش غسالة حلل مش أطباق بس :)

واحدة صحبتي قالتلي حاجة جميلة جدا كل ما تتعبي احتسبي تعبك ده ثواب عند ربنا وان شاء الله تبقي طباخة ماهرة

klmat said...

الف الف مليوووووووووووون مبروك
فرحت اوى اوى من قلبى ربنا يهنيكى
اما باالنسبه لشغل البيت والطبيخ فتره صغيره وحاتلاقى نفسك بتعملى كل حاجه زى الفل مافيش افضل من الممارسه
وممكن تشوفى قناه فتافيت فيها اكلات سريعه كلنا فى الاول شيطنا وقلبنا المطبخ بس بعد كده حاتلاقى كل حاجه سهله
انا بدخل عندك وفى كل المدونات اللى بحبها بس مش بعلق لان عينى بتتعب من الكمبيوتر لكن لقيت نفسى عايزه اباركلك من قلبى
اميره

قول ياااارب said...

ههههههههههههههههههههه لاء بتتعبى بجد يابنتى ده اللى فى ميدان التحرير مكنوش تعبوا كده ههههههه
بجد الف مليووووووون مبرووووووووك وربنا يسعدلك ايامك ومتقلقيش كل الستات بيتعلموا فى عش الزوجيه
تمنياتى لكى بالتوفيق دااائما يااارب
وخلى بال من الفرحه ده انتى عذبتيها ههه

شهد الكلمات said...

اولا مبرووووووووووك
و سعيدة ان اول زيارة ليا لمدونتك و اول بوست اقراه ليكي يكون خبر زواجك و حرق الفرخه :)) كل العرايس كدة ماتضايقيش طبيعي تحرقي و تدلقي و تكسري و تتعوري المهم ماتياسيش من طلب الفلبينية هههههههههههه
دمك خفيف جدا و اسلوبك جميل

تحياتي الخالصة و الف مبروك مرة تانية

BNT ELISLAM said...

من اول اسبوع وصنيه بطاط الى هى من اسهل الاكلات ؤمال لو محاشى حمام فريك او رز او


وصوانى بالفرن كان ايه اللى حصل



على العموما تعيشى وتتعلمى ياقمر

رحــــيـل said...

رحاب

ياقهلا ياقهلا
مكسوفة من ايه يابنتى بس اتصلى في اى وقت تلاقينى فى المطبخ  بجرب خلطاتي العبقرية
وبعدين الجايات كتير احنا اصلا لسه مخلصين شغل فى الشقة امبارح والنهارد اول يوم احتفل بيها بروقان
وبعدين بالرغم من رفضى التام قبل الجواز لتعلم الطبيخ وانى حاليا شبه الفرخة الدايخة فى المطبخ الا ان برضه ان الواحد تتعلم وتجرب فى بيتها .. بس لازم تتعلمى تاكلى الاول يا رحاب عشان على اساسه تعرفى تجربى تتطبخى
هقبالك ياقمررررررررررررر
-------------------------------
كلمات من نور

يادي النور
:D
مش انا بس يعنى اللى ليا تجارب وفضايح ههههههههه ضحكتينى موت ع الخروف اللى قلبه ابيض
ربنا يطمنك
وعقبال الاولاد يارب لما تفرحي بيهم
---------------------------------------
ممكن

الله يبارك فيك
ربنا يكرمك وعقبالك لو كان لسه
شكرا ليك
---------------------------------------
سلوتي

بقى كده ياسلوى دراسة جدوى بس اما اشوفك هو انا ناقصة
يابنتى اى حاجة وكله على بعضه خلينا نشوف اللى ورانا في مدونة مهجورة وفيس بوك بينادى

عقبال ما افرح بيكي
----------------------------------
نهى

الله يبارك فيكي
ادعيلي بقى الغسالة تشتغل لسه بتفرج عليها وبصلى وادعي 
هو بصراحة متحمل كتر خيره يعني ربنا يثبته بقى على موقفه
وبعدين انا اعتقد انى ربنا لو رزقنى بأطفال الوقتى هعقد اعيط معاهم ونبقى عايزين اللى يسكتنا احنا الاتنين
--------------------------------
منونا

وانتى عسسسسل بجد بجد
فرحت جدا بمكالمتك بيا ربنا يخليكي
انا كمان مازلت فى انتظار الصور برضه
ادعى لامجد بقى 
عقبالك يا جميل
------------------------------------
الاء

الله يبارك فيكي
عقبال ما افرح بيكي ونحضرلك ان شاء الله
عايزن نتقابل بقى وحشتوني
-------------------------------
دكتور احمد

ياااه ايه النور ده
عاش من شاف تعليقاتك يا افندم
الله يبارك فيك وعقبال فرحك
شكلي هقضيها اتعصام بدري بدري
:D
عودا حميدا
---------------------------------------
موناليزا

مش انا لوحدي يعنى يا منى اللى بنادى بكده كويس ان فى حد سبقنى
انا مش عايزه يحصل عشرة بينى وبين المطبخ انا خلاص كرهته من اول اسبوووووع
انا هطبخ واجري بعد كده
ربنا يكرمك ويسعد قلبك

رحــــيـل said...

