Monday, December 17, 2012

مالك


سلام عليكم
مبدأياً انا اصلا كان المفروض اكتب التدوينة دي يوم 11-12 عشان ده يوم ميلاد مالك :) كل سنة وهو روح قلبي
بس قبل ما أكتب لمالك تدوينته حبيت أعلن موقفي من اللي حاصل

أنا من اللي بيقولوا لاء للدستور
ومن اللى قاطعوا الانتخابات فى المرحلة التانية عشان كان مستحيل ادي لشفيق او للاخوان فكلاهما وجهان لعملة واحده
أنا من هؤلاء الذين لا يمثلهم هذا المدعو برئيس جمهورية لاني اصلا  ماعصرتش على نفسي لمون ونزلت انتخبته
انا من الناس اللى بتتفرج على سي بي سي و اون تي في :) وبكره هؤلاء الحمقي المختليين بتوع قناة الناس
انا من هؤلاء اللي مصدقين ان الاخوان والسلفين همج نزلوا ضربوا المعتصمين وان كل ما يقال عنهم افتراء  وان اى تصريح من اى اخواني او سلفي كذب ونفاق وادعاء وغباء
اه ومن الناس اللى شايفة ان مرسي جماعته ممشايه ع العجين ما يلخبطوش .. بس يلخبط فى مصير البلد عادي المهم الجماااااااااااعة - الله يحرقهم -
ايون انا من الناس اللي بتدعي ليل نهار على الاخوان والسلفين عشان مش شايفين غير مصلحتهم وبس
عشان كمية الغل اللي جواهم هتحرق البلد
  نسيت اقول حاجة مهمة ان الحمد لله مسلمة لكني  لا أرضى ان يمثل هؤلاء الاسلام
فكما قال د / طارق السويدان
 لا أفهم لماذا يعتبر بعض الإسلاميين المعارضة لاجتهادتهم السياسية معارضة للإسلام نفسه وليتذكروا أنهم بشر فالإسلاميون ليسوا الإسلام"
طبعا اللي حاصل دلوقتي انهم بيكفروا اي حد يقف ضدهم وبيحولوا اي صراع سياسي لحلال وحرام وجنة ونار لعنة الله عليهم
=================
فاصل  :)
ايون ماهو مش معقول يعني انقل من الهم اللي فات لسيرة كوكو العطرة على طول كده لازم فاصل
و من هنا احب اسمعكم معانا أغنيتنا المفضلة انا ومالك


مالك كمل سنة .. عدت بسرعة جدا يمكن أول سنة بتكون صعبة كانت صعبة فعلا  بس هو كان ولد طيب ماكنش  بيعيط كتير لحد ست شهور بدأ يكتشف اوبشن البكا ومن ساعتها :)
لاء بس انا اصلا نادرا لما بوصله للمرحلة دي مش بقدر اسمعه بيعيط امجد شايف اني بدلعه
اصلا مالك طول الوقت بيدلع لانه اول حفيد في العيلتين فحبيب الكل وبعدين ماله لما يدلع وهو قمر صغير كده
فاكرة اول كل حاجة كانت جديدة بيكون ليها فرحتها أول صوت اول حركة اول كلمه نترجمها اول سنة اول خطوة اول بابا واول ماما
يمكن ماكنتش مشغولة قبل كده بفكرة انى اكون ماما بس مالك بيخليني فرحانة بجد
يوم عيد ميلاده كان يوم جميل صحيح كان عنده فوبيا من البلونات وكان بيهرب منها ومن اى حد ماسكها وكان مش فاهم الناس دي طفت النور ليه وايه اللى ماسكينه فى ايديهم منور ده الناس دي اتهبلت ولا ايه بيغنوا بصوت عالي وعاملين دوشة ليه ؟
البيت بالنسباله كان زي بيت الرعب كده :)
بس الحمد لله بعدها بكام يوم وبعد محاولات مختلفة قدرنا نقنع مالك ان البلونات مش كائنات فضائية ولا حاجة وقدر انه يلعب بيها و يفرقعها كمان من غير ما يخاف منها تاني :)
نفسي ربنا يقدرني واقدر اكون ماما كويسة لمالك وقد المسؤلية واني ما اتسببش ليه في اى حاجة تضايقه واكون صاحبته ويحكيلي على كل حاجة ويارب كل سنة تبقى احلى من اللى قبلها طول الوقت 

