Monday, December 17, 2012

مالك


سلام عليكم
مبدأياً انا اصلا كان المفروض اكتب التدوينة دي يوم 11-12 عشان ده يوم ميلاد مالك :) كل سنة وهو روح قلبي
بس قبل ما أكتب لمالك تدوينته حبيت أعلن موقفي من اللي حاصل

أنا من اللي بيقولوا لاء للدستور
ومن اللى قاطعوا الانتخابات فى المرحلة التانية عشان كان مستحيل ادي لشفيق او للاخوان فكلاهما وجهان لعملة واحده
أنا من هؤلاء الذين لا يمثلهم هذا المدعو برئيس جمهورية لاني اصلا  ماعصرتش على نفسي لمون ونزلت انتخبته
انا من الناس اللى بتتفرج على سي بي سي و اون تي في :) وبكره هؤلاء الحمقي المختليين بتوع قناة الناس
انا من هؤلاء اللي مصدقين ان الاخوان والسلفين همج نزلوا ضربوا المعتصمين وان كل ما يقال عنهم افتراء  وان اى تصريح من اى اخواني او سلفي كذب ونفاق وادعاء وغباء
اه ومن الناس اللى شايفة ان مرسي جماعته ممشايه ع العجين ما يلخبطوش .. بس يلخبط فى مصير البلد عادي المهم الجماااااااااااعة - الله يحرقهم -
ايون انا من الناس اللي بتدعي ليل نهار على الاخوان والسلفين عشان مش شايفين غير مصلحتهم وبس
عشان كمية الغل اللي جواهم هتحرق البلد
  نسيت اقول حاجة مهمة ان الحمد لله مسلمة لكني  لا أرضى ان يمثل هؤلاء الاسلام
فكما قال د / طارق السويدان
 لا أفهم لماذا يعتبر بعض الإسلاميين المعارضة لاجتهادتهم السياسية معارضة للإسلام نفسه وليتذكروا أنهم بشر فالإسلاميون ليسوا الإسلام"
طبعا اللي حاصل دلوقتي انهم بيكفروا اي حد يقف ضدهم وبيحولوا اي صراع سياسي لحلال وحرام وجنة ونار لعنة الله عليهم
=================
فاصل  :)
ايون ماهو مش معقول يعني انقل من الهم اللي فات لسيرة كوكو العطرة على طول كده لازم فاصل
و من هنا احب اسمعكم معانا أغنيتنا المفضلة انا ومالك


مالك كمل سنة .. عدت بسرعة جدا يمكن أول سنة بتكون صعبة كانت صعبة فعلا  بس هو كان ولد طيب ماكنش  بيعيط كتير لحد ست شهور بدأ يكتشف اوبشن البكا ومن ساعتها :)
لاء بس انا اصلا نادرا لما بوصله للمرحلة دي مش بقدر اسمعه بيعيط امجد شايف اني بدلعه
اصلا مالك طول الوقت بيدلع لانه اول حفيد في العيلتين فحبيب الكل وبعدين ماله لما يدلع وهو قمر صغير كده
فاكرة اول كل حاجة كانت جديدة بيكون ليها فرحتها أول صوت اول حركة اول كلمه نترجمها اول سنة اول خطوة اول بابا واول ماما
يمكن ماكنتش مشغولة قبل كده بفكرة انى اكون ماما بس مالك بيخليني فرحانة بجد
يوم عيد ميلاده كان يوم جميل صحيح كان عنده فوبيا من البلونات وكان بيهرب منها ومن اى حد ماسكها وكان مش فاهم الناس دي طفت النور ليه وايه اللى ماسكينه فى ايديهم منور ده الناس دي اتهبلت ولا ايه بيغنوا بصوت عالي وعاملين دوشة ليه ؟
البيت بالنسباله كان زي بيت الرعب كده :)
بس الحمد لله بعدها بكام يوم وبعد محاولات مختلفة قدرنا نقنع مالك ان البلونات مش كائنات فضائية ولا حاجة وقدر انه يلعب بيها و يفرقعها كمان من غير ما يخاف منها تاني :)
نفسي ربنا يقدرني واقدر اكون ماما كويسة لمالك وقد المسؤلية واني ما اتسببش ليه في اى حاجة تضايقه واكون صاحبته ويحكيلي على كل حاجة ويارب كل سنة تبقى احلى من اللى قبلها طول الوقت 

5 comments:

rack-yourminds said...