ليدي
الله يبارك فيكي
ههههه هي فعلا تجربة فظييييعة جدا \بس قدر بقى هنعمل ايه بقى
عقبالك ان شاء الله لما تجربي رسمي فى مطبخك
شكرا ليكى
-------------------------------------------
كلمات

مصدقتش لما شفت تعليقك وفرحت جدا جدا بيه
وان اطمنت عليكى عشانك غايبة بقالك كتير
الف سلامة على عنيكي ربنا يشفيكي
شكرا جدا جدا ليكي
-------------------------------------
قول يارب

ياااااارب 
الله يبارك فيكي
طيب طالما بتوع التحرير ماكنوش بيعملوا كده انا هروح اعتصم هناك مش قدام باب الشقة
يمكن امجد يستجيب لطلبي بخصوص الفليبينية
شكرا ليكى يامورا
--------------------------------------
شهد الكلمات

الله يبارك فيكي
نورتينى وان شاء الله ماتكونش أخر زيارة
اوعدك ان المغامرات مش هتنتهى شكلى لسه بدرى عليا
ههههههههههه انا لما بيأس بقضيها عياااااااط هههههه
عقباااالك لو لسه شكرا ليكى جدا
-------------------------------
بنت الاسلام

اهلا بيكي
محاشي حمام فريك وروز
طيب وطي صوتك بقى احسن امجد يسمعك

لسسسسسه بدري عما ما تدخل كلمة محاشي دي قاموسي المطبخي

تسلمى يا جميلة وعقبالك

rovy said...

السلام عليكم ..
وحشيتنى المدونة ..
ألف مبروك و يارب يبارك لكى و يرزقك كل السعادة ..
تحياتى لك غاليتى ..

L.G. said...

ضحكتيني وأنا ماليش نفس :)
أنا حصلي كده مع الصينية بس وانا في اعدادي بس لحد دلوقتي بقرف من الفرخة قبل ما تستوي وحاليا بخلي كل العيلة تاكل في طبق واحد عشان المواعين هههههههه مع ان عندنا غسالة اطباق صغيرة بس صدقيني زي قلتها مع المواعين المصرية بتبقى عايزة مواعين نضيفة اصلا

تحياتي لك ودعواتي لامجد في سنة الصمود
مبرووووك عقبال المكرونة بالباشميل

L.G. said...

كتبت تعليق طويل وراح راح راح زي الفرخة كده
المهم المواعين حددث ولا حرج من رايي تاكلوا في الحلة
غسالة الاطباق زي قلتها مع المواعين المصرية حيث انها تحتاج مواعين نضيفة
مبرووك ودعواتي لأمجد بالصمود

الله يرحم الفرخة

حمامة said...

هههههههههههههههههههههههه
عسسسسسسسسسسل والله بجد
مبارك الاول قبل اي حاجة وماشاء الله
كنتي امورة انا شوفت الصورة واضفتك ع الفيس بوك من بعد اذنك يعني

انا الحمد لله لحقت نفسي واتجوزت قبل الثورة المجيدة ورغم انى بعرف اطبخ الحمد لله بس اكيد يابنتي لازم تحصل حوادث واصابات

وعامة لو احتاجتي اي نصيحة مطبخية انا هنا :D

عرفة فاروق عبد لله said...

الاول الف مليون مبروررررررررررررررررك
ليكو
ربنا يجعل ايامكوا كلها فرح وسعادة
ونصيحة اتعلمى الطبخ بدرى بدرى قبل ما ييجى بيبى وتزنقى بجد

شفـقــة و إحســــان said...

هو ده الكلام المظبوط اللى كنت مستنياه يا سوسو بقينا فى الهواء سوا يا جميل

MKSARAT - SAYED SAAD said...

بقالي كتير مجدتش هنا واول ما الاقي يكون مغمرات فرخة في صنية بطاطس وانا جعان
ربنا يسامحك

rack-yourminds said...

دخلت اكتر من مره لقيتها مقفوله

مفيش جديد؟

Gilan Saleh said...

ده انا على كده شاطره جداااااااااااااااااااااااااااااااااااااااااااااااااااا
بجد ايه دة ياساره ربنا يصبره يارب عليكى
وربنا يوفقك ويسعدك يارب بس بجد ابدئي اتعلمى واقري كتير بقه
ومبروك الف مبروك

rack-yourminds said...

لسه برده الفرخه في مغامرتها هيا بسبعة ارواح ولا ايه هههه

shemo_ joker said...

السلام عليكم......


ول مرة ادخل بس عجبتنى اووووى
وجامدة اوووووى

وخوفتينى اووووى عشان انا خايبة اوووى كدا بردو


ههههههههههههه
ربنا يستر
دومتى بخير فى رعاية الله
shemo