Tuesday, November 6, 2012

رأس البر .. تاني مرة

وسط زحمة الأحداث وسرعتها وناس كتير بتعدى علينا طول الوقت وأفكار كتير بتروح وبتيجي على بالنا وأحلام رايحة جاية رغم دوشة الدنيا ينفع نقضي وقت حلو يبقى يوم مايتنسيش وعشان نعمل ده لازم ندور ع الناس اللي معاهم بيحلى الوقت .. اللي معاهم الوقت بيجري بسرعة .. واللي معاهم تحس انك من جوا شبه برا .. واللي معاهم بتبتسم من قلبك .. واللي معاهم تتفاجأ ان الدنيا لسه بخير .. واللي معاهم  بتبقى فرحان ...  الناس اللي مش بيجمعك بيهم غير الذكرى الحلوة ... ايون هما الناس دول اللي  للأسف مش سهل نلاقيهم 

بس الاكيد ان حظي حلو لأني اعرف ناس كده وان لما انوي اقضي يوم حلو بلاقي ناس تنور اليوم ده
L.G  
اللي هي سماح يعني كانت فكرتها اننا نعمل ايفنت بدعوات خاصة للناس اللي يهمنا حضورها وكالعادة دعوات كتير وتأكيدات بالحضور واحتمالات واعتذارات وفي الاخر كنا مش كتير عددا لكن اكثر قربا :)

رأس البر مدينة رائعة اليومين دول فى الصيف مش حلوة خالص زحمة ودوشة محدش يعرف يستمتع فيها لا بحر ولا بر دلوقتى بجد مالهاش حل خصوصا لما تكون وسط صحبة هايلة

 ايناس نهر الحب وروضه من بورسعيد
دعاء ولولا وابراهيم العدوي من المنصورة 
محمود من القاهرة
نور من اسكندرية
وسما  ليساندرا ومحمد الغرباوى عرسان جداد بقى وكده و ان شاء الله نحضر فرحهم قريب
وسماح طبعا صاحبة افكار الالعاب وكتاب العب مع طفلك :)
وطبعا امجد ومالك 

صاحب الكافتريا في راس البر طلب مننا نخدم نفسنا بنفسنا لان مافيش عمال هههههههههه كان اوبشن هايل بصراحه رغم ضياع الوقت
بعد الفطار وصلاة الجمعة
لعبنا اتوبيس كومبليت بقالي سنين ملعبتش اللعبة دي يمكن من ثانوي مع انى مالعبتش بس كنت بحاول اغشش امجد :)
وفاز امجد ومحمود ودعاء وسماح جابتلهم هدايا  
وكمان كان في مسابقات من كتاب العب مع طفلك :) 
وبدون كلام
وبالرغم من انى كنت قلقانه من فقرة اللعب الا انها كانت ظريفة جدا وسمعنا فيها اسماء حيوانات وبلاد غريبة 
قمنا اتمشينا عند الفنار ورجعنا كملنا مشي ع النيل وخدنا مركب كان ولا اروع وفقاقيع الصابون كانت جميلة والصور والجو كل حاجه كانت حلوة
روحنا نتغدي 
قامت مجموعة ركبت عجل  
الغريب بقى ان طلب ايناس ونسمه اتأخر جدا وعرفنا انه اتعمل تلات مرات
الاول طلع غلط والثاني وقع والحمد لله وصل فى المرة التالته
بدأنا نتجمع عند الموقف واحنا فى الطريق لدمياط عشان كل واحد يركب لبلده سماح طلبت مننا نكتب كلمة لليوم كانت كل الناس مبسوطة محصلش حاجة تضايق محصلش موقف بايخ 
مالك كمان كان مبسوط بأصحابه اللي حس قد ايه هما بيحبوه هو كمان بيحبهم وهيفضل فاكر اليوم ده على الاقل بصوره معاكم .. شكرا انكم موجودين فى الدنيا