بداية شكرا لكل اللي علقوا ع البوست اللى فات وكل أصحابي اللي بيسألوا دايما :)
ثانيا كل سنة طبعا و انتم بخير واحرار اول رمضان يعدي عليا ومبارك مش رئيسنا واعتقد انه كده على معظمنا
ثالثا بقي امممم غايبة انا بقالي كتير بس اصل الدنيا حر قوي وحاجة خنقة كده .. كتير كان بيكون في دماغي مواضيع اكتب عنها وامور كتير بتحصل واخبار مستفزة بس تقريبا بكسل كمان يمكن الفيس بوك بقى اسهل واسرع في نشر الاخبار والتعليق عليها فالواحد بقى بيطلع غيظه من اللي بيحصل هناك
جايز التدوينة دي تبقى ملخبطة شوية ممممم ممكن اقسمها فقرات مالهاش دعوة بعضها
1
النهاردة كان في خبر عن وفاة بنت اسمها هدى 17 سنة كانت مصابة برصاص الداخلية ايام الثورة اصيبت وهي بتدافع عن اخوها اللى استشهد وقت الثورة .. ماتت بسبب تسوس عظام القفص الصدري لان الرصاصة مخرجتش من جسمها طول ست شهور !!!!!! سابوها تموت هي تبقى مين يعنى
محمد صبحي كان على قناة التحرير من وقت بيحكي انه كان فى زيارة لفرنسا وزار مصابين الثورة هناك اللى كان حظهم كويس وسفرهم رجال اعمال على نفقتهم الخاصة
وقال ان تونس بعد ثورتها سفرت 1200 مصاب يتعالجوا على نفقة الدولة !!! واحنا عملنا ثورة عشان يفضل دم المصري رخيص
عملنا ثورة عشان مبارك يفضل يتعالج في شرم الشيخ
عملنا ثورة عشان الثوار يتحاكموا محاكمات عسكرية والمجرمين تتأجل قضاياهم قدام المحاكم المدنية
الله يكون في عون المجلس العسكري بيتعب فعلا هياخد باله من مين ولا مين كفاية عليه يطبطب ويأجل محاكمات ويبرأ مجرمين بيتعبوا فعلا بجد مش مهم بقى القصاص للشهداء ولا المصابين يتعالجوا وياخدوا تعويضات هيجيبوا فلوس لاهالي الشهدا والمصابين ولا هيدفعوا مرتبات كلاب الداخلية اللى بدل ما يتحاكموا اتنقلوا لأماكن تانية بمرتبات اكبر .. هيحموا مبارك ولا اهالي الشهداء اللى بيتهددوا ؟ لازم يركزوا التركيز مهم برضه عشان يجيبوا مجموع
وبعدين المجلس العسكري مش فاضي يحاكم المتهمين فى قضايا الفساد وقتل المتظاهرين يا جماعة عندهم شغل اكبر دلوقتي بيطلعوا اشاعات على 6 ابريل ويخونوا المعتصمين ويقسموا الشعب فرق ويلاغوا الاخوان المسلمين اللي بيدوروا على مصلحتهم وبس - ومحدش يدخل يدافع عن الاخوان عشان مش هقتنع مع احترامي لشباب الاخوان اللي نزلوا بيان وضحوا فيه تضامنهم مع 6 ابريل واعتراضهم على موقف المجلس وطالبوا فيه قيادتهم برد فعل اقوى تجاه اللى حصل- ويظبطوا امورهم مع السلفيين عشان يفصلولهم فتاوي على مزاجهم يكفروا بيها اللي يضايقهم واللي بيخرجوا عن الحاكم واللي بيعتصموا ... ومن هنا بقى قسموا الشعب تيارات اسلامية وكفار وملحدين
زي ما طلعوا علينا ايام الاستفتاء بتاع الانتخابات اولا ولا الدستور اولا .. كفروا اللى بينادي بالدستور اولا- مع ان كان منهم على سبيل المثال دكتور عمرو خالد- ويومها كان بيوزعوا منشورات مستفزة جدا وسطحية جدا مقدرتش اعمل حاجة غير انى قطعتها ورميتها قدامهم من غيظي ومن تافهتهم
المجلس العسكري بقى خد باله من موضوع الانقسام ده قال بقي نخبط احنا في بعض وهو ياخد راحته ولما يتزنق يقضيها اشاعات