اولا:انا هقول لمالك كل سنه وانت بالف خير والف سلامه وربنا يخليك ويحفظك لوالديك امين يا رب
__

ثانيا:اختي رحيل اكيد انتي عارفه اني بختلف معكي في كل ما طرحتيه من الأف الي الياء لكن لا اريد ان ادخل معكي في جدال قد يطول وبرده عشان العسول مالك لما يكبر ان شاء الله يلاقي مامته عامله خناااااااااقه في ذكري عيد ميلاده! وخصوصا بقي لما يلاقي كل اللي ذكرته مامته كان مبني علي معلومات وتنظيرات وتحاليل اعلامي قنوات الفلووووووووووووول المنتفعين من نظام مبارك ههههه
__

سؤال اخير وبرجوا من مالك يسامحني, ما هي المواد التي دعنك الي رفض الدستور!!!

في امان الله

rack-yourminds said...

اختي رحيل,اعلم ان القصف اليومي للإعلام قد تسبب في تشويه الإدراك وتكوين صوره نمطيه ظالمه للتيار الاسلامي ,ادري انك قد لا تقتنعين بكلامي وهذه هو الأرجح ,ولكن لي طلب عند حضرتك اريدك ان تستمعي الي وجهة النظر الأخري حتي ولو سمعتيها علي مضض

وقد اخترت لحضرتك ثلاثة شخصيات من اشرف واعلم الرجال المهندس ابو العلاء ماضي والدكتور محمد محسوب والمحامي الرااائع عصام سلطان وهم ليسوا من الإخوان ولا من السلفييين ولكنهم من حزب الوسط ولهم مواقفهم المختلفه مع الإخوان المسلمين, وارجوا من حضرتك ان تستمعي لهم من باب سماع الراي الاخر ولعلم حضرتك المنابر التي تحدثوا منها ليست قناة الناس ولا قناة مصر 25 ولكن كانت حواراتهم عبر الجزيره .اعلم ان تلك الحوارات طويله وتستغرق وقتا قد يقارب ثلاثة ساعات ولكن من اجل البحث عن البحث عن الحقيقه افتي المخلصين عمرهم من اجل الوصول اليها

http://www.youtube.com/watch?v=lNlO1y3Vdd0
http://www.youtube.com/watch?v=ZFAmNj-fO5M

http://www.youtube.com/watch?v=K86gxJ2U6sY

__

اتمني من حضرتك تستمعي الي تلك الحورات

سلميلي علي مالك ضروري .حفظكم الله







رحــــيـل said...

وانت طيب يا مصطفى وبخير دايما
عقبال يارب لما تفرح بولادك كده ونسمع عنك كل خير

وان شاء الله مالك لما يكبر مش هيلاقي خناقة ولا حاجة عشان حقيقى انت من المدونين اللى انا بحترمهم جدا

شوف بغض النظر عن اعلام الفلول زي ما انت بتصفه انا اصلا موقفي من الاخوان مش من امبارح يعني ولا من سنه انا رأى فيهم سئ من زمان من حتي قبل الثورة طول الوقت اصلا رأى فيهم سئ بالاضافة طبعا لمواقفهم المتناقضة طول الوقت بعد الثورة
انا لا اثق فيهم ولا في نواياهم اطلاقا لا كرجال دين ولا كرجال سياسة
ومنه لا اثق فيما يطرحونه ويدعمونه
يعنى ببساطة مش بصدفهم ولا بيدخلوا قلبي كده لو سمعت حد منهم بيتكلم مش بحس كلاموا حقيقي

اما بالنسبة لحزب الوسط فأنا كنت من اعضاءه لوقت قريب يعني عارفه الاسماء اللى طرحتها وبتفرج برضه ع الجزيرة مباشر :) مش يعاملها معامله قناة الناس طبعا
الجزيرة فريقها محترم وناس متحضرة بالرغم من ميلها للاخوان الا انهم بيطرحوا ده بشكل مهذب

اما بالنسبة لقنوات الفلول كما وصفتهم برضه بيستضيفوا اخوان عادي وبيفتحولهم مساحات للكلام
القصد يعني ان الاكيد مش هما السبب فى رأى عن اللى بيحصل وان كان هواهم يصادف هوايا
:)
وفي كل الاحوال ربنا يصلح امور البلد :)

وشكرا لتعليقك

nabil sami said...

أرجو أن تعيدي المحاوله
أقسم بالله لولا الأخوان ما كانت هناك ثوره ولا ديمقراطيه

L.G. said...

ايه البوست العجب ده :)
فيما يخص انك ثورية .. ثورية يعني انا مش عاجبني الاخوان بس مبدعيش عليهم بدعي للبلد
والفاصل ده اغنية ايه كوكوواوا
وبعدين تبوظي بوست عيد ميلاد مالك بالاخوان يا شيخة حرام عليك
كل سنة وهو سعيد وربنا يمتعه بحبكم وحنانكم يارب ونسيتي تذكري ان تليفونك رن باسمي يوم عيد ميلاده :)))))) وده حدث مهم وانا متأكدة انك انت وأمجد ان شاء الله لن تدخروا وسعا قدر استطاعتكم في تربية مالك احسن تربية ربنا يخليكم لبعض يارب