Tuesday, November 6, 2012

رأس البر .. تاني مرة

وسط زحمة الأحداث وسرعتها وناس كتير بتعدى علينا طول الوقت وأفكار كتير بتروح وبتيجي على بالنا وأحلام رايحة جاية رغم دوشة الدنيا ينفع نقضي وقت حلو يبقى يوم مايتنسيش وعشان نعمل ده لازم ندور ع الناس اللي معاهم بيحلى الوقت .. اللي معاهم الوقت بيجري بسرعة .. واللي معاهم تحس انك من جوا شبه برا .. واللي معاهم بتبتسم من قلبك .. واللي معاهم تتفاجأ ان الدنيا لسه بخير .. واللي معاهم  بتبقى فرحان ...  الناس اللي مش بيجمعك بيهم غير الذكرى الحلوة ... ايون هما الناس دول اللي  للأسف مش سهل نلاقيهم 

بس الاكيد ان حظي حلو لأني اعرف ناس كده وان لما انوي اقضي يوم حلو بلاقي ناس تنور اليوم ده
L.G  
اللي هي سماح يعني كانت فكرتها اننا نعمل ايفنت بدعوات خاصة للناس اللي يهمنا حضورها وكالعادة دعوات كتير وتأكيدات بالحضور واحتمالات واعتذارات وفي الاخر كنا مش كتير عددا لكن اكثر قربا :)

رأس البر مدينة رائعة اليومين دول فى الصيف مش حلوة خالص زحمة ودوشة محدش يعرف يستمتع فيها لا بحر ولا بر دلوقتى بجد مالهاش حل خصوصا لما تكون وسط صحبة هايلة

 ايناس نهر الحب وروضه من بورسعيد
دعاء ولولا وابراهيم العدوي من المنصورة 
محمود من القاهرة
نور من اسكندرية
وسما  ليساندرا ومحمد الغرباوى عرسان جداد بقى وكده و ان شاء الله نحضر فرحهم قريب
وسماح طبعا صاحبة افكار الالعاب وكتاب العب مع طفلك :)
وطبعا امجد ومالك 

صاحب الكافتريا في راس البر طلب مننا نخدم نفسنا بنفسنا لان مافيش عمال هههههههههه كان اوبشن هايل بصراحه رغم ضياع الوقت
بعد الفطار وصلاة الجمعة
لعبنا اتوبيس كومبليت بقالي سنين ملعبتش اللعبة دي يمكن من ثانوي مع انى مالعبتش بس كنت بحاول اغشش امجد :)
وفاز امجد ومحمود ودعاء وسماح جابتلهم هدايا  
وكمان كان في مسابقات من كتاب العب مع طفلك :) 
وبدون كلام
وبالرغم من انى كنت قلقانه من فقرة اللعب الا انها كانت ظريفة جدا وسمعنا فيها اسماء حيوانات وبلاد غريبة 
قمنا اتمشينا عند الفنار ورجعنا كملنا مشي ع النيل وخدنا مركب كان ولا اروع وفقاقيع الصابون كانت جميلة والصور والجو كل حاجه كانت حلوة
روحنا نتغدي 
قامت مجموعة ركبت عجل  
الغريب بقى ان طلب ايناس ونسمه اتأخر جدا وعرفنا انه اتعمل تلات مرات
الاول طلع غلط والثاني وقع والحمد لله وصل فى المرة التالته
بدأنا نتجمع عند الموقف واحنا فى الطريق لدمياط عشان كل واحد يركب لبلده سماح طلبت مننا نكتب كلمة لليوم كانت كل الناس مبسوطة محصلش حاجة تضايق محصلش موقف بايخ 
مالك كمان كان مبسوط بأصحابه اللي حس قد ايه هما بيحبوه هو كمان بيحبهم وهيفضل فاكر اليوم ده على الاقل بصوره معاكم .. شكرا انكم موجودين فى الدنيا 

7 comments:

Lyssandra said...