ومحدش يقولى بقى اصله بابا وماما وانور وجدي والبلد هتضيع وعجلة الانتاج
المجلس العسكري حاجة والجيش حاجة تانية
المجلس العسكري الوقتي شغال سياسة وبيتحكم في مصير البلد واحنا الشعب اللى المفروض يحدد مصيره بنفسه
المجلس العسكري اشخاص بني ادمين يعني مش خط احمر ولا اخضر ولا حتي بمبى مسخسخ يعني مش معصومين من الخطأ مش هنعملهم بعبع ونفضل نبقى نكبر وننفخ فيهم لحد ما نلاقي نفسنا قدامنا 30 سنة كمان عشان نخلص من سطوتهم واستبدادهم
الجيش على عينا وراسنا .. يعنى الجيش المصري بتاعنا والمجلس مش تبعنا ... كان واحد من الهتافات فى مظاهرات المنصورة
وبعدين كان فين الجيش يوم موقعة الجمل وكان فين يوم العباسية كان واقف يتفرج ؟؟؟ ولا كان واقف يحمي البلطجية ؟؟؟
وبعدين اللي خايفين على مصلحة البلد وبيهاجموا الثوار والمعتصمين واللي قلبهم على مبارك ومش قادرين على بعده اللي بينزلوا روكسي اللي شايفين ان الثورة خربت البلد ؟؟؟؟ هما البعدا معندهمش نظر ؟؟؟ معندهمش عقل ؟؟؟
يعني ماكنوش واخدين بالهم قبل الثورة من كم الجرائم اللي بترتكب في حق الشعب؟ ولا هما عشان مصلحتهم ماشية اتعموا عن اللي كان حاصل طول السنين اللى فاتت ؟؟؟
طيب بعد الثورة مش واخدين بالهم ان في شهداء اتقتلوا وان اهاليهم قلبهم محروق عليهم وان في شباب زي الفل ضحى بحياته عشان احنا حياتنا تبقى احسن ؟؟؟ ولا هما شايفين انهم ممولين من بره وقبضوا تمن حياتهم قبل ما يموتوا ؟؟؟؟
هما البعدا مش حاسين بالمصابين وحالتهم عامله ازاى ؟؟؟ والمعاملة اللي اتعاملوها في المستشفيات والاهمال اللي اتسبب في عاهات مستديمة لكتير منهم غير اللى توفوا طبعا ؟؟؟؟
هما البعدا اخرهم قنواتنا المصرية بتاعة الحكومة اللي لسه مخدوش بالهم ان في ثورة حصلت ؟؟؟؟
هما البعدا قلبهم واجعهم على مبارك وما اتحركش لدموع ام شهيد وهي بتحكي على ابنها ؟؟؟؟؟
هما البعدا عندهم دم لامؤاخذة ؟؟؟!!!!!!! ده ايه القرف ده
وهو بقى المجلس العسكري ناوي يقضيها اشاعات كده كتير من غير تحقيقات وادلة ونيابة ولا الوقتي الاتهامات بقى اخرها بيان على الفيس بوك و كم خبر على كم صورة على التليفزيون المصري ؟؟؟ ولا هو نظام العيار اللي مايصيبش يدوش
اتمنى ان الجمعة الجاية تبقى لم الشمل بجد ما بين كل التيارات والاحزاب ربنا يستر وتعدي على خير
مافيش فقرة 2 بقى انا رغيت كتير مع اني اصلا كنت هكتب بوست تاني خالص مالوش علاقة بأحداث اليومين دول بس الواحد دمه محروق .... تصبحوا على خير
عاش الشهيد مقتول ... لكل شهيد خبز بدمه العيش بحرية
10 انتو كمان حاولوا معايا:
انا كل ما اقعد مع نفسي شويه وافكر في الي بيحصل ..بحس اني خلاص الجنان هو اخر الي هوصله...
في ناس كتير مابتتعلمش ... عملو خلاص المجلس العسكري شيء مقدس لا مساس به ( لسه الخوف جوانا) نسيو ان الخوف على اكلنا ونفسنا هو الي خلانا تحت رحمه حسني واعوانه 30 سنه لغايه مانهبونا وسرقوا بلدنا ...
للاسف الخوف بيجري جوه دم الناس دي
خلاص اتعودا على الذل اتعودو يكلو الفتات الي بيسيبو اللصوص
ويبقولو بس ادينا عايشين
خلاص السلبيه عششت في دماغهم ...
ده انا ببقى هتجنن وانا بسمع الناس في الشارع بيدعو على الي عملو الثوره..
للاسف بحس ان الناس قلبوهم ميته
نسيو الي ضحوا بحايتهم عشان البلد
................
مش عارفه فعلا هو في ايه
بس حسبي الله ونعم الوكيل ..في كل انسان استهان بدم الشهيد الي سالت دمه على ارض الوطن عشان احنا نعيش عيشه كريمه
الف حمد الله علي السلامه ,,كل سنه وحضرتك طيبه والاسره في احسن حال
__
حقيقي انا مختلف معكي في جزئيات كتير في هذا البوست وهتعرفي جزء من اختلافي معكي لو فتحتي اللينك ده هتلاقي تعليقين ليا
http://shams-elnahar.blogspot.com/2011/07/blog-post_24.html
__
بختلف معكي في رايك من الاخوان ,مع اني مش اخواني لكن لا يوجد شك ان الاخوان فصيل سياسي محترم وله اسهاماته في الحياة السياسيه في مصر وكثير من المفكرين الكبار والعلماء من مدرسة الاخوان ,اكيد تعرفي العالم الكبير محمد الغزالي والدكتور يوسف القرضاوي الذي كان له دور عظيم ايام الثوره وغيرهم الكثير من مدرسة الاخوان المسلمين
اختي رحيل الاخوان المسلمون كان لهم دور عظيم ايام الثوره المصريه والكل يشهد بما فيهم العلمانيون ان التيار الاسلامي وفي القلب منه الاخوان المسلمون هم الذين حموا المتظاهرين في موقعة الجمل ولولاهم لسحقهم البلطجيه
الاخوان المسلمون لهم مشروفهم الحضااري الذي ينسجم مع تركيبة الشعب المصري وطبعا هذا المشروع لا يلقي ترحيبا من العلمانيين الذين يشوهون صوره الاخوان ليل نهار عبر قنواتهم الفضائيه وللاسف كثير من الشباب يتم تضليله عبر تلك القنوات التي يسيطر عليها العلمانيون
وزاد حنق العلمانيون علي الاخوان بعد الاستفتاء عندما استجاب الشعب لصوت التيار الاسلامي لاجل هذا يريدون الانقلاب علي ارادة الشعب في اول تجربه ديمقراطيه حره تشهدها مصر ولعلمك انا من الذين قالو لا واحترمت فيما بعد ارادة الشعب
___
في امان الله
حنان
احنا اتعودنا على تقديس الحاكم كأنه نبي معصوم من الخطأ.. احنا مااتعودناش نعيش احرار عشان كده لسه الناس مش مستوعبة يعنى ايه ثورة ويعني ايه ان الشعب هو اللي خط احمر مش الحاكم
الحكومة والداخلية والمجلس العسكري هما اللى مسئولين عن غياب الامن وعدم استقرار الوضع لحد الوقتى سايبين البلطجية ع الناس ليه ؟؟؟؟ عشان الناس تفضل تدعي على اللى عمل الثورة وتنسى اللى سرق البلد طول 30 سنة
ربنا يرحم الشهدا ويصبر اهاليهم
وحيد
الله يسلمك وكل سنة وانت طيب وبخير دايما
قريت الكومنت بتاعك عند شمس النهار
بالنسبة لدفاعك عن المجلس العسكري
يا وحيد هما مش معصومين من الخطأ مش هما الملايكة اللى نزلت علينا من السما عشان يتطهروا البلاد .. وقفوا مع الثورة وحموها !!!!! طيب مش هو ده اصلا دور الجيش هو ولاءه المفروض يكون للشعب ولا للرئيس ... يعنى اللى عمله ده واجبه ولا تفضل منه علينا ؟؟؟؟؟
هو بيحمي مبارك وبيتعامل معاه على انه فوق القانون وسايبه يتعالج فى شرم بالرغم انه متهم في حين ان مصابيين الثورة حصلهم عاهات مستديمة بسبب البهدلة اللى اتبهدلوها فى المستشفيات
بيحاكموا الثوار محاكمات عسكرية ليه ؟؟؟