نسيتي كمان بدون كلام :) دعاء المتميزة بجد

ونسيتي معايا غزل البنات يا فالحة :) وأكلته كله كله لوحدي
هاهاي

بجد اليوم كان أكثر من رائع
وباتمني لو نقدر نكرره علي فترات قريبة
انتي فاكرة راس البر اول مرة كانت امتي ؟؟؟ :)
أعتقد تالت مرة بقي لما نحتفل لشهادة مالك الابتدائة ولا ايه ؟ :)

اليوم كان ممتاز ورائع وانا من زمان ماقضيتش وقت حلو كده
شكراًلكل اللي كانوا معانا وبيهم اكتمل اليوم ده
وشكراً للظروف اللي بتجمعني دايماً بيكي
ومبسوووووطة اني شوفت مالك اللي ماشوفتوش من يوم السبوع :) الولد أمور بس مالناش نصيب بقي محمد سبق :)
ممكن نبقي نحجزه طيب ؟؟
بس بردو مصرّة ان النظرة إياها كانت ذات مغزي
ههههههههههههه

يارب نتقابل تاني علي خير بإذن الله

رحــــيـل said...

لاء ده انا كتبت كتير ومسحت :)
ده كفاية السوداني اللى فضلت طول الليل اقشره و ف الاخر رجعت بيه باكل فيه من يومها

اول مره كانت من سنتين ياااه الايام بتجري ان شاء الله المره الجاية بعد فرحكم هو ده بقى اهم حاجة نحضرها الفترة الجاية :)

يابنتى كل نظرات كوكو ذات مغزى وبعدين اجدعنوا وهاتوا بنت عشان نجوزهم بسرعة وافضى انا بقى للنت تاني :)

يارب يا سما متجمعين دايما على خير

Mahmoud Bahgat said...

شكرا لهذا اليوم الرائع و بجد يوم لاينسى و عقبال كل لقاء بس يكون حلو كده و ربنا ما يحرمنا من لقائتنا و يجعنا على خير
و السودانى لو كان طلع بدرى شوية كنا خلصناه زى اللب
بس ملحقوة المرة الجاية ابقى سلمينا الفول اول ما تيجى و استلمى الكيس اخر اليوم
تحياتى

L.G. said...

اخيرا زيست
رشيت المدونة عودا حميدا
فيما يخص اليوم احب اسجل ان نسمة استولت على مالك لدرجة اني متصورتش معاه خالص
ثانيا سارة كانت بتغشش امجد في المسابقات
ثالثا ملحقتش اقعد مع حد
رابعا للأمانة يا جماعة محمود كان جايب قصص هدايا بس واضح انه اتحرج يقولي لما استوليت على كيس الكتب كله
خامسا
كان اجمل شاي بلبن شربته وعجل ركبته وكريب دقته واتمنى كل المدونين يسعدوا بلقاءاتهم زي اليوم بتاعنا ده وربنا يجمعنا دايما يارب على ما يحب ويرضى

rack-yourminds said...

ليه بس تفكرووووني بالتصييف !!اصلي السنه ديه كل الظرووووف كانت ضدي ومقدرتش اصيف عشان كده اي حد بيجيب سيرة اجازه وتصييف ببقي متغااااااااظ هههه
_

ربنا يديم الصحبه ويخليكم لبعض

في امان الله

رحــــيـل said...

محمود

كنت ناسيه وبعدين المركب كان وقت مناسب انتوا اللى خفتوا ماتعرفوش تتغدوا :)
لمرة الجايه هفطركم بيه ان شاء الله :)

سماح

محمود اتحرج ليه كانت قصص اطفال زى العب مع طفلك كده :) ما عندي طلعتى الكتاب

ايون نسمه كتر خيرها فعلا فضلت شايله مالك عنى وقت واينو والغرباوي

وبالرغم ان مالحقناش نقعد مع حد بس اعتقد ان احلى حاجة ان المجموعة كلها كانت مع بعضها دى ميزة فى العدد القليل


مصطفى
يا اهلا يا اهلا خلاص انت المرة الجاية ابعتلك دعوه ان شاء الله غالبا هنبقى فى اسكندرية :) وتشتي هناك بقى مش لازم تصيف

الازهرى said...

كل ما أفتكر أزعل
كان نفسى أكون موجود جدا

لكن أعمل إيه ظروف الشغل منها لله