ماكنش في اى صلاحيات لحكومة شرف غير بعد الاعتصامات والمظاهرات الاخيرة .. مش فاهمه ايه الحكمة فى انه اول ما مسك الحكومة ساب البلد تولع من جوا وكل اللى شغله انه يظبط علاقتنا بره مش كان اولى بدل ما ضيع كام شهر من غير اى اصلاحات داخلية انه يعمل اللى عمله الوقتي من زمان ولا يعنى هما خلاص مش بيجيوا غير بالضغط بالمظاهرات؟؟
فين دور الداخلية فى حفظ الامن ليه سايبين البلطجية لحد الوقتي بترهب فى الناس وتكرهم فى الثورة
الظباط المتهمين بقتل المتظاهرين تم نقلهم لادارات اخرى بمرتبات اعلى
وحركة التنقلات اللى حصلت كان اغلبها لرتب خلاص ميعاد معاشها قرب
ولسه فى حالات تعذيب فى الاقسام
وزير الداخلية اول ما مسك الوزارة صرف مكافأت للظباط وبدل فزع يا عينى عشان اللى شافوا ايام الثورة ؟؟؟؟؟؟؟
كل ده بيحصل بموافقة مين ؟؟؟؟
وما علينا من موضوع الحد الادنى للاجور لان الموضوع عايز وقت فعلا وتخطيط
بس ليه المحاكمات بتتأجل ؟؟؟؟ وليه الاخبار عن مبارك مبهمه ومش واضحة ؟؟؟؟؟ ليه المجلس العسكرى قرارات بتتسم بالميوعه وعدم الوضوح
قين ادلة اتهاماته ل6 ابريل ؟؟؟
على فكرة فى قيادى سلفى قال انهم بياخدوا تمويل من قطر والامارات للجماعات الاسلاميه محدش يعنى حقق معاه ولا وجهلوا اتهام هو مش ده تمويل خارجى برضه ؟؟؟ في حين ان ستى ابريل ما فيش لادليل ولا اعتراف منهم بده وكل الاشاعات اللى المجلس طلعها عليهم ردوا عليها وقالوا انهم عندهم استعداد للتحقيق فيها
وبعدين يعنى المفروض المجلس يبقى ابر من انه يطلع اشاعات اخرها بيان ع الفيس بوك ولا ايه ؟؟
اه جهاز امن الدولة لم يحل فعليا والكل عارف انه تم تغير اسمه بس للامن الوطني لكن لسه بيمارس دوره كما هو بطاقم عمله من الجزارين
اما بقى بخصوص مظاهرة العباسية
اتفقنا ان مافيش حاجة بتحصل غير بالضغط ومظاهرات واعتصامات
الشباب كتبوا مطاليهم وقرروا انهم يتوجهوا بشكل سلمى للتظاهر عند وزارة الدفاع زيها زي اى مصلحة حكومية بيتم التظاهر قدامها والاكيد بغض النظر عن كون ده صح ولا غلط ان احنا عملنا ثورة عشان حرية الرأى والتعبير والدستور بيكفل عن الشعل فى التظاهر طالما سلمي .... مين بقى اللى حول المظاهرة لمعركة ؟؟؟ ومين اللى وقف يتفرج عليهم وهما بيتسحلوا ؟؟؟؟
بالنسبة للاخوان محدش طبعا ينكر دورهم فى الثورة ولا دور اى حد كان فى التحرير لكن اللى حصل بعد كده انهم بدأوا يدورا على مصلحتهم
مبدأيا كده من اول الاستفتاء ع الدستور والانتخابات
النتيجة كانت نعم ده حقيقى بس هل فعلا دى كانت ارادة الشعب نفسه ؟؟؟
اقولك ع اللى شفته يومها فى اللجان احنا روحنا صوتنا فى لجنة وطلعنا منها على لجنة تانيه نشوف الناس فيها نظامهم ايه
1 أغلبية الناس اللى بتصوت اصلا شكلها بسيطة جدا ومش مستوعبه اصلا الفكرة من اللي بيحصل دول الاخوان والسلفين ليهم دلال عليه باسم الدين يعنى هما من غير ما يفهموا الناس اصلا اللى بيحصل خدوهم من بيوتهم لحد اللجان اعملوا كذا عملوا - زى ما بيحصل فى ايام الانتخايات لما يكون فى مرشح للاخوا-
الناس اللى شويه بتسأل فهموها ان لازم الانتخابات الاول عشان المادة اللى بتقول اننا دولة اسلامية مش تتلغى مع انها اصلا ماكنتش ضمن المواد اللى مطروحة للتغير والاستفتاء
الورق اللى بيتوزع مكتوب فيه كلام فى منتهى السذاجة منه على سبيل المثال
الاقباط بيقولوا لاء يبقى احنا مانقولش نعم ليه ؟؟؟
على اساس انهم اعداء مش شركاء فى الوطن .. هما كده مش بيعملوا قتنة برضه هل سبب منطقى ان طالما الاقباط ليهم رأى معين يبقى لازم نخالفه ؟؟؟
واكيد فى ناس كانت مقتنعه بنعم ومحدش اثر عليها
بس انا بقولك ازاى تم التأثير على شريحة كبيرة من الناس باسم الدين
وطبعا اى حد خالف رأيهم بقى علماني وملحد وكافر
ومن هنا كان للجماعات الاسلامية دور كبير فى التفرقة بين الناس لان كل الأحداث اللى جت بعد كده بقت تتحسب بالشكل ده ياما تبقى تيار اسلامي ياما ملحد وعلماني ورسخوا ده فى اذهان الناس
ده غير انصالهم وانسحابهم من بعض المظاهرات والاعتصامات مجاملة للمجلس العسكري ولان مصلحتهم ماشية واتحرروا من كونهم جماعة محظورة
لا احترم فى الاخوان سوى القلة اللى اصدرت البيان باسم شباب الاخوان واللى طول الوقت كانو بيتصرفوا كانهم جزء من الشعب دون انفصال عنه اوالانصياع لقيادتهم دون وعي
ومش منطقي انك تقول ان الشباب اللى مش مصدقة الاخوان مضللة اعلاميا لان الاكيد ان عندهم عقل وليهم وجهة نظر مبنية على مواقف كتير مش مجرد تضليل اعلامي
ورمضان كريم :)
اولا :اريدك ان تقراي مقال بلال فضل واعتقد هو محسوب علي التيار الليبرالي
اللينك موجود عندي في اخر بوست
___________
ثانيا :
اي تيار سياسي له جمهوره وعندما ياخذ هذا التيار موقف معين ويريد ان يدعم موقفه بيرجع الي قاعدنه اي جماهيره الذي تؤيده, وفي الاستفتاء ايد غالبيه الشعب هذا التيار ,,,ليييييييييييه!!؟هذا هو السؤال المهم ...لماذا ايد غالبية الشعب التيار الاسلامي ولم يؤيد التيار الليبرالي او العلماني , الاجابه بسيطه لان الشعب يثق في التيار الاسلامي ويثق في قياداته ,وهذا ليس مقتصرا علي الاستفتاء ففي الانتخابات ايضا اكيد شفتي ما يحظي به التيار الاسلامي من تاييد ساااحق ,ليه برده لان هذا التيار الاسلامي واقصد هنا الاخوان المسلمون دائما بيرعي وبيخدم جمهوره ,,في حين اصحاب المشاريع الاخري كانوا مكتفين فقط بالاعلام زي مبيحصل دلوقتي
اختي رحيل اكيد لاحظتي الحشد الكبير الذي كان تقوم به ايضا الكنيسه اذا الحشد كان علي الجانبين وهذا ليس عيبا فكل يبحث عن مصلحته لان هذه هي السياسه ,,لكن المهم الشعب اختار من يثق في موقفه وهو راي ان موقف الاخوان هو الموقف الصحيح ,واكيد اختار الشعب الاخوان لانه بيثق فيهم
اختي رحيل مازلت اؤكد ان التيار الليبرالي والعلماني المسيطر علي الاعلام دائما يشوه الاسلاميين ويتصيد لهم الاخطاء وهذا سببا في تضليل كثير من الناس
اختي رحيل عندما يختار الشعب مسار سياسي معين فما علينا الا الاذعان لهذا الاختيار ,اما اذا قلنا ان الشعب تم تغييبه او هو غير واعي فتخن نردد ما كان يقوله رموز النظام السابق باننا شعب غير مؤهل للديمقراطيه !!!
كل سنه وانتي بالف خير
كل سنه وحضرتك طيبه وكل الاسره الكريمه
رمضان كريم
كل عام وحضرتك بخير ,,
ربنا يتقبل منا صالح الأعمال
ويقوينا على الصيام
ربنا يستر على البلد
شكرا جميعا على مروركم وكل سنة وانتم بألف خير
وحيد
رمضانك كريم واسفة انى ما كملتش مناقشة لان النت فاصل عندي بقاله اكتر من اسبوع
شكرا ليك
Post a Comment